Jubilees Chapter 23 - መጽሐፈ ኩፋሌ | EOTC Bible

¹ይህ ወር በባተ በዐሥራ አምስተኛው ቀን፥ ከላሞች ወገን ዐሥራ አራት ፍሪዳዎችን፥ ሃያ ስምንት የበግ ሙክቶችን፥ አርባ ዘጠኝ በጎችን፥ ዘጠና ስድስት የበግ ጠቦቶችን፥ ሃያ ዘጠኝ የፍየል ጠቦቶችን ለሚቃጠልመሥዋዕት አቀረበ፤ የተወደደ ቍርባንም አድርጎ በእግዚአብሔር ፊት ለበጎ መዓዛ ወደ መሠዊያው አገባ። ²ዐሥራትም ያወጣ ዘንድ ከተሳለው ስእለት ከመሥዋዕታቸው ጋር ያቀረበው መባ ይህ ነው። የመጠጡም ቍርባን ከዚህ ጋር አንድ ነው። ³እሳት በበላው ጊዜም በእሳቱ ላይ ነጭ ዕጣንን ያጥን ነበር። ስለ ድኅነት መሥዋዕትም አራት ፍሪዳዎችን፥ አራት የበግ ሙክትቶችን፥ አራት በጎችን፥ አራት የፍየል ሙክቶችን፥ ዓመት የሆናቸውን ሁለት የበግ ጠቦቶችን፥ ሁለት የፍየል ጠቦቶችንም ያቀርብ ነበር። በየዕለቱ ሰባት ቀን እንዲህ ያደርግ ነበር። ⁴እርሱም ከቤተ ሰቦቹና ከልጆቹ ሁሉ ጋር ደስ ብሎት ሰባት ቀን በዚያ ይበላ ነበር። ከክፉ ሁሉ ያዳነውን፥ የለመነውንም የሰጠውን እግዚአብሔርን ፈጽሞ ያመሰግነው ነበር። ንጹሕ ከሆነውም ከብት ሁሉ ዐሥራት አወጣ። ⁵የሚቃጠል መሥዋዕትም አደረገ፤ ንጹሕ ያልሆነውን እንስሳም ለልጁ ለሌዊ ሰጠው። የሰውንም ወገን ሁሉ ሰጠው። ⁶ሌዊም ከዐሥሩ ወንድሞቹ ተለይቶ በአባቱ በያዕቆብ ፊት በቤቴል አገለገለ። ⁷በዚያም ካህን ሆኖ ኖረ፤ ያዕቆብም ስእለቱን ሰጠው፥ ዳግመኛም ለእግዚአብሔር እንደዚሁ ዐሥራትን ሰጠ። ይህንም ቀደሰው፤ ለእርሱም የተቀደሰ ሆነ። ⁸ስለዚህ ነገር ዐሥራትን ለማውጣት፤ ከዓመት እስከ ዓመት ስሙ ይጠራበት ዘንድ በተመረጠ በቅዱስ ቦታ ዳግመኛ በእግዚአብሔር ፊት ለመብላት ሥርዐት ሆኖ በሰማይ ጽላት ተወስኖአል። ⁹ለዚህም ሕግ ለዘለዓለሙ የተወሰነ ዘመን የለውም፤ ይኸውም ሥርዐት ከዓመት እስከ ዓመት ሊያደርጉት፥ ዳግመኛ በእግዚአብሔር ፊት በተመረጠ ቦታ ሊበሉት በሰማይ ጽላት የተጻፈ ነው። ¹⁰የዓመቱ አዝመራ እስከሚደርስበት ወራት ድረስ ዘሩ እሰከ ዓመት ድረስ ይበላልና፤ ከዚህም ዓመት ለሚመጣው ዓመት ከእርሱ ማትረፍ የለም፤ ወይኑም ወይን እስከሚደርስበት ወራት፥ ዘይቱም ዘይት እስከሚደርስበት ወራት ይበላልና ማትረፍ የለም። ¹¹ከእርሱም የሚተርፈውና የደለበው ሁሉ የረከሰ ይሁን፤ የረከሰም ሆኖአልና በእሳት ይቃጠል። እንደዚሁ በቤተ መቅደስ ሆነው በአንድነት ይብሉት፤ አያድልቡት። ¹²የበጉና የላሙ ዐሥራት ሁሉ ለእግዚአብሔር የተቀደሰ ነው። ስለ ዐሥራቱም የሚሆነው እንደዚሁ በሰማይ ጽላት ተወስኖአልና፥ ተጽፎአልምና ካህናቱ ከዓመት እስከ ዓመት በፊቱ የሚበሉት ይሁን። ¹³በሁለተኛዪቱ ሌሊት፥ ይህም ወር በባተ በሃያ ሁለተኛው ቀን ያዕቆብ ያን ቦታ ይሠራ ዘንድ፥ ቅጥሩንም ሠርቶ ይቀድሰው ዘንድ፥ ለእርሱም እስከ ዘለዓለሙ ድረስ፥ ከእርሱም በኋላ ለልጆቹ እስከ ዘለዓለም ድረስ የተቀደሰ ያደርገው ዘንድ መከረ። ¹⁴እግዚአብሔርም በሌሊት ተገለጠለት ባረከውም፦ እንዲህም አለው፥ “ስምህ እስራኤል ይባል እንጂ ያዕቆብ አይባል።” ¹⁵ዳግመኛም አለው፥ “ሰማይንና ምድርን የፈጠርሁ አምላክህ እግዚአብሔር እኔ ነኝ፤ አከብርሃለሁ፥ እጅግ በጣምም አበዛሃለሁ። ¹⁶ነገሥታቱም ከአንተ ይወለዳሉ፤ በቦታውም ሁሉ ይገዛሉ፤ የሰው ልጅም የረገጠውን ቦታ ሁሉ ይገዛሉ፥ ከሰማይ በታች ያለ ሀገርን ሁሉ ለዘርህ እሰጣለሁ፤ እንደ ወደዱም አሕዛብን ሁሉ ይገዛሉ። ¹⁷ከዚህም በኋላ ሀገሪቱን ሁሉ እጅ ያደርጋሉ፤ ለዘለዓለምም ይወርሱአታል።” ከእርሱም ጋር ተነጋግሮ ከጨረሰ በኋላ ከእርሱ ዘንድ ወጣ። ወደ ሰማይም እስኪወጣ ድረስ ያዕቆብ ያይ ነበር። ¹⁸እርሱም በሌሊት ራእይ አየ፤ እነሆ፥ መልአክ ከሰማይ ሲወርድ አየ፤ እነሆ፥ ሰባት ሰሌዳዎች በእጁ ነበሩ። ¹⁹ለያዕቆብም ሰጠውና አነበባቸው፤ በዓለሙ ሁሉ ለልጆቹና ለእርሱ የሚሆን በውስጣቸው የተጻፈውን ሁሉ አነበበ። በሰሌዳዎቹም የተጻፈውን ሁሉ አሳየው። ²⁰እንዲህም አለው፥ “ይህን ቦታ አትሥራ፥ የዘለዓለም መቅደስንም አታድርገው፤ ይህ ቦታ አይደለምና በዚህ ቦታ አትደር። ወደ አባትህ ወደ አብርሃም ቤት ሂድ፤ አባትህ እስከሚሞትባት ቀን ድረስ በዚያ በአባትህ በይስሐቅ ቤት ኑር፤ በግብፅ ሳለህ በሰላም ትሞታለህና። ²¹በዚህች ምድር ከአባቶችህ መቃብር ከአብርሃምና ከይስሐቅ ጋር በክብር ትቀበራለህና አትፍራ፤ ሁሉ እንዳየኸውና እንዳነበብኸው እንደዚሁ ይደረጋልና። ²²አንተም ያየኸውንና ያነበብኸውን ሁሉ ጻፍ።” ያዕቆብም፥ “ያነበብሁትንና ያየሁትን ሁሉ እንዴት አስታውሳለሁ?” አለ። ጌታም፥ “እኔ ሁሉን አሳስብሃለሁ” አለው። ²³ከእርሱም ወጣ፥ ያዕቆብም ከእንቅልፉ ነቃ፤ ያነበበውንና ያየውንም ሁሉ ዐሰበ። ያየውንና ያነበበውንም ነገር ሁሉ ጻፈ። ²⁴ዳግመኛም በዚያ አንድ ቀን በዓል አደረገ፥ በቀደሙት ዕለታት እንደሚሠዋው ሁሉ አድርጎ ሠዋባት። ያች ቀን ተጨምራለችና ስምዋን ተውሳክ አላት። ²⁵የቀደሙትንም ቀኖች በዓል ብሎ ጠራቸው። እንዲህም ትሆን ዘንድ እንዲህ ይታይ ነበር፥ ይህም በሰማይ ጽላት ተጽፎአል። ²⁶ስለዚህም ነገር በዓል ያደርጋት ዘንድ፥ በዓል በሚደረግባቸው በሰባቱ ቀኖች ላይ እርስዋን ይጨምር ዘንድ ተገለጠለት። በዓመት እንደሚመላለሱ ቀኖች ቍጥር በሰላም መሥዋዕት የሚሠዋባትና በዓል የሚደረግባት ቀን ናትና ስምዋ ተውሳክ ተባለ። ²⁷ይህ ወር በባተ በሃያ ሦስት ቀን በዚያ ሌሊት የርብቃ ሞግዚት ዲቦራ ሞተች። ከከተማውም በታች በወንዙ አጠገብ በግራር ሥር ቀበሩአት። ²⁸የዚያንም ወንዝ ስም “ፈለገ ዲቦራ” አለው። ግራሩንም “የዲቦራ ልቅሶ ግራር” አለው። ²⁹ርብቃም ተመልሳ ወደ አባቱ ወደ ይስሐቅ ቤት ሄደች። ያዕቆብም አባቱ እንደሚወድደው አድርጋ ለአባቱ ምግብ ታዘጋጅ ዘንድ የፍየሎችን ሙክቶችና የበጎችንም ሙክቶች፥ በጎችንም በእጅዋ ላከ። ³⁰ክብራታን ወደምትባል ሀገር እስኪቀርብ ድረስ ከእናቱ ኋላ ሄደ። በዚያም አደረ። ³¹ራሔልም ሌሊት ወንድ ልጅ ወለደች። በወለደችውም ጊዜ ተጨንቃ ነበርና ስሙን የኀዘኔ ልጅ አለችው። ³²አባቱ ግን ስሙን ብንያም አለው። በዚህ ኢዮቤልዩ በስድስተኛው ሱባዔ በአንደኛው ዓመት ስምንተኛው ወር በባተ በዐሥረኛው ቀን ራሔል ሞተች። ኤፍራታ በምትባል ምድርም በዚያ ተቀበረች፤ ይህችውም ቤተ ልሔም ናት። ³³ያዕቆብም በጎዳና ዳር ባለ በራሔል መቃብር ላይ ሐውልትን አቆመ። ³⁴ያዕቆብም ሄዶ በመግደላ ድራኤፍ ደቡብ አደረ ከሚስቱ ከልያም ጋር ወደ አባቱ ወደ ይስሐቅ ሄዱ። ³⁵በዐሥረኛው ወር መባቻ ሮቤል የአባቱ ዕቅብት የምትሆን የራሔልን አገልጋይ ባላንን ተሰውራ በውኃ ስትታጠብ አይቶ ወደዳት። ³⁶በሌሊትም ተሰውሮ ወደ ባላን ቤት ገባ፤ እርስዋም በቤቷ ብቻዋን በአልጋዋ ላይ ተኝታ አገኛት። ከእርስዋም ጋር ተኛ፥ በነቃችም ጊዜ እነሆ፥ ሮቤል ከእርስዋ ጋር በመኝታዋ ተኝቶ አየች። ³⁷እጅዋንም ዘርግታ ያዘችውና ጮኸች፤ ሮቤል እንደ ሆነም ዐወቀች። ከእርሱም የተነሣ አፈረች። ከእርሱም ላይ እጅዋን አነሣች። እርሱም ሸሸ። በዚህም ነገር ፈጽማ ታለቅስ ነበር፤ ለማንም ሰው አልተናገረችም። ³⁸ያዕቆብም መጥቶ በፈለጋት ጊዜ፥ “ሮቤል ስላሳደፈኝ ሌሊትም ስለደረሰብኝ ከአንተ ተለይቻለሁና ለአንተ የምገባ አይደለሁም፤ እኔ ግን እንቅልፍ ይዞኝ ነበር፤ ልብሴን ገልጦ ከእኔ ጋር እስኪተኛ ድረስ አላወቅሁትም ነበር” አለችው። ³⁹ከባላን ጋር ተኝቶአልና፥ የአባቱንም ኀፍረት ገልጦአልና ያዕቆብ በሮቤል ፈጽሞ ተቈጣ። ⁴⁰ሮቤል አሳድፎአታልና ከዚህ በኋላ ያዕቆብ ወደ እርስዋ አልቀረበም። የአባቱን ኀፍረት የገለጠ ሰው ሁሉ ርኩስ ነው፤ ነገሩ እጅግ ክፉ ነውና፥ በእግዚአብሔርም ፊት የተናቀ ነውና። ⁴¹ስለዚህ ነገር ሰው ከአባቱ ሚስት ጋር እንዳይተኛ፥ የአባቱንም ኀፍረት እንዳይገልጥ በሰማይ ጽላት ተጽፎአል፤ ርኩስም ስለ ሆነ ሞትን ይሙት። ⁴²ከአባቱ ሚስት ጋር የሚተኛ ሰው ጐስቋላ ነው። ሴትም ብትሆን ጐስቋላ ናት። በምድር ርኩስ ሥራን ሠርተዋልና። እርሱም እርስዋም ይሙቱ። በአምላካችን ፊት ለአገዛዝ በመረጠው ወገን መካከል ርኵሰት አይሁን። ⁴³ከአባቱ ሚስት ጋር የሚተኛ ሰው የአባቱን ኀፍረት ገልጦአልና የተረገመ ይሆን ዘንድ ዳግመኛ ተጽፎአል። ⁴⁴የእግዚአብሔር ወዳጆች ሁሉ፥ “ይሁን፥ ይሁን” አሉ። ⁴⁵አንተም ሙሴ ይህን ነገር ይጠብቁ ዘንድ የእስራኤልን ልጆች እዘዛቸው፥ ለሞት የሚያበቃ ፍርድ ነውና፥ የረከሰም ነውና። ⁴⁶ይህን ክፉ ሥራ ለሠራ ሰው ከመገደልና በድንጋይ ከመደብደብ፥ ከእግዚአብሔርም ሕዝብ መካከል ተለይቶ ከመጥፋት በቀር በኀጢአቱ ይቅርታና ስርየት የለውም፤ በእስራኤልም መካከል ይህን ሥራ የሚሠራ ማንኛውም ሰው የተናቀና የተጠላ ስለ ሆነ በምድር አንድ ቀን እንኳ መኖር አይገባውም። ⁴⁷ለእርስዋ ባልዋ አባቱ ያዕቆብ በሕይወት ሳለ ከአባቱ ዕቅብት ጋር ከተኛ በኋላ ለሮቤል ሕይወትና ስርየት ነበረው አይበሉ። ⁴⁸በዚያን ጊዜ ለሁሉ ሥርዐትና ሕግ፥ ፍርድም አልተሠራምና፤ ነገር ግን በዘመናችሁ የዘመናትና የቀናት ሕግ እንደ ዘለዓለም ሆኖ ለዘለዓለም ትውልድ ተሠርቶአል። ⁴⁹ለዚህም ሕግ የዘመን ፍጻሜ የለውም። በሕዝቡ መካከል ሁለቱ ሁሉ በአንድነት ይጠፉ ዘንድ፥ ይህችን ኀጢአት በሠሩባት ቀን ይገድሉአቸው ዘንድ ነው እንጂ ለኀጢአታቸው ምንም ስርየት የለውም። ⁵⁰አንተም ሙሴ ለእስራኤል ጻፍላቸው፤ ይጠብቁአት፤ እንደዚህ ያለ ሥራም አይሥሩ፤ ለሞት የሚያበቃ በደልንም አይበድሉ። ፊት አይቶ የማያዳላ፥ መማለጃን የማይቀበል እርሱ አምላካችን እግዚአብሔር እውነተኛ ፈራጅ ነውና። ⁵¹ይሰሙ ዘንድ፥ ይጠብቁም ዘንድ፥ ከእነርሱም ይለዩ ዘንድ ከምድር ፈጽመው እንዳይጠፉ ይህን የሥርዐት ነገር ንገራቸው። ዓለም በፈጣሪያችን ፊት ይህችን ኀጢአት ለሚሠሩአት ሰዎች ሁሉ የተጠላ፥ የተናቀና የተነቀፈ ነውና፥ በምድር ላይ ከሚሠሩት ከዝሙት የበለጠ ታላቅ ኀጢአት የለምና። ⁵²እስራኤል ለእግዚአብሔር የተለየ ወገን ነውና፥ ለአምላኩም የተለየ ወገን ነውና፥ የክህነትና የመንግሥት ወገን ነውና፥ ገንዘብም ነውና። በቅዱስ ሕዝብ መካከል እንዲህ ያለ ኀጢአት ሊታይ አይገባም። ⁵³በዚህ በስድስተኛው ሱባዔ በሦስተኛው ዓመት ያዕቆብና ልጆቹ ሄደው በአባቱ በይስሐቅና በእናቱ በርብቃ አቅራቢያ በአብርሃም ቤት አደሩ። ⁵⁴የያዕቆብም ልጆች ስማቸው ይህ ነው፤ መጀመሪያው ሮቤል ይባላል፤ ሁለተኛው ስምዖን ይባላል፤ ሦስተኛው ሌዊ ይባላል፤ አራተኛው ይሁዳ ይባላል፤ አምስተኛው ይሳኮር ይባላል፤ ስድስተኛው ዛብሎን ይባላል፤ እነዚህ የልያ ልጆች ናቸው። ⁵⁵የራሔልም ልጆች ዮሴፍና ብንያም ናቸው። ⁵⁶የባላንም ልጆች ዳንና ንፍታሌም ናቸው። ⁵⁷የዘለፋም ልጆች ጋድና አሴር ናቸው። ⁵⁸ልያ ለያዕቆብ የወለደቻት ሴት ልጅ ዲና ብቻ ናት። ሄደውም ለያዕቆብና ለርብቃ ሰገዱ። ⁵⁹ባዩአቸውም ጊዜ ያዕቆብንና ልጆቹን ሁሉ መረቁአቸው። የትንሹን ልጁን የያዕቆብን ልጆች አይቶአልና ይስሐቅ ፈጽሞ ደስ ብሎት መረቃቸው።

መጽሐፈ ኩፋሌ 23