Enoch Chapter 8 - መጽሐፈ ሄኖክ | EOTC Bible

¹ከዚያም በመድበራ ተራራ መካከል ወደ ምሥራቅ ሄድሁ። ²ምድረ በዳውንም ብቻ አየሁ። ³ነገር ግን ከዚህ ዘር ዛፎችን የተመላ ነው። ⁴ውኃም ከወደ ላይ ይመነጫል፤ ሻሻቴውም በዝቶ እንደሚንሻሽ በላዩ ይታያል። ⁵በመስዕ በኩል እንደሚፈስስ ወደ ምዕራብ ይፈስሳል፤ ከአራቱም ማዕዘን ይወጣል፥ ከዚያም ውኃና ጠል አለ። ⁶ከመድበራም ወደ ሌላ ቦታ ሄጄ ወደዚህ ተራራ ምሥራቅ ቀረብሁ። ⁷በዚያም የፍርድ እንጨቶችን አየሁ፤ ይልቁንም የነጭ ዕጣንና የከርቤ መዓዛ ያላቸውን ዛፎች አየሁ፥ ዛፎቹም አይመሳሰሉም። ⁸በእርሱ ላይ፥ በእነርሱም ላይ፥ ሩቅም ባይደለ በምሥራቅ ተራራ ላይ፥ ⁹የማይገታ ውኃ ያለባቸው የሸለቆዎችን ሌላ ቦታ አየሁ። ¹⁰ያማረ ዛፍንም አየሁ፤ ሽታውም እንደ ለውዝ ሽታ ነው። ¹¹በእነዚህ ሸለቆዎች አጠገብም መዓዛ ያለው ሽቱን አየሁ። ¹²ከእነዚህም በላይ ወደ ምሥራቅ ቀረብሁ፥ በውስጡ ዛፎች ያሉበት ሌላ ተራራንም አየሁ። ¹³ከእርሱም ስሙ ሰሪራ፥ ከልበኔም እንደሚባል እንደ ነቄጥሮ ያለ ውኃ ይፈስሳል። ¹⁴በዚያም ተራራ ላይ ሌላ ተራራን አየሁ፤ በውስጡም ዋግራ የሚባሉ ዛፎች አሉበት። ¹⁵እነዚያም ዛፎች እንደ ከርካዕ ምሉኣንና ጽኑዓን ናቸው፤ ይህንም ፍሬ በያዙት ጊዜ ከሽቱ ሁሉ ይበልጣል። ¹⁶ከእነዚህም ሽቱዎች በኋላ በተራሮች ላይ ወደ መስዕ ስመለከት፥ ¹⁷ያማረ ሽቱን፥ ቀናንሞስና ፕፕሬ የሚባል መዓዛ ያላቸው ዛፎችንም የተመሉ ሰባት ተራራዎችን አየሁ። ¹⁸ከዚያም በእነዚያ ተራሮች ራስ ላይ ርቄ ወደ ምሥራቅ ሄድሁ። ¹⁹በኤርትራ ባሕርም ሄድሁ፤ ከዚያም የራቅሁ ሆንሁ። ²⁰ዙጡኤል በሚባል መልአክ ላይም አልፌ ሄድሁ፤ ወደ ጽድቅ ገነትም መጣሁ። ²¹ከእነዚህ ዛፎችም ወዲያ ብዙዎችንና ታላላቆች ዛፎችን በዚያ በቅለው አየሁ። ²²ሽታቸውም ያማረ ሲሆን ታላላቆች ነበሩ። ብርሃናቸውም ብዙ ነው፤ እነርሱም ያበራሉ። ²³ከእርሱም በልተው ታላቅዋን ጥበብ የሚያውቁበት የጥበብ ዛፍን አየሁ፤ እርሱም ተረርቃሞ ይመስላል። ²⁴ፍሬውም እንደ ወይን ዘለላ እጅግ ያማረ ነው፤ የዚያም ዛፍ ሽታው ሄዶ ከሩቅ ይደርሳል። ²⁵እንዲህም አልሁ- “ይህ ዛፍ መልካም ነው፤ መልኩም ያማረና ደስ የሚያሰኝ ነው።” ²⁶ከእኔ ጋራ ያለው መልአክ ቅዱስ ሩፋኤልም መለሰልኝ፥ እንዲህም አለኝ- ²⁷“የቀደሙህ ሽማግሌው አባትህና ባልቴቷ እናትህ ከእርሱ የበሉ የጥበብ ዛፍ ይህ ነው። ²⁸ጥብብንም ዐወቋት፤ ዐይኖቻቸውም ተገለጡ፤ ዕራቁታቸውንም እንዳሉ ዐወቁ፤ ከገነትም ተሰደዱ።” ²⁹ከዚያም እስከ ምድር ዳርቻ ድረስ ሄድሁ፤ በዚያም ታላላቅ አውሬዎችን አየሁ። ³⁰አንዱ ከሌላው ልዩ ነው፤ የወፎችም ፊታቸው ይለያያል፥ መልካቸውም፥ ቃላቸውም አንዱ ከሌላው ይለዋወጣል። ³¹ከእነዚህ አውሬዎችም በስተምሥራቅ ሰማዩ በላዩ ያረፈበትን የምድር ዳርቻንና የተከፈቱ ደጆችን አየሁ። ³²የሰማይ ከዋክብትም እንዴት እንደሚወጡ አየሁ፤ ከእርሱ የሚወጡባቸው ደጃፎችንም ቈጠርሁ። ³³የእያንዳንዱን መውጫ ሁሉ በየቍጥራቸው፥ በየስማቸውና በየደረጃቸው፥ በየመኖሪያቸው፥ በየጊዜያቸውና በየወራታቸው ከእኔ ጋር ያለው መልአኩ ዑርኤል እንዳሳየኝ ጻፍሁ። ³⁴ሁሉንም ለእኔ አሳየኝ፥ እርሱም ጻፈው፤ ዳግመኛም ስማቸውን፥ ሥርዐታቸውንና ሥራቸውን ጻፈልኝ። ³⁵ከዚያም በምድር ዳርቻ ወደ መስዕ ሄድሁ፤ በዚያም በምድር ሁሉ ዳርቻ ታላቅና የከበረ ተአምራትን አየሁ። ³⁶በዚያም የተከፈቱ ሦስት የሰማይ ደጃፎችን በሰማይ አየሁ፤ ከእነዚያም በየአንዳንዱ ነፋሳት ይወጣሉ። ³⁷በመስዕ በኩል ነፋስ በነፈሰ ጊዜ ቀቅና በረዶ፥ ውርጭና አመዳይ፥ ጤዛና ዝናምም ይፈስሳል፤ ካንዲቱም መስኮት በበጎ ይነፍሳል። ³⁸በሁለቱ መስኮቶችም በኀይል በነፈሱ ጊዜ በምድር ላይ ጭንቅ ይሆናል። በኀይልም ይነፍሳሉ። ³⁹ከዚያም በምድር ዳርቻ ወደ ምዕራብ ሄድሁ፤ በዚያም በመስኮቶቹ ልክና በመውጫው ልክ በምሥራቅ እንዳየሁ የተከፈቱ ሦስት መስኮቶችን አየሁ። ⁴⁰ከዚያም በምድር ዳርቻ ወደ አዜብ ሄድሁ። ⁴¹በዚያም የተከፈቱ ሦስት የሰማይ መስኮቶችን አየሁ፤ ከዚያም ከአዜብ ዋዕይ ጤዛና ዝናም፥ ነፋስም ይወጣል። ⁴²ከዚያም በሰማይ ዳርቻ ወደ ምሥራቅ ሄድሁ። ⁴³በዚያም በምሥራቅ በኩል የተከፈቱ ሦስት የሰማይ ደጃፎችን አየሁ። ⁴⁴በእነዚህ በትናንሽ ደጃፎችም በእያንዳንዱ በኩል ታናናሾች የሰማይ ከዋክብት ያልፋሉ። ⁴⁵በታየችላቸውም ጎዳና ወደ ምዕራብ ይሄዳሉ። ⁴⁶ይህንም ባየሁ ጊዜ አመሰገንሁ፤ የፍጥረቱንም ገናናነት ለመላእክቱና ለሰዎች ነፍሳት ይገልጥ ዘንድ፥ ሥራውንም ያመሰግኑ ዘንድ፥ ፍጥረቱም ሁሉ የኀይሉን ሥራ ያዩ ዘንድ፥ ታላቅ የሆነ የእጁንም ሥራ ያከብሩ ዘንድ፥ እርሱንም ለዘለዓለሙ ያመሰግኑት ዘንድ ታላላቅና የከበሩ ተአምራትን ያደረገ የክብር ጌታን ሁልጊዜ አመሰግነዋለሁ።

መጽሐፈ ሄኖክ 8