Enoch Chapter 9 - መጽሐፈ ሄኖክ | EOTC Bible

¹ሁለተኛ ጊዜ ሄኖክ ያየው ራእይ፤ የአዳም ልጅ፥ የሴት ልጅ፥ የሄኖስ ልጅ፥ የቃይናን ልጅ፥ የመላልኤል ልጅ፥ የያሬድ ልጅ ሄኖክ ያየው የጥበብ ራእይ ይህ ነው። ²በምድር ላይ ለሚኖሩ ሰዎች እናገረው ዘንድ የጀመርሁት የጥበብ ነገር መጀመሪያ ይህ ነው። ³የቀድሞ ሰዎች፥ ስሙ፤ በኋላም የተነሣችሁ ሰዎች፥ በመናፍስት ጌታ ፊት የምናገረው የቅዱሱን ነገር አስተውሉ። ⁴እነዚህ “መጀመሪያው ይሻላል” ይላሉ፤ እኛም በኋላ የተነሣን ሰዎች የጥበብ መጀመሪያን አንከለክልም። ⁵እኔ እንዳሰብሁት የዘለዓለም የሕይወት እድል ከእርሱ የተሰጠኝ የመናፍስት ጌታ እንደ ወደደ የያዝሁት ጥበብ ከመናፍስት ጌታ ፊት እስከ ዛሬ ድረስ አልተሰጠኝም ነበር። ⁶ሦስት ምሳሌዎችም ተገለጡልኝ። ⁷እኔም በምድር ለሚኖሩ ሰዎች እነግራቸው ጀመር። ⁸መጀመሪያው ምሳሌ ይህ ነው፥ የጻድቃን ማኅበር በተገለጠ ጊዜ፥ ኃጥኣንም በኀጢአታቸው በተፈረደባቸው ጊዜ፥ ከምድር ፊትም በታወኩ ጊዜ፥ ⁹በመናፍስት ጌታ ዘንድ ሥራቸው በጸናላቸው በተመረጡ ጻድቃን ፊት ጻድቁ በተገለጠ ጊዜ፥ ¹⁰በምድር ላይ ለሚኖሩ ለጻድቃንና ለተመረጡ በተገለጠ ጊዜ፥ ¹¹የኀጢአተኞች ማደሪያ ወዴት ነው? የመናፍስት ጌታን የካዱት ሰዎችስ ማረፊያቸው የት ነው? ¹²ጥንቱን ባልተወለዱ በተሻላቸው ነበር፤ የጻድቃንም የተሰወሩ ክብሮቻቸው በተገለጡ ጊዜ በኃጥአን ይፈረድባቸዋል፤ ከጻድቃንና ከተመረጡት ሰዎች ፊትም የተነሣ ዝንጉዎች ይታወካሉ። ¹³ከዛሬም ጀምሮ ምድርን የሚገዟት ሰዎች አዛዦችና ልዑላን አይሆኑም። ¹⁴የቅዱሳንንም ፊት ማየት አይችሉም። ለቅዱሳን ጻድቃንና ለተመረጡ ሰዎች ፊት የመናፍስት ጌታ ክብሩ ተገልጧልና። ¹⁵ያንጊዜም አዛዦች ነገሥታቱ ይጠፋሉ፥ በጻድቃንና በቅዱሳን እጅም ይሰጣሉ። ¹⁶ከዚያ ወዲያ የእነርሱ ሕይወት ተፈጽሞአልና በመናፍስት ጌታ ዘንድ ለእነርሱ የሚያማልድ የለም። ¹⁷በዚያም ወራት እንዲህ ይሆናል፥ የተመረጡና ቅዱሳን ልጆች ¹⁸በዚያም ወራት ሄኖክ የቅንዐትና የቍጣ መጻሕፍትን፥ የችኮላና የሁከት መጻሕፍትንም ያዘ። ¹⁹የመናፍስት ጌታም ምሕረት አይደረግላቸውም አለ። ²⁰በዚያም ጊዜ ደመናና ጥቅል ነፋስ ከምድር ፊት ነጥቆ በሰማያት ዳርቻ አኖረኝ። ²¹በዚያም ሌላ ራእይ አየሁ፤ የጻድቃንን ማደሪያቸውንና የቅዱሳንን ማረፊያቸውን አየሁ። ²²በዚያም ዐይኖቼ ከመላእክት ጋራ ማደሪያቸውን፥ ከቅዱሳንም ጋር ማረፊያቸውን አዩ። ²³ስለ ሰው ልጆች ይለምናሉ፥ ይማልዳሉ፥ ይጸልያሉም። ²⁴ጽድቅም በፊታቸው እንደ ውኃ ይፈስሳል፤ ምሕረትም በምድር እንደ ጠል ይሆናል፤ በመካከላቸውም ለዘለዓለሙ እንዲህ ይሆናል። ²⁵በዚያም ወራት ዐይኖቼ በጽድቅና በሃይማኖት የተመረጡ ሰዎችን ቦታ አዩ። ²⁶በዘመናቸውም ጽድቅ ይሆናል፥ ለጻድቃንና ለተመረጡትም ለዘለዓለሙ በእርሱ ፊት ቍጥር የላቸውም። ²⁷ከመናፍስት ጌታ ክንፍ በታችም ማደሪያቸውን አየሁ። ²⁸ጻድቃንና የተመረጡትም ሁሉ በፊቱ እንደ እሳት ብርሃን ያበራሉ። ²⁹አፋቸውም በረከትን ይሞላል፥ ከንፈሮቻቸውም የመናፍስት ጌታን ስም ያመሰግናሉ። ³⁰ጽድቅም በፊቱ አያልቅም፥ ርትዕም በፊቱ አይፈጸምም። ³¹በዚያም እኖር ዘንድ ወደድሁ፥ ነፍሴም ያን ቦታ ወደደችው። ³²በመናፍስት ጌታ ፊት ስለ እኔ እንዲህ ጸንቶአልና ጥንቱን እድል ፋንታዬ በዚያ ሆነ። ³³በዚያም ወራት የመናፍስት ጌታን ስም አመሰገንሁ፥ ከፍ ከፍም አደረግሁ፤ የመናፍስት ጌታም በበረከትና በክብር እንደ ወደደ እርሱ አጽንቶኛልና በረከትንና ክብርን ሰጠሁ። ³⁴ቈይቶም ዐይኖቼ ያን ቦታ አዩ። ³⁵እንዲህም እያልሁ አከበርሁት፥ አመሰገንሁትም- “ቡሩክ ነው፥ ከጥንትም ጀምሮ እስከ ዘለዓለሙ ይመስገን። ³⁶በፊቱም ፍጻሜ የለም። ³⁷ዓለም ሳይፈጠር ይህ ዓለም ምን እንደ ሆነ እርሱ ያውቃል፤ ለልጅ ልጅ ዘመን የሚሆነውንም ነገር ያውቃል። ³⁸የማያንቀላፉ ያመሰግኑሃል፥ በጌትነትህም ፊት ይቆማሉ። ³⁹የመናፍስት ጌታ ቅዱስ፥ ቅዱስ፥ ቅዱስ ነህ፥ ፍጥረትህም ⁴⁰በዚያም የማያንቀላፉትን ሁሉ በፊቱ ቁመው ሲያመሰግኑ ዐይኖቼ አዩ። ⁴¹“አንተ ቡሩክ ነህ፥ የመናፍስት ጌታም ስም ለዘለዓለም ቡሩክ ነው” ይላሉ። ⁴²ማየት እስኪሳነኝም ድረስ ፊቴ ተለወጠ።

መጽሐፈ ሄኖክ 9