Jubilees Chapter 29 - መጽሐፈ ኩፋሌ | EOTC Bible

¹ይሁዳም ከምራቱ ጋር ተኝቶአልና የሠራው ሥራ ክፉ እንደ ሆነ ዐወቀ። በዐይኖቹ ፊት ራሱን አዋረደ። የልጁንም ኀፍረት ገልጦአልና እንደ በደለና እንደ ሳተ ዐወቀ። ²ስለ በደሉም በእግዚአብሔር ፊት ያዝንና ይለምን ጀመር። ³ፈጽሞም ስለ ለመነና ስለ አለቀሰ እንዲሰረይለት በሕልም ነገርነው። ከዚህም በኋላ ኀጢአት አልሠራም። ከኀጢአቱና ከአለማወቁ ተመልሶአልና ስርየት ሆነለት። ⁴በአምላካችን ፊት በድሎአልና፥ እንዲህ የሚያደርግን ሰው ሁሉ፥ ከምራቱም ጋር የሚተኛን ሰው ሁሉ ይቃጠልበት ዘንድ በእሳት ያቃጥሉት። በእነርሱ ኀጢአትና በደል ሆኖአልና ስለዚህ ነገር በእሳት ያቃጥሉአቸው። ⁵አንተም፥ “በመካከላቸው ርኵሰትና ኀጢአት እንዳይሆን የእስራኤልን ልጆች እዘዛቸው፤ ከምራቱና ከአማቱ ጋር የሚተኛ ሁሉ ርኵሰትን አድርጎአልና ከእርስዋ ጋር የተኛውን ሰው ሴቲቱንም በእሳት ያቃጥሉ።” ⁶ቍጣውና መቅሠፍቱም ከእስራኤል ይርቃል። ⁷ለይሁዳም ሁለቱ ልጆቹ ከእርስዋ ጋር እንዳልተኙ ነገርነው፤ ስለዚህም ዘሩ ለሌላ ነገድ ሆነ። ⁸ለልጆቹ ከአዘዛቸው ከአብርሃም ፍርድ የተነሣ ይሁዳ በእሳት ያቃጥሉአት ዘንድ ወድዶአልና፥ በልበ ቅንነትም ሄዶአልና፥ ፍርድንም መርምሮአልና አልጠፉም። ⁹በአርባ አምስተኛው ኢዮቤልዩ በሦስተኛው ሱባዔ በመጀመሪያው ዓመት በምድሩ ላይ ድርቅ ይመጣ ጀመር። ¹⁰ዝናብም በምድር መዝነቡን ተወ። ምንም የሚወርድ አልነበረምና። ምድርም ድርቅ ሆነች። በግብፅ ምድር ግን ምግብ ነበር፤ አዝመራ በሆነበት በሰባቱ ዓመት ዮሴፍ የግብፅን እህል ሰብስቦ ጠብቆት ነበርና። ¹¹የግብፅ ሰዎችም ምግባቸውን ይሰጣቸው ዘንድ ወደ ዮሴፍ መጡ። እርሱም የመጀመሪያው ዓመት ስንዴ ያለበትን ጎተራ ከፍቶ ለሀገሩ ሕዝብ በወርቅ ሸጠ። ¹²ያዕቆብም በግብፅ እህል እንዳለ ሰማ። ከግብፅም እህል ሸምተው ያመጡለት ዘንድ ዐሥሩን ልጆቹን ላከ። ¹³ብንያምን ግን አልላከውም። ወደ ግብፅ ከሚሄድ ነጋዴ ጋር ደረሱ። ዮሴፍም ዐወቃቸው፤ እነርሱ ግን አላወቁትም፤ ከእነርሱም ጋር ተነጋገረ። እንዲህም ብሎ ጠየቃቸው፥ “እናንተ ሰላዮች አይደላችሁምን? የሀገሩንም መግቢያ ትሰልሉ ዘንድ መጥታችኋል።” አሰራቸውም። ¹⁴ከዚህ በኋላ ፈታቸው፤ ስምዖንንም ብቻ አስቀረ። ዘጠኙ ወንድሞቹንም በአቅማዳቸው ስንዴውን ሞልቶ ሰደዳቸው። ወርቃቸውንም በአቅማዳቸው ጨመረላቸው፤ እነርሱ ግን አላወቁም። ¹⁵አባታቸው በሕይወት እንደ አለ፥ ታናሽ ወንድማቸውም እንደ አለ ነግረውታልና ታናሽ ወንድማቸውን ያመጡ ዘንድ አዘዛቸው። ¹⁶ከግብፅ ሀገርም ወጥተው ወደ ከነዓን ምድር ደረሱ፤ ያገኛቸውንም ነገር ሁሉ ፥ የሀገሩ ገዢ ከእነርሱ ጋር ጭንቅ ነገርን እንደ ተናገረ፥ ብንያምንም እስኪያመጡ ድረስ ስምዖንን መያዣ አድርጎ እንደ አስቀረው ለአባታቸው ነገሩት። ¹⁷ያዕቆብም አላቸው፥ “የወላድ መካን አደረጋችሁኝ፥ ዮሴፍ የለ፥ ስምዖን የለ፥ ብንያምንም ትወስዱብኝ ነውን? ክፋታችሁ በእኔ ደረሰ፤ ልጄ ከእናንተ ጋር አይሄድም። ¹⁸እናታቸው ሁለት ልጆች ወልዳ ነበርና አንዱ ሞተ፤ ይህንም ትወስዱብኝ ነውን? በመንገድ ታሞ ቢሞት ያረጀ ሰውነቴን በኀዘን ወደ መቃብር ታወርዳላችሁን?” አላቸው። ወርቃቸው ሁሉ ተቋጥሮ እንደ ተመለሰ አይቶአልና ስለዚህ ነገር እርሱን መላክ ፈራ። ¹⁹ከግብፅ ሰዎች ብዙዎች ዮሴፍ ብዙ እህልን እንደሚሰበስብ፥ ለረኃቡም ዓመት በጎተራ እንደሚያስቀምጥና እንደሚጠብቅ ካዩት ጀምሮ ለምግብ እህላቸውን ሰብስበዋልና ከግብፅ በቀር በከነዓንና በምድር ሁሉ ራቡ ፈጽሞ ጸና። ²⁰የግብፅ ሰዎችም በመጀመሪያው የራብ ዓመት ተመገቡት። ²¹ያዕቆብም በምድር ረኃብ እጅግ እንደ ጸና፥ መዳንም እንደ ሌለ ባየ ጊዜ ልጆቹን፥ “እንዳንሞት ወደ ግብፅ ሄዳችሁ እህል ሸምታችሁ አምጡልን” አላቸው። እነርሱም፥ “ታናሹ ወንድማችን ከእኛ ጋር ካልሄደ አንሄድም” አሉት። ²²ያዕቆብም ብንያምን ከእነርሱ ጋር ካልሰደደው ከራቡ የተነሣ ሁሉም እንደሚጠፉ ዐሰበ፥ ሮቤልም፥ “እርሱን በእጄ ስጠኝ፤ መልሼ ባላመጣልህ ስለ እርሱ ፋንታ ሁለቱን ልጆችን ግደላቸው” አለው። ²³እርሱም፥ “ከአንተ ጋር አይሄድም” አለው። ይሁዳም ቀርቦ፥ “ከእኔ ጋር ስደደው፤ መልሼ ባላመጣልህም በሕይወት ዘመኔ ሁሉ በፊትህ በደለኛ ልሁን” አለ። ²⁴በዚህ ሱባዔ በሁለተኛው ዓመት በዐሥረኛው ወር መባቻ ከእነርሱ ጋር ሰደደው፤ ከሚሄዱትም ሁሉ ጋር ወደ ግብፅ ደረሱ። ከእነርሱም ጋር እጅ መንሻቸው ልባንጃ፥ ለውዝ፥ ጠርቤንቶስና የማር ወለላ በእጃቸው ነበር። ²⁵ደርሰውም በዮሴፍ ፊት ቆሙ። ወንድሙን ብንያምንም ባየው ጊዜ ዐወቀው። ²⁶“ትንሽ ወንድማችሁ ይህ ነውን?” አላቸው። እነርሱም፥ “አዎን፥ ነው” አሉት። እርሱም፥ “ልጄ ሆይ፥ እግዚአብሔር ይጠብቅህ” አለው፥ ወደ ቤቱም ሰደዳቸው፤ ስምዖንንም አወጣላቸው። ²⁷ግብርም አገባላቸው፥ በእጃቸውም ያመጡትን እጅ መንሻቸውን አቀረቡለት። በፊቱም በሉ፤ ለሁሉም ፋንታ ፋንታቸውን ሰጣቸው። ከሁሉም ፋንታ ይልቅ የብንያም ፋንታ ሰባት እጅ በለጠ። በሉ፥ ጠጡም፥ ሄደውም አህዮቻቸው ባሉበት ዐደሩ።

መጽሐፈ ኩፋሌ 29