Jubilees Chapter 27 - መጽሐፈ ኩፋሌ | EOTC Bible

¹ከዚህም በኋላ እነዚያ የያዕቆብ ልጆች፥ ባሪያዎቻቸውም ተከፍለው በግንቡ በአራቱ ማዕዘን ወጡ። ²ይሁዳ በፊት ወጣ፤ ንፍታሌምና ጋድ፥ አምሳ ብላቴኖችም በግንቡ ደቡብ ከእርሱ ጋር ነበሩ። በፊታቸው ያገኙትን ሁሉ ገደሉ። ከእነርሱም አንድ ሰው ስንኳ ያመለጠ የለም። ³ሌዊ፥ ዳንና አሴር በግንቡ ምሥራቅ ወጡ፤ አምሳ ብላቴኖችም ከእነርሱ ጋር ነበሩ። የሞዓብንና የአሞንንም ተዋጊዎች ገደሉ። ⁴ሮቤል፥ ይሳኮርና ዛብሎንም በግንቡ ሰሜን ወጡ፥ አምሳ ብላቴኖችም ከእነርሱ ጋር ነበሩ፤ የፍልስጥኤምንም አርበኞች ገደሉ። ⁵ስምዖን፥ ብንያምና የሮቤል ልጅ ኤናክ በግንቡ ምዕራብ ወጡ፥ አምሳ ብላቴኖችም ከእነርሱ ጋር ነበሩ። ከኤዶምና ከኮራውስ አራት መቶ ጠንካሮች ተዋጊዎች ሰዎችን ገደሉ። ስድስት መቶዎቹ ግን ሸሹ፤ አራቱ የዔሳው ልጆችም። ⁶አባታቸው በኮረብታው ላይ ሞቶ እንደ ወደቀ ትተውት ከእነርሱ ጋር ሸሹ። ይህችውም በአዱራም ያለች ኮረብታ ናት፤ የያዕቆብም ልጆች በኋላቸው ተከትለው እስከ ሴይር ተራራ ድረስ አሳደዱአቸው። ⁷ያዕቆብ ግን በአዱራም ኮረብታ ወንድሙን ቀብሮ ወደ ቤቱ ተመለሰ። የያዕቆብ ልጆች የዔሳውን ልጆች በሴይር ተራራ አስጨነቁአቸው። ለያዕቆብ ልጆችም ተገዢዎች ይሆኑ ዘንድ አንገታቸውን ዝቅ አደረጉ። ⁸ከአነርሱም ጋር ሰላምን ያደርጉ እንደ ሆነ ይወጉአቸውም እንደ ሆነ፥ ወደ አባታቸው ላኩ። ⁹ያዕቆብም ሰላምን ያደርጉ ዘንድ ወደ ልጆቹ ላከ፤ ከእነርሱም ጋር ሰላምን አደረጉ። ¹⁰በዘመኑ ሁሉ ለያዕቆብና ለልጆቹ ይገብሩ ዘንድ የመገዛት ቀንበርን በእነርሱ ላይ አኖሩ። ¹¹ያዕቆብ ወደ ግብፅ እስከሚወርድበት ቀን ድረስ ለያዕቆብ ሲገብሩ ኖሩ፤ የኤዶም ልጆችም፥ ዐሥራ ሁለቱ የያዕቆብ ልጆች በእነርሱ ላይ ከሠሩት ከመገዛት ግብር እስከዚያች ቀን ድረስ አላጐደሉም። ¹²እስከዚያች ቀን ድረስ ለእስራኤል ልጆች ንጉሥ ሳይነግሥ በኤዶምያስ የነገሡ ነገሥታት እነዚህ ናቸው። ¹³በኤዶምያስ የቢዖር ልጅ ባላቅ ነገሠ፤ የከተማውም ስም ዲናባ ነበር፤ ባላቅም ሞተ። ¹⁴በእርሱም ፋንታ ከቦሶር ወገን የዛራ ልጅ ዮባብ ነገሠ። የዛራ ልጅ ዮባብም ሞተ። በእርሱም ፋንታ ከቴማን ሀገር አሳም ነገሠ፤ አሳምም ሞተ። ¹⁵በእርሱም ፋንታ በሞዓብ ምድረ በዳ የምድያምን ሰዎች የገደለ የባሬድ ልጅ አዶታ ነገሠ፤ የከተማውም ስም አውት ነበር። አዶታም ሞተ። ¹⁶በእርሱም ፋንታ ከአሜሴቅ ወገን ሰልማን ነገሠ። ሰልማንም ሞተ። በእርሱም ፋንታ ከሮባኦት ወንዝ የመጣ ሳኦል ነገሠ፤ ሳኦልም ሞተ። በእርሱም ፋንታ የአክቡር ልጅ ብዑሉናን ነገሠ፤ የአክቡር ልጅ ብዑሉናንም ሞተ። ¹⁷በእርሱም ፋንታ አዳት ነገሠ፤ የሚስቱ ስም ማየጦቢት ነበር፤ ይህችውም የሜትቤድዘብ ልጅ የመጥሪት ልጅ ናት። በኤዶምያስ ሀገር የነገሡ ነገሥታት እነዚህ ናቸው። ¹⁸ያዕቆብም አባቱ ተሰዶ በኖረበት ያዕቆብ በተዛመዳቸው ሀገር በከነዓን ኖረ። ¹⁹ዮሴፍም የዐሥራ ሰባት ዓመት ልጅ ሳለ ወንድሞቹ ከሸጡት በኋላ ወደ ግብፅ አወረዱት። የፈርዖን ባለሙዋል የአዛዦች አለቃ ፋጢፋራን ገዛው። ዮሴፍንም በቤቱ ሁሉ ላይ ሾመው። ²⁰በዮሴፍ ምክንያት የእግዚአብሔር በረከት በግብፃዊው ሰው ቤት ሆነ። እግዚአብሔርም የሚሠራውን ሁሉ ያቀናለት ነበር። ²¹ግብፃዊውም ሰው እግዚአብሔር ከዮሴፍ ጋር እንደ አለ፥ የሚሠራውንም ሥራ ሁሉ እግዚአብሔር እንዲያቀናለት አይቶአልና ሁሉን በዮሴፍ ፊት ተወ። ²²ዮሴፍም መልከ መልካም፥ እጅግም የተዋበ ነበረ። ²³የጌታውም ሚስት ዐይኖችዋን አንሥታ ዮሴፍን አየችው። ወደደችውም፤ ከእርስዋም ጋር ይተኛ ዘንድ ለመነችው፤ እርሱ ግን ልቡን አልሰጣትም። ²⁴እግዚአብሔርንም አሰበው፤ ባል በአላት ሴት ማንም ሰው እንዳያመነዝር ከአብርሃም ቃላት አባቱ ያዕቆብ ያነበበላቸውን ነገሮች አሰበ። በሰማይ በልዑል እግዚአብሔር ፊት የተሠራለት የሞት ቅጣት እንደ አለ አሰበ። በዘመኑ ሁሉ ኀጢአት ስለ እርሱ በእግዚአብሔር ፊት በዘለዓለም መጽሐፍ እንደምትጻፍ አሰበ። ²⁵ዮሴፍም ይህን ነገር አሰበ፤ ከእርስዋም ጋር ይተኛ ዘንድ አልወደደም፤ አንድ ዓመት አባበለችው፤ ከለከላትም፤ መስማትንም እንቢ አላት። ²⁶እርስዋ ግን ከእርስዋ ጋር ይተኛ ዘንድ ልትጣላው በቤት አስጨንቃ ያዘችው፤ የቤቷንም ደጃፍ ዘጋች፤ በገሃድም ያዘችው፤ እርሱ ግን ከእጅዋ አመለጠ፤ ልብሱንም በእጅዋ ትቶ፥ ሳንቃውንም ሰብሮ ከፊቷ ወደ ውጭ ሸሸ። ²⁷ያቺም ሴት ከእርስዋ ጋር እንደማይተኛ በአየች ጊዜ እንዲህ ብላ በጌታው ፊት አጣላችው፥ “የምትወድደው ይህ ዕብራዊ ባሪያህ ይደፍረኝ ዘንድ ወደደ። ²⁸እንዲህም ሆነ፥ ቃሌን ከፍ አድርጌ በጮኽሁ ጊዜ ልብሱን በእጄ ትቶ፥ በያዝሁትም ጊዜ ሳንቃውን ሰብሮ ሸሸ።” ²⁹ግብፃዊውም የዮሴፍን ልብስና የተሰበረውን መዝጊያ አየ፤ ³⁰የሚስቱንም ነገር ሰምቶ ዮሴፍን ንጉሥ ያሰራቸው እስረኞች ወደ አሉበት እስር ቤት አገባው። ³¹በዚያም በእስር ቤት ኖረ። እግዚአብሔርም ለዮሴፍ በእስር ቤት ጠባቂዎች አለቃ ፊት ሞገስን፥ ምሕረትንም በፊቱ ሰጠው። እግዚአብሔር ከእርሱ ጋር እንደ አለ፥ የሚሠራውንም ሥራ ሁሉ እግዚአብሔር እንዲያቀናለት አይቶአልና ሁሉን በፊቱ ተወ። ³²ዮሴፍ ሁሉን ያደርግ ነበርና፥ እግዚአብሔርም ይፈጽምለት ነበርና የእስር ቤት ጠባቂዎች አለቃ ያለ እርሱ ምንም የሚያውቀው አልነበረም። በዚያም ሦስትዓመት ³³በዚያም ወራት የግብፅ ንጉሥ ፈርዖን በሁለቱ ባለምዋሎቹ በጠጅ አሳላፊዎች አለቃና በእንጀራ አሳላፊዎች አለቃ ላይ ተቈጣ። ዮሴፍ ተይዞ በዚያ በታሠረበት በእሥር ቤቱ አለቃ ቤትም በእስራት አኖራቸው። ³⁴የእስረኞች አለቃም በፊታቸው ይላላካቸው ዘንድ፥ በፊቱም ይላላከው ዘንድ ዮሴፍን ሾመው። ³⁵ሁለቱም የጠጅ አሳላፊዎች አለቃና የእንጀራ አሳላፊዎች አለቃ ሕልም አለሙ። ለዮሴፍም ነገሩት፤ ዮሴፍም እንደ ተረጐመላቸው እንዲሁ ሆነላቸው። ³⁶ፈርዖንም ዮሴፍ እንደ ተረጐመላቸው የጠጅ አሳላፊዎችን አለቃ ወደ ሥራው መለሰው፤ የእንጀራ አሳላፊዎችን አለቃ ግን ገደለው፤ ³⁷የጠጅ አሳላፊዎች አለቃ ግን ዮሴፍን በእስር ቤት ረሳው። ዮሴፍ የሚሆንለትን ነግሮት ነበርና እንደ ነገረው ለፈርዖን ይነግረው ዘንድ አላሰበም። ረስቶታልና።

መጽሐፈ ኩፋሌ 27