Enoch Chapter 31 - መጽሐፈ ሄኖክ | EOTC Bible

¹ዳግመኛም፥ አንዱ ሌላውን ሲወጋው፥ አንዱም ሌላውን ሲውጠው አየሁ። ²ምድርም ትጮህ ጀመረች፥ ዳግመኛም ዐይኖቼን ወደ ሰማይ አቅንቼ በራእይ አየሁ። ³እነሆም፥ የሸበተ ሰውን የመሰሉ ከሰማይ ወጡ፥ አንዱም ከዚያ ቦታ ወጣ፤ ሦስቱም ከእርሱ ጋር ወጡ። ⁴ኋላም ከእርሱ ጋር የወጡ እነዚያ ሦስቱ እጄን ያዙኝ፥ በምድር ካሉ ሰዎችም ለይተው አነሡኝ። ⁵በረጅም ተራራ ላይም ከፍ አድርገው ከምድር የራቀች ግንብን አሳዩኝ፥ ኮረብታውም ሁሉ ከእርሱ ያነሰ ሆነ። ⁶እንዲህም አሉኝ- “በእነዚያ ዝሆኖችና ግመሎች ላይ፥ በአህዮችም ላይ፥ በከዋክብትም ላይ፥ በላሞቹም ሁሉ ላይ፥ የሚመጣውን ሁሉ እስክታይ ድረስ በዚህ ተቀመጥ።” ⁷ቀድመው ከወጡት ከእነዚያ ከአራቱ አንዱን አየሁት፥ ከሰማይም የወደቀ ያን መጀመሪያውን ኮከብ ያዘው። ⁸እጅና እግሩንም አስሮ በጥልቁ ጣለው፥ ያም ጕድጓድ ጠባብና ጥልቅ፥ ጭንቅና ጨለማም ነው። ⁹ከእነዚያም አንዱ ሰይፉን መዝዞ ለእነዚያ ዝሆኖች፥ ለእነዚያም ግመሎችና አህዮች ሰጣቸው። ¹⁰አንዱም ሌላውን ይወጋው ጀመረ፥ ምድርም ሁላ በእነርሱ ላይ ተነዋወጠች። ¹¹በራእይም ባየሁ ጊዜ ከእነዚያ ከወጡት ከአራቱ አንዱ እነሆ፥ ከሰማይ መረቡን ጣለ። ¹²ኀፍረታቸው እንደ ፈረሶች ኀፍረት የሆነ ታላላቅ ከዋክብትንም ሁሉ ሰብስቦ ያዘ። ¹³ሁሉንም እጃቸውንና እግራቸውን አስሮ በምድር ጕድጓድ ጣላቸው። ¹⁴ከእነዚያም ከአራቱ አንዱ ወደ ነጩ ላም ሄደ፥ እየራደም ምሥጢርን አስተማረው። ¹⁵ያ ላምም ተወለደ፤ ሰውም ሆነ፥ መርከብንም ሠርቶ በእርሷ ተቀመጠ። ¹⁶ሦስቱ ላሞችም በዚያች መርከብ ከእርሱ ጋር ተቀመጡ፥ በእነርሱም ላይ መርከቡ ተዘጋ። ¹⁷ዳግመኛም ዐይኖቼን ወደ ሰማይ አቅንቼ ከፍ ያለ ጠፈርን አየሁ፥ በእርሱም ሰባት የውኃ ሻሻቴዎች አሉ፤ እነዚህም ሻሻቴዎች በአንድ ቦታ ብዙ ውኃን ያፈስሳሉ። ¹⁸ዳግመኛም አየሁ፥ እነሆም፥ በምድር ላይ በዚያ በታላቁ ቦታ ምንጮች ተከፈቱ። ¹⁹ያም ውኃ ይፈላና በምድር ላይ ይነሣ ጀመር፥ ምድሩም ሁሉ በውኃ እስኪሸፈን ድረስ ያን ቦታ አያሳየውም ነበር። ²⁰በሁሉም ላይ ውኃው በዛ፤ ጨለማና ጉምም ሆነ፤ የዚያንም ውኃ ከፍታውን አየሁ፥ ውኃውም በዚያ ቦታ ላይ ከፍ ከፍ አለ። ²¹በቦታውም ላይ ውኃውን ያፈስስ ነበር፥ በምድር ላይም ጸና። ²²በዚያም ቦታ ላሞች ሁሉ በውኃው ሲሰጥሙ፥ ሲዋጡና ሲጠፉም እስከማያቸው ድረስ ተሰበሰቡ። ²³ያም መርከብ በውኃው ላይ ይንሳፈፍ ነበር፥ ላሞችና ዝሆኖች፥ አህዮችና ግመሎች፥ ከብቶችም ሁሉ በምድር ተሰጠሙ። ²⁴እኔም እነርሱን ማየት አልተቻለኝም፤ እነርሱም መውጣት ተሳናቸው፥ በጥልቁም ባሕር ተሰጥመው ጠፉ። ²⁵ዳግመኛም ከዚህ ከታላቁ ጠፈር እነዚህ ሻሻቴዎች እስኪጠፉ ድረስ በራእይ አየሁ፥ የምድሩም ምንጭ ተደፈነ። ²⁶ሌሎች ጕድጓዶችም ተከፈቱ፥ ምድር እስኪገለጥ ድረስም ውኃው ወደ እነርሱ ይወርድ ጀመር። ²⁷ያ መርከብም በምድር ላይ ተቀመጠ። ጨለማዪቱ ራቀች፥ ብርሃንም ሆነ። ²⁸ሰው የሆነ ያም ነጭ ላም ከመርከቡ ወጣ፥ ሦስቱም ላሞች ከእርሱ ጋር ወጡ። ²⁹ከእነዚህም ከሦስቱ ላሞች አንዱ ነጭ ላም ያን ላም ይመስለዋል፥ ከእነርሱም አንዱ እንደ ደም ቀይ ነው፤ አንዱም ጥቁር ነው፥ ያም ነጩ ላም ከእነርሱ ተለይቶ ሞተ።

መጽሐፈ ሄኖክ 31