Enoch Chapter 33 - መጽሐፈ ሄኖክ | EOTC Bible

¹ሰባውን እረኞች ጠራ፤ ይጠብቋቸውም ዘንድ እነዚያን በጎች ሰጣቸው። ²ለእረኞችና ለአገልጋዮቻቸውም እንዲህ አላቸው- “ከእናንተ እያንዳንዱ ሁሉ ከዛሬ ጀምሮ በጎችን ይጠብቋቸው፤ እኔም የማዝዛችሁን ሁሉ አድርጉ። ³እኔም በቍጥር እሰጣችኋለሁ፤ ከእነርሱም የሚጠፋውን እኔ እነግራችኋለሁ፤ እነርሱንም አጥፉ፥” እነዚያንም በጎች ሰጣቸው። ⁴ሌላውንም ጠርቶ እንዲህ አለው- “ካዘዝኋቸው ወጥተው ከእነርሱ ውስጥ ያጠፋሉና በእነዚህ በጎች ላይ እረኞች የሚያደርጉትን ሁሉ አስተውል፤ ተመልከትም። ⁵በእኔ ትእዛዝ ምን ያህል እንደሚያጠፉ፥ በራሳቸውም ምን ያህል እንደሚያጠፉ በእረኞች የሚደረገውን ጥጋብና ጥፋት ሁሉ ጻፍ። ⁶የእያንዳንዳቸውንም እረኞች ጥፋት ሁሉ በእነርሱ ላይ ጻፍ። በፊቴም በቍጥር አንብብ፤ ምን ያህልም ያጠፏቸው እንደ ሆነ፥ ምን ያህልም ለጥፋት ይሰጧቸው እንደ ሆነ፥ ⁷የእረኞችን ሥራ ሁሉ እንዳውቅ ይህ ምስክር ይሆነኝ ዘንድ፥ ⁸ባዘዝኋቸውም ትእዛዝ ጸንተው ይኖሩ፥ ወይም አይኖሩ እንደ ሆነ የሚያደርጉትን አይቼ እሰጣቸው ዘንድ፥ ⁹እነርሱ አይወቁ፤ አንተም አታሳያቸው፤ አትዝለፋቸውም፤ ነገር ግን በየጊዜው እያንዳንዳቸው የሚያጠፉትን የእረኞችን ጥፋት ጻፍ። ሁሉንም ወደ እኔ አምጣ። ¹⁰እነዚያም እረኞች በየጊዜው እስኪጠብቋቸው ድረስ አየሁ፤ ከታዘዙትም ወጥተው ብዙ ይገድሉና ያጠፉ ጀመሩ። ¹¹እነዚያንም በጎች በአንበሶች እጅ ጣሏቸው፤ አንበሶችና ነብሮችም ከእነዚያ በጎች አብዛኛዎችን በልተው ዋጧቸው። ¹²የዱር እሪያዎችም ከእነርሱ ጋር በሉ፤ ያን ግንብም አቃጠሉት፤ ያንም የበጎች ቤት ቈፈሩት። ¹³እኔም ያ የበጎች ቤት ተቈፍሯልና ስለ ግንቡ እጅግ ብዙ አዘንሁ። ¹⁴ከዚያም በኋላ ወደዚያ ቤት ይገቡ እንደ ሆነ፥ ወይም አይገቡ እንደ ሆነ እነዚያን በጎች ማየት አልተቻለኝም። ¹⁵እረኞቻቸውና አገልጋዮቻቸውም በጎቹን ይበሏቸው ዘንድ ለዱር አራዊት ሁሉ አሳልፈው ሰጧቸው። ¹⁶ከእነርሱም እያንዳንዱ ሁሉ በየጊዜው በቍጥር ይቀበላል፤ ከእነርሱም እያንዳንዱ የሚያጠፋው ምን ያህል እንደ ሆነ ለሁለተኛው በመጽሐፍ ይጽፍለታል፤ ይልቁንም ከሥርዐታቸው ወጥተው እያንዳንዱ ይገድላል፤ ያጠፋልም። ¹⁷እኔም ስለ እነዚያ በጎች ብዙ ጊዜ አለቅስና እጮህ ጀመርሁ። ¹⁸እንደዚህም በየቀኑ ከእነዚያ እረኞች ለሚያጠፋው ለአንዱ እንዴት እንደሚጽፍለት ያን የሚጽፍለትን በራእይ አየሁ። ¹⁹አውጥቶም ያሳርፈዋል፤ ለበጎችም ጌታ መጽሐፉን ሁሉና የሚሠሩትን ሥራ ሁሉ፥ ከእነርሱም እያንዳንዳቸው ያሰወገዱትንና ለጥፋት አሳልፈው የሰጡትን ሁሉ ያሳያል። ²⁰መጽሐፉም በበጎች ጌታ ፊት ተነበበ፤ እርሱም መጽሐፊቱን በእጁ አነሣ፤ አነበባት፤ አጥፎም አኖራት። ²¹ከዚያም በኋላ እረኞች ዐሥራ ሁለት ሰዓት ሲጠብቁ አየሁ፤ ከእነዚያም በጎች ሦስቱ ተመልሰው መጥተው ገቡ። ²²ከዚያም ቤት የፈረሰውን ሁሉ ይሠሩ ጀመሩ፤ የዱር እሪያዎችም ከለከሏቸው፤ ነገር ግን አልተቻላቸውም። ²³ዳግመኛም እንደ ቀድሞው ይሠሩ ጀመሩ፤ ግንቡንም አነሡት፤ ግንቡም ረዥም ይባላል። ²⁴ዳግመኛም በግንቡ ፊት ማዕዷን ሲያኖሩ፥ የረከሰውንና ንጹሕ ያይደለውን ኅብስት ሁሉ በእርሱ ላይ ሲሠሩ አየሁ። ²⁵በዚህ ሁሉ ላይም በጎች ዐይኖቻቸውን ተጋርደዋል፤ አያዩምም፤ እረኞቻቸውም እንደዚሁ ናቸው። ²⁶ለጥፋትም አሳልፈው ይሰጧቸዋል፤ በጎቹንም በእግራቸው ይረግጧቸዋል፤ ይበሏቸዋልም። ²⁷የበጎቹም ጌታ በጎች ሁሉ ዳግመኛ እስኪበተኑ ድረስ ዝም አለ፤ ከእነርሱም ጋር አንድ ሆኑ፤ ከአራዊትም እጅ አላዳኗቸውም። ²⁸ያም መጽሐፉን የሚጽፍ አውጥቶ አሳየው፤ በበጎች ጌታ ማደሪያም አነበበው፤ ስለ እነርሱም ይማልደዋል። ²⁹የእረኞችንም ሥራ ሁሉ እያሳየው፤ ይለምነዋል፤ በእረኞችም ሁሉ ላይ በፊቱ ያዳኛል፤ ያንም መጽሐፍ አንሥቶ በእርሱ ዘንድ አኑሮ ወጣ። ³⁰ሠላሳ ሰባቱም እረኞች እንደዚህ እስከሚጠብቁበት ዘመን ድረስ አየሁ። ³¹ሁሉም በየጊዜያቸው እንደ ቀድሞዎቹ ፈጸሙ። ³²ሌሎችም በየጊዜያቸው ይጠብቋቸው ዘንድ ከእጃቸው ተቀበሏቸው፤ እያንዳንዱም እረኛ ሁሉ በየጊዜው ነው። ³³ከዚህም በኋላ የሰማይ ወፎችን ሁሉ በራእይ አየሁ፥ ንስሮችና ጥንብ አሞራ፥ አንጭት አሞራና ቍራዎች መጡ። ንስሮችም ወፎችን ሁሉ ይመሯቸው ነበሩ። ³⁴እነዚያንም በጎች ይበሏቸው ጀመሩ፤ ዐይኖቻቸውንም ይጐጠጕጧቸው ጀመሩ፤ ሥጋቸውንም ይበሉአቸው ጀመሩ። ³⁵በጎችም ሥጋቸው በወፎች ተበልቶአልና ጮኹ። ³⁶እኔም ተኝቼ ሳለሁ ጮኽሁ፤ በጎችንም በሚጠብቃቸው በእረኛው ላይ አለቀስሁ። ³⁷በጎችም በውሾችና በንስሮች፥ በአንጭት አሞራዎችም እስከ ተበሉ ድረስ አየሁ። ³⁸አጥንቶቻቸው ብቻቸውን እስከ ቆሙ ድረስ ሥጋንና ቍርበትን፥ ጅማትንም ፈጽሞ አልተዉላቸውም፤ አጥንቶቻቸውም በምድር ላይ ወደቁ፤ በጎችም አነሱ። ³⁹ሃያ ሦስቱም እረኞች እስከሚጠብቁበት ዘመን ድረስ አየሁ፤ አምሳ ስምንት ሱባኤንም በየዘመናቸው ፈጸሙ። ⁴⁰ታናናሾች ጠቦቶችም ከእነዚያ ነጫጭ በጎች ተወለዱ፤ ዐይኖቻቸውንም ይገልጡና ያዩ፥ ወደ በጎችም ይጮኹ ጀመሩ። ⁴¹በጎችም አልጮሁላቸውም፤ የነገሯቸውንም ነገር አላዳመጧቸውም፤ ነገር ግን ፈጽመው ቸል አሉ፤ ዐይኖቻቸውንም ተሸፈኑ፤ በረታባቸውም። ⁴²በራእይም በጠቦቶቹ ላይ ሲበርሩባቸው ቍራዎችን አየሁ፤ ከእነዚያም ጠቦቶች አንዱን ያዙት። ⁴³በጎችንም ቀጥቅጠው በሏቸው፤ ለእነዚያ ጠቦቶችም ቀንዶች እስኪወጡላቸው ድረስ አየሁ። ቍራዎችም ቀንዶቻቸውን ይሰብሩባቸው ነበር። ⁴⁴ከእነዚያም በጎች በአንዱ ላይ አንድ ትልቅ ቀንድ እስኪበቅል አየሁ። ዐይኖቻቸውም ተገለጡ። ⁴⁵በእነርሱም አየባቸው፤ ዐይኖቻቸውም ተከፈቱ፤ ለበጎችም ጮኸላቸው፤ አውራዎችም አዩት፤ ሁሉም ወደ እርሱ ሮጡ። ⁴⁶ንስሮችና ጥንብ አሞራዎች፥ ቍራዎችና አንጭት አሞራዎች እስከ ዛሬ ድረስ ይነጥቋቸው ነበር። በላያቸውም እያንዣበቡ ይበሏቸው ነበር። ⁴⁷በጎች ግን ዝም ብለው ነበር፤ አውራዎችም ፈጽመው ይጮኹ ነበር፤ እነዚያም ቍራዎች ከእነርሱ ጋር ይጋደሉና ይጣሉ ነበር። ቀንዱንም ሊያስወግዱ ወደዱ፤ ነገር ግን አልቻሉትም። ⁴⁸እረኞች፥ ንስሮችና እነዚያ ጥንብ አሞራዎች፥ አንጭት አሞራም እስኪመጡ ድረስ አየኋቸው። ⁴⁹የዚያንም አውራ ቀንዱን ይሰብሩ ዘንድ ለቍራዎች ጮኹ። ⁵⁰እነርሱም ከእርሱ ጋር ተጣልተው ተጋደሉ፤ እርሱም ከእነርሱ ጋር ተጣላ፤ ረድኤቱም ትመጣለት ዘንድ ጮኸ። ⁵¹የእረኞችን ስሞች የሚጽፍና በበጎች ጌታ ፊት የሚያቀርብ ያ ሰውም እስኪመጣ ድረስ አየሁ። ⁵²እርሱም ረዳው፤ ሁሉንም አሳየው፤ የዚያም አውራ ረዳቱ ወረደ፤ ያም የበጎች ጌታ ወደ እነርሱ በመዓት እስኪመጣባቸው ድረስ አየሁ። ⁵³ያዩትም ሁሉ ሸሹ፤ ሁሉም ከፊቱ የተነሣ በጥላው ወደቁ። ንስሮች፥ ጥንብ አሞራዎችና ቍራዎች፥ አንጭት አሞራም ተሰበሰቡ። ⁵⁴ከእነርሱም ጋር የሜዳ በጎችን አመጡ፤ ሁሉም በአንድነት የዚያን አውራ ቀንድ ሊሰብሩ ተረዳዱ። ⁵⁵በጌታ ቃል መጽሐፉን የሚጽፍ ያን ሰውም በኋላ የተነሡ እነዚያ ዐሥራ ሁለቱ እረኞች ያጠፉትን ያን የጥፋት መጽሐፍ እስኪገልጠው ድረስ አየሁት። ⁵⁶ከእነርሱም አስቀድመው ከነበሩት እነርሱ አብልጠው እንዳጠፉ በበጎች ጌታ ፊት አሳየ፤ የበጎችም ጌታ ወደ እነርሱ እስኪመጣ ድረስ አየሁ። ⁵⁷የቍጣውንም በትር በእጁ አንሥቶ ምድርን መታት፤ ምድርም ተሰነጠቀች፤ አራዊትም ሁሉ፥ የሰማይ ወፎችም ሁሉ ከእነዚያ ከበጎች የተነሣ ወደቁ፤ በምድርም ሰጠሙ፤ ምድርም ተጫነቻቸው። ⁵⁸ለበጎችም ታላቅ ሰይፍ እስኪሰጣቸው ድረስ አየሁ፤ በጎችም ይገድሏቸው ዘንድ በዱር አራዊት ሁሉ ላይ ወጡ። ⁵⁹አራዊትና የሰማይ ወፎችም ሁሉ ከፊታቸው ሸሹ።

መጽሐፈ ሄኖክ 33