Jubilees Chapter 32 - መጽሐፈ ኩፋሌ | EOTC Bible

¹ያዕቆብ ከልጆቹ ጋር ከግብፅ ምድር በምትሻለው በጌሴም ምድር ኖረ። ያዕቆብም ወደ ግብፅ በገባ ጊዜ የመቶ ሠላሳ ዓመት ሰው ነበረ። ²ዮሴፍም ለአባቱና ለወንድሞቹ ለቤተሰቦቻቸውም ለሰባቱ የራብ ዓመት የሚበቃ ምግብን ሰጣቸው። ከራቡ ጽናት የተነሣም የግብፅ ምድር ተጨነቀች። ³ዮሴፍም መላዋን የግብፅ ምድርን በእህል ምክንያት ለፈርዖን እጅ አደረጋት። ሰውንና ከብቱን፥ ሁሉንም ለፈርዖን ገንዘብ አደረገ። የራቡም ዘመን ተፈጸመ። ⁴ዮሴፍ በስምንተኛው ዓመት ዘር ይዘሩ ዘንድ በግብፅ ላሉ ሰዎች ዘርንና ምግብን ሰጠ። ፈሳሹ በግብፅ ሀገር ሁሉ መልቶአልና፥ በሰባቱ የራብ ዐመታት በወንዝ አጠገብ ካሉ ከጥቂቶች ቦታዎች በቀር አያጠጣም ነበርና። ⁵ዛሬ ግን ወንዙ መልቶአል፤ የግብፅ ሰዎችም ምድሩን ዘሩ፤ ምድርም በዚያ ዓመት ብዙ ስንዴን አፈራች። ያም ዓመት የአርባ አምስተኛው ኢዮቤልዩ የአራተኛው ሱባዔ መጀመሪያ ነው። ⁶ዮሴፍም ከዘሩት እህል አምስተኛውን እጅ ወስዶ ለንጉሥ አገባ። አራቱንም እጅ ለዘርና ለምግብ ሊሆናቸው ተወላቸው። ዮሴፍም እስከዚህ ቀን ድረስ ለግብፅ ሀገር ሰዎች ይህን ሥርዐት አደረገላቸው። ⁷ያዕቆብም በግብፅ ሀገር ዐሥራ ሰባት ዓመት ኖረ። የኖረባቸውም ዓመታት ሁሉ ሦስት ኢዮቤልዩ ሆኑ፥ ሦስት ኢዮቤልዩም መቶ አርባ ሰባት ዓመት ነው። በአርባ አምስተኛው ኢዮቤልዩ በአምስተኛው ሱባዔ በአራተኛው ዓመት ሞተ። ⁸ያዕቆብም ሳይሞት ልጆቹን መረቃቸው። በግብፅ ሀገር የሚያገኛቸውን ሁሉ፥ በኋለኛውም ዘመን በእነርሱ ላይ የሚመጣባቸውን ሁሉ ነገራቸው፤ መረቃቸውም። ⁹ለዮሴፍም በምድር ላይ ሁለት ዕጣ ሰጠው። እንደ አባቶቹም አንቀላፋ። በከነዓንም ሀገር ደርብነት ባላት ዋሻ በአባቱ በአብርሃም አጠገብ ተቀበረ። ይኸውም በከነዓን ሀገር ደርብነት ባላት ዋሻ ለራሱ በቈፈራት መቃብር ነው። የእርሱን መጽሐፎችና የአባቶቹን መጽሐፎች ሁሉ እስከዚህ ቀን ድረስ ለልጆቹ ይጠብቃቸውና ያድሳቸው ዘንድ ለልጁ ለሌዊ ሰጠው። ¹⁰ያዕቆብም ከሞተ በኋላ እንዲህ ሆነ፤ የእስራኤል ልጆች በግብፅ ሀገር በዙ፤ ብዙ ወገንም ሆኑ። ወንድም ወንድሙን ይወድ ዘንድ፥ ባልንጀራም ከባልንጀራው ጋር ይረዳዳ ዘንድ ሁሉም በልቡናቸው የተካከሉ ሆኑ። ¹¹ዮሴፍም በኖረበት ዘመን ሁሉ በዐሥሩ የሱባዔ ዓመታት እጅግ በጣም በዙ። ዮሴፍም በኖረበት ዘመን ሁሉ የእስራኤልን ልጆች የግብፅ ሰዎች ሁሉ ያከብሩአቸው ነበረና አባቱ ያዕቆብ ከሞተ በኋላ ዮሴፍ በኖረበት በሕይወቱ ዘመን ሁሉ ባላጋራ አልነበረም፤ ምንም ክፉ አልነበረም። ¹²ዮሴፍም የመቶ ዐሥር ዓመት ሰው ሲሆን ሞተ፤ በከነዓን ምድር ዐሥራ ሰባት ዓመት ኖረ፥ ዐሥር ዓመት ሲያገለግል ኖረ፥ ሦስት ዓመት በግዞት ቤት ኖረ፤ ሰማንያ ዓመት ከንጉሥ በታች ሆኖ የግብፅን ሀገር ሁሉ እየገዛ ኖረ። ሞተም፤ ወንድሞቹም ሁሉ ሞቱ። ያችም ትውልድ ሁላ ሞተች። ¹³ከግብፅም በሚወጡበት ወራት ዓፅሙን ይወስዱ ዘንድ ሳይሞት የእስራኤልን ልጆች አዘዛቸው። የግብፅ ሰዎች ዕለቱን አውጥተው ዳግመኛ በከነዓን ሀገር እንደማይቀብሩት ዐውቆአልና ስለ ዓፅሙ አማላቸው። የከነዓን ንጉሥ መምከሮን አሱር በሚባል ሀገር ሲኖር ከግብፅ ንጉሥ ጋር በቆላ ተዋግቶአልና፥ በዚያም ገድሎታልና። ¹⁴እስከ ኤርሞንም በር ድረስ ግብፃውያንን አሳደደ፤ በግብፅም ሁለተኛ ሌላ ንጉሥ ነግሦአልና መግባት ተሳነው፤ ከእርሱም ይልቅ በርትቶአልና ወደ ከነዓን ሀገር ተመለሰ፤ የግብፅ በሮችም ተዘጉ፤ ወደ ግብፅም የሚወጣና የሚገባ አልነበረም። ¹⁵ዮሴፍም በአርባ ሰባት ኢዮቤልዩ በሦስተኛው ሱባዔ በሁለተኛው ዓመት ሞተ። በግብፅም ሀገር ቀበሩት፤ ከእርሱም በኋላ ወንድሞቹ ሁሉ ሞቱ። ¹⁶በአርባ ሰባተኛው ኢዮቤልዩ በሁለተኛው ሱባዔ በሁለተኛው ዓመት የግብፅ ንጉሥ ከከነዓን ንጉሥ ጋር ይዋጋ ዘንድ ወጣ። ¹⁷የእስራኤልም ልጆች ከዮሴፍ ዓፅም በቀር የያዕቆብን ልጆች ዓፅሞች ሁሉ በምድረ በዳ በተራራ ላይ ባለች ደርብነት ባላት ዋሻ ቀበሩ። ¹⁸ብዙ ሰዎችም ወደ ግብፅ ተመለሱ፤ ከእነርሱም ጥቂት ሰዎች በኬብሮን ቀሩ፤ አባትህ አብራንም ከእነርሱ ጋር ቀረ። ¹⁹የከነዓን ንጉሥ የግብፅን ንጉሥ ድል ነሣው። ²⁰የግብፅንም ሰዎች እንዲህ አላቸው፥ “የእስራኤል ልጆች ከእኛ እነሆ፥ ፈጽመው በዙ፤ ሳይበዙም እንጠበብባቸው፤ ጦርነትም ሳይመጣብን፥ እነርሱም ሳይወጉን በአገዛዝ መከራ እናጽናባቸው፤ ይህ ካልሆነ ግን እነርሱ ከጠላቶቻችን ጋር አንድ ሆነው ይወጉናል፤ ልቡናቸውና ፊታቸውም ወደ ከነዓን ነውና ከምድራችን ይወጣሉ።” ²¹በሥራም መከራ ያጸኑባቸው ዘንድ፥ የሠራተኛ አለቆችን ሾመባቸው፤ አዘዙአቸውም። ለፈርዖንም ፊጦምና ራሚስ የሚባሉ ጽኑ አንባዎችን ሠሩ። በግብፅም ሀገር ቅጥሩንና የፈረሰውን ግንብ ሁሉ ሠሩ። በግፍም ይገዙአቸው ነበር። ነገር ግን ክፉ ነገር የሚያደርጉባቸውን ያህል እንደዚሁ ፈጽመው ይበዙ ነበር። የግብፅም ሰዎች የእስራኤልን ልጆች ይጸየፉአቸው ነበር። ²²በአርባ ሰባተኛው ኢዮቤልዩ በሰባተኛው ሱባዔ በሰባተኛው ዓመት አባትህ ከከነዓን መጣ፤ በአርባ ስምንተኛው ኢዮቤልዩ በአራተኛው ሱባዔ በስድስተኛው ዓመት ተወለድህ፤ ይኸውም በእስራኤል ልጆች ላይ መከራ የጸናበት ዘመን ነው። ²³የግብፅ ንጉሥ ፈርዖንም የተወለደውን ወንድ ልጃቸውን ሁሉ ወደ ባሕር ይጥሉ ዘንድ በእነርሱ ላይ ትእዛዝን አዘዘ። ²⁴አንተም እስክትወለድ ድረስ ሰባት ወር ልጆቻቸውን ሲጥሉ ኖሩ። እናትህም ሦስት ወር ሸሸገችህ። ለእርስዋም ነገሩአት። ሣጥንም አሠራችልህ፥ በሙጫና አደሮ ማርም ለበጠችው፥ በወንዙም ዳር በፊላ ሣር ውስጥ አኖረችው። በውስጡም ሰባት ቀን አኖረችህ፥ እናትህም በሌሊት እየመጣች ታጠባህ ነበር፥ እኅትህ ማርያምም በቀን ከአሞራዎች ትጠብቅህ ነበር።

መጽሐፈ ኩፋሌ 32