Esther Chapter 9 - መጽሐፈ አስቴር | EOTC Bible

¹አዳር በሚባለውም በዐሥራ ሁለተኛው ወር ከወሩም በዐሥራ ሦስተኛው ቀን ንጉሡ የጻፈው ደብዳቤ ደረሰ። ²በዚያችም ቀን የአይሁድ ጠላቶች ጠፉ። ስለፈሩአቸውም አይሁድን የሚቃወም ሰው አልነበረም። ³መርዶክዮስን መፍራትም በላያቸው ስለ ወደቀ በየሀገሩ የነበሩ አዛውንትና ሹሞች፥ አለቆችም፥ የንጉሡም ጸሓፊዎች ሁሉ አይሁድን አከበሩ። ⁴መርዶክዮስ በመንግሥቱ ሁሉ ይከበር ዘንድ የንጉሡ ደብዳቤ ያስገድድ ነበርና፤ ⁵አይሁድም ጠላቶቻቸውን ሁሉ በሰይፍ እየመቱ ገደሉአቸው፤ አጠፉአቸውም፤ በሚጠሉአቸውም ላይ እንደ ወደዱ አደረጉባቸው። ⁶አይሁድም በሱሳ ከተማ አምስት መቶ ያህል ሰዎችን ገደሉ፤ አጠፉም። ⁷ፈርሰኔስ፥ ደልፎን፥ ፋስጋ፤ ⁸ፋርዳታ፥ በርያ፥ ሰርበካ፤ ⁹መርመሲማ፥ ሩፋዮስ፥ አርሳዮስ፥ ዛቡታዮስ የሚባሉትን፥ ¹⁰የቡጊያዊው የሐመዳቱን ልጅ የአይሁድን ጠላት የሐማን ዐሥሩን ልጆች ገደሉ፤ በዚያም ቀን ገንዘባቸውን ሁሉ ዘረፉ። ¹¹በሱሳ ከተማ የተገደሉት ሰዎች ቍጥርም ወደ ንጉሡ ተላለፈ። ¹²ንጉሡም ንግሥቲቱን አስቴርን፥ “አይሁድ በሱሳ ከተማ አምስት መቶ ሰዎችን ገደሉ፤ አጠፉአቸውም፤ በቀሩትስ በንጉሡ ሀገሮች እንዴት አድርገው ይሆን? እንግዲህስ ይደረግልሽ ዘንድ የምትፈልጊው ምንድን ነው?” አላት። ¹³አስቴርም፥ “አይሁድ ነገ ደግሞ እንዲሁ እንዲያደርጉ፥ ዐሥሩንም የሐማ ልጆች በግንድ ላይ እንዲሰቅሉ ይፈቀድላቸው፤” አለች። ¹⁴ንጉሡም ይህ ይደረግ ዘንድ ፈቀደ፤ በከተማ ለሚኖሩ አይሁድም የሐማን ልጆች አስከሬን ይሰቅሉ ዘንድ አዘዘ። ¹⁵አይሁድም አዳር በሚባለው ወር በዐሥራ አራተኛው ቀን በሱሳ ተሰብስበው ሦስት መቶ ያህል ሰዎችን ገደሉ፤ ነገር ግን ንብረታቸውን አልዘረፉም። ¹⁶የቀሩትም በንጉሡ ሀገር ያሉ አይሁድ ተሰብስበው እርስ በርሳቸው ተረዳዱ፤ ከጠላቶቻቸውም ዐረፉ፤ ከሚጠሉአቸውም አዳር በሚባለው ወር በዐሥራ ሦስተኛው ቀን ዐሥራ አምስት ሺህ ገደሉ፤ ነገር ግን የዘረፉት የለም። ¹⁷በዚያም ወር በዐሥራ አራተኛው ቀን ዐረፉ፤ ያችንም ቀን ከግብዣና ከደስታም ጋር የዕረፍት ቀን አደረጓት። ¹⁸በሱሳ ከተማ የነበሩት አይሁድ ግን በዐሥራ አራተኛው ቀን ተሰብስበው ዐረፉ፤ በዐሥራ አምስተኛውም ቀን በዓልና ደስታ አደረጉ። ¹⁹ስለዚህ በገጠር መንደሮች ተበታትነው የሚኖሩ አይሁድ አዳር በሚባለው ወር ዐሥራ አራተኛውን ቀን የደስታና የመጠጥ፥ የመልካምም ቀን፥ እርስ በርሳቸውም ስጦታ የሚሰጣጡበት ቀን ያደርጉታል።

²⁰መርዶክዮስም ይህን ነገር በመጽሐፍ ጻፈው፤ በንጉሡም በአርጤክስስ ሀገሮች ሁሉ፥ በሩቅም በቅርብም ላሉት ሁሉ ላከው። ²¹በየዓመቱም አዳር በሚባለው ወር ዐሥራ አራተኛውንና ዐሥራ አምስተኛውን ቀን የደስታ ቀኖች አድርገው ይጠብቋቸው ዘንድ፥ ²²በእነዚያ ወራት አይሁድ ከጠላቶቻቸው ዕረፍትን አግኝተዋልና፥ አዳር የተባለውም ወር ከኀዘን ወደ ደስታ፥ ከልቅሶም ወደ መልካም ቀን የተለወጠበት የግብዣና የደስታም ቀን፥ ለወዳጆቻቸውና ለድኆችም ስጦታ የሚልኩበት ቀን ነውና። ²³አይሁድም መርዶክዮስ እንደ ጻፈላቸው ተቀበሉት፤ ²⁴መቄዶንያዊው የሐመዳቱ ልጅ ሐማም አይሁድን በተንኰል ያጠፋ ዘንድ ተዋግቶአቸው ነበር፤ ዐዋጅም ዐውጆ ነበር፤ ዕጣም ጥሎ ነበር። ²⁵እንዲሁም ወደ ንጉሡ ገብቶ መርዶክዮስን ይሰቅለው ዘንድ ጠይቆ ነበር፤ ነገር ግን በአይሁድ ላይ የተተነኰለው ክፉ ተንኰል በራሱ ላይ ተመለሰ። እርሱም ልጆቹም ተሰቀሉ። ²⁶ስለዚህም እነዚህ ቀኖች ዕጣ ስለ ተጣለባቸው ፉሪም ተባሉ። በዚችም ደብዳቤ ስለ ተጻፈው ቃል ሁሉ፥ በውስጥዋም ስለ ተገኘውና ስላገኙአቸውም ነገሮች ሁሉ በቋንቋቸው ፉሪም ይሏቸዋል። ²⁷አይሁድም ለራሳቸው፥ ለዘራቸውና ከእነርሱ ጋር አንድ ለሚሆኑ ሁሉ ከዚህ ሥርዐት እንዳይወጡ የተጻፈውን ተቀበሉ። እነዚህም ቀኖች በየትውልዳቸውና በየወገናቸው፥ በየሀገራቸውም፥ በየከተማቸውም ለዘለዓለም የታሰቡና የተከበሩ ይሆናሉ። ²⁸እነዚህም የፉሪም ቀኖች ሁልጊዜ ይከበራሉ፤ መታሰቢያቸውም በትውልድ ሁሉ አይደመሰስም። ²⁹የአሚናዳብም ልጅ ንግሥቲቱ አስቴርና አይሁዳዊው መርዶክዮስ ያደረጉትን ሁሉ ጻፉ። የፉሪምንም ደብዳቤ አጸኑ። ³⁰ደብዳቤዎቹንም በአርጤክስስ መንግሥት በመቶ ሃያ ሰባቱ ሀገሮች ወዳሉ አይሁድ ሁሉ በሰላምና በእውነት ቃል ላኩ። ³¹እነዚህንም የፉሪም ቀኖች መርዶክዮስና ንግሥቲቱ አስቴር ለራሳቸው የጾም ቀን አደረጓቸው፤ በሕይወታቸውና በምክራቸውም ማሉ። ³²አስቴርም ይህን ነገር በትእዛዝ አጸናችው፤ ለመታሰቢያም ተጻፈ።

መጽሐፈ አስቴር 9

አይሁድ ጠላቶቻቸውን እንደ ተበቀሉ

የፉሪም በዓል