Jubilees Chapter 31 - መጽሐፈ ኩፋሌ | EOTC Bible

¹ይቀር ዘንድ፥ ወይም ይወርድ ዘንድ ራእይ ያይ እንደ ሆነ በዚያ ሰባት ቀን ተቀመጠ። ከከረመውም ስንዴ የመጀመሪያውን ፍሬ በዓል አደረገ። ²በአውሬዎችና በከብቶች፥ በወፎችና በሰዎች ሁሉ ድርቅ ስለ ሆነ ከከነዓን ሀገር ሁሉ በምድር የሚዘሩት ምንም እፍኝ ሙሉ ዘር አልነበረምና። ³በዐሥራ ስድስተኛውም ቀን እግዚአብሔር ተገለጠለት፥ “ያዕቆብ፥ ያዕቆብ” ብሎ ጠራው። ያዕቆብም፥ “እነሆ፥ አለሁ” አለ። እርሱም አለው፥ “የአባቶችህ የአብርሃምና የይስሐቅ አምላክ እኔ ነኝ። በዚያ ብዙ ወገን አደርግሃለሁና ወደ ግብፅ መውረድን አትፍራ፤ እኔ ከአንተ ጋር እወርዳለሁ። እኔም እወስድሃለሁ፥ በዚያችም ምድር ትቀበራለህ። ⁴ዮሴፍም እጁን በዐይኖችህ ላይ ያኖራል፤ አትፍራ፤ ወደ ግብፅም ውረድ።” ⁵ያዕቆብም ተነሣ፤ ልጆቹና የልጅ ልጆቹም ተነሡ፤ አባታቸውንና ጓዛቸውንም በሰረገላ ጫኑ። ⁶በዚህ በሦስተኛው ወር በዐሥራ ስድስተኛው ቀን ያዕቆብ ከዐዘቅተ መሐላ ተነሥቶ ወደ ግብፅ ሄደ። ⁷ያዕቆብም ከእርሱ አስቀድሞ የጌሼምን ምድር ይጐበኝ ዘንድ ልጁን ይሁዳን ወደ ልጁ ዮሴፍላከ። ለእርሱ አቅራቢያ ይሆኑ ዘንድ፥ በዚያ ሊኖሩ እንዲመጡ ዮሴፍ ነግሮአቸዋልና። ⁸ይህችውም በግብፅ ምድር መልካም ነበረች። ለእርሱም ቅርብ ነበረች፥ ለእስራኤልና ለከብቶቻቸውም የተመቸች ነበረች። ⁹ከአባታቸው ከያዕቆብ ጋር ወደ ግብፅ የወረዱ የያዕቆብ ልጆች ስማቸው ይህ ነው። የያዕቆብ የበኵር ልጅ ሮቤል ነው። የልጆቹም ስማቸው ኤኖክ፥ ፋሉስ፥ ኤስሮም፥ ከርሚ፥ ከእርሱ ጋር እነዚህ አምስቱ ናቸው። ¹⁰ስምዖንና ልጆቹ፥ የልጆቹም ስማቸው ይህ ነው። ኢሙኤል፥ ኢያሚን፥ አዕዎት፥ ኢያኪም፥ ሳዖር፥ የስፍንስዋቅ ልጅ ሳውል፥ ከእርሱ ጋር እነዚህ ሰባቱ ናቸው። ¹¹ሌዊና ልጆቹ፥ የልጆቹም ስም ይህ ነው። ጌድሶር፥ ቀዓት፥ ሜራሪ፥ እኒህ አራቱ ናቸው። ¹²ይሁዳና ልጆቹ፥ የልጆቹም ስም ሴሎም፥ ፋሬስ፥ ዛራ፥ እሊህ አራቱ ናቸው። ¹³ይሳኮርና ልጆቹ፥ የልጆቹም ስም ይህ ነው። ቶላ፥ ፉኣ፥ ኢያስብ፥ ሳምሮን፥ እኒህ አምስቱ ናቸው። ¹⁴ዛብሎንና ልጆቹ፥ የልጆቹም ስም ይህ ነው። ሳኦር፥ ¹⁵የያዕቆብ ልጆች፥ ልጆቻቸውም እነዚህ ናቸው፤ በመስጴጦምያ ልያ ለያዕቆብ የወለደችለት ስድስት ናቸው። አንዲቱ እኅታቸው ዲና ናት። ከልያ የተወለዱ ልጆች ሁሉ ከአባታቸው ከያዕቆብ ጋር ወደ ግብፅ የወረዱ ልጆቻቸውም ሃያ ዘጠኝ ናቸው። አባታቸው ያዕቆብም ከእነርሱ ጋር ተቈጥሮ ሠላሳ ሆኑ። ¹⁶የያዕቆብ ሚስት የልያ አገልጋይ ዘለፋ ለያዕቆብ የወለደችለት ልጆች ጋድና አሴር ናቸው። ከእነርሱ ጋር ወደ ግብፅ የወረዱት የልጆቻቸውም ስም ይህ ነው። ¹⁷የጋድ ልጆች ሳፍዮን፥ አሐዲ፥ ¹⁸የአሴርም ልጆች፥ ኢያምና፥ ይሱአ፥ በርያ አንዲት እኅታቸውም ሣራ ናቸው። እነዚህ አምስቱ ናቸው። ¹⁹የዘለፋም ልጆች ዐሥራ አራት ናቸው። የልያም ሁሉ አርባ አራት ሆኑ። ²⁰የያዕቆብ ሚስት የራሔል ልጆች ዮሴፍና ብንያም ናቸው። አባቱ ወደ ግብፅ ሳይወርድ ለዮሴፍ በግብፅ ልጆች ተወለዱለት። የኤልዮጶሊስ ካህን የሚሆን የፋጢፋራ ልጅ አስኔት የወለደችለት ምናሴና ኤፍሬም ናቸው።፥ እነዚህ ሦስቱ ናቸው። ²¹የብንያምም ልጆች ላውባኤል፥ አስቤል፥ ጎአው፥ ንዕማን፥ አብሮድዮ፥ ራኤፍስ፥ ያኒማ፥ አፊም፥ የአም፥ ጋዐም፥ ²²ዳንና ንፍታሌምን የወለደችለት የያዕቆብ ሚስት የራሔል አገልጋይ የባላ ልጆች እነዚህ ናቸው። ከእነርሱ ጋር ወደ ግብፅ የወረዱት የልጆቻቸውም ስም ይህ ነው። ²³የዳን ልጆች ኩሲም፥ ሰሞን፥ አሱድ፥ ኢያሳክ፥ ሰሎሞን ናቸው፥ እኒህ ስድስቱ ናቸው። በገቡበት ዓመት በግብፅ ሞቱ። ለዳንም ኩሲም ብቻ ተረፈለት። ²⁴የንፍታሌምም ልጆች ስማቸው ይህ ነው። ኢያስኤል፥ ገሀን፥ አስዓር፥ ያኩም፥ አው ናቸው፤ ከረሃቡ ዘመን በኋላ የተወለደ አው በግብፅ ሞተ። የራሔል ሰዎች ሁሉ ሃያ ሰባት ሆኑ፥ ወደ ግብፅ የወረዱ የያዕቆብ ልጆች ሁሉ ሰባ ሰዎች ናቸው። ²⁵እንግዲህ እነዚህ ልጆቹና የልጅ ልጆቹ ሁሉ ሰባ ናቸው። ሚስትም ሳያገቡ በግብፅ የሞቱት አምስት ናቸው፤ ልጅም አልነበራቸውም። ²⁶የይሁዳ ሁለቱ ልጆቹ ኤርና አውናን በከነዓን ሀገር ሞቱበት፥ ልጅም አልነበራቸውም፤ የሞቱትንም የእስራኤል ልጆች ቀበሩአቸው። እነዚህም ወገኖች ከሰባው ሰዎች ጋር ተቈጠሩ። ²⁷ያዕቆብም በአርባ አምስተኛው ኢዮቤልዩ በሦስተኛው ሱባዔ በሁለተኛው ዓመት በአራተኛው ወር መባቻ ወደ ግብፅ ወደ ጌሴም ምድር ገባ። ²⁸ዮሴፍም አባቱን ያዕቆብን ይቀበል ዘንድ ወደ ጌሴም ምድር መጣ። የአባቱንም አንገት አቅፎ አለቀሰ። ያዕቆብም ዮሴፍን፥ “አይችሃለሁና እንግዲህ ወዲህ ልሙት” አለው። ²⁹“አሁንም ከአገልጋዩ ከያዕቆብ ምሕረቱንና ይቅርታውን ያላራቀ የእስራኤል አምላክ የአብርሃም አምላክ፥ የይስሐቅም አምላክ ይመስገን፤ በቤቴል ያየሁት ራእይ እውነተኛ ሕልም ነውና እኔ በሕይወት ፊትህን ማየቴ ለእኔ ታላቅ ነው፤ አምላኬ እግዚአብሔር ለዘለዓለሙ ይመስገን፤ ስሙም የተመሰገነ ነው” አለ። ³⁰ዮሴፍና ወንድሞቹ በአባታቸው ፊት እንጀራን በሉ፤ ወይንንም ጠጡ፤ ያዕቆብም ዮሴፍን ከወንድሞቹ ጋር በፊቱ ሲበላና ሲጠጣ አይቶታልና ፈጽሞ ደስ አለው። እርሱን የጠበቀውን፥ ዐሥራ ሁለቱን ልጆቹንም የጠበቀለትን፥ የሁሉን ፈጣሪ አመሰገነው። ³¹ዮሴፍም በጌሴም ምድርና በራምሴ በፈርዖን ፊት እነርሱ በሚገዙት በአውራጃዋም ሁሉ ይኖሩ ዘንድ ለአባቱ ገንዘብ ሰጠው፤ ለወንድሞቹም ሰጣቸው።

መጽሐፈ ኩፋሌ 31