Enoch Chapter 28 - መጽሐፈ ሄኖክ | EOTC Bible

¹አሁንም ልጄ ማቱሳላ፥ እነዚህን ሁሉ ለአንተ እናገራለሁ፤ ለአንተም እጽፍልሃለሁ፥ ሁሉንም ገለጥሁልህ፤ የእነዚህንም ሁሉ መጻፎቻቸውን ሰጠሁህ። ²ልጄ ማቱሳላ፥ ለዓለም ትውልድ ታስተላልፍ ዘንድ የአባትህን የእጅ መጻፎች ጠብቅ። ³ለአንተና ለልጆችህ፥ ለአንተም ልጆች ለሚሆኑት ጥበብን ሰጠሁህ። ይህችም ጥበብ ለልጆቻቸውና ለልጅ ልጆቻቸው እስከ ዘለዓለም ያስተላልፉ ዘንድ በሕሊናቸው ትኖራለች። ⁴ይህችን ጥበብ ይማሯት ዘንድ የሚያስተውሉና በጆሯቸው የሚያደምጡ ሰዎች አያንቀላፉም፥ ለሚበሏትም ካማሩ ምግቦች ይልቅ ትስማማቸዋለች። ⁵ጻድቃንም ሁሉ ብፁዓን ናቸው፤ በጽድቅ መንገድ የሚሄዱና በዘመናቸው ሁሉ ቍጥር እንደ ኃጥኣን ኀጢአት የሌለባቸውም ብፁዓን ናቸው። ⁶በሰማይ የሚሄድ ፀሓይ፥ ከሻለቆች ጋር በመስኮቶች ሠላሳ ቀን ይገባል፥ ይወጣልም። ⁷ከሚጨመሩላቸውና አራቱን ክፍለ ዘመን ከሚለዩ ከሚመሯቸው አራት ከዋክብት ጋራ የከዋክብት ሥርዐታቸው ይህ ነው። ⁸ከእነርሱም ጋር አራት ቀን ይገባሉ፥ ስለ እነርሱም ሰዎች ይሳሳታሉ፤ በዓለሙ ሁሉ ቍጥርም አይቈጥሯቸውም፥ ይስትWaቸዋልና። ⁹ሰዎችም ጠንቅቀው አያውቋቸውም፤ በዘመኑ ቍጥር አሉና፥ ለዘለዓለምም በእውነት የተጻፉ ናቸው። ¹⁰አንዱ በመጀመሪያዪቱ መስኮት፥ አንዱም በሦስተኛዪቱ መስኮት፥ አንዱም በአራተኛዪቱ መስኮት፥ አንዱም በስድስተኛዪቱ መስኮት ይገባል። ¹¹ዓመቱም በሦስት መቶ ስድሳ አራት ቀን ይፈጸማል፤ ነገሩም እውነት ነው፥ የተጻፈውም ቍጥሩ የተጠነቀቀ ነው። ¹²የዓለም ፍጥረት ሁሉ ጌታ ስለ ሰማይ ሠራዊት ለእኔ ያዘዘልኝ መልአኩ ዑርኤል ስለ ብርሃናትና ወሮች፥ ስለ በዓላት፥ ስለ አራቱ ክፍለ ዘመኖችና ዓመታት፥ ስለቀኖችም አሳየኝ፤ ዕውቀትንም አሳደረብኝ። ¹³እርሱም በሰዎች ላይ በሰማይ የፀሐይንና የጨረቃን፥ የከዋክብትንም፥ በክበባቸው የሚመላለሱ የሰማይ ሠራዊትንም ሁሉ ብርሃን ያሳይ ዘንድ በመዓልትና በሌሊት ሥልጣን አለው። ¹⁴በቦታዎቻቸውና በዘመኖቻቸው፥ በሱባዔዎቻቸውና በወሮቻቸውም የሚወጡና የሚገቡ የከዋክብት ሥርዐት ይህቺ ናት። ¹⁵ምግብናቸውን የሚጠብቁ ከዋክብትን የሚመሩ የከዋክብት ስማቸው ይህ ነው፤ በዘመኖቻቸውና በሥርዐቶቻቸው፥ በጊዜዎቻቸውና በወሮቻቸው፥ በሥልጣኖቻቸውም በመቋሚያዎቻቸውም ይገባሉ። ¹⁶አራቱን ክፍለ ዓመት የሚለዩ አራቱ መሪዎቻቸው አስቀድመው ይገባሉ። ¹⁷ከእነርሱም ቀጥሎ ሠላሳውን ቀንና ሦስት መቶ ስድሳ አራት ቀን የሚሆን ዓመቱን የሚለዩ ሥርዐታት የሚባሉ ኮከቦችን የሚመሩ ዐሥራ ሁለት የወር መጋቢዎች፥ ሰባቱን ዕለታትና አራቱን ክፍለ ዘመን በሚለዩ በዘጠና አንድ መጋቢዎች ላይ የሚጨመሩ አራቱንም ጳጉሜን ከሚለዩ ከሺ አለቆች ጋር ይገባሉ። ¹⁸እነዚያም የሺህ አለቆቹ በመሪና በተመሪ መካከል ናቸው፥ አንዱም በአንዱ መቋሚያ በኋላ ይጨመራል፤ መሪዎቻቸውም ሠላሳውን ቀን ይለያሉ። ¹⁹የተሠሩ አራቱን ክፍለ ዘመን የሚለዩ የእነዚህ መጋቢዎች ²⁰የሺህ አለቆችን የሚመሯቸው የወር መጋቢዎች ስማቸው አንድርናኤል፥ ኢየሱሳኤል፥ ኢይሉማኤልም ናቸው። ²¹ሥርዐታት የሚባሉ የሻለቆችን የሚመሩ መጋቢዎችን ²²አንዱም- አራቱን ክፍለ ዘመን የሚለዩ ምቅዋማትን ²³ስሙ ተመዓኒና ²⁴በምግብናው የሚመግባቸው ቀኖችም ሁሉ ዘጠና አንድ ቀኖች ናቸው። ²⁵በእርሱ ምግብና ወራትም በምድር ላይ ይታዩ ዘንድ ያላቸው እነዚህ የቀኖቹ ምልክቶች ላብ፥ ዋዕይና ኀዘን ናቸው። ²⁶ዛፎችም ሁሉ ያፈራሉ፤ ቅጠልም በዛፎች ሁሉ ላይ ይወጣል፤ የስንዴውም መከርና ጽጌረዳውም፥ ሌሎች አበባዎችም ሁሉ በሜዳው ያብባሉ፤ በክረምት የሚለመልሙ ዛፎችም ይደርቃሉ። ²⁷በበታቾቻቸው ያሉ የመሪዎቻቸው ስሞች ብርክኤልና ዘሓብሳኤል ናቸው፤ ²⁸ከእነርሱ ጋር የሚጨመር ሌላው የሻለቃ ስሙ ሄሉያሴፍ ነው። ²⁹የዚህ የምልክኤል የምግብናው ወራት ተፈጸመ፤ ከእርሱም ቀጥሎ ሁለተኛው መጋቢ ስሙን ብሩህ ፀሐይ ብለው የሚጠሩት ሕልመልመሌክ ነው። ³⁰የሚያበራበትም ቀን ሁሉ ዘጠና አንድ ቀን ነው፤ በምድር ላይ የሚመግብባቸው ወራቶች ምልክቶች ሙቀትና ድርቅ ናቸው። ³¹ዛፎችም ፈጽሞ የበሰለ ፍሬያቸውን ያወጣሉ፥ የደረቀ ፍሬያቸውንም ይሰጣሉ፤ በጎችም ይንጠላጠላሉ፥ ይፀንሳሉም። ³²ሰዎችም የምድር ፍሬን ሁሉ፥ በእርሻውም ያለውን ፍሬ ሁሉ፥ በወይኑ ዐውድማ ያለውን ፍሬ ሁሉ ይሰበስባሉ፥ በምግብናውም ወራት ይህ ሁሉ ይደረጋል። ³³ስማቸውና ሥርዐቶቻቸውም እነዚህ ናቸው፤ በበታቻቸው ያሉ የዕለት መጋቢዎችን የሚመሩ የሻለቆችም ስማቸው ጊዳኤልና ኪኤል፥ ሄኤልም ናቸው። ³⁴ከእነርሱም ጋር የሚጨመር የሺህ አለቃ ስሙ አስፋኤል ነው፥ የምግብናውም ወራት ተፈጸመ።

መጽሐፈ ሄኖክ 28