Jubilees Chapter 28 - መጽሐፈ ኩፋሌ | EOTC Bible

¹በዚያም ወራት ፈርዖን በምድር ሁሉ ስለሚሆነው ጥጋብና ራብ በአንዲት ሌሊት ሁለት ሕልሞችን አየ። ²ከእንቅልፉም ነቃ፤ በግብፅ ያሉ ሕልም የሚተረጕሙትንና ጠንቋዮችን ሁሉ ጠርቶ ሁለቱን ሕልሞቹን ነገራቸው። ነገር ግን ሊተረጕሙ አልቻሉም። ³ከዚህም በኋላ የጠጅ አሳላፊዎች አለቃ ዮሴፍን አሰበው፤ የእርሱንም ነገር በንጉሡ ዘንድ ተናገረ። ⁴ከእስር ቤትም አወጡት። ሁለቱን ሕልምቹንም በፊቱ ተናገረ። ⁵እርሱም ሁለቱ ሕልሞቹ አንድ እንደ ሆኑ፥ በፈርዖን ፊት ተናገረ። ⁶እንዲህም አለው፥ “በግብፅ ሀገር ሁሉ ጥጋብ የሚሆንበት ሰባት ዓመት ይመጣል፤ ከዚህ በኋላ በሀገሩ ሁሉ ተመሳሳይ የሌለው ሰባት የራብ ዓመት ይመጣል፤ ⁷አሁንም የግብፅ ሰዎች ሁሉ ለፈርዖን ጎተራ ይሥሩ፤ ጥጋብ በሆነበት ዘመንም በሀገር የተገኘውን እህል ለሀገር ምግብ ሊሆን ያኑሩት፤ ሰባት ዓመት ራብ ለሚሆንበትም ዘመን ምግብ ይሆናል፤ ራቡም እጅግ የጸና ይሆናልና ከራብ ጽናት የተነሣ ሀገር አትጠፋም።” ⁸እግዚአብሔርም በፈርዖን ፊት ለዮሴፍ ባለምዋልነትንና ምሕረትን ሰጠው። ⁹ፈርዖንም ሹሞቹን፥ “የእግዚአብሔር መንፈስ አድሮበታልና እንደዚህ ሰው ያለ ብልህና ዐዋቂ ሰው አናገኝም” አላቸው። ¹⁰በመንግሥቱም ሁለተኛ ሰው አድርጎ ሾመው፤ የግብፅንም ሀገር ሁሉ አስገዛው፤ በፈርዖንም ሁለተኛ ሰረገላ ላይ አስቀመጠው፤ የነጭ ሐር ቀሚስም አለበሰው፤ በአንገቱም ዝርግፍ ወርቅ አሰረለት። ¹¹“ኤል ኤል አብሪር” ብሎ በፊቱ ዐዋጅ ነገረለት፤ በእጁም የወርቅ ቀለበት አደረገለት፤ በቤቱ ሁሉ ላይ አሠለጠነው፤ ከፍ ከፍም አደረገው። እንዲህም አለው፥ “ከዙፋኔ ብቻ በቀር ከአንተ አልበልጥም።” ¹²ዮሴፍም በግብፅ ሀገር ሁሉ ሠለጠነ፤ የፈርዖንም መኳንንት ሁሉ ሹሞቹም ሁሉ፥ የንጉሡንም ሥራ የሚሠሩ ሁሉ ወደዱት፤ በቅንነት ይሔዳልና፥ ትዕቢትም የለውምና፥ ኵራት፥ ፊት አይቶም ማድላት የለውምና፥ መማለጃንም መቀበል የለውም ነበርና። በግብፅ ላሉ አሕዛብ ሁሉ በሚገባ ይፈርድላቸው ነበርና። ¹³የግብፅም ሀገር በዮሴፍ ምክንያት በፈርዖን ፊት ሰላም ሆነች። እግዚአብሔር ከእርሱ ጋር አለና። በፈርዖን ዘመዶች ሁሉ፥ በሚያውቁት ሰዎችም ሁሉ ፊት፥ ለእርሱም ምስክርነትን በሚሰጡ ሰዎች ፊት ባለምዋልነትንና ምሕረትን ሰጠው። የፈርዖንም መንግሥት ቀናች። ባለጋራ አልነበረም። ክፉም አልነበረም። ¹⁴ንጉሡም ዮሴፍን “ሰፋንጢፋንስ” ብሎ ጠራው። ለዮሴፍ ሚስት ትሆነው ዘንድ የእንጀራ አሳላፊዎች አለቃ የሚሆን የኤሌዮጲስ ካህን ልጅ የፋጢፋራንን ልጅ ሰጠው። ¹⁵ዮሴፍም በፈርዖን ፊት በቆመ ጊዜ የሠላሳ ዓመት ሰው ነበር። ¹⁶በዚያም ዓመት ይስሐቅ ሞተ። ስለ ሁለቱ ሕልሞች ትርጓሜ ዮሴፍ እንደ ተናገረው ደረሰ። ¹⁷በግብፅ ሀገር ሁሉ ሰባት ዓመት ጥጋብ ሆነ፤ የግብፅ ምድርም ብዙ ፍሬን አፈራች፤ አንዲቱ መስፈሪያ ሺህ ስምንት መቶ መስፈሪያ ሆነች። ¹⁸ዮሴፍም ስንዴው እስኪመላ ድረስ፥ ከብዛቱም የተነሣ መቍጠርና መስፈር እስኪሳናቸው ድረስ፥ የከተማውን ምግብ በየሀገሩ ሰበሰበ። ¹⁹በአርባ አምስተኛው ኢዮቤልዩ፥ በሁለተኛውም ሱባዔ፥ በሁለተኛው ዓመት፥ ይሁዳ ለበኵር ልጁ ለኤር ከአራም ልጆች ወገን ሚስትን አጋባው፤ ስምዋም ትእማር ይባላል። ²⁰ጠላትም፥ ከእርስዋም ጋር አልተኛም፤ እናቱ ከከነዓን ልጆች ነበረችና፤ ከእናቱም ወገን ሚስትን ያገባ ዘንድ ወደደ፥ አባቱ ይሁዳ ግን አልፈቀደለትም። ²¹ያም የይሁዳ የበኵር ልጅ ኤር ክፉ ነበረ፤ እግዚአብሔርም ቀሠፈው። ²²ይሁዳም ልጁን አውናንን አለው፥ “ወደ ወንድምህ ሚስት ግባ፤ ዋርሳም አድርጋት። ለወንድምህም ዘር ተካለት።” ²³አውናንም የእርሱ ልጅ እንደማይሆንና የወንድሙ ልጅ እንደሚሆን ዐወቀ፤ ወደ ወንድሙ ሚስትም ገባ። ነገር ግን ዘሩን በምድር ላይ ያፈስስ ነበር። ይህም በእግዚአብሔር ፊት ክፉ ሆነ፥ ቀሠፈውም። ²⁴ይሁዳም ምራቱን ትእማርን፥ “ልጄ ሴሎም እስኪያድግ ድረስ መበለት ሆነሽ በአባትሽ ቤት ተቀመጪ፤ ለእርሱም ሚስት ትሆኚው ዘንድ እሰጥሻለሁ” አላት። ²⁵እርሱም አደገ፥ የይሁዳ ሚስት ቢድሱኤል ግን ያገባ ዘንድ ለልጅዋ ሴሎም አልፈቀደችም፤ የይሁዳ ሚስት ቢድሱኤልም በዚህ ሱባዔ በአምስተኛው ዓመት ሞተች። ²⁶በስድስተኛው ዓመት ይሁዳ በጎቹን ይሸልት ዘንድ ወደ ቴምናታ ወጣ፤ ለትእማርም “እነሆ፥ አማትሽ በጎቹን ይሸልት ዘንድ ወደ ቴምናታ ይወጣል” ብለው ነገሩአት። ²⁷የመበለትነቷንም ልብስ ትታ መጐናጸፊያዋን ለበሰች። አጊጣም በቴምናታ ጎዳና በር ተቀመጠች። ²⁸ይሁዳም ሲሄድ አገኛት፥ ጋለሞታም እንደ ሆነች ተጠራጥሮ፥ “ወደ አንቺ ልግባ” አላት፤ እርሷም፥ “ግባ” አለችው፥ ገባም፥ እርስዋም፥ “ዋጋዬን ስጠኝ” አለችው። “በጣቴ ካለ ቀለበቴ፥ ከኵፍየቴና በእጄ ካለ ዘንጌ በቀር በእጄ የለኝም” አላት። ²⁹እርስዋም፥ “ዋጋዬን እስክትሰድልኝ ድረስ እነርሱን ስጠኝ” አለችው፤ እርሱም፥ “አንድ የፍየል ጠቦት እልክልሻለሁ” አላት። ለእርስዋም እነርሱን ሰጣት። ³⁰እርስዋም ፀነሰችለት፤ ይሁዳም ወደ በጎቹ ሄደ፥ እርስዋም ወደ አባቷ ቤት ሄደች። ³¹ይሁዳም በበግ ጠባቂው በአዶላማዊው እጅ የፍየሉን ጠቦት ሰደደላት፤ እርሱም አጣትና፥ “በዚያ የነበረችው ጋለሞታ ወዴት አለች?” ብሎ የሀገሩን ሰዎች ጠየቃቸው፤ እነርሱም፥ “በዚህ ጋለሞታ የለችም፥ በእኛ ዘንድም ጋለሞታ የለችም” አሉት። ³²ተመልሶም፥ “አጣኋት፥ የሀገሩንም ሰዎች ጠየቅኋቸው እነርሱም፦ በዚህስ ጋለሞታ የለችም አሉኝ” ብሎ ነገረው። ³³እርሱም፥ “መዘባበቻ እንዳንሆን ተነሥ እንሂድ” አለው። ከዚህም በኋላ ሦስት ወር በሆናት ጊዜ እርስዋ እንደ ፀነሰች ታወቀች፤ ለይሁዳም፥ “እነሆ፥ ምራትህ ትእማር በዝሙት ፀነሰች” ብለው ነገሩት። ³⁴ይሁዳም ወደ አባቷ ቤት ሄደ፥ እናቷንና አባቷን፥ ወንድሞችዋንም፥ “በእስራኤል ዘንድ ኀጢአት ሠርታለችና በእሳት ያቃጥሉአት ዘንድ አውጡአት” አላቸው። ³⁵እንዲህም ሆነ፥ ያቃጥሉአት ዘንድ ባወጡአት ጊዜ፥ “ለእርሱ ፀንሻለሁና ይህ የማን እንደ ሆነ ዕወቅ ብላ ቀለበቱን፥ ኵፍየቱንና ዘንጉን ለአማቷ ላከች። ³⁶ይሁዳም፥ “ትእማር ከእኔ ይልቅ እውነተኛ ሆነች፤ ከእንግዲህም አያቃጥሉአት” አለ። ስለዚህም ነገር ለሴሎም አልተሰጠችም። ከዚያም በኋላ ዳግመኛ አልቀረባትም። ³⁷ከፀነሰችም በኋላ በዚህ በሁለተኛው ሱባዔ በሰባተኛው ዓመት ሁለቱን ልጆች ፋሬስንና ዛራን ወለደች። ³⁸ከዚህ በኋላ ዮሴፍ ለፈርዖን የነገረው ሰባቱ የጥጋብ ዐመት ተፈጸመ።

መጽሐፈ ኩፋሌ 28