Enoch Chapter 5 - መጽሐፈ ሄኖክ | EOTC Bible

¹የረዓይትም ሞት መናፍስት ከሥጋቸው በወጡበት ይሆናል። ²የሚጠፋም ይሁን። ³ፍርድም ሳይደረግ እንዲሁ ይጠፋሉ፤ እስከ ታላቋ የፍጻሜ ዕለት ድረስ ከታላቋ ዓለም ከትጉሃንና ከዝንጉዎች የተነሣ ፍርድ ይፈጸማል። ⁴አሁንም ስለ እነርሱ ልትለምንላቸው የላኩህን አስቀድሞ በሰማይ የነበሩ ትጉሃንን እንዲህ በላቸው። ⁵“ዛሬም እናንተ በሰማይ አላችሁ፥ ምሥጢራትም ገና አልተገለጡላችሁም። ⁶የተናቀ ምሥጢርንም ዐወቃችሁ፥ በልቡናችሁም ጽናት ይህን ለሴቶች ነገራችሁ። ⁷በዚህም ምሥጢር ሴቶችና ወንዶች በምድር ላይ ክፋትን ያበዛሉ፤ እንግዲህስ ሰላም የላችሁም።” ⁸እንደ ቋያ የሚቃጠሉ ሰዎች ወዳሉበት አንድ ቦታ ወሰዱኝ፤ በወደዱም ጊዜ እንደ ሰው ይታያሉ። ⁹ጥቅል ነፋስ ወዳለበት ቦታ፥ ራሱም እስከ ሰማይ ወደሚደርስ ተራራ ወሰዱኝ። ¹⁰የሚያበሩ አራት ቦታዎችንም አየሁ፤ በጥልቁም ዳርቻ ነጐድጓድ አለ፤ የእሳት ቀስትና ጐራንጕሪያቸውም፥ የእሳት ሰይፍና መብረቆችም ሁሉ አሉ። ¹¹የሚናገር የሕይወት ውኃና የምዕራብ እሳት እስካለበት ድረስ ወሰዱኝ፤ ይኸውም የፀሐይን መግቢያ ሁሉ የሚይዝ ነው። ¹²እሳቱ እንደ ውኃ እስከሚፈስስ እስከ እሳት ፈሳሽ ድረስ መጣሁ፤ በምዕራብ ወዳለው ወደ ታላቁም ባሕር ይፈስሳል። ¹³ታላላቅ ወንዞችንም ሁሉ አየሁ፤ እስከ ታላቁ ጨለማም ድረስ ደረስሁ፥ ሥጋዊ ሁሉ ወደሚመላለስበትም ሄድሁ። ¹⁴የክረምት ጭጋጎች ያሉባቸው ተራሮችንም፥ የወንዙም ሁሉ ውኃ የሚፈስበትን አየሁ። ¹⁵የምድር ወንዞችን ሁሉ አፋቸውን፥ የጥልቁንም አፍ አየሁ። ¹⁶የነፋሶችንም ሁሉ ቦታዎች አየሁ፤ ፍጥረቱንና የምድሩን ሁሉ መሠረቶች በእነርሱ እንዳስጌጠ አየሁ። ¹⁷የምድርንም የማዕዘን ድንጋይ አየሁ፤ ምድርንና ጠፈርንም የሚሸከሙ አራቱን ነፋሳት አየሁ። ¹⁸የሰማይንም ከፍታ ነፋሳት እንደ ዘረጓት አየሁ። ¹⁹እነርሱም በሰማይና በምድር መካከል ይቆማሉ፤ እነርሱም የሰማይ ምሰሶዎች ናቸው። ²⁰ሰማይን የሚመልሷት፥ የፀሐይን ክበብና ከዋክብትን ሁሉ የሚያገቡ ነፋሳትንም አየሁ። ²¹በምድር ላይ ደመናትን የሚሸከሙ ነፋሳትንም አየሁ። ²²የመላእክትንም መንገድ አየሁ፤ በምድር ዳርቻም በላይ ያለ ጠፈርን የሚያጸና አድማስን አየሁ። ²³ወደ አዜብ፥ ከከበረ ድንጋይም ይልቅ ወደሚያበሩ ወደ ሰባት ተራሮች ሄድሁ። ²⁴ሦስቱ በምሥራቅ በኩል፥ ሦስቱም በአዜብ በኩል ናቸው። በምሥራቅ በኩል ያለው ግን አንዱ ከቅጥልጣል ዕንቍ ነው፤ አንዱ ከባሕርይ ዕንቍ ነው፤ አንዱም ደምርፅ ከሚባል ዕንቍ ነው፤ በአዜብ በኩል ያለውም ከቀይ ዕንቍ ነው። ²⁵መካከለኛው ግን ፔካ ከሚባል ዕንቍ እንደ ተሠራ እንደ እግዚአብሔር ዙፋን እስከ ሰማይ ይደርሳል። ²⁶አጎበሩም ሰንፔር ከሚባል ዕንቍ ነው፤ በተራራው ሁሉ ያለ የሚነድድ እሳትንም አየሁ። ²⁷በዚያም በታላቅ ምድር መጨረሻ የሚሆን ቦታን አየሁ፤ በዚያም ውኃዎች ይሰበሰባሉ። ²⁸በሰማይ እሳት ምሰሶዎችም ጥልቅ የሆነ የምድር ጕድጓድን አየሁ። ²⁹በውስጣቸውም የሚቃጠሉና የሚወርዱ፥ በላይ በኩልና በታች በኩልም የማይቈጠሩ የሰማይ አዕማድን አየሁ። ³⁰በጕድጓዱም ላይ ቦታን አየሁ፥ ለዚያም ቦታ በላይ ጠፈር በታችም የምድር መሠረት የለውም። ³¹በላዩም ውኃ የለም፤ ወፎችም የሉበትም፤ ነገር ግን ምድረ በዳ ነው። ³²በዚያም እንደሚቃጠሉ ታላላቅ ተራሮች ሰባት ከዋክብትን በሚያስፈራ ሁኔታ አየሁ። ³³መልአኩም የሚጠይቀኝ መንፈስ እንደ መሆኑ እንዲህ አለኝ- “ይህ ቦታ የሰማይና የምድር መጨረሻ ነው። ³⁴ይህም- ለሰማይ ከዋክብትና ለሰማይ ሠራዊት፥ በእሳት ላይ ለሚገለባበጡ ከዋክብትም የግዞት ቤት ሆናቸው። ³⁵እነዚህም በጊዜያቸው አልመጡምና ከመውጣታቸው አስቀድሞ የእግዚአብሔርን ትእዛዝ የተላለፉ ናቸው። ³⁶በምሥጢር ዘመንም እስከ ኀጢአታቸው መጨረሻ ድረስ ተቈጥቶ አጋዛቸው።” ³⁷ዑርኤልም እንዲህ አለኝ- “መላእክት ³⁸መንፈሶቻቸውም ብዙ መልክ ሆነው ሰዎችን ያረክሷቸዋል፤ እስከሚፈጸሙባት እስከ ታላቅዋ የፍርድ ቀን ድረስም እንደ አማልክት ለአጋንንት ይሠዉ ዘንድ ሰዎችን ያስትWaቸዋል። ³⁹ሴቶቻቸውም የሰማይ መላእክትን አስተው እንደ ሰላማውያት ሴቶች ይሆናሉ።” ⁴⁰እኔ ሄኖክ የሁሉን ፍጻሜ ራእይ ብቻዬን አየሁ፤ እኔም እንዳየሁ ከሰዎች ወገን ያየ የለም።

መጽሐፈ ሄኖክ 5