Jubilees Chapter 21 - መጽሐፈ ኩፋሌ | EOTC Bible

¹በዚያም የያዕቆብን ልጅ ዲናን ወደ ሀገሩ ገዥ ወደ ኤውያዊው ሰው ወደ ኤሞር ልጅ ወደ ሴኬም ቤት ነጥቀው ወሰዱአት። ከእርስዋም ጋር ተኛ፤ አስነወራትም፤ እርስዋም የዐሥራ ሁለት ዓመት ትንሽ ልጅ ነበረች። ሚስትም ሆና ትሰጠው ዘንድ ከአባቷና ከወንድሞችዋ ማለደ። ²ያዕቆብም ተቈጣ። እኅታቸውንም ዲናን አስነውረዋታልና ልጆቹ በሰቂማ ሰዎች ተቈጡ፤ ከእነርሱም ጋር በተንኰል ተናገሩ፤ አታልለውም በዘበዙአቸው። ³ስምዖንና ሌዊ ድንገት ወደ ሰቂማ ገብተው በሰቂማ ሰዎች ሁሉ ቅጣትን አደረጉ። ⁴በውስጥዋም ያገኙትን ሰው ሁሉ ገደሉ። አንድ ሰው ስንኳን አላስቀሩም። ቈስለውም ሳሉ ሁሉን ገደሉ፤ እኅታቸውን ዲናን አስነውረዋልና። ⁵ከእንግዲህ ወዲህ ከዛሬ ጀምሮ የእስራኤልን ልጅ ለማስነወር እንዲህ አታድርጉ። በእስራኤል ኀፍረትን ስለአደረጉ የሰቂማን ሰዎች ሁሉ በሰይፍ ያጠፏቸው ዘንድ በሰማይ ጽላት በእነርሱ ቅጣት ተጽፎአልና። ⁶በሰይፍ ያጠፉአቸው ዘንድ፥ በእነርሱም ላይ ቅጣትን ያደርጉ ዘንድ፥ የእስራኤልን ድንግል ማስነወር በእስራኤል ዘንድ ከእንግዲህ ወዲህ እንዲህ እንዳይደረግ እግዚአብሔር በያዕቆብ ልጆች እጅ ጣላቸው። ⁷በእስራኤል ዘንድ ልጁንም ቢሆን፥ እኅቱንም ቢሆን ከአሕዛብ ልጆች ለተወለደ ሰው ሁሉ ይሰጥ ዘንድ የወደደ ሰው ቢኖር፥ ሞትን ይሙት። ኀጢአትን ሠርቶአልና፥ በእስራኤልም ዘንድ ኀፍረትን አድርጎአልና በድንጋይ ደብድበው ይግደሉት። ⁸ሴቲቱንም የአባቷን ወገን ስም አስነቅፋለችና በእሳት ያቃጥሏት፤ ከእስራኤልም ተለይታ ትጥፋ። እስራኤል ለእግዚአብሔር የተቀደሰ ነውና በምድር ትውልድ ዘመን ሁሉ በእስራኤል ዘንድ ሴሰኛ ኀጢአተኛም አይገኝ። ⁹ነውር የሠራ ሰው ሁሉ ሞትን ይሙት፤ በድንጋይም ይደብድቡት። ስለ እስራኤልም ልጆች ሁሉ በሰማይ ጽላት እንዲህ ተሠርቶአል፤ ተጽፎአልምና የእስራኤልን ልጅ የሚያስነውር ሁሉ ሞትን ይሙት፤ በድንጋይም ይደብድቡት። ¹⁰ለዚህም ሕግ የተወሰነ ዘመን የለውም፤ የሚተውበትም የለም። ልጁን ለጣዖት ሰጥቶአልና፥ ራሱንም ለማሳደፍ እግዚአብሔርን በድሎአልና በእስራኤል ሁሉ ዘንድ ልጁን ያስነወረ ሰው ይጠፋል እንጂ ይቅር የሚባልበት የለም። ¹¹አንተም ሙሴ! የእስራኤልን ልጆች እዘዛቸው። ከልጆቻቸውም ለአሕዛብ እንዳያጋቡ፥ ከአሕዛብም ልጆች እንዳያገቡ በእነርሱ ላይ አዳኝባቸው፤ በእግዚአብሔር ፊት የተናቀ ነውና። ¹²ስለዚህ ነገር የሕጉን ነገር፥ በዲና ላይ ያደረጉትን የሰቂማን ሰዎች ሥራ ሁሉ፥ የያዕቆብም ልጆች፥ “ለእኛ ስድባችን ነውና እኅታችንን ላልተገረዘ ሰው አንሰጥም” ብለው እንደ ተናገሩ ጻፍሁልህ። ¹³ልጃቸውን ለአሕዛብ ልጆች ለሚሰጡ፥ ከአሕዛብም ልጆች ሚስትን ለሚያገቡ ለእስራኤል ስድብ ነውና፥ ርኩስም ነውና፥ ለእስራኤልም የተናቀ ነውና። ¹⁴ከአሕዛብም ልጆች ሚስት ያለው፥ ከልጆቹም ከአሕዛብ ወገን ለተወለደ ሰው የሰጠ እስራኤል ከዚህ ኀጢአት አይነጻም። በመቅሠፍት ላይ መቅሠፍት፥ በመርገም ላይ መርገም፥ ቅጣትም፥ መቅሠፍትም፥ መርገምም ሁሉ ይመጣባታልና። ¹⁵ይህንም ነገር ቢያደርግ ኀጢአት ከሚሠሩ ከእነዚህ ወገኖች በዐይኖቹ አይቶ ቸል ቢል፥ የእግዚአብሔርንም ማደሪያ ከሚያጐሳቍሉ፥ የከበረ ስሙንም ከሚያሳድፉ ወገን አይቶ ቸል ቢል፥ ስለዚች ኀጢአትና ስለዚች ሁሉ በደል ሕዝቡ ሁሉ በአንድነት ይጠፋሉ። ¹⁶ፊት መመለስ የለም። ፊት አይቶ ማድላት የለም። በጎ መዓዛ አድርጎ ይቀበለው ዘንድ መሥዋዕቱንና ቀዳምያቱን፥ ስቡንና የሚጤሰውን ከእጁ መቀበል የለም። ¹⁷ወንድም ቢሆን፥ ሴትም ብትሆን፥ በእስራኤል ዘንድ ሰውነቱን በኀጢአት የሚያሳድፍ አይሁን። ስለዚህ ነገር ይህችን ምስክር በእስራኤል አሰማባቸው ብዬ አዘዝሁህ። ¹⁸በሰቂማና በልጆችዋ የተደረገውን፥ በሁለቱ በያዕቆብ ልጆች ለጥፋት እንደ ተሰጠች፥ ታመው ሳሉ እንዳጠፉአቸው፥ ጽድቅ ሆኖ እንደ ተቈጠረላቸው እይ። ¹⁹እነርሱም ለጽድቅ እንደ ተቈጠሩ የሌዊም ልጅ ለክህነት እንደ ተመረጠ፥ እኛ በዘመኑ ሁሉ እንዳገለገልን፥ ሌዋውያንም በእግዚአብሔር ፊት ያገለግሉ ዘንድ እንደ ተመረጡ እይ። እውነት ነገርን ይሠራ ዘንድ፥ ፍርድንም ይፈርድ ዘንድ፥ በእስራኤል ላይ በጠላትነት ከሚነሡ ብድራትን ይመልስ ዘንድ ቀንቶአልና ሌዊ ይባረክ፤ ልጆቹ ለዘለዓለም ይባረኩ። ²⁰በሰማይ ጽላት ምስክር ሊሆን ወደ ሁሉ አምላክ ጽድቅንና በረከትን እንዲህ ያቀርቡለታል። ሰው በሕይወት ሳለ የሠራውን ጽድቅ እናስባለን። በዓመት በዓመት በሚመላለሱ ጊዜያት ሁሉ እስከ ሺህ ትውልድ ድረስ ያቀርባሉ። በረከት ይመጣለታል፥ ከእርሱም በኋላ ለልጆቹ። ²¹በሰማይ ጽላት የእግዚአብሔር ወዳጅ ደግ ሰውም ተብሎ ተጻፈ። ይህን ሁሉ ነገር ጻፍሁልህ። ኀጢአት እንዳይሠሩ፥ ከሥርዐትም እንዳይተላለፉ፥ ይሠሩአት ዘንድ፥ ይጽፉአትም ዘንድ፥ የእግዚአብሔር ወዳጆችን ሁነው ይጽፉ ዘንድ፥ የተሠራላቸውን ቃል ኪዳን እንዳያፈርሱ ለእስራኤል ልጆች ትነግር ዘንድ አዘዝሁህ። ²²ቃል ኪዳኑንም ቢያፈርሱ፥ ከኀጢአት ሥራ ወገንም ሁሉ ቢሠሩ ግን ጠላቶች ሆነው በሰማይ ጽላት ይጻፋሉ፤ ከሕያዋንም መጽሐፍ ይደመሰሳሉ፤ የሚጠፉ ሰዎች በሚጻፉበትም መጽሐፍ ይጻፋሉ። ከምድር ላይ ከሚጠፉ ሰዎችም ጋር ይቈጠራሉ። ²³የያዕቆብም ልጆች ሰቂማን ባጠፉበት ቀን ጽድቅንና የቀና ሥራን እንደ ሠሩ፥ በኀጢአተኞችም ብድርን እንደ መለሱ በሰማይ ጽላት ተጻፈላቸው። ለበረከትም ተጻፉ። ²⁴እኅታቸውን ዲናንም ከሴኬም ቤት አወጡ። በሰቂማ ያለውንም ሁሉ፥ በጎቻቸውንም፥ ላሞቻቸውንም፥ አህዮቻቸውንም፥ ገንዘባቸውንም ሁሉ፥ መንጋቸውንም ሁሉ ማረኩ። ሁሉንም ወደ አባታቸው ወደ ያዕቆብ አመጡ። ²⁵በዚያ ከሚኖሩ ከከነዓናውያንና ከፍሪዛውያን የተነሣ ፈርቶአልና ሀገሩን ስላጠፉ ከእነርሱ ጋር ተነጋገረ። ²⁶በሰቂማ ዙሪያ ባሉ ሀገሮች ሁሉ የእግዚአብሔር መፈራት ሆነ። በእነርሱ ድንጋጤ ወድቆባቸዋልና የያዕቆብን ልጆች ለማሳደድ አልተነሡም። ²⁷በወሩ መባቻ ያዕቆብ ለቤተ ሰቡ ሁሉ፥ “ከኀጢአት ንጹሓን ሁኑ፤ ልብሳችሁንም ለውጡ” ብሎ ተናገረ። ²⁸“ከወንድሜ ከዔሳው ፊት በሸሸሁ ጊዜ ከእኔ ጋር ላለ፥ ወደዚህችም ሀገር በሰላም ለመለሰኝ ለእግዚአብሔር ወደ ጸለይሁበት ወደ ቤቴል ተነሥተን እንውጣ። ²⁹በመካከላችሁም ያሉትን እንግዶች አማልክት አርቁ። ልዩ የሆኑ አማልክትንም አጥፉአቸው፤ በጆሮአችሁ ያለውንም፥ በአንገታችሁም ያለውን ጌጥ አስወግዱ።” ³⁰ራሔል ከአባቷ ከላባ የሰረቀችውን ጣዖት፥ ገንዘብዋንም ሁሉ ለያዕቆብ ሰጠች። እርሱም አቃጠለው፤ ሰበረውም፤ አጠፋውም፤ በሰቂሞን ሀገር ባለ በዮርዳኖስም በታች ቀበረው።

መጽሐፈ ኩፋሌ 21