Jubilees Chapter 26 - መጽሐፈ ኩፋሌ | EOTC Bible

¹ይህን አዝዞአቸውና መርቆአቸው ከጨረሰ በኋላ በፊቱ በአንድነት በሉ፤ ጠጡም። ²በመካከላቸውም መተካከል ሆኖአልና ደስ አላቸው። ከእርሱም ዘንድ ወጡ፤ በዚያችም ቀን ዐርፈው ተኙ። ³ይስሐቅም ደስ ብሎት በዚያች ቀን በአልጋው ላይ ተኛ፤ የዘለዓለምንም እንቅልፍ አንቀላፋ። ⁴የመቶ ሰማንያ ዐመት ሰው ሆኖ ሞተ። ሃያ አምስት ሱባዔንና አምስት ዓመትን ጨረሰ። ሁለቱ ልጆቹ ዔሳውና ያዕቆብም ቀበሩት። ⁵ዔሳውም በኤዶምያስ አውራጃ ወደ አለች ወደ ሴይር ተራራ ሄደ፤ በዚያም ኖረ። ⁶ያዕቆብም አባቱ አብርሃም ተሰዶ ይኖርበት በነበረ በኬብሮን ምድር ባለ ግንብ ኖረ። ⁷እንደ ተወለደበት ወራት እንደሚታየው ትእዛዝ አድርጎ በፍጹም ልቡናው እግዚአብሔርን አመለከው። ⁸በአርባ አምስተኛው ኢዮቤልዩ በሁለተኛው ሱባዔ በአራተኛው ዓመት ሚስቱ ልያ ሞተች። በአባቱ እናት በሳራ መቃብር በስተግራ በእናቱ በርብቃ መቃብር አጠገብ ደርብነት በአላት ዋሻ ቀበራት። ⁹ልጆቹና ልጆችዋ ሁሉ ለሚስቱ ለልያ ከእርሱ ጋር ያለቅሱላት ዘንድ፥ ስለ እርስዋም ያረጋጉት ዘንድ መጡ፤ ያለቅስላት ነበርና። በሥራዋም ሁሉ ፈጽማ ቅን ስለሆነች እኅቷ ራሔል ከሞተች ጀምሮ ፈጽሞ ይወድዳት ነበርና። ¹⁰ያዕቆብንም ታከብረው ነበር፤ ከእርሱም ጋር በኖረችበት ዘመን ሁሉ ክፉ ነገር ከአፍዋ አልሰማም፤ የዋህና ሰላማዊት ነበረችና፥ ሰላም፥ ቅንነት፥ ክብርም ያላት ነበረችና። ¹¹በሕይወት ሳለች የሠራችውን ሥራ ሁሉ ያስብ ነበር፤ ያለቅስላትም ነበር። በፍጹም ሰውነቱና በፍጹም ልቡናው ፈጽሞ ይወድዳት ነበርና። ¹²የዔሳውና የያዕቆብ አባት ይስሐቅ በሞተባት ቀን የዔሳው ልጆች ይስሐቅ ለታናሹ ልጁ ለያዕቆብ ብኵርናውን እንደ ሰጠው ሰሙ። ¹³ፈጽመውም ተቈጡ፤ “አንተ ታላቅ ሳለህ፥ ያዕቆብ ያንተ ታናሽ ሲሆን፥ አባትህ አንተን ትቶ ለያዕቆብ ብኵርናን ለምን ሰጠው?” ብለው ከአባታቸው ጋር ተከራከሩ። ¹⁴እርሱም አላቸው፥ “እኔ ብኵርናዬን በትንሽ ምስር ንፍሮ ሸጫለሁና ስለዚህ ነው። ¹⁵በልቶ ሊመርቀኝ አድኜ አመጣለት ዘንድ አባቴ በላከኝ ቀን በተንኰል መጥቶ የሚበላውንና የሚጠጣውን ለአባቴ አቀረበ። አባቴም መረቀው፤ እኔንም ከእርሱ በታች አደረገኝ። ¹⁶አሁንም ወንድም ከወንድሙ ጋር በክፉ ነገር እንዳንፈላለግ፤ ነገር ግን ወንድም ከወንድሙ ጋር በፍቅርና በሰላም ጸንተን እንድንኖር፥ መንገዳችንንም እንዳናጠፋ፥ አባታችን እኔንና እርሱን አማማለን።” ¹⁷እነርሱም አሉት፥ “ከእርሱ ጋር ፍቅር ለማድረግ አንሰማህም፤ ከእርሱ ኀይል የእኛ ኀይል ይጸናልና፥ እኛም ከእርሱ እንበረታለንና ወደ እርሱ ሄደን እንገድለዋለን፤ ልጆቹንም እንገድላለን፤ ከእኛ ጋር ካልሄድህም በአንተ ላይ ክፉ ነገር እናደርግብሃለን። ¹⁸አሁንም ስማን፤ ወደ አራም፥ ወደ ፍልስጥኤም፥ ወደ አሞንና ወደ ሞዓብ ልከን በሰልፍ የሚመክቱ የተመረጡ ሰዎችን ለራሳችን እንምረጥ፤ ¹⁹ወደ እርሱም ሄደን ከእርሱ ጋር እንዋጋ፤ ኀይልም ሳይዝ ከምድር እናጥፋው።” ²⁰አባታቸውም፥ “አትሂዱ፤ በፊቱም እንዳትጠፉ፥ ከእርሱ ጋር ጠብን አታድርጉ” አላቸው። ²¹እነርሱም አሉት፥ “ከልጅነትህ ጀምሮ እስከዚህች ቀን ድረስ ሥራህ ይህ ብቻ ነውን? አንተ አንገትህን ወደ ቀንበሩ ታገባለህ፤ እኛስ ይህን ነገር አንሰማም።” ²²ወደ አራምና ወደ አባታቸው ወዳጅ ወደ አዱራም ልከው የተመረጡ አርበኞችና ጦረኞች የሚሆኑ ሺህ ሰዎችን ለመቅጠር ከእነርሱ ጋር ተስማሙ። ²³ከተወዳጁአቸው ከአሞንና ከሞዓብ ልጆች የተመረጡ ሺህ አርበኞች፥ ²⁴ከፍልስጥኤም የተመረጡ ሺህ አርበኞች፥ ²⁵ከኤዶምና ከኮራውስ የተመረጡ ሺህ አርበኞች፥ ²⁶ከኬጤዎንም ጽኑዓን የሆኑ አርበኞች ወደ እነርሱ መጡ። ²⁷አባታቸውንም፥ “ወጥተህ ምራቸው፤ ይህ ካልሆነ እንገድልሃለን” አሉት። እርሱም ወደ ወንድሙ ወደ ያዕቆብ ሊመራቸው ይሄድ ዘንድ ልጆቹ እንደ ተበራቱበት በአየ ጊዜ ፈጽሞ ቍጣን ተመላ። ²⁸ከዚህም በኋላ በልቡ የተሰወረ ክፋትን ሁሉ በወንድሙ በያዕቆብ ላይ አሰበ። ነገር ግን በዘመኑ ሁሉ በወንድሙ በያዕቆብ ላይ ክፉ ነገርን እንዳይፈልግ ለእናቱና ለአባቱ የማለውን መሐላ አላሰበም። ²⁹ያዕቆብ ግን እነርሱ ለመዋጋት ወደ እርሱ እንደሚመጡ ይህን ሁሉ አላወቀም። እርሱም ከተመረጡ ከአራት ሺህ አርበኞችና ጦረኞች ጋር በግንቡ አጠገብ ወደ እርሱ እስኪቀርቡ ድረስ ለሚስቱ ለልያ ያለቅስ ነበር። ³⁰የኬብሮን ሰዎችም፥ “እነሆ፥ ወንድምህ ይዋጋህ ዘንድ ሰይፍ ከታጠቁ፥ ጋሻቸውንና ጦራቸውንም ከያዙ ከአራት ሺህ ሰዎች ጋር መጣ” ብለው ወደ እርሱ ላኩ። ³¹ከዔሳው ይልቅ ያዕቆብን ይወዱት ነበርና ነገሩት፤ ያዕቆብ ለጋስ ሰው ነበረና፥ ከዔሳውም ይልቅ ቸር ነበረና። ያዕቆብም ወደ ግንቡ አጠገብ እስኪቀርቡ ድረስ የነገሩትን አላመነም። የግንቡንም በር ዘጋ። ³²በግንቡም ላይ ቆሞ ከወንድሙ ከዔሳው ጋር ተነጋገረ፤ እንዲህም አለ፥ “ሚስቴ ስለ ሞተች በበጎ ማረጋጋት ታረጋጋኝ ዘንድ መጣህን? ³³እናትህና አባትህ ሳይሞቱ ዳግመኛ ፈጥነህ የማልኸው መሐላ ይህ ነውን? ³⁴ከማልኸው መሐላ ወጥተህ በደልህ፤ ለአባትህም በማልህበት ጊዜ ተፈረደብህ።” ዔሳውም ያንጊዜ መለሰ። ³⁵እንዲህም አለው፥ “ለምድር አራዊትና ለሰው ልጆች በእውነት የተማማሉት መሐላ እስከ ዘለዓለም ድረስ የለም። ³⁶በየቀኑ ይህ ለዚህ ክፋትን ይፈልጋል። እያንዳንዱም ጠላት ጠላቱን ይገድለው ዘንድ ይፈልጋል። ³⁷አንተም እኔን ከልጆች ጋር እስከ ዘለዓለም ድረስ ትጠላኛለህ፤ ከአንተ ጋርም ወንድማማችነት ማድረግ የለም። እኔ የምነግርህን ይህን ነገሬን ስማ። እሪያ ጠጕሩንና ቁርበቱን እንደ ባዘቶ ቢለውጥ፥ ³⁸እንደ በግና እንደ ዋልያም በራሱ ላይ ቀንድ ቢወጣ፥ ያንጊዜ ከአንተ ጋር ወንድማማችነትን አደርጋለሁ። ³⁹ጡቶች ከእናቶች ቢለዩ ወንድም በሆንኸኝ ነበር። ተኵላዎችም እንዳይበሉአቸውና እንዳይነጣጠቁአቸው ከበጎች ጋር ሰላምን ቢያደርጉ፥ ልቡናቸውም ለእነርሱ በጎ ነገርን ለማድረግ ቢያስብ፥ ⁴⁰ያንጊዜ በልቡናዬ ለአንተ ሰላም ይሆናል። አንበሳ ለላም ወዳጁ ቢሆን፥ ከእርሱም ጋር በአንድ ቀንበር ቢጠመድ፥ ከእርሱም ጋር ቢያርስ፥ ከእርሱም ጋር ሰላምን ቢያደርግ፥ ያንጊዜ ከአንተ ጋር ሰላምን አደርጋለሁ። ⁴¹ቁራዎች እንደ ሳቢሳ ቢነጡ፥ ያንጊዜ እንደ ወደድሁህ፥ ከአንተም ጋር ሰላምን እንዳደረግሁ አውቃለሁ፤ አንተም ትጠፋለህ፥ ልጆችህም ይጠፋሉ። ለአንተም ሰላም አይደረግልህም።” ⁴²ያንጊዜም ያዕቆብ በእርሱ ልቡናውን እንዳስጨከነ፥ ይገድለውም ዘንድ በፍጹም ልቡናው እንዳሰበ ዐወቀ። ⁴³እርያ በጦር ወግቶ ወደሚገድለው ሰው ፈጥኖ እንደሚወጣ፥ ከእርሱም እንደማይሸሽ ዔሳው ፈጥኖ መጣ። ⁴⁴ያንጊዜም ባሪያዎቹንና ወገኖቹን፥ ወዳጆቹንም ሁሉ ይከቡት ዘንድ አዘዘ። ⁴⁵ከዚህም በኋላ ይሁዳ አባቱን ያዕቆብን ተናገረው፤ እንዲህም አለው፥ “አባቴ ሆይ፥ ቀስትህን ሳብ፥ ፍላጻህንም ወርውረህ ጠላትህን ውጋ፤ ጠላትህንም ግደል። ኀይልም ይሁንልህ። ⁴⁶እኛ ወንድምህን አንገድልምና፤ እርሱም በአንተ ዘንድ አለና፥ በእኛም ዘንድ ለመከበር እንደ አንተ ነውና።” ⁴⁷ያንጊዜም ያዕቆብ ቀስቱን ስቦ ፍላጻውን ወርውሮ ወንድሙን ዔሳውን ወግቶ ገደለው። ⁴⁸ዳግመኛም ፍላጻውን ወርውሮ የአሕዛብ ወገን የሚሆን አዱራንን የግራ ጡት ሥሩን ወጋው፤ አሳድዶም ገደለው።

መጽሐፈ ኩፋሌ 26