Jubilees Chapter 24 - መጽሐፈ ኩፋሌ | EOTC Bible

¹ከዚህ ከአርባ አራተኛው ኢዮቤልዩ በዚህ ሱባዔ በስድስተኛው ዓመት በጎችን ይጠብቁ ዘንድ ያዕቆብ ልጆቹን ላካቸው። አገልጋዮቹንም ከእነርሱ ጋር ወደ ሰቂሞን መስክ ላካቸው። ²በዛፍ ሥር ተሰውረው ያጠፉአቸው ዘንድ፥ ሚስቶቻቸውንና ከብቶቻቸውንም ይማርኩ ዘንድ ሰባቱ የአሞሬዎን ነገሥታት በእነርሱ ላይ ተሰበሰቡ። ³የያዕቆብም ልጆች፥ ሌዊ፥ ይሁዳና ዮሴፍ ከአባታቸው ከያዕቆብ ጋር በቤት ነበሩ። ልቡናው ያዝንበት ነበርና፥ እርሱንም መተው አልተቻላቸውምና፤ ስለዚህም ታናሹ ልጁ ብንያም በእርሱ ዘንድ ነበረ። ⁴የታፋ ነገሥታት፥ የአሬሳ ነገሥታት፥ የሳራጋን ነገሥታትና የሴሎን ነገሥታት፥ የጋዒዝ ንጉሥ፥ የቤቴሮን ንጉሥና የማአኒሲኪሮስ ንጉሥ በተራራ የሚኖሩ ሁሉ። ⁵በከነዓን ባለ ዛፍ ሥር የሚኖሩ ሁሉ መጡ። ለያዕቆብም፥ “እነሆ፥ የአሞሬዎን ነገሥታት ልጆችህን ከበቡአቸው፤ መንጋቸውንም ተነጠቁ” ብለው ነገሩት። ⁶እርሱም ከቤቱ ተነሣ፤ ሦስቱም ልጆቹ፥ የአባቱም ብላቴኖች ሁሉ፥ የእርሱም ብላቴኖች ተነሡ። ⁷መሣሪያ የያዙ ዘጠኝ ሺህ ሰዎች ይዞ ሄዶ በሰቂሞን መስክ ወጉአቸው። ⁸የሸሹትንም ተከትለው በሰይፍ አጠፉአቸው፤ ታፋና አሬሳን፥ ሴሎንና ሰራጋን፥ ማአኒሲኪሮስን፥ ጋኤዝንም አጠፋቸው፤ መንጋውንም ሰበሰበ። ⁹በእነርሱ ላይ ከፍ ከፍ አለ። እነዚህ አምስት እጅ የምድራቸውን ፍሬ ግብር ይሰጡት ዘንድ በእነርሱ ላይ ግብር ሠራ። ¹⁰ታምናን ታሬስንና ሮቤልን ቀጸረ፤ በሰላምም ተመለሰ። ¹¹ከእነርሱ ጋር ሰላምን አደረገ። እርሱና ልጆቹ ወደ ግብፅ እስከወረዱበት ቀን ድረስ አገልጋዮች ሆኑት። ¹²በዚህ ሱባዔ በሰባተኛው ዓመት የወንድሞቹን ደኅንነት ያውቅ ዘንድ ዮሴፍን ከቤቱ ወደ ሰቂሞን ምድር ላከው። ¹³በዶታኤም ምድርም አገኛቸው፤ በዘበዙት፥ ይገድሉትም ዘንድ፦ መከሩበት። ¹⁴ተመልሰውም ለእስማኤላውያን ነጋዴዎች ሸጡት። እነሱም ወደ ግብፅ አውርደው የኤሌው ሀገር ካህን ለሚሆን፥ ለእንጀራ አሳላፊዎች አለቃ፥ ለፈርዖን ባለምዋል ለፋጢፋራን ሸጡት። ¹⁵የያዕቆብም ልጆች አውራ ፍየል አርደው የዮሴፍን ልብስ በደም ነከሩ። ¹⁶ሰባተኛው ወርም በባተ በዐሥረኛው ቀን ወደ አባታቸው ወደ ያዕቆብ ላኩ። በዚያች ቀን ከጥዋት እስከ ማታ ድረስ አለቀሰ። ¹⁷ልብሱንም አመጡለት፤ በሞቱ ኀዘን ተንቀጠቀጠ። ዮሴፍን ክፉ አውሬ እንደ በላው ነገሩት፤ የቤቱም ሰዎች ሁሉ በዚያች ቀን አለቀሱ፤ ቀኑን ሁሉ ከእርሱ ጋር ያዝኑና ያለቅሱ ነበር። ¹⁸ወንዶቹ ልጆቹና ሴቲቱ ልጁ ያረጋጉት ዘንድ ተነሡ። ነገር ግን ስለ ልጁ ስለ ዮሴፍ አልተረጋጋም። ¹⁹በዚያም ቀን ባላን ዮሴፍ እንደ ሞተ ሰማች። ለእርሱም ስታለቅስ ሞተች። እርስዋም በቅፍራቲፋ ትኖር ነበር። ²⁰ልጁ ዲናም ዮሴፍ ከጠፋ በኋላ ሞተች። በያዕቆብ ላይ በአንድ ወር ይህ ሦስቱ ኀዘን ደረሰበት። ባላንም በራሔል መቃብር አንጻር ቀበሩአት፤ ልጁን ዲናንም በዚያ ቀበሩዋት። ²¹ከዮሴፍ መጥፋት በኋላ አንድ ዓመት ሲያለቅስ ኖረ። “ስለ ልጄ ስለ ዮሴፍ እያለቀስሁ ወደ መቃብር እወርዳለሁ” ብሎአልና ልቅሶውን አልተወም። ²²ስለዚህ ነገር የዮሴፍን መርዶ ወደ አባቱ ወደ ያዕቆብ ባደረሱበት ቀን በፍየል ጠቦት ለእርሱ ያስተሰርይለት ዘንድ፥ ሰባተኛው ወር በባተ በዐሥረኛው ቀን ያዝኑ ዘንድ፥ በእስራኤል ልጆች ላይ ሥርዐት ተሠራ። ²³ሰባተኛው ወር በባተ በዐሥረኛው ቀን ከዓመት አንድ ጊዜ ስለ ኀጢአታቸው ተሠራች፤ ስለ ልጁ ስለ ዮሴፍ የአባታቸውን ልቡና አሳዝነዋልና። ²⁴ይህቺም ቀን ስለ ኀጢአታቸውና ስለ በደላቸው ሁሉ፥ ስለ ስሕተታቸውም በዚህች ቀን በዓመት አንድ ጊዜ በዚያች ቀን ራሳቸውን ሊያነጹ ያዝኑባት ዘንድ ተሠራች። ²⁵ዮሴፍም ከጠፋ በኋላ የያዕቆብ ልጆች ለራሳቸው ሚስት አገቡ፤ የአንደኛው የሮቤል ሚስት ስምዋ አዳ ይባላል። ²⁶የሁለተኛውም የስምዖን ሚስት ስምዋ አንዲባአ ትባላለች፤ ይህችውም የከነዓን ሴት ናት። የሦስተኛው የሌዊ ሚስት ስምዋ ሚልካ ይባላል፤ እርስዋም ከታራ ልጆች ወገን ከአራም ልጆች የተወለደች ናት። ²⁷የአራተኛው የይሁዳ ሚስት ስምዋ ቤተ ሱኤል ይባላል፤ እርስዋም የከነዓን ሴት ናት። የአምስተኛው የይሳኮር ሚስትም ስምዋ ሒዛቃ ይባላል። ²⁸የስድስተኛው የዛብሎን ሚስትም ስምዋ ኒኤሚን ይባላል። የሰባተኛው የዳን ሚስትም ስምዋ ኤግላ ይባላል። የስምንተኛው የንፍታሌም ሚስት ስምዋ የመስጴጦምያ ሴት የምትሆን ራሱኡ ናት። ²⁹የዘጠነኛው የጋድ ሚስትም ስምዋ ሚካ ይባላል። የዐሥረኛው የአሴር ሚስትም ስምዋ ኢዮና ይባላል። የዐሥራ አንደኛው የዮሴፍ ሚስትም ስምዋ አስኔት ይባላል። ይህችውም የግብፅ ሴት ናት። ³⁰የዐሥራ ሁለተኛው የብንያምም ሚስት ስምዋ ኢዮሳካ ይባላል። ስምዖንም ተመልሶ ከመስጴጦምያ እንደ ወንድሞቹ ሁለተኛ ሚስት አገባ።

መጽሐፈ ኩፋሌ 24