Enoch Chapter 34 - መጽሐፈ ሄኖክ | EOTC Bible

¹ባማረችው ምድር ዙፋን እስኪሠራ ድረስ አየሁ፤ የበጎችም ጌታ በእርሱ ላይ ተቀመጠ። ²የታጠፉትንም መጣፎች ሁሉ አነሣ፤ እነዚያንም መጣፎች በበጎች ጌታ ፊት ገለጣቸው። ³እነዚያንም የቀደሙትን ሰባቱን ነጮች ጠራቸው፤ ኀፍረታቸው እንደ ፈረስ ኀፍረት ከሆነ ከእነዚያ ከዋክብት ከሚቀድም ከመጀመሪያው ኮከብ ወደ እርሱ ያመጡ ዘንድ አዘዘ። ⁴አስቀድሞ የወደቀውን መጀመሪያውንም ኮከብ፥ ሁሉ ወደ እርሱ አመጧቸው። ⁵ከሰባቱ ነጮች አንዱ የሆነውን በፊቱ የሚጽፈውንም ያን ሰው እንዲህ አለው- ⁶“በጎችን የሰጠኋቸውን፥ ተቀብለውም ካዘዝኋቸው ወጥተው ብዙዎችን ያጠፉትን እነዚህን ሰባውን እረኞች አግዛቸው።” ⁷እነሆ ሁሉንም ታስረው አየኋቸው፤ ሁሉም በፊቱ ቆመው ነበር፤ ፍርድም አስቀድሞ ከከዋክብት ተጀመረ፤ ተወቀሱ፤ ኀጢአተኞችም ሆነው ተገኙ፤ ወደ ቅጣት ቦታም ሄዱ። ⁸ወደ ጥልቁም ጣሏቸው፤ ያም ቦታ የሚያላልብ፥ እሳትንና የእሳት ምሰሶን የተመላ ነው። ⁹እነዚያም ሰባው እረኞች ለፍርድ ቀረቡ፤ ኀጢአተኞችም ሆኑ፤ እነርሱም ወደዚያ የእሳት ጕድጓድ ተጣሉ። ¹⁰ያንጊዜም እንደዚሁ እሳትን የተመላ አንድ ጕድጓድ በምድር መካከል እንደ ተከፈተ አየሁ። ¹¹የታወሩ እነዚያን በጎችም አመጧቸው። ለፍርድ ቀረቡ፤ ኀጢአተኞችም ሆነው ተገኙ፤ ወደዚያ ወደ እሳቱ ጕድጓድም ተጣሉ፤ ተቃጠሉም። ¹²ያም ጕድጓድ በዚያ ቤት በስተቀኝ ነበር፤ እነዚያንም በጎች ሲቃጠሉ፥ አጥንቶቻቸውም ሲቃጠሉ አየሁ። ¹³ያን ያረጀውንም ቤት እስኪጠቀልለው አይ ዘንድ ቆምኹ፤ ምሰሶዎችንም ሁሉ አወጧቸው። ¹⁴የዚያም ቤት ተክሉና ጌጡ ሁሉ ከእርሱ ጋር ተጠቀለለ፤ አውጥተውም በምድር ቀኝ ባለ በአንድ ቦታ ጣሉት። ¹⁵የበጎች ጌታም ከዚያ ከቀደመው ቤት ታላቅና ከፍ ያለ አዲስ ቤትን እስኪያመጣ ድረስ አየሁ፤ ያንም አስቀድማ በተጠቀለለችው ቤት ቦታ አቆመው። ¹⁶ምሰሶዎችዋም ሁሉ አዲሶች ናቸው፤ ጌጧም ሁሉ አዲስ ነው፤ ካፈረሳት ካረጀችው ከመጀመሪያዪቱም ቤት ይልቅ ታላቅ ነው፤ በጎችም ሁሉ በመካከሏ ናቸው። ¹⁷የቀሩትንም በጎች ሁሉና በምድር ላይ ያሉ እንስሳትን ሁሉ፥ የሰማይ ወፎችንም ሁሉ፥ ¹⁸ለእነዚያ በጎች ሲወድቁና ሲሰግዱ፥ ሲማልዷቸውና ቃላቸውንም ሁሉ ሲሰሟቸው አየኋቸው። ¹⁹ከዚያም በኋላ ነጫጭ ልብስ የለበሱና አስቀድመው ወደ ሰማይ ያወጡኝ እነዚያ ሦስቱ እጄን ያዙኝ። ²⁰የዚያም አውራ እጅ ይዛኝ ሳለች አወጡኝ፤ ፍርድም ሳትደረግ በእነዚያ በጎች መካከል አኖሩኝ። ²¹እነዚያም በጎች ሁሉ ነጫጭ ሆኑ፤ ፀጕራቸውም ታላቅና ንጹሕ ነበር። ²²የጠፉና የተበተኑ ሁሉ፥ የዱር አራዊት ሁሉና የሰማይ ወፎችም ሁሉ በዚያ ቤት ተሰበሰቡ። ²³ሁሉም ደጋግ ሁነዋልና፥ ወደ ማደሪያውም ተመልሰዋልና የበጎች ጌታ እጅግ ደስ አለው። ²⁴ለበጎችም የተሰጣቸውን ያን ሰይፍ እስኪያጋድሙት ድረስ አየሁ፤ ወደ ቤቱም መለሱት፤ በጌታም ፊት አተሙት። ²⁵በጎችም ሁሉ በዚያ ቤት ተዘጋባቸው፤ ነገር ግን አልቻላቸውም፤ የሁሉም ዐይኖቻቸው ተገልጠው በጎውን ይመለከቱ ነበር፤ ከእነርሱም በመካከላቸው የማያይ አንድ እንኳ አልነበረም። ²⁶ያም ቤት ታላቅና ሰፊ እንደ ሆነ አየሁ፤ ፈጽሞም ሙሉ ነበር። አንድ ነጭ ላምም ተወልዶ አየሁ፤ ቀንዶቹም ታላላቆች ነበሩ። ²⁷የዱር አራዊትና የሰማይ ወፎችም ሁሉ ፈርተው በየጊዜው ይማልዱታል። ²⁸ዘመዶቻቸውም ሁሉ እስኪለወጡ ድረስ አየሁ፤ ላሞችም ሁሉ ነጫጭ ሆኑ። ²⁹በመጀመሪያም ነገር በመካከላቸው ሆነ፤ ያም ነገር ታላቅ አውሬ ሆነ፤ በራሱም ላይ ታላላቅና ጥቋቍር ቀንዶች አሉ። ³⁰የበጎችም ጌታ በእነርሱና በላሞች ሁሉ ደስ አለው። ³¹እኔም በመካከላቸው ተኝቼ ነቃሁ፤ ሁሉንም አየሁ፤ ተኝቼም ያየሁት ራእይ ይህ ነው፤ ነቅቼም የጽድቅ ጌታን አመሰገንሁት፤ ለእርሱም ምስጋናን አቀረብሁለት። ³²ከእርሱም የተነሣ ታላቅ ልቅሶን አለቀስኹ፤ ወደዚያም ወደ አየሁት ሲወርዱ ባየሁ ጊዜ መታገሥን አልቻልሁምና እንባዬ አልተገታም። ³³ሁሉ መጥቶ ይጨረሳልና፥ የሰውም ሁሉ ሥራ በየወገኑ ተገለጠልኝ። ³⁴በዚያችም ሌሊት የቀደመውን ሕልሜን አሰብሁት፤ ያን ራእይ አይቻለሁና ስለ እርሱ ነገር አለቀስሁ፤ ታወክሁም። ³⁵አሁንም ልጄ፥ ማቱሳላ! ወንድሞችህን ሁሉ ጥራልኝ፤ የእናትህንም ልጆች ሁሉ ሰብስብልኝ፤ ቃል ጠርቶኛልና። ³⁶እስከ ዘለዓለምም የሚደርስባችሁን እገልጥላችሁ ዘንድ መንፈስ በእኔ ላይ አድሮአልና። ³⁷ከዚያም በኋላ ማቱሳላ ሄዶ ወንድሞቹን ሁሉ ወደ እርሱ ጠራቸው፤ ዘመዶቹንም ሰበሰባቸው፤ ለልጆቹም ሁሉ እውነት ነገርን ነገራቸው። ³⁸እንዲህም አለ- “ልጆቼ፥ የአባታችሁን ነገር ሁሉ ስሙ፤ ወዳጆቼ፥ በእናንተ አዳኝባችኋለሁና፥ እነግራችኋለሁምና የአፌን ቃል በቅንነት አድምጡ። ³⁹ሕግንም ውደዷት፤ በእርሷም ሂዱ፤ ሁለት ልብም ሆናችሁ ወደ ሕግ አትቅረቡ፤ ልጆቼ፥ በእውነት ኑሩ እንጂ ሁለት ልብ ሆነው ከሚኖሩ ሰዎች ጋር አትተባበሩ። ⁴⁰እርስዋም በመልካም ጐዳና ትመራችኋለች፤ በምድር ላይ የግፍ አካል እንዲጸና አውቃለሁና ጽድቅ ለእናንተ ኅብረት ይሆናል። ⁴¹በምድርም ላይ ታላቅ መቅሠፍት ይፈጸማል፤ ዐመፅም ሁላ ትጨረሳለች፤ ከሥርዋም ትቈረጣለች። ⁴²ሕንጻውም ሁሉ ያልፋል፤ ዐመፅም ትደገማለች፤ በምድርም ላይ ትፈጸማለች፤ የዐመፅና የግፍ፥ የበደልም ሥራ ሁሉ እጥፍ ሆና ትሠራለች። ⁴³ዐመፅና ኀጢአት፥ ስድብና ግፍ፥ ክፉውም ሥራ ሁሉ በበዛ ጊዜ፥ በደልና ወንጀል፥ ርኵሰትም በበዛ ጊዜ ታላቅ መቅሠፍት ከሰማይ በእነዚህ ሁሉ ላይ ይደረጋል። ⁴⁴ቅዱስ እግዚአብሔርም በምድር ላይ ፍርድን ያደርግ ዘንድ በመቅሠፍትና በመዓት ይመጣል። ⁴⁵በእነዚያም ወራቶች ግፍ ከሥርዋ ትቈረጣለች፤ የዐመፅም ሥሮች ከሽንገላ ጋር ይቈረጣሉ፤ ከሰማይም በታች ይጠፋሉ። ⁴⁶ሁሉም ከአሕዛብ ጋር ይሰጣል፤ አዳራሾችም በእሳት ይቃጠላሉ፤ ከምድርም ሁሉ ያወጧቸዋል፤ በገሃነመ እሳትም ይጣላሉ። በመዓትና በዘለዓለማዊ ኀይለኛ ፍርድ ይጠፋሉ። ⁴⁷ጻድቁ ከእንቅልፉ ይነሣል፤ ጥበብም ይነሣል፤ ለእነርሱም ይሰጣል፤ ከእርሱም የተነሣ የዐመፅ ሥሮች ይቈረጣሉ። ⁴⁸ኃጥኣንም በሰይፍ ይጠፋሉ፤ ተሳዳቢዎችም በቦታው ሁሉ ይቈረጣሉ። ⁴⁹ግፍን የሚያስቧትና ስድብንም የሚሠሯት በሰይፍ ይጠፋሉ።

መጽሐፈ ሄኖክ 34