Enoch Chapter 26 - መጽሐፈ ሄኖክ | EOTC Bible

¹የፀሐይ ስሙ እንደዚህ ነው፤ አንዱ ኦርያሬስ፥ ሁለተኛውም ቶማስስ ይባላል። ²ለጨረቃም አራት ስሞች አሉት፤ አንዱ ስሙ አሶንያ ይባላል፥ ሁለተኛውም ዕብላ ይባላል፥ ሦስተኛው ብናሴ ይባላል፥ አራተኛውም ኤራዕ ይባላል። ³ታላላቅ ብርሃናት እነዚህ ሁለቱ ናቸው፤ ክበባቸውም እንደ ሰማይ ክበብ ነው፤ የሁለቱም መጠኖቻቸው እኩል ናቸው። ⁴በፀሐይ ሰሌዳም ከጨረቃ ሰባት ክፍለ ብርሃን ይጨመርበታል፥ የፀሐይ ሰባተኛው ክፍል እስኪጨረስ ድረስ በልክ ትቀበላለች። ⁵በምዕራብ መስኮት ይገባሉ፥ ወደ መስዕም ይዞራሉ፥ በምሥራቅም መስኮት በሰማይ ፊት ይወጣሉ። ⁶ጨረቃም በወጣ ጊዜ በሰማይ ይታያል፤ የሰባተኛውን ክፍለ ብርሃን እኩሌታም ይቀበላል። ⁷በዐሥራ አራተኛው ቀንም ብርሃኑን ፈጽሞ ያገኛል፤ ሦስት አምስተኛ ክፍለ ብርሃንም ይጨመርለታል። ⁸ለዘመን ምልክት ሊሆን እስከ ዐሥራ አምስት ቀን ብርሃኑን ፈጽሞ ያገኛል፤ ሦስት አምስተኛም ይሆናል፤ ጨረቃም በአንድ ሰባተኛ እጅ እኩሌታ ይሆናል። ⁹በሕፀፁም ጊዜ በመጀመሪያዪቱ ቀን ዐሥራ አራተኛውን እጅ ክፍለ ብርሃን ያጣል፤ በሁለተኛዪቱም ቀን ዐሥራ ሦስተኛዪቱን እጅ ያጣል። ¹⁰በሦስተኛውም ቀን ዐሥራ ሁለተኛውን እጅ ያጣል፤ በአራተኛውም ቀን ዐሥራ አንደኛውን እጅ ያጣል። ¹¹በአምስተኛውም ቀን ዐሥረኛውን ክፍል ያጣል፤ በስድስተኛውም ቀን ዘጠነኛውን ክፍል ያጣል። ¹²በሰባተኛውም ቀን ስምንተኛውን ክፍል ያጣል፥ በስምንተኛውም ቀን ሰባተኛውን ክፍል ያጣል። ¹³በዘጠነኛውም ቀን ስድስተኛውን ክፍል ያጣል፤ በዐሥረኛውም ቀን አምስተኛውን ክፍል ያጣል። ¹⁴በዐሥራ አንደኛውም ቀን አራተኛውን ክፍል ያጣል፤ በዐሥራ ሁለተኛውም ቀን ሦስተኛውን ክፍል ያጣል። ¹⁵በዐሥራ ሦስተኛውም ቀን ሁለተኛውን ክፍል ያጣል፤ በዐሥራ አራተኛውም ቀን የሰባተኛውን እጅ እኩሌታ ያጣል። ¹⁶በዐሥራ አምስተኛው ቀንም ከብርሃን የቀረ ብርሃኑ ሁሉ ይጨረሳል። ¹⁷በታወቁም ወራቶች በእየሃያ ዘጠነኛው ቀን ለጨረቃ ምላት ይሆናል፤ በእየሃያ ስምንተኛው ቀንም ምላት የሚደረግበት ጊዜ አለ። ¹⁸መልአኩ ዑርኤልም ብርሃን በጨረቃ በተሣለ ጊዜ ሌላ ሥርዐትን አሳየኝ። ¹⁹ጨረቃም ከፀሐይ ብርሃን ከሚጨመርላት ቀን ጀምሮ በምትሄድበት ዘመን ሁሉ ብርሃኗን በፀሐይ ፊት ታገኛለች፤ እስከ ዐሥራ አራተኛው ቀን ድረስም ብርሃኗ በሰማይ ይፈጸማል። ²⁰ሁሉም ²¹ፀሐይ ወደ ምዕራብ በሚገባበትም ቀን ብርሃኑ በጥንቃቄ ይጨረሳል፥ በሌሊትም ከምሥራቅ ይወጣል። ²²ፀሐይም በፊቱ እስኪወጣ ድረስ ጨረቃ መላ ሌሊቱን ያበራል፤ ጨረቃም በፀሐይ ፊት ይተያያል። ²³የጨረቃ ብርሃን ከወጣበት ጀምሮ ብርሃኑ ሁሉ እስኪጨረስ ድረስ ዳግመኛ ከዚያ ይጐድላል። ²⁴ጨረቃም የሚያበራበት ወር ያልፋል፥ ሰሌዳውም ብርሃን የሌለበት ባዶ ይሆናል። ²⁵ሦስት ወር ምላት በሚያደርግበት ዘመኑ በሠላሳኛው ቀን ሕፀፅ ያደርጋል። ሦስቱንም ወር ሕፀፅ በሚያደርግባቸው ቀኖች በእየሃያ ዘጠነኛው ቀን ሕፀፅ ያደርጋል። ²⁶በመጀመሪያው ዘመን፥ በመጀመሪያው መስኮት በመቶ ሰባ ሰባት ቀን፥ በመወለጃውም ዘመን ሦስቱን ወር በየሠላሳኛው ቀን ይታያል። ሦስቱንም ወር በእየሃያ ዘጠነኛው ቀን ይታያል። ²⁷ያለ ፀሐይ ብርሃን ሌላ ብርሃን ምንም የላትምና በእየሃያኛው ቀን በሌሊት ሰው መስሎ፥ በቀንም ሰማይ መስሎ ይታያል። ²⁸አሁንም ልጄ ማቱሳላ ሆይ፥ ሁሉን አሳየሁህ፤ የሰማይ ከዋክብት ሥርዐት ሁሉ ተፈጸመ። ²⁹በእየቀኑ ሁሉና በእየዘመኑ ሁሉ፥ በእየሹመታቸውም ሁሉ፥ በእየዓመቱም ሁሉ፥ በመውጫውና በታዘዘበት ሁሉ፥ በወሩ ሁሉና በሱባዔው ሁሉ የሚሆነውን የእነዚህን ሥርዐት አሳየኝ። ³⁰በዚች በስድስተኛዪቱ መስኮት ብርሃኑ ጨርሶ ይጠፋልና በስድስተኛዪቱ መስኮት የሚደረግ የጨረቃንም ሕፀፅ አሳየኝ። ³¹ከዚያም በኋላ የወር መባቻ ይሆናል፤ ሕፀፅ በሚያደርግበትም ዘመን በመጀመሪያዪቱ መስኮት የሚደረገውን ሕፀፅ አሳየኝ። ³²መቶ ሰባ ሰባት ቀን እስኪፈጸም ድረስ በሱባዔው ሥርዐት ቢቈጥሩት ሃያ አምስት ሱባዔ ከሁለት ቀን ይሆናል። ³³ጨረቃ በአንዱ ዓመት ከፀሐይና ከከዋክብት ሥርዐት የሚያንሰው በጥንቃቄ ቢቈጠር አምስት ቀን ይሆናል። ³⁴ይህም የምታየው አንቀጽ በተፈጸመ ጊዜ መሪያቸው ታላቁ መልአክ ዑርኤል ካሳየኝ ከብርሃን ሁሉ የሚበልጥ እንደዚህ ያለ አርኣያና ምሳሌን ታያለህ። ³⁵በዚያም ወራት መልአኩ ዑርኤል ሄኖክ ሆይ፥ “እነሆ፥ ሁሉን አሳየሁህ” ብሎ መለሰልኝ። ³⁶ይህን ፀሐይ፥ ይህንም ጨረቃ ታየው ዘንድ፥ የሰማይ ከዋክብትን የሚመሯቸውን፥ ³⁷ሥራቸውንና ዘመናቸውንም፥ መውጫቸውንም የሚለውጡትን ሁሉ ታያቸው ዘንድ ገለጥሁልህ።

መጽሐፈ ሄኖክ 26