Esther Chapter 8 - መጽሐፈ አስቴር | EOTC Bible

¹በዚያም ቀን ንጉሡ አርጤክስስ የጠላት የሐማን ንብረት ሁሉ ለንግሥቲቱ ለአስቴር ሰጠ። ንጉሡም መርዶክዮስን ጠራው፤ አስቴር በቤቱ እንዳደገች ነግራው ነበርና። ²ንጉሡም ከሐማ ያወለቀውን ቀለበቱን አወጣ፤ ለመርዶክዮስም ሰጠው። አስቴርም በሐማ ንብረት ሁሉ ላይ መርዶክዮስን ሾመችው። ³አስቴርም እንደ ገና ለንጉሡ ነገረችው፤ በእግሩም ላይ ወድቃ የሐማን ክፋትና በአይሁድ ላይ የተተነኰለውን ተንኰል ይሽር ዘንድ ለመነችው። ⁴ንጉሡም የወርቁን ዘንግ ለአስቴር ዘረጋላት፤ አስቴርም ተነሥታ በንጉሡ ፊት ቆመች። ⁵እንዲህም አለች፥ “ንጉሥ ሆይ፥ ደስ ቢያሰኝህ በፊትህም ሞገስ አግኝቼ እንደ ሆነ በመንግሥትህ ሁሉ ያሉትን አይሁድ ለማጥፋት ሐማ የጻፋቸው ደብዳቤዎች ሁሉ ይገለበጡ ዘንድ ላክ። ⁶እኔ በሕዝቤ ላይ የሚወርደውን ክፉ ነገር አይ ዘንድ እንዴት እችላለሁ? ወይስ ከዘመዶች ጥፋት በኋላ እኖር ዘንድ እንዴት እችላለሁ?” ⁷ንጉሡም ንግሥቲቱን አስቴርን አላት፥ “እነሆ የሐማን ገንዘብ ሁሉ ፈጽሜ ሰጠሁሽ፤ እርሱንም እጆቹን በአይሁድ ላይ ስለዘረጋ በግንድ ላይ ሰቀልሁት፤ እንግዲህ ምን ትፈልጊያለሽ? ⁸በንጉሡም ስም የተጻፈውንና በንጉሡ ቀለበት የታተመውን እንቢ የሚል የለምና እናንተ ደግሞ ደስ የሚያሰኛችሁን በእኔ ስም ጻፉ፤ በቀለበቴም አትሙ።” ⁹በዚያም ዓመት ኔሳን በተባለው በመጀመሪያው ወር ከወሩም በሃያ ሦስተኛው ቀን የንጉሡ ጸሓፊዎች ተጠሩ፤ ንጉሡም እንዳዘዘው ሁሉ ከሕንድ ጀምሮ እስከ ኢትዮጵያ ድረስ በመቶ ሃያ ሰባቱ ሀገሮች ላሉ ሹሞችና አለቆች፥ አዛውንትም፥ ለእያንዳንዱም ሀገር እንደ ጽሕፈቱ፥ ለእያንዳንዱም ሕዝብ እንደ ቋንቋው፥ ለአይሁድም እንደ ጽሕፈታቸውና እንደ ቋንቋቸው ተጻፈ። ¹⁰በንጉሡም በአርጤክስስ ስም ጻፉ፤ በንጉሡም ቀለበት አትመው ደብዳቤውን በመልእክተኞች ላኩ። ¹¹በከተሞች ሁሉ እንደ ሕጋቸው ያደርጉ ዘንድ፥ እርስ በርሳቸውም ይረዳዱ ዘንድ ጠላቶቻቸውንና የሚነሡባቸውን ሁሉ እንደ ወደዱ ይቋቋሙ ዘንድ አዘዛቸው። ¹²ይህም አዳር በሚባለው በዐሥራ ሁለተኛው ወር በዐሥራ ሦስተኛው ቀን በንጉሡ በአርጤክስስ ሀገሮች ሁሉ በአንድ ቀን እንዲሆን ነው።

¹³የዐዋጁም ደብዳቤ ግልባጭ የሚከተለው ነው። ¹⁴በቸርነትና ሹመትን ፈጥኖ በመስጠት ከሚጠቅሙአቸው ክብርን ያገኙ ብዙዎች ትዕቢትን አበዙ። ¹⁵ክፉ የሚያደርጉትም ለእኛ በሚገዙት ላይ ብቻ አይደለም፤ ነገር ግን ጥጋባቸውን መታገሥ ባለመቻላቸው የሚጠቅሙአቸውን ይተናኰሉ ዘንድ ያስባሉ። ¹⁶የሰውን ምስጋና የሚክዱ ብቻ አይደሉም፤ ዳግመኛም አዲሶች ባለጸጎች እንደ መሆናቸው በመታበይ ራሳቸውን ከፍ ያደርጋሉ። ሁልጊዜም ሁሉን ከሚመለከት፥ ኀጢአትንም ከሚጠላ ከእግዚአብሔር ፍርድ የሚያመልጡ ይመስላቸዋል። ¹⁷ነገር ግን ብዙ ጊዜ የሚገዙልን በመስማማት ይገዙልንና ያገለግሉን ዘንድ የታመናቸው የተዘጋጁ እነዚያ ሰዎች ንጹሕ ደምን በማፍሰስ አንድ ሆኑ፤ ¹⁸ሐሰትንም በመምከር በየውሀትና በፀጥታ የምትኖር መንግሥትን አታለው የሚያስጨንቅ መከራን መከሩባቸው። ¹⁹ነገር ግን በማሰብ ይቀራል፤ ይኸውም ከእኛ አስቀድሞ ከነበሩ ሰዎች ይልቅ እንድናበልጥ አይደለም፤ ሕጉን እንደ ተቀበልነው እንዲሁ ጸንተን እንኖራለን፤። ²⁰ነገር ግን ከዚህ በኋላ ያለ ሕግ የተደረገውን ነገር እንመረምራለን፤ በሚገባ መፍረድ የማይችሉ፥ የማይገባቸውን ክብር አግኝተዋልና። ²¹ከዚህም በኋላ መንግሥታችን ያለ ሁከት ጸንታ የምትኖርበትን፥ የሕዝቡም ኑሮ የሚቃናበትን አስበን፥ የተገለጠውንም ሁልጊዜ በየዋህነት እንፈርዳለን። ²²መቄዶናዊ የሐመዳቱ ልጅ ሐማ ግን ከእውነት ነገር የወጣና የፋርስ ደም የሌለው እንደ መሆኑ ከእኛ ቸርነት ርቆአል፤ በእኛ ዘንድም ሲኖር ባዕድ ሁኖአል። ²³እርሱም በሕዝቡ ላይ ሁሉ ሹመትንና ባለሟልነትን አገኘ። አባታችን እስክንለውና የመንግሥታችንም ዙፋን ሁለተኛ እስክንለው የወደደውን ሹመት አገኘ። ²⁴ዳግመኛም ይህ አልበቃውም፤ ነገር ግን ታብዮ ከመንግሥታችን ያወጣን ዘንድ፥ ሰውነታችንንም ወደ ጥፋት ይወስድ ዘንድ አሰበ። ²⁵በሁሉ የሚጠቅመንንና የሚያድነንን፥ የሚያገለግለንንም መርዶክዮስን፥ ያለ ነቀፋ የመንግሥታችን ተባባሪ የምትሆን አስቴርንም በብዙ ተንኰል፥ ነገርንም በማሳመር ከወገኖቻቸው ሁሉ ጋር ያጠፋቸው ዘንድ ለመነ። ²⁶ስለዚህም ነገር በየዋህነት እንኖራለንና የፋርስን መንግሥት አገኘን፤ እሱ ግን ወደ መቄዶን ያዛውረው ዘንድ አሰበ። ²⁷“እኛ ግን ያጠፋቸው ዘንድ የፈለጋቸውን አይሁድን በክፋት እንዳይደሉ፥ ነገር ግን በእውነተኛ ሕጋቸው እንደሚኖሩ አገኘናቸው። ²⁸በእውነት ለእኛና ከእኛ በፊት ለነበሩ እንደ ልባችን ቅንነት መንግሥትን ያዘጋጀልን የልዑሉና የታላቁ የሕያው እግዚአብሔር ልጆች ናቸው። ²⁹ነገር ግን የሐመዳቱ ልጅ የሆነ የሐማን ትእዛዝ፥ የላከውንም ደብዳቤ ቃል ባትሰሙ መልካም ነገር ታደርጋላችሁ። ³⁰እርሱ ራሱ ይህን ነገር አስቦበታልና፥ ሁሉን የሚገዛ እግዚአብሔር ፈጥኖ ፍዳውን ስለ ከፈለው ከወገኖቹ ሁሉ ጋር በሱሳ ከተማ አደባባይ ተሰቀለ። ³¹ይህችንም ደብዳቤ በግልጥ ዘርግታችሁ በቦታው ሁሉ አሳዩአት፤ አይሁድንም በሕጋቸው ጸንተው ይኖሩ ዘንድ ተዉአቸው። ³²ዐሥራ ሁለተኛው ወር አዳር በባተ በዐሥራ ሦስተኛው ቀን ከዚያች ጀምሮ እስከዚች ሰዓት ድረስ ቀድሞ በመከራቸው ወራት ከአስጨነቋቸው ራሳቸውን ይከላከሉ ዘንድ ርዱአቸው። ³³ሁሉን የሚችል እግዚአብሔርም በጥፋታቸው ፋንታ ለእነዚህ ለተመረጡ ሕዝብ ደስታን አደረገላቸው። ³⁴እናንተም በተጠሩት በበዓሎቻችሁ በታወቀ ቀን እንደዚሁ አድርጉ። ³⁵እነሆ፥ ከዚህ በኋላም ለእኛና ለፋርስ ሰዎች፥ በጎ ነገርን ለሚያደርጉ ሕይወት ይሆንላቸዋል፤ እኛን ይወነጅሉ ዘንድ ለሚወድዱ ግን የጥፋታቸው መታሰቢያ ይሆናል። ³⁶ሀገሩ ሁሉ፥ ወይም ከተማው በሁሉም ቦታ እንዲህ ያላደረገ በጦርና በእሳት በመዓት ይጠፋል፤ ጥፋትም የሚሆነው በሰዎች ብቻ አይደለም፤ ነገር ግን በአውሬዎችና በዎፎችም ላይ ይሆናል።” ³⁷አይሁድም ጠላቶቻቸውን እንዲበቀሉ በዚያ ቀን ይዘጋጁ ዘንድ የደብዳቤው ቅጂ በግዛቱ ሁሉ በግልጥ ቦታ ተዘርግቶ እንዲታይ ተደረገ። ³⁸ፈረሰኞችም የንጉሡን ትእዛዝ ይፈጽሙ ዘንድ ቸኩለው ወጡ። ዐዋጁም በሱሳ ከተማ ተነገረ። ³⁹መርዶክዮስም ልብሰ መንግሥት ለብሶ፥ የወርቅ አክሊልም ደፍቶ፥ ከሐምራዊ ግምጃ የተሠራ መጐናጸፊያም ተጐናጽፎ ወጣ፤ በሱሳ ከተማ የነበሩትም አይተው ደስ አላቸው። ⁴⁰ለአይሁድም ብርሃንና ደስታ ሆነ። ⁴¹ትእዛዙም በታወጀበት፥ ደብዳቤውም በተገኘበት አውራጃና ከተማ ሁሉ ለአይሁድ ደስታና ተድላ፥ የግብዣም ቀን፥ መልካምም ቀን ሆነ። ከአሕዛብም ብዙዎች አይሁድን ስለ ፈሩ ተገዝረው አይሁድ ሆኑ።

መጽሐፈ አስቴር 8

አስቴር አይሁድን እንደ አዳነች

አይሁድን ለመታደግ የወጣ የንጉሥ ዐዋጅ