Enoch Chapter 32 - መጽሐፈ ሄኖክ | EOTC Bible

¹የምድረ በዳ አውሬዎችንና ወፎችንም ይወልዱ ጀመሩ- ከእነርሱም የአሕዛብ ሁሉ ዓይነት ተገኘ። ²አንበሶችና ነብሮች፥ ዥቦችና ውሾች፥ አውጮችና የዱር እሪያ፥ ቀበሮዎችና ሽኮኮዎች፥ ³አነርና ዘማች አሞራ፥ ጥንብ አሞራና አንጭት አሞራ፥ ጉሬዛና ቍራዎች። ⁴በመካከላቸውም ነጭ ላም ተወለደ፤ አንዱም ከሌላው ጋር እርስ በርሳቸው ይነካከሱ ጀመሩ። ⁵በመካከላቸው የተወለደው ያ ነጭ ላምም የሜዳ አህያን፥ ከእርሱም ጋር ነጭ ላምን ወለደ። ⁶የሜዳ አህዮችም በዙ፤ ከእርሱም የተወለደው ያ ላም- ጥቁር የዱር እሪያንና ነጭ በግን ወለደ። ⁷ያም የዱር እሪያ ብዙ እሪያዎችን ወለደ፤ በጉም ዐሥራ ሁለት በጎችን ወለደ። ⁸ዐሥራ ሁለቱ በጎችም ባደጉ ጊዜ ከእነርሱ አንዱን ለሜዳ አህዮች አሳልፈው ሰጡት። ⁹እነዚያ የሜዳ አህዮችም ያን በግ ለዥቦች ሁለተኛ አሳልፈው ሰጡት። በጉም በዥቦች መካከል አደገ። ¹⁰ጌታም ዐሥራ አንዱን በጎች ከእርሱ ጋር ይኖሩ ዘንድ፥ ከእርሱም ጋር በዥቦች መካከል ይሰማሩ ዘንድ አመጣቸው። ¹¹እነዚህም በዙ፤ ብዙ የበጎች መንጋዎችንም ሆኑ፤ ዥቦችም ልጆቻቸውን እስኪጨርሱባቸው ድረስ ያስፈሯቸውና ያስጨንቋቸው ጀመሩ። ¹²ልጆቻቸውንም በብዙ ውኃ ፈሳሽ ጣሏቸው፤ እነዚያም በጎች ስለ ልጆቻቸው ይጮሁ፥ ወደ ጌታቸውም ይከሱ ጀመሩ። ¹³ከዥቦች የዳነውም በግ ሸሽቶ ወደ ሜዳ አህዮች ሄደ። ¹⁴የበጎች ጌታም የበጎችን ድምፅ ሰምቶ ከፍ ካለው ከጽርሐ አርያም እስኪወርድ ድረስ በጎችን እየጮሁ ሲያለቅሱ፥ በፍጹም ኀይላቸውም ጌታቸውን ሲለምኑት አየኋቸው። ¹⁵ወደ እነርሱም መጥቶ አያቸው፤ ከዥቦች ያመለጠውን ያን በግ ጠራው፤ በጎችንም እንዳይነኳቸው ያዳኝባቸው ዘንድ ስለ ዥቦች ነገረው። ¹⁶በጉም በጌታ ቃል ወደ ዥቦች ሄደ፤ ሌላው በግም ያን በግ ተገናኘው፤ ከእርሱም ጋር ሄደ። ¹⁷ሁለቱም በአንድነት ወደ ዥቦቹ ማኅበር ገቡ፤ ተናገሯቸውም። ¹⁸እንግዲህም ወዲህ በጎቹን እንዳይነኳቸው አዳኙባቸው። ¹⁹ከዚህም በኋላ በፍጹም ኀይላቸው እጅግ እንደ ጸኑባቸው ዥቦችን አየኋቸው። ²⁰በጎችም ጮሁ፤ ጌታቸውም ወደ በጎች መጥቶ ዥቦቹን ይመታቸው ጀመረ። ²¹ዥቦችም ይጮሁ ጀመሩ፤ በጎቹም ዝም አሉ፤ ከዚያም ጊዜ ጀምሮ አልጮሁም፤ በጎችንም ከዥቦች ተለይተው እስኪወጡ ድረስ አየኋቸው። ²²የዥቦችም ዐይኖቻቸው ተጋረዱ። እነዚያም ዥቦች በፍጹም ኀይላቸው በጎችን እየተከተሉ ወጡ። ²³የበጎችም ጌታ እየመራቸው ከእነርሱ ጋር ሄደ፤ በጎችም ሁሉ እርሱን ተከተሉት፤ ፊቱም የበራና የከበረ ነው፤ መልኩም የሚያስፈራ ነው። ²⁴ዥቦች ግን በአንዲት የውኃ መጠራቀሚያ እስኪገናኙአቸው ድረስ በጎቹን ይከተሏቸው ጀመሩ። ²⁵ያም የውኃ መጠራቀሚያ ተከፈለ፤ ውኃውም በዚህና በዚያ በፊታቸው ቆመ፤ የበጎቹም ጌታ ይመራቸው ነበር፤ በመካከላቸውና በዥቦቹም መካከል ቆመ። ²⁶ዥቦቹም በጎቹን ገና አላዩአቸውም ነበር፤ በውኃው ማጠራቀሚያ መካከልም ሄዱ። ²⁷ዥቦችም በጎችን ተከተሏቸው፤ ዥቦቹም በውኃው መጠራቀሚያ ላይ ተከትለዋቸው ሮጡ። ²⁸የበጎቹንም ጌታ ባዩት ጊዜ ከፊቱ ይሸሹ ዘንድ ተመለሱ። ²⁹ያም የውኃው መጠራቀሚያ ተሰበሰበ፤ ፈጥኖም እንደ ቀድሞ ፍጥረቱ ሆነ፤ ውኃውም- እኒህን ዥቦች እስኪአሰጥማቸው ድረስ መልቶ ከፍ ከፍ አለ። ³⁰በጎቹንም የተከተሏቸው ዥቦች ሁሉ እስኪጠፉና እስኪሰጥሙ ድረስ አየሁ። ³¹በጎች ግን ከውኃው ዐለፉ፤ ሣርና ውኃ ወደሌለበትም ምድረ በዳ ወጡ። ³²ዐይኖቻቸውንም ገልጠው ያዩ ጀመሩ፤ ጌታቸውም ሲጠብቃቸውና ሣርና ውኃ ሲሰጣቸው አየሁ። ³³ያም በግ በፊት በፊት እየሄደ ይመራቸው ነበር፤ በጉም ወደ ረዥሙ ዐለት ራስ ላይ ወጣ። ³⁴የበጎቹም ጌታ ወደ እነርሱ ላከው፤ ከዚህ በላይ በፊታቸው የቆመውን የበጎችን ጌታ አየሁት። ³⁵መልኩም ያማረ የሚያስፈራና፥ ኀይለኛ ነው፤ በጎቹም ሁሉ እርሱን አይተው ከፊቱ የተነሣ ፈሩ። ³⁶እነዚያም ሁሉ ከእርሱ የተነሣ ይፈሩና ይንቀጠቀጡ ነበር፤ በመካከላቸውም ከነበረው ከሁለተኛው በግ ጋር ያለ ያን በግ ተከትለው ጮሁ። ³⁷በጌታችን ፊት መቆም እርሱንም ማየት አይቻለንም አሉ፤ የሚመራቸውም ያ በግ ተመልሶ ወደ ዐለቱ ራስ ወጣ። ³⁸በጎቹም ዐይኖቻቸውን ይጋረዱ፥ ካሳያቸውም መንገድ ይስቱ ጀመሩ። ³⁹ያም በግ አላወቀም ነበር፤ የበጎችም ጌታ በእነርሱ ላይ ታላቅ ቍጣን ተቈጣባቸው። ⁴⁰በጉም ዐውቆ ከዐለቱ ራስ ወረደ። ⁴¹ወደ በጎችም መጣ፤ ዐይኖቻቸው የተጋረዱባቸውንና ከመንገዱ የወጡትን አብዛኛዎቹን አገኘ። ⁴²ባዩትም ጊዜ ፈሩ፤ ከፊቱም የተነሣ ተንቀጠቀጡ፤ ወደ ቦታቸውም ይመለሱ ዘንድ ወደዱ። ⁴³ያም በግ ሌሎች በጎችን ከእርሱ ጋር ወሰደ፤ ወደ እነዚያ ወደ በደሉ በጎችም ገባ። ⁴⁴ከዚህም በኋላ ይገድላቸው ጀመረ፤ በጎችም ከፊቱ የተነሣ ፈሩ፤ በጉም የበደሉ እነዚያን በጎች መለሳቸው፤ ወደ ቦታዎቻቸውም ተመለሱ። ⁴⁵በዚያም በጉ ሰው እስኪሆን ድረስ፥ ለበጎቹም ጌታ ቤትን እስኪሠራ ድረስ፥ በጎቹንም ሁሉ በዚያ ቤት እስኪያቆማቸው ድረስ ራእይን አየሁ። ⁴⁶በጎችንም የመራቸውን ያን በግ የተገናኘው በግ እስኪተኛ ድረስ አየሁ። ⁴⁷ታላላቁ በጎችም ሁሉ እስኪጠፉ ድረስ አየሁ፤ በእነርሱም ፋንታ ታናናሾቹ ተነሥተው ወደ መንጋው ገቡ። ⁴⁸ወደ ውኃው ፈሳሽም ቀረቡ፤ ይመራቸው የነበረው፥ ሰው የሆነው ያም በግ ከእነርሱ ተለይቶ ተኛ። ⁴⁹በጎችም ሁሉ ፈለጉት፤ በእርሱም ላይ ታላቅ ጩኸትን ጮሁ፤ ለዚያም በግ ከሚጮሁት ጩኸት ዝም እስኪሉ ድረስ አየሁ። ⁵⁰ያንም የውኃ ፈሳሽ አልፈውት ሄዱ፤ ስለ አንቀላፉትም ምትክ የሚመሯቸው በጎች ተተክተው መሯቸው። ⁵¹በጎችም ወደ አማረ ቦታ፥ ወደ ተወደደችና ወደ ሰባች ምድርም እስኪገቡ ድረስ አየሁ። ⁵²እነዚያም በጎች እስኪጠግቡ ድረስ አየሁ፤ ያም ቤት ባማረች ምድር በመካከላቸው ይኖር ነበር። ⁵³ሌላ በግ ተነሥቶ እስኪመራቸው ድረስ ዐይኖቻቸው የሚገለጡበትና የሚጋረዱበት ጊዜ ነበረ። ⁵⁴ሁሉንም መለሳቸው፤ ዐይኖቻቸውም ተገለጡ። ⁵⁵የበጎች አውራ ሌላ በግ እስኪነሣ ድረስም- እነዚያን በጎች ውሾችና ቀበሮች፥ የዱር እሪያም ይበሏቸው ጀመሩ። የሚመራቸውም አውራ ከእነርሱ አንዱ ነበር። ⁵⁶ያም አውራ ሁሉን እስኪያጠፋቸው ድረስ እነዚያን ውሾችና ቀበሮች፥ የዱር እሪያውንም ወዲህና ወዲያ ይወጋ ጀመር። ⁵⁷የዚያም በግ ዐይኖቹ ተገለጡ፤ በበጎች መካከል ያለ ክብሩን የተወ ያን አውራም አየው። ⁵⁸እነዚያንም በጎች ይወጋቸውና ይረግጣቸው ጀመረ፤ እርሱም ያለ ደስታ ኖረ። ⁵⁹የበጎችም ጌታ በጉን ወደ ሌላው በግ ላከው፤ ክብሩንም በተወው በዚያ በግ ፋንታ አውራ ይሆንና በጎችን ይመራቸው ዘንድ አስነሣው። ⁶⁰ወደ እርሱም ሄዶ ለብቻው አነጋገረው፤ ያንም አውራ አስነሥቶ ለበጎቹ ገዥና መሪ አደረገው። ⁶¹በዚህም ሁሉ እነዚያ ውሾች በጎቹን ያስጨንቋቸው ነበር። ⁶²መጀመሪያው አውራ ያን ኋለኛውን አውራ አሳደደው፤ ያም ኋለኛው አውራ ተነሥቶ ከፊቱ ሸሸ። ⁶³መጀመሪያውንም አውራ ውሾቹ እስኪያጠፉት ድረስ አየሁ። ⁶⁴እንዲህም ሆነ- ኋለኛው አውራ ተነሥቶ ታናናሽ በጎችን መራቸው። ⁶⁵ይህም ኋለኛው አውራ ብዙ በጎችን ወልዶ ሞተ። ⁶⁶ትንሹም በግ በእርሱ ፋንታ አውራ ሆነ፤ ለእነዚያም በጎች ገዥና መሪ ሆነ። ⁶⁷እነዚያም በጎች አደጉ፤ በዙም። እነዚያም ውሾችና ቀበሮች፥ የዱር እሪያም ፈሩ፤ ከእርሱም ሸሹ። ⁶⁸ያም አውራ አራዊትን ሁሉ ወጋ፤ አራዊትም ዳግመኛ በበጎች መካከል መግባት አልቻሉም። ከእነርሱም ምንም አልነጠቁም። ⁶⁹ቤቱም ታላቅና ሰፊ ሆነ፤ ለእነዚያም በጎች በዚያ ቤት ላይ ግንብ ተሠራ። ለበጎችም ጌታ በዚያ ቤት ላይ ረዥምና ታላቅ ግንብ ተሠራ። ⁷⁰ያም ቤት ተዋረደ፤ ግንቡ ግን ከፍ ከፍ አለ፤ ረዥምም ሆነ፤ የበጎችም ጌታ በዚያ ግንብ ላይ ቆመ፤ ሙሉ የሆነች ማዕድንም በፊቱ አቀረቡ። ⁷¹ዳግመኛም እነዚያን በጎች እንደ ሳቱና በብዙ ጎዳና እንደሄዱ አየኋቸው፤ ያንም ቤታቸውን ተዉ። ⁷²የበጎችም ጌታ ከበጎች ውስጥ ጠርቶ ወደ በጎች ላካቸው፤ በጎችም ይገድሏቸው ጀመሩ። ⁷³ከእነርሱም አንዱ ከሞት አመለጠ፤ አልተገደለምም፤ ፈጥኖም ሄዶ በበጎች ላይ ጮኸ። ⁷⁴ሊገድሉትም ወደዱ፤ የበጎችም ጌታ ከበጎች እጅ አዳነው፤ ወደ እኔም አውጥቶ አኖረው። ⁷⁵ጩኸውም ያዳኙባቸው ዘንድ ሌሎች ብዙ በጎችን ወደ እነዚያ በጎች ላከ። ⁷⁶ከእነርሱም የተነሣ የበጎችን ጌታ ቤቱንና ግንቡን ሲተዉ አየሁ፤ ከዚህም ሁሉ ስተው ዐይኖቻቸው ተጋረዱ። ⁷⁷የበጎችም ጌታ ብዙ ሰልፍን በእነርሱ ላይ እንዳደረገ፥ እነዚያም በጎች ያን ሰልፍ እስኪጠሩት ድረስ አየሁ። ⁷⁸ቦታቸውንም አሳልፈው ሰጡ፤ እርሱም በአንበሶችና በነብሮች፥ በዥቦችና በአውጮች፥ በቀበሮችና በአውሬዎች ሁሉ እጅ ጣላቸው፤ እነዚያ የዱር አራዊትም በጎቹን ይነጥቋቸው ጀመሩ። ⁷⁹እርሱም ቤታቸውንና ግንባቸውን እንደ ተወው አየሁ። ⁸⁰ይነጥቋቸውም ዘንድ በአንበሶች እጅ፥ ይበሏቸውም ዘንድ በአራዊት ሁሉ እጅ ሁሉንም ጣላቸው። ⁸¹እኔም በፍጹም ኀይሌ እጮህ፥ የበጎችንም ጌታ እጠራውና ስለ በጎቹም አመለክተው ዘንድ ጀመርሁ፤ በዱር አራዊት ሁሉ ተበልተዋልና። ⁸²እርሱም እያየ ዝም አለ፤ ደስም አለው፤ እነርሱ ተበልተው ተውጠዋልና፥ ንብረታቸውንም ተነጥቀዋልና፤ መብል እንዲሆኗቸውም በአራዊት ሁሉ እጅ ጣላቸው።

መጽሐፈ ሄኖክ 32