Jubilees Chapter 20 - መጽሐፈ ኩፋሌ | EOTC Bible

¹ያዕቆብ በአርባ አራተኛው ኢዮቤልዩ በሁለተኛው ሱባዔ በመጀመሪያው ዓመት ወደ ካራን ይሄድ ዘንድ ከዐዘቅተ መሐላ ወጣ። በተራራ ወዳለች ወደ ሎዛም ደረሰ። ይህችውም ቤቴል ናት። ²በዚህ ሱባዔ በመጀመሪያው ወር መባቻ በመሸ ጊዜ ወደ ቦታው ደረሰ። በዚያችም ሌሊት ከመንገዱ ወደ ምዕራብ አለፍ አለ። ፀሐይ ገብቶ ነበርና በዚያ ተኛ። ከዚያ ቦታ ድንጋዮችም አንድ ድንጋይ አምጥቶ በዚያ ዛፍ ሥር አኖረው። እርሱም ብቻውን ይሄድ ነበር። ³በዚያችም ሌሊት ተኝቶ ሳለ ሕልምን አየ። እነሆ፥ መሰላል በምድር ላይ ተተክላ ጫፍዋ እስከ ሰማይ ደርሶ፥ እነሆ፥ የእግዚአብሔር መላእክት ሲወጡባትና ሲወርዱባት፥ እነሆም፥ እግዚአብሔር በውስጥዋ ተቀምጦ አየ። ⁴ከያዕቆብም ጋር ተነጋገረ። እንዲህም አለ፥ “የአባትህ የአብርሃም አምላክ የይስሐቅም አምላክ እኔ ነኝ። ይህችን አንተ የተኛህባትን ምድር ለአንተ፥ ከአንተም በኋላ ለዘርህ እሰጣታለሁ። ዘርህም እንደ ባሕር አሸዋ ይሆናል። በምዕራብና በምሥራቅ፤ በሰሜንና በደቡብ ትበዛለህ። የአሕዛብም ሀገሮች ሁሉ በአንተና በዘርህ ይባረካሉ፥ ⁵እነሆ፥ እኔም ከአንተ ጋር እኖራለሁ፤ ሁልጊዜም እጠብቅሃለሁ። ያልሁህን ሁሉ እስካደርግልህ ድረስ አልለይህምና ከሄድህበት ወደዚህች ሀገር በሰላም እመልስሃለሁ።” ⁶ያዕቆብም ተኝቶ ነበር። እንዲህም አለ፥ “ይህ ቦታ በእውነት የእግዚአብሔር ቤት ነው፤ እኔ ግን አላወቅሁም ነበር” አለ ⁷እርሱም ፈራ እንዲህም አለ፥ “ይህ ቦታ ግሩም ነው፥ የእግዚአብሔር ቤት ነው እንጂ ምንም ተራ ቦታ አይደለም። ይህችም የሰማይ ደጃፍ ናት” አለ። ⁸ያዕቆብም ሲነጋ ገሥግሦ ተነሥቶ፥ በራስጌው ትራስ አድርጎ ያኖረውን ድንጋይ ወሰደ፤ ለምልክትም ሐውልት አድርጎ አቆመው፥ በራሱም ላይ ዘይትን አፈሰሰበት። ⁹የዚያንም ቦታ ስም ቤቴል አለው። ቀድሞ ግን የሀገሩ ስም ሎዛ ነበረ። ¹⁰ያዕቆብም ለእግዚአብሔር እንዲህ ብሎ ስእለት ተሳለ፤ “እግዚአብሔር ከእኔ ጋር ቢኖር፥ እኔ በምሄድባትም በዚህች መንገድ ቢጠብቀኝ፥ እበላ ዘንድ እንጀራን ቢሰጠኝ፥ እለብስም ዘንድ ልብስን ቢሰጠኝ፥ ወደ አባቴም ቤት በሰላም ብመለስ፥ እግዚአብሔር አምላኬ ይሆነኛል። ¹¹ይህም በዚህ ቦታ ለምልክት ሐውልት አድርጌ ያቆምሁት ድንጋይ የእግዚአብሔር ቤት ይሆናል፤ ከዚህም ከሰጠኸኝ ሁሉ እኔ ለአንተ ለአምላኬ ዐሥራት እሰጣለሁ።” ¹²እግሩንም አንሥቶ ወደ መስጴጦምያ ወደ ምሥራቅ ወደ ርብቃ ወንድም ወደ ላባ ተጓዘ። ¹³ከእርሱም ጋር ኖረ፤ ስለ ልጁ ስለ ራሔልም አንድ ሱባዔ ተገዛለት፤ በሦስተኛው ሱባዔ በመጀመሪያው ዓመት፥ “ስለ እርስዋ ለአንተ ሰባት ዓመት የተገዛሁላትን ሚስቴን ስጠኝ” አለው። ¹⁴ላባም ያዕቆብን፥ “እኔ ሚስትህን እሰጥሃለሁ” አለው። ላባም ሰርግ አደረገ፤ ትልቂቱን ልጁን ልያን ወስዶ ለያዕቆብ ሚስት ትሆነው ዘንድ ሰጠው፤ የምታገለግላት ባሪያውን ዘለፋንም ሰጣት። ¹⁵ያዕቆብ ግን ራሔል መስላዋለችና አላወቀም ነበር፤ ወደ እርስዋም ገባ፤ እርስዋ ግን እነሆ ልያ ነበረች። ¹⁶ያዕቆብም በላባ ተቈጣ። “የተገዛሁልህ ስለ ልያ ያይደለ፤ ስለ ራሔል አይደለምን? ለምን እንዲህ አደረግኸኝ? ለምንስ በደልኽኝ? ልጅህን ውሰድ፤ በእኔ ክፉ አድርገሃልና እኔ እሄዳለሁ” አለው። ¹⁷የልያ ዐይንዋ ልም ነበረና ያዕቆብ ከልያ ይልቅ ራሔልን ይወድ ነበር፤ ነገር ግን መልክዋ እጅግ መልካም ነበረ። ራሔል ግን ዐይነ መልካም ነበረች፤ መልክዋም ያማረ እጅግ ደመ ግቡ ነበረች። ¹⁸ላባም ያዕቆብን እንዲህ አለው፥ “እንዲህ አይደለም፤ በሀገራችን ታላቂቱ ሳለች ታናሽቱን መስጠት የለም። ይህንም ማድረግ አግባብ አይደለም። ታላቂቱ ሳለች ታናሽቱን ልጁን የሚሰጥ እንደሌለ በሰማይ ጽላት እንዲህ ታውቆአል፤ ተጽፎአልም፤ ታላቂቱን ልጅ አስቀድሞ ይሰጣል። ከእርስዋም በኋላ ታናሽቱን ይሰጣልና። ¹⁹እንዲህ በሚያደርግም ሰው ስለ እርሱ በደልን በሰማይ ጽላት ይጽፉበታል። ²⁰ይህ ሥራ በእግዚአብሔር ፊት ክፉ ነውና ይህን ሥራ የሚሠራ ሰው የሚጸድቅ አይደለም። ²¹አንተም ለእስራኤል ልጆች፦ እጅግ ክፉ ነውና ይህን ነገር እንዳያደርጉ፤ አስቀድመው ታላቂቱን ሳይሰጡ ታናሽቱን እንዳይሰጡ እዘዝ። ²²ላባም ያዕቆብን፥ “የዚህች የሰርግዋ በዓል ሰባቱ ቀን ይለፍ። ዳግመኛም ሰባት ዓመት ትገዛልኝ ዘንድ፥ በመጀመሪያው ሱባዔ እንዳደረግህ በጎችን ትጠብቅልኝ ዘንድ ራሔልን እሰጥሀለሁ” አለው። ²³የልያ ሰርግ በዓል ሰባቱ ቀን በአለፈ ጊዜ ሁለተኛ ሰባት ዓመት ይገዛለት ዘንድ ላባ ለያዕቆብ ራሔልን ሰጠው። ለራሔልም የዘለፋን እኅት ባላን አገልጋይ ትሆናት ዘንድ ሰጣት። ልያ በብላሽ ተሰጥታለችና ስለ ራሔል ዳግመኛ ሰባት ዓመት ተገዛ። ²⁴እግዚአብሔርም የልያን ማኅፀን ከፈተ፤ ፀነሰች፤ ለያዕቆብም ወንድ ልጅን ወለደች፤ በሦስተኛው ሱባዔ በመጀመሪያው ዓመት በዘጠነኛው ወር በዐሥራ አራተኛው ቀን ስሙን ሮቤል አለው። ²⁵እግዚአብሔርም ልያ እንደምትጠላ፥ ራሔል ግን እንደምትወደድ አይቶአልና የራሔል ማኅፀን ተዘጋ። ²⁶ያዕቆብም ዳግመኛ ወደ ልያ ገባ፤ ፀነሰች፤ ሁለተኛም ወንድ ልጅን ወለደችለት፤ ስሙንም በዐሥረኛው ወር በሃያ አንደኛው ቀን ስምዖን አለው። ²⁷በዚህ ሱባዔ በሦስተኛው ዓመት ያዕቆብ ዳግመኛ ወደ ልያ ገባ፤ ፀነሰች፥ ሦስተኛ ወንድ ልጅንም ወለደችለት፤ በመጀመሪያው ወር መባቻ ስሙን ሌዊ አለው። ²⁸በዚህ ሱባዔ በስድስተኛው ዓመት ያዕቆብ ዳግመኛ ወደ ልያ ገባ፤ ፀነሰች፤ አራተኛ ወንድ ልጅንም ወለደችለት፤ በአራተኛው ሱባዔ በሦስተኛው ወር በዐሥራ አምስተኛው ቀን በመጀመሪያው ዓመት ስሙን ይሁዳ አለው። ²⁹እርስዋ አትወልድም ነበርና በዚህ ሁሉ ራሔል በልያ ትቀና ነበር። ያዕቆብንም፥ “ልጅ ስጠኝ” አለችው። ³⁰ያዕቆብም፥ “የማኅፀንሽን ፍሬ የከለከልሁሽ እኔ ነኝን? እኔ አስተውሁሽን?” አላት። ³¹ራሔልም ልያ ለያዕቆብ አራት ልጆች ሮቤልንና ስምዖንን፥ ሌዊንና ይሁዳን እንደ ወለደች ባየች ጊዜ፥ “ወደ ባሪያዬ ወደ ባላን ግባ፤ ትፀንሳለች፤ ወንድ ልጅንም ትወልድልኛለች” አለችው። ³²ያዕቆብም ወደ ባላን ገባ፤ እርስዋም ፀነሰች፤ ወንድ ልጅንም ወለደችለት፤ በሦስተኛው ሱባዔ በስድስተኛው ዓመት በስድስተኛው ወር በዘጠነኛው ቀን ስሙን ዳን አለው። ³³ያዕቆብም ዳግመኛ ወደ ባላን ገባ፤ እርስዋም ፀነሰች፤ ለያዕቆብም ዳግመኛ ወንድ ልጅን ወለደችለት። በአራተኛው ሱባዔ በሁለተኛው ዓመት በሰባተኛው ወር በአምስተኛው ቀን ራሔል ስሙን ንፍታሌም አለችው። ³⁴ልያም እንደ መከነች፥ ልጅም እንደማትወልድ በአየች ጊዜ እርስዋ በራሔል ቀናች፤ እርስዋም አገልጋይዋን ዘለፋን ለያዕቆብ ሚስት ትሆነው ዘንድ ሰጠችው። እርስዋም ጸነሰች፤ ወንድ ልጅንም ወለደችለት። በአራተኛው ሱባዔ በሦስተኛው ዓመት በስምንተኛው ወር በዐሥራ ሁለተኛው ቀን ስሙን ጋድ አለችው። ³⁵ዳግመኛም ወደ እርስዋ ገባ፤ እርስዋም ፀነሰች፤ ሁለተኛ ወንድ ልጅንም ወለደችለት፤ በአራተኛው ሱባዔ በአምስተኛው ዓመት በዐሥራ አንደኛው ወር በሁለተኛው ቀን ልያ ስሙን አሴር አለችው። ³⁶ያዕቆብም ወደ ልያ ገባ፤ እርስዋም ፀነሰች፤ ለያዕቆብም ወንድ ልጅን ወለደችለት፤ በአራተኛው ሱባዔ በአራተኛው ዓመት በአምስተኛው ወር በአራተኛው ቀን ስሙን ይሳኮር አለችው፤ ለሞግዚትም ሰጠችው። ³⁷ያዕቆብም ዳግመኛ ወደ እርስዋ ገባ፤ ፀነሰች፤ ወንድና ሴት ሁለት ልጆችን ወለደችለት። በአርባ አራተኛው ኢዮቤልዩ በስድስተኛው ሱባዔ በሰባተኛው ዓመት በሰባተኛው ወር የወንዱን ስም ዛብሎን አለችው፤ የሴቲቱን ስም ዲና አለቻት። ³⁸እግዚአብሔርም ራሔልን ይቅር አላት፤ ማኅፀንዋም ተከፈተ፤ ፀነሰችም ወንድ ልጅንም ወለደች፤ በአራተኛው ሱባዔ በስድስተኛው ዓመት በአራተኛው ወር መባቻ ስሙን ዮሴፍ አለችው። ³⁹ዮሴፍም በተወለደ ጊዜ ያዕቆብ ላባን፥ “ሚስቶችንና ልጆችን ስጠኝ፤ ወደ አባቴ ወደ ይስሐቅ ልሂድ፤ ስለ ሁለቱ ልጆችህ ለአንተ የተገዛሁላቸውን ዘመኖች ፈጽሜአለሁና ቤት እሠራለሁ፤ ወደ አባቴም ቤት እሄዳለሁ” አለው። ⁴⁰ላባም ያዕቆብን፥ “በደመወዝህ ከእኔ ጋር ተቀመጥ፤ ዳግመኛም መንጋዎችን ጠብቅልኝ፤ ደመወዝህንም ውሰድ፤” አለው። ⁴¹አመድማ፥ ዥንጕርጕር፥ ነጭ ሆኖ የተወለደው ደመወዝ ሊሆነው ከፍየሉ ጠቦትና ከበጉ ጠቦት፥ በጉን ሁሉ ደመወዝ ይሰጠው ዘንድ እርስ በርሳቸው ተዋዋሉ። ⁴²በጎቹም ሁሉ ምልክት ያለውን ሁሉ አመድማውን፥ ዥንጕርጕሩን ይወልዱ ጀመር። ዳግመኛም በጎቹ በእነዚያ አምሳል ይወልዱ ጀመር። ምልክት ያለው ሁሉ ለያዕቆብ፥ ምልክት የሌለውም ለላባ ሆነ። ⁴³የያዕቆብም ገንዘቡ እጅግ በዛ፤ ላሙንና በጉን፥ አህያውንና ግመሉን ገዛ። ወንድ ልጅንና ሴት ልጅን ወለደ። ⁴⁴ላባና ልጆቹም በያዕቆብ ቀኑበት። ላባም በጎቹን ከእርሱ ሰበሰበ፤ በክፉ አስተያየትም ይመለከተው ጀመር። ⁴⁵ራሔልም ዮሴፍን ከወለደች በኋላ እንዲህ ሆነ፤ ላባ በጎቹን ይሸልት ዘንድ ሄደ። የሦስት ቀን ጎዳና ያህል ከእርሱ ርቀው ነበሩ። ⁴⁶ያዕቆብም ላባ በጎቹን ይሸልት ዘንድ እንደሚሄድ አይቶ ልያንና ራሔልን ጠርቶ ከእርሱ ጋር ወደ ከነዓን ይመጡ ዘንድ ከልባቸው የሚገባ ነገር ነገራቸው። በሕልም ያየውን ሁሉ፥ ወደ አባቱም ቤት ይመለስ ዘንድ የነገረውን ሁሉ ነግሮአቸዋልና። ⁴⁷እነርሱም፥ “ወደምትሄድበት ቦታ ሁሉ ከአንተ ጋር እንሄዳለን” አሉት። ⁴⁸ያዕቆብም የአባቱን የይስሐቅን አምላክ የአያቱን የአብርሃምን አምላክ አመሰገነው። ⁴⁹ተነሥቶም ሚስቶቹንና ልጆቹን በበቅሎ አስቀመጠ፤ ገንዘቡንም ሁሉ ያዘ። ወንዙንም ተሻግሮ ወደ ገለዓድ ምድር ደረሰ። ⁵⁰ያዕቆብም ለላባ አሳቡን ሰወረው፤ አልነገረውም። በአራተኛው ሱባዔ በሰባተኛው ዓመት በመጀመሪያው ወር በሃያ አንደኛው ቀን ያዕቆብ ወደ ገለዓድ ተመለሰ። ላባም በኋላው ተከተለው። ⁵¹በሦስተኛው ወር በዐሥራ ሦስተኛው ቀን ያዕቆብን በገለዓድ ተራራ አገኘው። በሕልም ሌሊት ተናግሮታልና ላባ በያዕቆብ ላይ ክፉ ነገርን ያደርግ ዘንድ እግዚአብሔር አላሰናበተውም፤ ላባም ለያዕቆብ ነገረው። ⁵²በዚያም ወር በዐሥራ አምስተኛው ቀን ያዕቆብ ለላባ፥ ከእርሱም ጋር ለመጡ ሰዎች ሁሉ ፍሪዳ አረደ። ⁵³አንዱም አንዱን በተንኰል እንዳይፈልገው በዚያች ቀን በገለዓድ ተራራ ያዕቆብ ለላባ ማለለት፤ ላባም ለያዕቆብ ማለለት። በዚያም ምስክር ይሆን ዘንድ ኮረብታን ሠራ፤ ስለዚህም የዚያ ቦታ ስም “ፍስሐተ ስምዕ” ተባለ፤ ⁵⁴ቀድሞ የገለዓድ ምድር የራፋኢም ምድር ተብሎ ይጠራ ነበር፤ የራፋኢም ምድር ነበረና። ቁመታቸው ዐሥር ክንድ፥ ዘጠኝ ክንድም፥ ሰባት ክንድም፥ ስምንት ክንድም የሚሆኑ የራፋኢም ልጆች ተወለዱ። መኖሪያቸውም ከአሞን ልጆች ሀገር ጀምሮ እስከ ኤርሞን ተራራ ድረስ ነበር። ⁵⁵የመንግሥታቸውም ከተማ ቆሬናኤምና አስጣሮስ፥ አድራኦና ሜሱር፥ ቢዖንም ነበሩ። እነርሱ እጅግ ክፉዎች ነበሩና ከክፉ ሥራቸው የተነሣ እግዚአብሔር አጠፋቸው። ⁵⁶ስለ እነርሱ ፋንታ ክፉ ኀጢአተኛ የሚሆን አሞሬዎን በሀገራቸው ኖረ። ዛሬ የእነርሱን ኀጢአት ሁሉ የፈጸመ ሰው የለም። ከዚህም በኋላ በምድር የዘመን ብዛት የላቸውም። ⁵⁷ያዕቆብም ላባን አሰናበተው፤ ወደ ምሥራቅ ምድር መስጴጦምያ ሄደ። ያዕቆብም ወደ ገለዓድ ምድር ተመለሰ። በዘጠነኛው ወር ከወሩም በዐሥራ አንደኛው ቀን ኢያቦቅን ተሻገረ። በዚያም ቀን ወንድሙ ዔሳው ወደ እርሱ ደረሰና ተወቃቀሱ። ⁵⁸ከእርሱም ተለይቶ ወደ ሰዒር ምድር ሄደ። ያዕቆብ ግን በድንኳን አደረ። ⁵⁹በዚህ ኢዮቤልዩ በአምስተኛው ሱባዔ በመጀመሪያው ዓመት ዮርዳኖስን ተሻግሮ በዮርዳኖስ ማዶ አደረ። በኮረብታው አጠገብ ከአለ ባሕር ጀምሮ እስከ ዶታንና እስከ ቤተ ሶን ድረስ፥ እስከ ዖመ አቅራቢትም ድረስ በጎቹን ያሰማራ ነበር። ለአባቱ ለይስሐቅም ከገንዘቡ ልብሱንና ምግቡን፥ ሥጋውንና መጠጡን፥ ወተቱንና ቅቤውን፥ ዳቦውንም፥ ከቆላውም ተምር ሁሉ ይሰድ ነበር። ⁶⁰ለእናቱ ለርብቃም በዐሥራ ሁለቱ ወር ጊዜዎች መካከል፥ በዘርና በአዝመራ መካከል፥ በበልግና በመከር፥ በክረምትና በበጋ መካከል በዓመት አራት ጊዜ ወደ አብርሃም ድንኳን ይልክላት ነበር። ⁶¹ይስሐቅም ከዐዘቅተ መሐላ ተመልሶ ወደ አባቱ ወደ አብርሃም ድንኳን ወጥቶ ነበረና፤ ከልጁ ከዔሳው ተለይቶ በዚያ ኖረ። ⁶²ያዕቆብም ወደ መስጴጦምያ በሄደ ጊዜ ዔሳው ማአሊትን ሚስት አድርጎ አገባ። ይህችውም የይስማኤል ልጅ ናት። የአባቱን መንጋዎች ሁሉና ሚስቶቹንም ሰበሰበ። ⁶³ወጥቶም በሴይር ተራራ ኖረ። አባቱን ይስሐቅንም በዐዘቅተ መሐላ ብቻውን ተወው። ⁶⁴ይስሐቅም ከዐዘቅተ መሐላ ወጥቶ በኬብሮን ተራራ በአባቱ በአብርሃም ግንብ ኖረ። ⁶⁵ከዚያም ያዕቆብ ለእናቱና ለአባቱ ሁሉን ይሰድ የነበረውን በየጊዜውም የፈለጉትን ሁሉ ይልክ ነበር። ⁶⁶ያዕቆብንም በፍጹም ልቡናቸው፥ በፍጹም ነፍሳቸውም ይመርቁት ነበር። በስድስተኛው ሱባዔ በመጀመሪያው ዓመት ወደ ሰቂማ ምሥራቅ ወደ ሳሌም በአራተኛው ወር በሰላም ወጣ።

መጽሐፈ ኩፋሌ 20