Enoch Chapter 7 - መጽሐፈ ሄኖክ | EOTC Bible

¹ከዚያም ወደ ሌላ ምድራዊ ቦታ ሄድሁ፤ በቀንና በሌሊት የሚቃጠል የእሳት ተራራንም አሳየኝ። ²በዚያም በኩል ሄድሁ፥ የከበሩ ሰባት ተራሮችንም አየሁ። ³ሁሉም አንዱ ካንዱ ልውጥ ነው፤ የከበሩና ያማሩ ድንጋዮችንም አየሁ፥ ሁሉም የከበረ ነው። ⁴መልካቸውም የበራ ነው፥ ፊታቸውም ያማረ ነው፥ ሦስቱም በምሥራቅ በኩል ናቸው፥ አንዱም ባንዱ ላይ የጸኑ ናቸው። ⁵ሦስቱም በሰሜን በኩል ናቸው፤ አንዱም ባንዱ ላይ የጸኑ ናቸው፤ ጥልቆች ቆላዎችም አሉ፥ ጠማሞችም ናቸው፥ አንዲቱም አንዲቱን አትቀርባትም። ⁶ሰባተኛውም ተራራ በእነዚህ መካከል ነው፥ ቁመታቸው ግን እንደ አትሮንስ ወንበር ሁሉም ይመሳሰላሉ። ⁷መዓዛ ያላቸው ዛፎችም ይከቡታል፤ በመካከላቸውም አንድ ዛፍ አለ፥ ከእነርሱ አንዱ ስንኳ ለእኔ የሸተተበት ጊዜ ከቶ የለም። ⁸እንደ እርሱም ያሉ ሌሎች አይሸቱም፤ ከሸቱውም ሁሉ ይልቅ ይሸታል። ⁹ቅጠሉና አበባው፥ እንጨቱም ለዘለዓለም አይጠወልግም። ¹⁰ፍሬውም ያማረ ነው፤ ፍሬው ግን እንደ ዘንባባ ፍሬ ነው። ¹¹ያንጊዜም “ይህ ዛፍ እነሆ፥ ያማረ ነው፥ ለማየትም ያማረ ነው፥ ቅጠሉም መልካም ነው፥ ፍሬውም ለማየት ፈጽሞ የተወደደ ነው” አልሁ። ¹²ያንጊዜም ከእኔ ጋር ያለው፥ በላያቸውም የተሾመው ከቅዱሳንና ከክቡራን መላእክት አንዱ ሚካኤል መለሰልኝ። ¹³እንዲህም አለኝ- “ሄኖክ፥ ስለዚህ ዛፍ ሽታ ለምን ትጠይቃለህ? ልታውቅስ ስለምን ትመራመራለህ?” ¹⁴ያንጊዜም እኔ ሄኖክ እንዲህ ብዬ መለስሁለት- “ስለ ሁሉ ላውቅ እወዳለሁ፥ ይልቁንም ስለዚህ ዛፍ ላውቅ እወዳለሁ።” ¹⁵እርሱም እንዲህ ብሎ መለሰልኝ- “ይህ ያየኸው፥ ራሱ የጌታን ዙፋን የሚመስለው ረጅም ተራራ፥ ቅዱሱና ታላቁ የዘለዓለም ንጉሥ የክብር ጌታ ምድርን በበጎ ሊጐበኛት በወረደ ጊዜ የሚቀመጥበት ዙፋኑ ነው። ¹⁶ይህንም የመልካም መዓዛ ዛፍ ጌታ ሁሉን እስከሚበቀልበት እስከ ታላቁ የፍርድ ጊዜና ለዘለዓለም እስከሚፈጸምበት ጊዜ ድረስ አንድ ሰው እንኳ ሊነካው ሥልጣን የለውም። ¹⁷ይህም ለጻድቃንና ለትሑታን ይሰጣል፤ ከፍሬውም ለተመረጡ ሰዎች ሕይወት ይሰጣል። ¹⁸በዘለዓለማዊው ንጉሥ በጌታ ቤት አንጻር በመስዕ በኩል በቅዱስ ቦታ ይተከላል። ¹⁹ያንጊዜም ደስ ይላቸዋል፥ ሐሤትንም ያደርጋሉ። ²⁰በየወገናቸውም በቅዱስ ቦታ ሽቱን ያቀርቡለታል፥ አባቶችህ ብዙ ዘመን እንደ ኖሩ እነርሱም በምድር ላይ ብዙ ዘመን ይኖራሉ። ²¹በዘመናቸውም ኀዘንና መከራ፥ ድካምና መቅሠፍት አይዳስሳቸውም።” ²²ለጻድቃን ሰዎች እንደዚህ አዘጋጅትWaልና፥ እንደዚህም ፈጥሮ ይስጧቸው ብሏልና የዘለዓለም ንጉሥ የክብር ጌታን አመሰገንሁት። ²³ከዚያም ወደ ምድር መካከል ሄድሁ፥ የተባረከና የለመለመ፥ ከተቈረጠ ዛፍም አቈጥቍጠው የሚኖሩ ቅርንጫፎች የጋረዱት ቦታን አየሁ። ²⁴በዚያም ቅዱስ ተራራን አየሁ፥ ከተራራውም በታች በምሥራቁ በኩል ውኃ አለ፤ የሚፈስሰውም ወደ ሰሜን ነው። ²⁵በምሥራቅም በኩል ከዚህ የሚረዝም ሌላ ተራራን አየሁ። ²⁶በመካከላቸውም ጥልቅ ሸለቆ አለ። ስፋትም የለውም፤ በእርስዋም ውኃ ወደ ተራራው ይፈስሳል። ²⁷በዚህም በሁለተኛው ተራራ ምዕራብ በኩል ከእርሱ የሚያንስ ተራራ አለ። ርዝመትም የለውም፥ በመካከላቸውም በበታቹ ሸለቆ አለ። ²⁸በሦስቱ ተራሮች ዳርቻ በኩልም ጥልቅ የሆኑና የደረቁ ሌሎች ሸለቆዎች አሉ። ²⁹ሸለቆዎች ሁሉ ጥልቆች ናቸው፥ ከጽኑ ዓለት ድንጋይ የተነሣም ስፋት የላቸውም። ³⁰በእነርሱ ላይም ዛፍ ይተከላል፥ ስለ ዓለቱም አደነቅሁ፥ ስለ ሸለቆውም አደነቅሁ፤ እጅግም አደነቅሁ። ³¹ያንጊዜም እንዲህ አልሁ- “የተባረከችና ሁለመናዋ ዛፎችን የተመላች ይህች ምድር ስለምን ናት? ³²ይህችስ በመካከላቸው የተረገመች ሸለቆ ስለምን ናት?” ³³ያንጊዜም ከእኔ ጋራ ያለው ከቅዱሳን መላእክት አንዱ ዑራኤል መለሰልኝ እንዲህም አለኝ- “ይህች የተረገመች ሸለቆ እስከ ዘለዓለሙ ለተረገሙ ናት። ³⁴በአንደበታቸውም በእግዚአብሔር ላይ የማይገባ ነገርን የሚናገሩ ሁሉ በዚያ ቦታ ይሰበሰባሉ። ³⁵ስለ ክብሩም ጭንቅ ነገርን ስለ ተናገሩ በዚያ ይሰበሰባሉ፤ በኋለኛውም ዘመን ፍርዳቸው በዚያ ይሆናል። ³⁶በእውነት የሚሆን የፍርድ ዐይነትም በጻድቃን ፊት ለዘለዓለም በእነርሱ ላይ ይሆናል። ³⁷ምሕረትን የሚያደርጉም- የዘለዓለም ንጉሥ የክብር ጌታን በዘመኑ ሁሉ በዚያ ያመሰግኑታል። ³⁸በተፈረደባቸውም ወራት እንዳደላቸው በቸርነቱ ያመሰግኑታል።” ³⁹እኔም ያንጊዜ የክብር ጌታን አመሰገንሁት፥ ለገናናነቱም እንደሚገባ ተናገርሁለት፥ ስሙንም ጠራሁ።

መጽሐፈ ሄኖክ 7