Enoch Chapter 35 - መጽሐፈ ሄኖክ | EOTC Bible

¹“ከዚህም በኋላ ሁለተኛዋ ጽድቅ የሚደረግባት ስምንተኛዪቱ ሱባዔ ትደረጋለች፤ ከግፈኞች የተነሣም የእውነት ፍርድ ይደረግባት ዘንድ ለእርስዋ ሰይፍ ይሰጣል፤ ኃጥኣንም በጻድቃን እጅ ይሰጣሉ። ²በመጨረሻዋም ከጽድቃቸው የተነሣ ንብረት ያደርጋሉ፥ ለገናናው ንጉሥም እስከ ዘለዓለም ሊመሰገንበት ቤት ይሠራል። ³“ከዚህም በኋላ በዘጠነኛዪቱ ሱባዔ ለዓለም ሁሉ የእውነት ፍርድ ትገለጣለች። ⁴የዝንጉዎችም ሥራ ሁሉ ከምድር ይጠፋል፤ ዓለምም ለጥፋት ይቈጠራል፤ ሰዎችም ሁሉ የቀናች መንገድን ይመለከታሉ። ⁵“ከዚህም በኋላ በዐሥረኛዪቱ ሱባዔ በሰባተኛው ክፍል የዘለዓለም ፍርድ ትደረግባታለች። ⁶ከመላእክት ሁሉ መካከል የሚወጣ ታላቅ ፍርድም በዘለዓለማዊው ሰማይ ከትጉሃን መላእክት ይደረጋል። ⁷የቀደመውም ሰማይ ፈጽሞ ያልፋል፤ አዲሱ ሰማይም ይገለጣል። የሰማይ ሠራዊትም ሁሉ ሰባት እጥፍ ለዘለዓለም ያበራሉ። ⁸ከዚህም በኋላ ቍጥር የሌላቸው ብዙ ሱባዔዎች በቸርነቱና በይቅርታው ለዘለዓለም ይሆናሉ፤ ከዚያም በኋላ ኀጢአት እስከ ዘለዓለም ትሠራለች አትባልም። ⁹“አሁንም ልጆቼ፥ እነግራችኋለሁ፤ የጽድቅ መንገዶችንና የግፍ መንገዶችንም አሳያችኋለሁ። ¹⁰ዳግመኛም የሚመጣውን ታውቁ ዘንድ አሳያችኋለሁ፤ አሁንም ልጆቼ፥ ስሙኝ፤ በጽድቅ መንገዶችም ሂዱ። ¹¹በዐመፅ መንገድ የሚሄዱ ሁሉ ለዘለዓለም ይጠፋሉና በግፍ መንገዶች አትሂዱ።” ¹²ከሰው ሁሉ ክቡር፥ የምድርም ሁሉ መምህር ከሆነው፥ የጥበብን ትምህርት ሁሉ ከጻፈው ከሄኖክ የተጻፈ መጽሐፍ፥ ¹³በምድር ለሚኖሩ ለልጆቼ ሁሉ፥ ፍርድንና ሰላምን ለሚያደርጉ ለኋላ ልጆችም፥ ¹⁴ቅዱሱና ገናናው ለሁሉ ቀኖችን ሰጥትWaልና መንፈሳችሁ በዘመናት አትዘን። ¹⁵ጻድቅ ሰው ከእንቅልፉ ይነሣል፤ በጽድቅ መንገዶችም ይሄዳል። ¹⁶መንገዱም፥ አኗኗሩም ሁሉ በቸርነትና በዘለዓለማዊ ይቅርታ ነው፤ ጻድቁን ይቅር ይለዋል፤ ለእርሱም ለዘለዓለሙ ቅንነትን ይሰጠዋል፤ ሥልጣንንም ይሰጠዋል። ¹⁷በቸርነትና በጽድቅ ጸንቶ ይኖራል፤ ብርሃንም ለዘለዓለም ይኖራል፤ ኀጢአትም በጨለማ እስከ ዘለዓለም ትጠፋለች፤ ከእንግዲህ ወዲያም ከዚያች ቀን ጀምሮ እስከ ዘለዓለም አትታይም። ¹⁸ከዚህም በኋላ እንዲህ ሆነ፥ ሄኖክ ከመጻሕፍት ይናገር ጀመረ። ¹⁹ሄኖክ ስለ ልጆችና ስለ ዓለም ምርጦች፥ ስለ ጽድቅና ስለ ቅን ፍርድ ተክልም እንዲህ አለ- “ልጆቼ፥ እነዚህን ነገሮች እነግራችኋለሁ፤ አስረዳችኋለሁም። ²⁰ከሰማይ የታየኝን ራእይ፥ ከቅዱሳን መላእክት ቃልም ያወቅሁትንና በሰማይ ሰሌዳ ላይ ያስተዋልሁትን እነግራችኋለሁ። ²¹ሄኖክም ከመጻሕፍት ይናገር ጀመረ፥ እኔ ሰባተኛው ትውልድ በመጀመሪያቱ ሱባዔ ተወለድሁ። ²²ፍርድና እውነት እስኪደረጉ ድረስ ጌታ ታገሠ፤ ከእኔም በኋላ በሁለተኛዪቱ ሱባዔ ታላቅ ኀጢአት ትሠራለች። ²³ተንኰልም ጸናች፤ በእርሷም የመጀመሪያዪቱ መጨረሻ ትደረጋለች። ²⁴ሰውም በእርስዋ ይድናል፤ እርሱም ከተጨረሰ በኋላ ዐመፅ ታድጋለች፤ እርሱም ለኀጥኣን ሥርዐትን ያደርጋል። ²⁵ከዚህም በኋላ በሦስተኛዪቱ ሱባዔ በመጨረሻዋ ሰው ለእውነተኛ ፍርድ ተክል ይመረጣል፤ ከእርሱም በኋላ የዘለዓለም ጽድቅና ርትዕ ተክል ይወጣል። ²⁶ከዚህም በኋላ በአራተኛዪቱ ሱባዔ በመጨረሻዋ የቅዱሳንና የጻድቃን ራእያት ይገለጣሉ። ሥርዐትና ቅጥርም ለልጅ ልጅ ዘመን ይሠራላቸዋል። ²⁷ከዚህም በኋላ በአምስተኛዪቱ ሱባዔ በመጨረሻዋ የምስጋናና የመንግሥት ቤት እስከ ዘለዓለም ይሠራል። ²⁸ከዚህም በኋላ በስድስተኛዪቱ ሱባዔ በእርሷ የሚኖሩ ሰዎች ሁሉ ደንቆሮዎች ናቸው፤ የሁሉም ልቡናቸው ከጥበብ ይለያል፤ በእርሷም ሰው ያርጋል። ²⁹በመጨረሻዋም ቤተ መንግሥቱ በእሳት ይቃጠላል፤ የተመረጠው የመንግሥት ወገን ሁሉም በእርሷ ይበተናሉ። ³⁰ከዚህም በኋላ በሰባተኛዪቱ ሱባዔ ወንጀለኛዋና ሥራዋ ብዙ የሆነ ትውልድ ትነሣለች፤ ሥራዋም ሁሉ ወንጀል ነው። ³¹በመጨረሻዋም ለፍጥረቱ ሁሉ ሰባት ዕጥፍ ትምህርት የሚሰጣቸው የተመረጡ ጻድቃን ከዘለዓለም የጽድቅ ተክል ይመረጣሉ። ³²ከሰው ልጆች ሁሉ የቅዱሱን ቃል መስማት የሚችልና የማይታወክ ማን ነው? አሳቡንስ ያስብ ዘንድ የሚችል ማን ነው? ³³ሰማይንና ሥራዋንም ሁሉ ቀና ብሎ ማየት የሚችል ማን ነው? ³⁴የሰማይንስ ሥራ ማወቅ የሚቻለው ማን ነው? ነፍሱን ያይ ዘንድ፥ ያም ባይሆን መንፈሱ ያይና ይናገር ዘንድ፥ ያም ባይሆን ወደ ላይ ይወጣና ክንፎቻቸውን ሁሉ ያይና ያስባቸው ዘንድ፥ ያም ባይሆን እንደ እነርሱ ያደርግ ዘንድ የሚቻለው ማን ነው? ³⁵የምድር ወርዷና ርዝመትWa ምን እንደ ሆነ ማወቅ የሚችል ሰው ሁሉ ማን ነው? ³⁶የእነዚህ ሁሉ ልካቸው ለማን ተገለጠ? የሰማይም ምጥቀትWaና ርዝመትWa ምን እንደ ሆነ፥ የጸናችም በምን ላይ እንደ ሆነ ማወቅ የሚችል፥ የኮከቦችም ቍጥራቸው ምን ያህል እንደ ሆነ፥ ብርሃናትም ሁሉ በየት እንደሚያርፉ ማወቅ የሚቻለው ሰው ሁሉ ቢኖር በእርሱ ነው።

መጽሐፈ ሄኖክ 35