መጽሐፈ አስቴር 4

መርዶክዮስ የአስቴርን ርዳታ እንደ ጠየቀ

¹መርዶክዮስም የተደረገውን ሁሉ በዐወቀ ጊዜ ልብሱን ቀደደ፤ ማቅም ለበሰ፤ በራሱም ላይ ዐመድ ነሰነሰ፤ ወደ ከተማዪቱም መካከል ወጣ። “ያለ በደል ሕዝብን ታጠፋላችሁን?” እያለም ታላቅና የመረረ ጩኸት ጮኸ። ²ማቅም ለብሶ፥ ዐመድ ነስንሶ በንጉሡ በር መግባት አይገባም ነበርና ከንጉሡ በር ደርሶ ቆመ። ³የንጉሡም ትእዛዝና ዐዋጅ በደረሰበት ሀገር ሁሉ በአይሁድ ላይ ታላቅ ኀዘን፥ ልቅሶና ዋይታም ሆነ፤ ብዙዎችም ማቅና ዐመድ ለራሳቸው አነጠፉ። ⁴የአስቴርም ደንገጥሮችዋና ጃንደረቦችዋ መጥተው ነገሩአት፤ ንግሥቲቱም እጅግ አዘነች፤ ማቁንም ይለውጥ ዘንድ የሚለብሰውን ልብስ ለመርዶክዮስ ላከችለት፤ እርሱ ግን ማቁን አልተውም አለ። ⁵አስቴርም ያገለግላት ዘንድ ንጉሡ ያቆመውን አክራትዮስን ጠራች፤ እርሱም ከጃንደረቦቹ አንዱ ነበረ፤ እርስዋም ይህ ነገር ምንና ምን እንደ ሆነ ያስታውቃት ዘንድ ወደ መርዶክዮስ እንዲሄድ ላከችው። ⁶አክራትዮስም በንጉሡ በር ፊት ወደ ነበረችው ወደ ከተማዪቱ አደባባይ ወደ መርዶክዮስ ወጣ። ⁷መርዶክዮስም የተደረገውን ሁሉ፥ አይሁድንም ለማጥፋት ሐማ በንጉሡ ግምጃ ቤት ይመዝን ዘንድ የተናገረውን የብሩን ቍጥር ነገረው። ⁸ለአስቴርም እንዲያሳያት ለመጥፋታቸው በሱሳ የተነገረውን የዐዋጁን ጽሕፈት ቅጅ ሰጠው፤ ወደ ንጉሡም ገብታ ስለ ሕዝብዋ ትለምነውና ትማልደው ዘንድ እንዲነግራት፥ “በእጄ እንዳደግሽ የችግርሽን ጊዜ አስቢ፤ ከንጉሡ በታች የተሾመው ሐማ ይገድሉን ዘንድ አዝዞአልና ወደ ጌታ ወደ እግዚአብሔር ለምኝ፤ ለንጉሡም ነግረሽ ከሞት አድኝን በላት” አለው። ⁹አክራትዮስም ገብቶ የመርዶክዮስን ቃል ለአስቴር ነገራት። ¹⁰አስቴርም አክራትዮስን ተናገረችው፤ ለመርዶክዮስም እንዲህ የሚል መልእክት ሰጠችው። ¹¹“የንጉሡ አገልጋዮችና በሀገሮችም የሚኖሩ ሕዝብ ሁሉ ወንድ ወይም ሴት ቢሆን ሳይጠራ ወደ ንጉሡ ወደ ውስጠኛው ወለል የሚገባ ሁሉ በሕይወት ይኖር ዘንድ ንጉሡ የወርቁን ዘንግ ካልዘረጋለት በቀር እርሱ ይሞት ዘንድ ሕግ እንዳለ ያውቃሉ፤ እኔ ግን ወደ ንጉሡ ለመግባት ይህን ሠላሳውን ቀን አልተጠራሁም።” ¹²አክራትዮስም የአስቴርን ቃል ለመርዶክዮስ ነገረው። ¹³መርዶክዮስም አክራትዮስን አለው፥ “ሂድና ለአስቴር እንዲህ በላት፦ አንቺ በንጉሥ ቤት ስለ ሆንሁ ከአይሁድ ሁሉ ተለይች ብቻዬን እድናለሁ ብለሽ በልብሽ አታስቢ። ¹⁴በዚህ ጊዜ ቸል ብትዪ ረድኤትና መዳን ለአይሁድ ከሌላ ስፍራ ይሆንላቸዋል፤ አንቺና የአባትሽ ቤት ግን ትጠፋላችሁ፤ ደግሞስ ወደ መንግሥት የመጣሽው እንደዚህ ላለው ጊዜ እንደ ሆነ ማን ያውቃል?” ¹⁵አስቴርም እንዲህ ብሎ ለመርዶክዮስ እንዲመልስ አዘዘችው፦ ¹⁶“ሂደህ በሱሳ ያሉትን አይሁድ ሁሉ ሰብስብ፤ ለእኔም ጹሙ፤ ሦስት ቀን ሌሊቱንና ቀኑን አትብሉ፤ አትጠጡም፤ እኔና ደንገጥሮች ደግሞ እንዲሁ እንጾማለን፤ ምንም እንኳ ያለ ሕግ ቢሆን ወደ ንጉሡ እገባለሁ፤ ብጠፋም እጠፋለሁ።” ¹⁷መርዶክዮስም ሄዶ አስቴር እንዳዘዘችው ሁሉ አደረገ።

የመርዶክዮስ ጸሎት

¹⁸እግዚአብሔር ያደረገውን ሁሉ እያሰበ ወደ እግዚአብሔር ለመነ። ¹⁹እንዲህም አለ፥ “አቤቱ! አቤቱ! ሁሉን የምትገዛ፥ በሥልጣንህ ሁሉን የፈጠርህ ንጉሥ! እስራኤልን ታድናቸው ዘንድ ብትወድ የሚከራከርህ የለም፤ ²⁰ሰማይንና ምድርን፥ ከሰማይ በታች ያለ ድንቅ ፍጥረትንም ሁሉ አንተ ፈጥረሃልና፥ ²¹አንተ ሁሉን ታውቃለህ፤ አቤቱ ለዚህ ትዕቢተኛ ሐማ ያልሰገድሁ በመናቅ እንዳይደለ፥ በትዕቢትም እንዳይደለ፥ ራሴንም ከፍ ከፍ በማድረግ እንዳይደለ አንተ ታውቃለህ። ²³የእግዚአብሔርን ክብር የሰው ክብር እንዳላደርግ፥ ከአንተም ከጌታዬ በቀር ለማንም እንዳልሰግድ፥ ይህን ነገር አደረግሁት እንጂ፥ እስራኤልስ የሚድኑ ከሆነ እግሩን እስም ዘንድ በወደድሁ ነበር፤ ይህንም ሥራ በትዕቢት አላደረግሁትም። ²⁵ያጠፉን ዘንድ በጠላትነት ተነሥተውብናልና፥ መጀመሪያ ርስትህንም ያጠፉ ዘንድ ወድደዋልና አሁንም አቤቱ የአብርሃም አምላክ ንጉሥ እግዚአብሔር ሆይ! ወገኖችህን አድን። ²⁶ከግብፅ ሀገር ያዳንኻቸው ርስትህን ቸል አትበል። ²⁷ልመናችንንም ሰምተህ ወገኖችህን ይቅር በል፤ አቤቱ በሕይወት ሳለን ስምህን እናመሰግን ዘንድ ኀዘናችንን ወደ ደስታ መልሰው፤ ተስፋ የሚያደርጉህንም ሰዎች አለኝታቸውን አታጥፋ።” ²⁸በፊታቸው ሞት ደርሶባቸዋልና እስራኤል ሁሉ ጮኹ፤ ቃላቸውንም አሰምተው በኀይላቸው ተናገሩ። ²⁹አስቴርም ሞትን ወደ መፍራት ደርሳለችና ሰውነትዋን ለእግዚአብሔር አደራ ሰጠች። ³⁰የደስታ ልብስዋን አውልቃ የኀዘን ልብስዋን ለበሰች፤ በደስታ ሽቱም ፋንታ በራስዋ ላይ ዐመድና ትቢያን ነሰነሰች። ሰውነትዋንም ፈጽማ አሳዘነች። በፀጕርዋ ሰርሜዶ ፋንታም ትቢያ ጨመረች።

የአስቴር ጸሎት

³¹ወደ እስራኤል አምላክ ወደ እግዚአብሔር እንዲህ ብላ ለመነች፥ “አቤቱ! ረዳት አንተ ብቻ ነህ፤ ሞት ወደ እኔ ቀርቦአል፤ ረዳት የሌለኝ ብቸኛ የሆንሁ እኔን ርዳኝ። ³³አቤቱ! እኔም ከልጅነቴ ጀምሬ ከአባቶች ወገኖች ዘንድ አንተ ከአሕዛብ ሁሉ ለይተህ እስራኤልን ገንዘብ እንዳደረግሃቸው፥ ለዘለዓለሙም ርስት ይሆኑህ ዘንድ አባቶቻችንን ከዘመዶቻቸው ለይተህ እንደተቀበልሃቸው ሰማሁ፤ አሁንም እንደ ተናገርህ ሁሉን አደረግህላቸው። ³⁴በፊትህ በደልን፤ በጠላቶቻችንም እጅ ጣልኸን። የአሕዛብን ጣዖቶች አመስግነናልና። አቤቱ አንተ ጻድቅ ነህ። ³⁶አሁንም እጃቸውን ወደ ጣዖቶቻቸው ያነሡ አሕዛብ በጽኑ አገዛዝ ገዙን እንጂ አልተዉንም። ³⁷በቃልህ የሠራኸውን ሥርዐት ያስወግዱ ዘንድ፥ ርስትህንም ያጠፉ ዘንድ፥ የሚያመሰግኑህንም ሰዎች አፍ ይዘጉ ዘንድ፥ የቤተ መቅደስንም ሥርዐትና መሠዊያህን ያጠፉ ዘንድ፥ ³⁸ለከንቱ ጣዖት ለማድላት የአሕዛብንም አፍ ይከፍቱ ዘንድ፥ ሥጋዊ ንጉሥንም ለዘለዓለሙ ያመሰግኑ ዘንድ በጽኑ አገዛዝ ገዙን። ³⁹ባጸናኸው ሕግ ያሉትን አሳልፈህ አትስጣቸው፤ በመከራችንም አይሳቁብን። ነገር ግን ምክራቸውን በራሳቸው መልስ፤ በእኛም ላይ በጠላትነት የተነሣውን አዋርደው። ⁴⁰አቤቱ አስበን፤ በመከራችንም ጊዜ ተገለጥልን፤ አለቆችን ሁሉ ያጸናህ የአማልክት ንጉሥ ሆይ! እኔንም አጽናኝ። ⁴¹በአንበሳው ፊት በአንደበቴ በጎ ነገርን አድርግ፤ የሚዋጋንንም ይጣላው ዘንድ፥ የእርሱንና ከእርሱ ጋር የሚተባበሩትንም ጥፋት ይናገር ዘንድ ልቡናውን መልሰ። ⁴²እኛን ግን በእጅህ አድነን፤ አቤቱ ከአንተ በቀር ማንም ሌላ ረዳት የሌለኝ ብቸኛ የሆንሁ እኔንም ርዳኝ። አቤቱ አንተ ሁሉን ታውቃለህ፤ የኀጢአተኞችን ክብራቸውን እንድጠላ፥ ያልተገረዙትንና የሌሎችን ሁሉ ምንጣፍ እንደምጠላ አንተ መርምረህ ታውቃለህ። ⁴⁴አንተ መከራዬን ታውቃለህ፤ በከበርሁበትም ወራት የምታይበት በራሴ ላይ ያለ ጌጥ ደስ እንደማያሰኘኝ፥ እንደ ደም ጨርቅም እንደምጸየፈው፥ በምከብርበትና በማርፍበትም ወራት እንደማላጌጥበት አንተ ታውቀዋለህ። ⁴⁵እኔ ባሪያህ የሐማን ማዕድ አልበላሁም፤ የንጉሡም መጠጥ ደስ አያሰኘኝም፤ ከወይናቸውም አልጠጣሁም። ⁴⁶አቤቱ! የአብርሃም አምላክ! ከገባሁ ጀምሮ እስከ ዛሬ ድረስ እኔ ባሪያህ በአንተ እንጂ በእነርሱ ደስ አልተሰኘሁም። ⁴⁷አቤቱ ሁሉን የምትችል፥ ተስፋ የቈረጡትን ጸሎት ስማ፤ በእኛ ክፉ ነገር ከሚያደርጉ እጅም አድነን፤ እኔንም ከምፈራው አድነኝ።”