Enoch Chapter 38 - መጽሐፈ ሄኖክ | EOTC Bible

¹ጻድቃን፥ በእነዚያ ወራቶች ለመታሰቢያ ጸሎታችሁን ትቀበሉ ዘንድ ተዘጋጁ። ²ኃጥኣን በልዑል ፊት ኀጢአትን ለመታሰቢያ እንደሚያኖሩት እናንተም በመላእክት ፊት ምስክሮች አድርጋችሁ አኑሯቸው። ³በእነዚያም ወራቶች አሕዛብ ይታወካሉ ፥ በጥፋትም ቀን የአሕዛብ ዘመዶች ይነሣሉ። ⁴በእነዚያም ወራቶች የተቸገሩ ይወጣሉ፤ ልጆቻቸውንም ይነጥቃሉ፥ ልጆቻቸውንም ይጥሏቸዋል። ⁵ከእነርሱም ልጆቻቸውን ያስወርዳሉ፤ እየጠቡም ሳሉ ልጆቻቸውን ይጥሏቸዋል። ⁶ወደ እነርሱም አይመለሱም፥ ለሚወዷቸውም አይራሩላቸውም። ⁷ዳግመኛም ለእናንተ ለኃጥኣን እኔ እምልላችኋለሁ፥ የማይገታ ደም ለሚፈስባት ቀን ኀጢአት ተዘጋጅታለችና። ⁸ለድንጋይም ይሰግዳሉ፥ የወርቁንና የብሩን፥ የእንጨቱንና የሸክላውን ምስልም ይሠራሉ። ⁹ለረከሱ መናፍስትና ለክፉዎች አጋንንት፥ ለጣዖቱም ሁሉ፥ ለመስገጃውም ሁሉ ይሰግዳሉ። ¹⁰ከእነርሱም ረድኤት ሁሉ አይገኝም፤ ስለ ልቡናቸውም ድንቍርና ይዘነጋሉ፥ በልቡናቸው ፍርሀትም ዐይኖቻቸው ይጋረዳሉ። ¹¹ሕልማቸውንም በማየት ይረሳሉ፥ ይፈራሉም፤ ሥራቸውን ሁሉ በሐሰት ሠርተዋልና፥ ለድንጋዩም ሰግደዋልና፥ ፈጥነውም ይጠፋሉና። ¹²በእነዚያም ወራቶች የጥበብን ነገር የሚቀበሉና የሚያውቋት ሁሉ ብፁዓን ናቸው። ¹³የልዑልንም ሥራዎች ይሠሯቸዋል፥ በጽድቅም መንገድ ይሄዳሉ። እነርሱ ይድናሉና ከሚዘነጉ ሰዎች ጋር አይዘነጉም። ¹⁴ለወንድማችሁ ክፉውን የምትዘረጉ ወዮላችሁ! በሲኦል ትጠፋላችሁና። ¹⁵የኀጢአትንና የተንኰልን መሠረት የምትሠሩ፥ በምድርም ላይ የምታሳዝኑ ወዮላችሁ! በእርሱ ትጠፋላችሁና። ¹⁶በባዕድ ገንዘብ ቤታችሁን የምትሠሩ ወዮላችሁ! ሥራቸውም ሁሉ ጡብ ነው፥ የኀጢአትም ድንጋይ ነው፤ ሰላም እንደሌላችሁም እኔ እነግራችኋለሁ። ¹⁷ለዘለዓለም የሚኖር የአባቶቻቸውን ድንበርና ርስት ለሚያፈርሱ ወዮላቸው! ለእነርሱም ዕረፍት አይደረግላቸውምና ልቡናቸውን ወደ ጣዖቱ ይወስዱታል። ¹⁸ዐመፅን የምትሠሯትና ግፍን የምትረዷት፥ እስከ ታላቋ የፍርድ ቀንም ድረስ ባልንጀሮቻችሁን የምትገድሉ፥ ወዮላችሁ! ክብራችሁን ይጥላልና፤ በልቡናችሁም ክፋትን ይጨምራልና። ¹⁹ሁላችሁንም በሰይፍ ያጠፋችሁ ዘንድ የቍጣውን መንፈስ ያስነሣል፥ ቅዱሳንና ጻድቃን ሁሉም ኀጢአታችሁን ያስባሉ። ²⁰በእነዚያም ወራቶች አባቶች ከልጆቻቸው ጋር በአንድ ቦታ ይገደላሉ፤ ²¹ወንድሞች ከወንድሞቻቸው ጋር ደማቸው እንደ ፈሳሽ ውኃ እስኪፈስስ ድረስ በሞት ይወድቃሉ። ሰው ከልጁና ከልጅ ልጁ ይገድለው ዘንድ በመራራት እጁን አይከለክልምና። ²²ኀጢአተኛውም ከከበረ ወንድሙ እጁን አይከለክልም፥ ከንጋትም ጀምሮ ፀሐይ እስኪገባ ድረስ ይዋጋሉ። ²³ፈረስም በኃጥኣን ደም ውስጥ እስከ እምቢያጕሱ ድረስ ይሄዳል፥ ሠረገላም እስከ ራሷ ድረስ ትሰጥማለች። ²⁴በእነዚያም ወራቶች መላእክት ወደሚሰወሩበት ቦታ ይወርዳሉ። ²⁵ኀጢአትን የሚረዷትንም ሁሉ ወደ አንድ ቦታ ይመልሷቸዋል። ²⁶ልዑልም በኃጥኣን ሁሉ ታላቅ ፍርድ ይፈርድ ዘንድ በዚያች ቀን ይነሣል። ²⁷ከቅዱሳን መላእክትም በቅዱሳንና በጻድቃን ላይ ጠባቂዎችን ይሰጣል፥ እነርሱም ክፋት ሁሉ፥ ኀጢአትም ሁሉ ጨርሶ እስኪጠፋ ድረስ እንደ ዐይን ብሌን ይጠብቋቸዋል። ²⁸ጻድቃን ረዥም እንቅልፍን ቢተኙም የሚፈሩት ነገር የላቸውም። ²⁹ጠቢባን እውነተኛ ነገርን ያያሉ፤ የዚህ ዓለም ልጆችም የዚችን መጽሐፍ ነገር ሁሉ ያስተውላሉ፥ ባለጸግነታቸውም በኀጢአታቸው በሚወድቁበት ጊዜ ሊያድናቸው እንደማይችል ያውቃሉ። ³⁰ኃጥኣን፥ በጽኑ መከራ ቀን ጻድቃንን በምታስጨንቋቸው ጊዜ ወዮላችሁ! በእሳትም ታቃጥሏቸዋላችሁ፥ እናንተም እንደ ሥራችሁ ፍዳውን ትቀበላላችሁ። ³¹ክፉውን ነገር ልብ ታደርጉ ዘንድ የምትተጉ ልበ ግልብጦች ወዮላችሁ! ፍራትም ያገኛችሁ ዘንድ አላችሁ፥ የሚረዳችሁም የለም። ³²ኃጥኣን፥ ወዮላችሁ! በአፋችሁ ነገር ላይና ሥራን በዘነጋችሁባቸው በእጆቻችሁ ሥራ ላይ በእሳት ወላፈን ትቃጠላላችሁና። ³³አሁንም ዕወቁ፥ መላእክት በሰማይ ከፀሐይና ከጨረቃ፥ ከከዋክብትም የተነሣ ስለ ኀጢአታችሁ ሥራችሁን ይመራመራሉና። ³⁴በምድር ላይ በጻድቃን ዘንድ ፍርድን ታደርጉባቸዋላችሁና ደመናውንና ጉሙን ሁሉ፥ ጠሉንና ዝናቡንም በእናንተ ያዳኝባችኋል፤ ወደ እናንተ እንዳይወርዱ ሁሉ ከእናንተ ይከለከላሉና፥ በኀጢአታችሁም አያስቡምና። ³⁵አሁንም ዝናብ ወደ እናንተ መውረድን እንዳይከለከል፥ ጠልም ከእናንተ ወርቅንና ብርን ተቀብሎ እንዲወርድ ለዝናም እጅ መንሻን ስጡ። ³⁶ውርጭና ዐመዳይ፥ የእነርሱም ቅዝቃዜ፥ የዐመዳይ ነፋሳትም ሁሉ፥ የእነርሱም ጭንቅ ሁሉ ቢወድቁባችሁ በእነዚያ ወራቶች በፊታቸው መቆም አይቻላችሁም።

መጽሐፈ ሄኖክ 38