Jubilees Chapter 5 - መጽሐፈ ኩፋሌ | EOTC Bible

¹በዚያችም ቀን አዳም ከኤዶም ገነት ሲወጣ ለበጎ መዓዛ ነጭ ዕጣን፥ ቀንዓትና ልባንጃ፥ ስንቡልም ኀፍረቱን በሸፈነበት ቀን በጥዋት ፀሓይ ሲወጣ ዐጠነ። ²በዚያችም ቀን የአራዊትና የእንስሳት ሁሉ፥ የሚመላለሰውና የሚንቀሳቀሰው፥ የወፎችም ሁሉ አፍ ከመናገር ተከለከለ። ከዚያ አስቀድሞ አንዱ ከአንዱ ጋር በአንድ አነጋገርና በአንድ ቋንቋ ይናገሩ ነበርና። ³በኤዶም ገነት የነበረውንም ሥጋዊ ሁሉ ከኤዶም ገነት አሰናበተ። ⁴ሥጋ ለባሹ ሁሉም በየወገናቸውና በየተፈጥሮአቸው ወደ ተፈጠረላቸው ቦታ ተበተኑ። ⁵ለአዳም ብቻ ከአራዊትና ከእንስሳት ሁሉ ተለይቶ፥ ኀፍረቱን ይሸፍን ዘንድ ልብስን ሰጠው። ስለዚህ የሕግን ፍርድ በሚያውቁ ሰዎች ሁሉ ላይ ኀፍረታቸውን እንዲሰውሩ እንጂ፥ አሕዛብም እንደሚገለጡ እንዳይገለጡ በሰማይ ጽላት ታዘዘ። ⁶በአራተኛው ወር መባቻ አዳምና ሚስቱ ከኤዶም ገነት ወጥተው በተፈጠሩባት ምድር በኤልዳ ምድር ኖሩ። አዳምም የሚስቱን ስም ሔዋን አላት፤ እስከ መጀመሪያው ኢዮቤልዩም ድረስ ልጅ አልነበራቸውም። ⁷ከዚህም በኋላ በግብር ዐወቃት፤ እርሱ ግን በኤዶም ገነት እንደ ተማረ ምድርን ያርሳት ነበር። ⁸በሦስተኛው ሱባዔ በሁለተኛው ኢዮቤልዩ ቃየንን ወለደች፤ በአራተኛውም ሱባዔ አቤልን ወለደችው፤ በአምስተኛውም ሱባዔ ልጅዋን አዋንን ወለደቻት። ⁹እግዚአብሔር ከአቤል እጅ መሥዋዕትን ተቀብሎአልና፥ ከቃየን እጅ ግን መሥዋትን አልተቀበለምና በሦስተኛው ኢዮቤልዩ መጀመሪያ ቃየን አቤልን ገደለው፤ በምድረ በዳም ገደለው፤ ስለ ተገደለም እየተካሰሰ ደሙ ከምድር እስከ ሰማይ ጮኸ። ¹⁰እግዚአብሔርም ስለ ገደለው ስለ አቤል ቃየንን ዘለፈው፤ ስለ ወንድሙ ስለ አቤል ደም በምድር ላይ ተቅበዝባዥ አደረገው፥ በምድርም ረገመው። ¹¹ስለዚህ ወንድሙን በተንኰል የሚገድል ሰው የተረገመ እንደ ሆነ በሰማይ ጽላት ተጻፈ። ያዩም ሁሉ ይሁን አሉ። አይቶም ያልተናገረ ሰው እንደ እርሱ የተረገመ ይሁን። ¹²ስለዚህም እኛ በሰማይና በምድር፥ በብርሃንና በጨለማ በሁሉም የሚደረገውን ኀጢአት ሁሉ በአምላካችን በእግዚአብሔር ፊት እንናገር ዘንድ መጣን አሉ፤ አዳምና ሚስቱም ስለ አቤል አራት የዘመን ሱባዔ እያለቀሱ ኖሩ። ¹³አዳምም በአምስተኛው ሱባዔ በአራተኛው ዓመት ደስ አለው። ዳግመኛ ሚስቱን በግብር ዐወቃት፤ ወንድ ልጅም ወለደችለት። “ቃየን ስለ ገደለው ስለ አቤልም እግዚአብሔር በምድር ሌላ ዘር አስነሥቶልናል” ብሎአልና ስሙን ሴት አለው። ¹⁴በስድስተኛው ሱባዔ ልጁን አዙራን ወለዳት፥ ቃየንም እኅቱ አዋንን ሚስት ትሆነው ዘንድ አገባት፤ በአራተኛውም ኢዮቤልዩ መጨረሻ ኤኖሕን ወለደችለት። ¹⁵በአምስተኛው ኢዮቤልዩ በመጀመሪያው ሱባዔ በአንደኛው ዓመት በምድር ቤቶች ተሠሩ። ቃየንም ከተማ ሠራ፤ ስምዋንም በልጁ በኤኖሕ ስም ጠራት። ¹⁶አዳምም ሚስቱ ሔዋንን በግብር ዐወቃት። ዳግመኛም ዘጠኝ ልጆችን ወለደችለት። ¹⁷ሴትም በአምስተኛው ኢዮቤልዩ በአምስተኛው ሱባዔ እኅቱን አዙራን ሚስት አድርጎ አገባት። ¹⁸በአራተኛውም ዓመት ሄኖስን ወለደችለት። እርሱም በምድር ላይ የእግዚአብሔርን ስም መጥራት የጀመረ ነው። ¹⁹በሰባተኛው ኢዮቤልዩ በሦስተኛው ሱባዔ ሄኖስ ሚስት ትሆነው ዘንድ እኅቱ ኖአምን አገባ፤ በአምስተኛውም ሱባዔ በሦስተኛው ዓመት ወንድ ልጅ ወለደችለት፤ ስሙንም ቃይናን አለው። ²⁰በስምንተኛው ኢዮቤልዩ መጨረሻ ቃይናን እኅቱን ሙአሊሊትን ሚስት አድርጎ አገባት፤ በዘጠነኛው ኢዮቤልዩ በመጀመሪያው ሱባዔ በዚህም ሱባዔ በሦስተኛው ዓመት ወንድ ልጅን ወለደችለት፤ ስሙንም መላልኤል አለው። ²¹በዐሥረኛው ኢዮቤልዩ በሁለተኛው ሱባዔ መላልኤል ሚስት ትሆነው ዘንድ የአባቱን ወንድም የበራኪሄልን ልጅ ዲናን አገባ። በሦስተኛውም ሱባዔ በስድስተኛው ዓመት ወንድ ልጅን ወለደችለት፥ ስሙንም ያሮድ አለው። በዘመኑ ትጉሃን የተባሉ የእግዚአብሔር መላእክት በምድር የሰው ልጆችን ያስተምሩ ዘንድ፥ በምድርም ፍርድንና ቅንነትን ያደርጉ ዘንድ ወደ ምድር ወርደዋልና። ²²ያሮድም በዐሥራ አንደኛው ኢዮቤልዩ ሚስት አገባ፤ ስምዋም ባረካ ይባላል፤ ይህችውም የአባቱ ²³ሰዎች በየወራቸው እንደ ሥርዐታቸው የዘመናትን ጊዜ ያውቁ ዘንድ እንደ ወራቸው ሥርዐት የሰማይን ምልክት በመጽሐፍ ጻፈ። ²⁴እርሱም አስቀድሞ ምስክርን ጻፈ። ለሰው ልጆችም በየወገናቸው አሰማባቸው፤ እርሱም በሱባዔ የሚቈጠሩ ቍጥሮችን ተናገረ፤ የዘመኖችንም ቀኖች እርሱ ተናገረ፤ ወሮችንም ሠራ፤ እኛም እንደ ነገርነው ዘመኖችን የሚቈጥሩባቸው ሱባዔዎችን ተናገረ። የተደረገውንና ገና የሚደረገውንም ቍርጥ ፍርድ እስከሚደረግበት ቀን ድረስ በዘመናቸው በሰው ልጆች ላይ የሆነውንና የሚሆነውን ሌሊት በራእይ አየ፤ ዐወቀም። ²⁵ለምስክርነትም ጻፈው። በሰው ልጆችም ሁሉ ላይ በየትውልዳቸው በምድር ምስክር ሊሆን አኖረው። ²⁶በዐሥራ ሁለተኛውም ኢዮቤልዩ በሰባተኛው ሱባዔ ሚስት አገባ። ስምዋም አድኒ ይባላል፥ ይህችውም የዳንኤል ልጅ የአባቱ እኅት ልጅ ናት፤ ለእርሱም ሚስት ልትሆነው አገባት። ²⁷በዚህም ሱባዔ በስድስተኛው ዓመት ወንድ ልጅን ወለደችለት። ስሙንም ማቱሳላ ብሎ ጠራው። ²⁸ከዚህም በኋላ ከአምላክ መላእክት ጋር ስድስት የኢዮቤላት ዘመኖችን ኖረ። በምድርም ያለውን ሁሉ፥ በሰማይም ያለውን የፀሓይን ሥልጣን አሳዩት። ²⁹ሁሉንም ጻፈ። ከሰው ልጆች ጋር በኀጢአት አንድ ሆነው በደል በሠሩት በትጉሃንም አዳኘባቸው። እነዚህ ከሰው ልጆች ጋር ይረክሱ ዘንድ፥ በግብርም አንድ ይሆኑ ዘንድ ጀምረዋልና፤ ሄኖክም በሁሉ ላይ አዳኘባቸው። ³⁰ከሰው ልጆችም መካከል ተወሰደ። ለጌትነትና ለክብርም ወደ ኤዶም ገነት ወሰድነው፤ እነሆ፥ እርሱ በዚያ የዘለዓለም ቅጣትንና ቍርጥ ፍርድን፥ የአዳምንም ልጆች ኀጢአት ሁሉ ይጽፋል። ³¹ለሰው ሁሉ ልጅ ያሰማ ዘንድ፥ ቍርጥ ፍርድም እስከሚደረግባት ቀን ድረስ የሰውን ሁሉ ሥራ ይናገር ዘንድ እርሱ ለምልክት ተሰጥቶአልና ስለ እርሱ በኤዶም ምድር ላይ ሁሉ የጥፋት ውኃን አመጣ። ³²እርሱም እግዚአብሔር የሚቀበለውን ዕጣን በሠርክ አስቀድሞ ዕጣን በሚቃጠልበት በተቀደሰው ተራራ ላይ ዐጠነ፤ ለእግዚአብሔር በምድር አራት ቦታዎች አሉትና፥ እነዚህም የኤዶም ገነትና ደብረ ዘይት፥ ይህም ዛሬ አንተ በውስጡ ያለህበት ደብረ ሲናና ምድርን ለማንጻት በሚደረግ በአዲስ ፍጥረት የሚነጻ ደብረጽዮን ናቸው። ³³ስለዚህም ምድር ከበደልና ከርኵሰት ሁሉ ለልጅ ልጅ ዘመን ትነጻለች። ³⁴በዐሥራ አራተኛው ኢዮቤልዩ ማቱሳላ ሚስቱን አድናን አገባ፤ ይህችውም የአባቱ እኅት ልጅ የአዝራኤል ልጅ ናት። ³⁵በስድስተኛው ሱባዔ በአንደኛው ዘመን ልጅን ወለደ። ስሙንም ላሜህ አለው። ³⁶በዐሥራ አምስተኛው ኢዮቤልዩ በሦስተኛው ሱባዔ ላሜህ ሚስት አገባ፤ ስምዋም ቤቴናስ ይባላል፥ ይህችውም የአባቱ የእኅት ልጅ የበራኪኤም ልጅ ናት፤ ሚስት ትሆነው ዘንድም አገባት።

መጽሐፈ ኩፋሌ 5