Enoch Chapter 37 - መጽሐፈ ሄኖክ | EOTC Bible

¹ጻድቃን፥ እመኑ፤ ኃጥኣን ለስድብ ይሆናሉና፥ በዐመፅም ቀን ይጠፋሉና። ²ልዑል የእናንተን ጥፋት ያስባልና፥ መላእክትም በሰማይ በእናንተ ጥፋት ላይ ደስ ይላቸዋልና ይህ የታወቀ ይሆንላችኋል። ³ኃጥኣን፥ ምን ታደርጉ ዘንድ አላችሁ? የጻድቃን የጸሎታቸውን ቃል በምትሰሙበት ጊዜ በዚያች የፍርድ ቀን ወዴት ትሸሻላችሁ? ⁴በእነዚያም ወራቶች የቅዱሳን ጸሎት ወደ እግዚአብሔር ትደርሳለች፥ በእናንተ ግን የቅጣታችሁ ወራት ይደርስባችኋል። ⁵የዐመፃችሁም ነገር ሁሉ በገናናውና በቅዱሱ ፊት ይነበባል፤ ፊታችሁም ያፍራል፤ በዐመፅ የጸና ሥራ ሁሉ ይጣላል። ⁶በባሕርና በየብስ መካከል ያላችሁ፥ ክፉ መታሰቢያችሁም በላያችሁ ያለባችሁ ኃጥኣን ወዮላችሁ! ⁷በእውነት ያይደለ ብርንና ወርቅን የምትሰበስቡ፥ ባለጸግነትን በለጸግን፤ ገንዘብም በዛልን፤ የወደድነውንም ሁሉ ገንዘብ አደረግን የምትሉ እናንተ፥ ወዮላችሁ! ⁸ብሩን ሰብስበን በሳጥኖቻችን መልተናልና፥ በቤታችንም ያሉ አራሾች እንደ ውኃ በዝተውልናልና አሁን ያሰብነውን እናድርግ የምትሉ እናንተ ወዮላችሁ! ⁹ሐሰታችሁ እንደ ውኃ ይፈስሳል፤ ባለጠግነታችሁ አይኖርላችሁምና፤ ነገር ግን ከእናንተ ፈጥኖ ይጠፋል። ሁሉን በዐመፅ ሰብስባችሁታልና። ¹⁰እናንተም ለታላቅ ርግማን ትሰጣላችሁ። ¹¹ዛሬም እኔ ለብልሆችና ለሰነፎች እምልላችኋለሁ፤ በምድር ላይ ብዙ ነገርን ታያላችሁና። ¹²እናንተ ወንዶቹ ከሴቶች ይልቅ ጌጥን ታጌጣላችሁና፥ ይልቁንም ከድንግሊቱ ይልቅ ብዙ መልክ ያለውን ጌጥ ታደርጋላችሁና። ¹³በመንግሥትና በገናናነት፥ በሥልጣንም፥ በብርና በወርቅ፥ በነጭ ሐርም፥ በክብርም ታጌጣላችሁ። ¹⁴መብሎችም እንደ ውኃ ይፈስሳሉ፤ ስለዚህም ትምህርትና ጥበብ የላቸውም። ¹⁵በዚያም ከገንዘባቸውና ከጌትነታቸው፥ ከክብራቸውም ሁሉ ጋር አንድ ሆነው ይጠፋሉ። ¹⁶በስድብና በችጋር፥ በታላቅ በቀልም ነፍሳቸው ወደ እሳት ጕድጓድ ትወድቃለች። ¹⁷ኃጥኣን፥ ተራራው ወንድ ባሪያ እንዳልነበረ፥ እንግዲህም ወዲህ እንደማይሆን፥ ኮረብታም ለሴት ሴት ባሪያ እንዳይደለች ለእናንተ ማልሁላችሁ። ¹⁸እንደዚሁም ኀጢአት በምድር ላይ አልተላከችም፤ ነገር ግን ሰዎች ከራሳቸው ፈጠሩአት፤ እርሷንም የሠሯት ሰዎች ለታላቅ መርገም ይሆናሉ። ¹⁹ለሴትም ምክነት አልተሰጣትም፤ ነገር ግን በእጅዋ በሠራችው ሥራ ልጅ ሳትወልድ ትሞታለች። ²⁰ኃጥኣን፥ በቅዱሱና በገናናው ማልሁላችሁ፤ ክፉ ሥራችሁ ሁሉ በሰማያት የተገለጠ ነውና፥ የተከደነና የተሰወረ የግፍ ሥራም የላችሁምና። ²¹በመንፈሳችሁ አታስመስሉ፤ በሰማይም በልዑል ፊት በየቀኑ ይጻፍ ዘንድ ያለውን ኀጢአታችሁን ሁሉ እንደማታውቁና እንደማታዩ በልቡናችሁ አትናገሩ። ²²የምትሠሩትም ግፍ ሁሉ በየቀኑ እስከ ፍርዳችሁ ቀን ይጻፋልና ከዛሬ ጀምሮ ታውቃላችሁ። ²³ሰነፎች፥ ወዮላችሁ! በስንፍናችሁ ትጠፋላችሁና፥ ጠቢባንንም አትሰሟቸውምና፥ በጎ ነገርም አታገኛችሁምና። ²⁴አሁንም ለጥፋት ቀን የተዘጋጃችሁ እንደ ሆናችሁ ዕወቁ፥ ኃጥኣን ተፈርዶባችሁ ትሄዳላችሁ እንጂ እንድናለን ብላችሁ ተስፋ አታድርጉ። ²⁵መድንን አታውቁምና ትሞታላችሁ። በነፍሳችሁ ለታላቅዋ የፍርድ ቀን፥ ለታላቅዋ የመከራና የጕስቍልና ቀንም ተዘጋጅታችኋልና። ²⁶ክፉ ሥራን የምትሠሩ፥ ብርንዶንም የምትበሉ ልበ ደንዳኖች ወዮላችሁ! በልታችሁና ጠጥታችሁ የምትጠግቡትን መልካሙን ነገር ከየት አገኛችሁ? ልዑል እግዚአብሔር በምድር ላይ ካበዛው መልካም ሁሉ አይደለምን? ነገር ግን ሰላም የላችሁም። ²⁷የዐመፅን ሥራ የምትወዷት ወዮላችሁ! በጎዋን ነገር ለእናንተ ለምን ተስፋ ታደርጋላችሁ? ²⁸በጻድቃንም እጆች ተላልፋችሁ ትሰጡ ዘንድ እንዳላችሁ ዕወቁ፤ አንገቶቻችሁንም ቈርጠው ይገድሏችኋል፤ አይራሩላችሁምም። ²⁹በጻድቃን መከራ ደስ የሚላችሁ ወዮላችሁ! ለእናንተ መቃብር አይቈፈርላችሁምና። ³⁰የጻድቃንን ነገር የምትንቁ ወዮላችሁ! የሕይወት ተስፋ አይሆንላችሁምና። ³¹ሐሰት ነገርንና የዝንጉዎችን ነገር የምትጽፉ ወዮላችሁ! እነርሱ ስንፍናን እንዲሰሟትና እንዳይዘነጓት ሐሰታቸውን ይጽፋሉና። ³²ሰላምም አይሆንላቸውም፤ ነገር ግን ሳይዘገዩ ፈጥነው ሞትን ይሞታሉ። ³³ኀጢአትን የምትሠሩ፥ የሐሰትን ነገር የምታመሰግኑና የምታከብሩም ወዮላችሁ! በዚሁም ጠፋችሁ፤ ሕይወትና በጎ ነገርም የላችሁም። ³⁴የቅን ፍርድ ነገሮችን የሚለዋውጡ ወዮላቸው! የዘለዓለም ሥርዐትንም ይለውጣሉ፤ ራሳቸውንም ኀጢአተኞች እንዳልሆኑ የሚያደርጉ በምድር ላይ ይረገጡ ዘንድ አላቸው።

መጽሐፈ ሄኖክ 37