Enoch Chapter 36 - መጽሐፈ ሄኖክ | EOTC Bible

¹አሁንም ልጆቼ፥ እላችኋለሁ፤ ጽድቅን ውደዱአት፤ በእርሷም ሂዱ፤ የጽድቅ መንገዶችን ይቀበሏቸው ዘንድ ይገባልና፤ ²የዐመፅ መንገዶችም ፈጥነው ይጠፋሉ፤ ያንሳሉም፤ ለታወቁ ሰዎችም ከልጅ ልጅ ጀምሮ የዐመፅና የሞት መንገዶች ይገለጣሉ፤ ከእነርሱም ይርቃሉ፤ አይከተሏቸውምም። ³አሁንም ለእናንተ ለጻድቃን እላችኋለሁ፤ በክፉ መንገዶች አትሂዱ፤ በግፍዕና በሞት መንገድም አትሂዱ፤ እንዳትጠፉም ወደ እነርሱ አትቅረቡ፤ ነገር ግን የተመረጠች ጽድቅንና ሕይወትን ለእናንተ ፈልጉ፤ ምረጡም። ⁴በሰላም መንገዶችም ሂዱ፤ ትድናላችሁ፤ በተድላም ትኖራላችሁ፤ በልቡናችሁም ዐሳብ ትይዛላችሁ። ⁵ክፉ ጥበብን ይሠሩ ዘንድ ኃጥኣን ሰዎችን እንደሚፈትኗቸው አውቃለሁና ነገሬ ከልቡናቸሁ አይጥፋ፤ ቦታም ሁሉ አይገኝላትም፤ መከራም ሁሉ አይጐድልም። ⁶ዐመፅንና ግፍን ለሚያንጹ፥ ተንኰልንም ለሚሠሯት ሰዎች ወዮላቸው! እነርሱ ፈጥነው ይጠፋሉና፥ ሰላምም የላቸውምና። ⁷ቤታቸውን በኀጢአት ለሚሠሩ ሰዎች ወዮላቸው! ከመሠረታቸው ሁሉ ይጠፋሉና፥ በሰይፍም ይወድቃሉና፥ ወርቅንና ብርንም የሚሰበስቧት በፍርድ ፈጥነው ይጠፋሉና። ⁸እናንተ ባለጠጎች ወዮላችሁ! በባለጠግነታችሁ ላይ ታምናችኋልና፥ ከባለጠግነታችሁም ትለያላችሁና። ⁹በባለጠግነታችሁ ወራት ልዑልን አላሰባችሁትምና፥ እናንተስ ስድብን፥ በደልንም ሠራችኋት፤ ደም ለሚፈስባት ቀንና ለጨለማዋ ቀን፥ ለታላቅዋ ፍርድ ቀንም የተዘጋጃችሁ ሆናችኋል። ¹⁰የፈጠራችሁ እንደሚያጠፋችሁ፥ በውድቀታችሁም ላይ ይቅርታው እንደማይደረግላችሁ እኔ እንደዚህ ብዬ እነግራችኋለሁ። ¹¹ፈጣሪያችሁም በጥፋታችሁ ደስ ይለዋል፤ የእናንተም ጻድቃን በእነዚያ ወራት ለዝንጉዎችና ለኃጥኣን መዘባበቻ ይሆናሉ። ¹²ዐይኖቼ ውኃን የቋጠሩ ደመናዎችን ይሆኑ ዘንድ፥ በእናንተም ላይ አለቅስ ዘንድ፥ ውኃንም እንደ ቋጠረ ደመና እንባዬን አፈስ ዘንድ፥ ከልቡናዬ ኀዘንም አርፍ ዘንድ ማን በሰጠኝ ነበር። ¹³ስድብንና ክፋትን ታደርጉ ዘንድ ማን ሰጣችሁ? እናንተን ኃጥኣንን ቍርጥ ፍርድ ያገኛችኋል። ¹⁴ጻድቃን ከኃጥኣን የተነሣ አትፍሩ፤ እንደ ወደዳችሁ በእነርሱ ላይ ፍርድን ታደርጉባቸው ዘንድ እግዚአብሔር ዳግመኛ በእጃችሁ ይጥላቸዋልና። ¹⁵እንዳትፈቱ ሆናችሁ ግዝትን ለምትገዝቱ ለእናንተ ወዮላችሁ! ስለ ኀጢአታችሁም ድኅነት ከእናንተ ራቀ። ¹⁶ለባልንጀራችሁ ክፉ ምላሽ ለምትመልሱ ለእናንተ ወዮላችሁ! እንደ ሥራችሁ መጠን ፍዳውን ትቀበላላችሁና። ¹⁷ሐሰት ለምትመሰክሩ፥ ለበደልም ለምትገቧት ለእናንተ ወዮላችሁ! ፈጥናችሁ ትጠፋላችሁና። ¹⁸እናንተ ኃጥኣን፥ ወዮላችሁ! ጻድቃንን ታሳድዱአቸዋላችሁና፥ እናንተም በእነርሱ እጅ ትወድቃላችሁና፥ ከዐመፅም የተነሣ ትሰደዳላችሁና፥ የእነርሱም ቀንበር በእናንተ ይጸናልና። ¹⁹ጻድቃን፥ ይህን ተስፋ አድርጉ፤ ኃጥኣን ከፊታችሁ ፈጥነው ይጠፋሉና፥ እንደ ወደዳችሁም ሥልጣን በእነርሱ ላይ ይሆንላችኋልና። ²⁰ኃጥኣንም መከራ በሚቀበሉበት ቀን የእናንተ ልጆች እንደ አሞሮች ከፍ ከፍ ይላሉ፤ ይነሣሉ። ²¹ማረፊያችሁም ከጥንብ አሞራ ቦታ ይልቅ ይርቃል፤ ወጥታችሁም ከዐመፀኞች ፊት የተነሣ ወደ ጕድጓድና ወደ ዐለቱ ንቃቃት እንደ ሽኮኮ ለዘለዓለም ትገባላችሁ። ²²በእናንተም ላይ ይጮኻሉ፤ ይህ ኀጢአታችሁ በእናንተ ምስክር ይሆንባችኋል እንጂ እናንተ እንደ እነርሱ አትሆኑም፤ ከኃጥኣንም ጋር አንድ ሆናችሁ፤ እንደ ሄለይም ያለቅሳሉ። ²³መከራን የምትቀበሉ እናንተ ግን አትፍሩ፤ ድኅነት ይሆንላችኋልና፥ የበራ ብርሃንም ለእናንተ ያበራላችኋልና፥ ከሰማይም የዕረፍት ቃልን ትሰማላችሁና። ²⁴ኃጥኣን ወዮላችሁ! ባለጸግነታችሁ ጻድቃንን ያስመስላችኋልና፥ ልቡናችሁም ኃጥኣን እንደ ሆናችሁ ይዘልፋችኋልና። ²⁵ይህም ነገር ለክፋታችሁ መታሰቢያ በእናንተ ላይ ምስክር ይሆናል። ²⁶የስንዴውን ፍሬ የምትበሉ፥ ከምንጩም መነሻ ኀይልን የምትጠጡ፥ የተዋረዱትንም በኀይላችሁ የምትረጋግጧቸው ወዮላችሁ! ²⁷ሁልጊዜ ውኃን የምትጠጡ ወዮላችሁ! ፍዳን ፈጥናችሁ ትቀበላላችሁና፥ የሕይወትንም ምንጭ ትታችኋልና ፈጽማችሁ ትጠፋላቸሁ። ²⁸ዐመፅንና ሽንገላን፥ ፅርፈትንም የምትሠሩ ወዮላችሁ! ይህም በእናንተ ላይ ለክፋት መታሰቢያ ይሆናል። ²⁹ጻድቁን በኀይል የምትቀጠቅጡት ኀያላን ወዮላችሁ! የጥፋታችሁ ቀን ትመጣለችና። ³⁰በእነዚያም ወራቶች በፍርዳችሁ ቀን ብዙዎችና ደጎች ወራቶች ለጻድቃን ይመጣሉ።

መጽሐፈ ሄኖክ 36