Enoch Chapter 25 - መጽሐፈ ሄኖክ | EOTC Bible

¹ነፋሳት ከእነርሱ የሚወጡባቸውና በምድር ላይ የሚነፍሱባቸው፥ ለነፋስት ሁሉ የተከፈቱ ዐሥራ ሁለት መስኮቶችን በምድር ዳርቻ አየሁ። ²ከእነርሱም ሦስቱ በምሥራቅ፥ ሦስቱም በምዕራብ፥ ሦስቱም በሰሜን፥ ሦስቱም በደቡብ የተከፈቱ ናቸው። ³መጀመሪያዎቹ ሦስቱ በምሥራቅ፥ ሦስቱም በመስዕ፥ በኋላ በግራ በኩል ያየኋቸው ሦስቱ በአዜብ፥ ሦስቱም በምዕራብ ናቸው። ⁴ከእነርሱም በአራቱ የበረከትና የሰላም ነፋሶች ይወጣሉ፤ ከእነዚያም ከስምንቱ የመቅሠፍት ነፋሶች ይወጣሉ። ⁵እነዚህም በተላኩ ጊዜ ምድርን ሁላ ያጠፏታል፤ በእርሷም ላይ ያለውን ውኃ፥ በእርሷም ላይ የሚኖሩትን ሁሉ፥ በውኃና በየብስ ላይ ያለውንም ሁሉ ይደመስሳሉ። ⁶ከእነዚህም መስኮቶች ለአዜብ በምትቀርብ በምሥራቅ በኩል ባለች በመጀመሪያዋ መስኮት ስሙ ጽባሓይ የሚባል መጀመሪያው ነፋስ ይወጣል፤ ከእርስዋም የምድር ድምሳሴ፥ ድርቅና ጥፋት ይወጣል። ⁷በመካከል ባለች በሁለተኛዪቱ መስኮትም ቅንነት ይወጣል፤ ከእርሷም ዝናብ፥ ፍሬም፥ ሰላምና ጠልም ይወጣል። ⁸በመስዕ በኩል ባለች በሦስተኛዪቱ መስኮትም ውርጭ፥ ድርቅም ይወጣል። ⁹ከእነዚህም ነፋሳት በኋላ በደቡብ በኩል ያሉ ነፋሳት በመጀመሪያዎቹ በሦስቱ መስኮቶች ይወጣሉ። ¹⁰ከእነርሱም ለምሥራቅ በምትቀርብ በመጀመሪያዪቱ መስኮት የድርቅ ነፋስ ይወጣል። ¹¹በእርስዋ አጠገብ ባለች በመካከለኛዪቱ መስኮትም ከእርስዋ መልካም ሽቱ፥ ጠልና ዝናም፥ ሰላምና ሕይወት ይወጣል። ¹²በምዕራብ በኩል ባለች በሦስተኛዪቱ መስኮትም ከእርስዋ ጠልና ዝናም፥ ኩብኩባና ድምሳሴም ይወጣል። ¹³ስሙ ባሕር በሚባል በመስዕ በኩል ካሉ ነፋሶች በኋላ ከሦስቱ መስኮቶች ለአዜብ በምትቀርብ በምሥራቅ በኩል ባለች በሰባተኛዪቱ መስኮት ከእርስዋ ጠልና ዝናም፥ ኩብኩባና ድምሳሴም ይወጣል። ¹⁴በቀጥተኛዪቱ በመካከለኛዋ መስኮትም ከእርስዋ ዝናምና ጠል፥ ሕይወትና ሰላም ይወጣል። ¹⁵ለመስዕ በምትቀርብ በምዕራብ በኩል ባለች በሦስተኛዪቱ መስኮትም ከእርስዋ ጉምና ውርጭ፥ ዋግና ጠል፥ ዝናምና ኩብኩባም ይወጣል። ¹⁶በምዕራብ በኩል ካሉ ከእነዚህ ከአራቱ ነፋሳት በኋላ ለመስዕ በቀረበች በመጀመሪያዪቱ መስኮት ከእርስዋ ጠልና ዝናም፥ የረጋውና የተበተነው ውርጭ፥ ዋግና ቀቅም ይወጣል። ¹⁷ከመካከለኛዪቱ መስኮትም ጠልና ዝናም፥ ሰላምና በረከትም ይወጣል። ¹⁸በአዜብ በኩል ባለች በሁለተኛዪቱ መስኮትም ከእርስዋ ድርቅና ድምሳሴ፥ ዋዕይና ጥፋት ይወጣል። ¹⁹በአራቱ የሰማይ ማዕዘን ያሉ ዐሥራ ሁለቱ መስኮቶች ተፈጸሙ። ልጄ ማቱሳላ! ትእዛዛቸውን ሁሉና መቅሠፍታቸውን ሁሉ፥ ሰላማቸውንም ሁሉ አሳየሁህ። ²⁰መጀመሪያ ነውና መጀመሪያውን ነፋስ ስሙን ጽባሓዊ ብለው ይጠሩታል። ²¹በዚያ ልዑል ²²የሰማይ ብርሃናት ሁሉ በዚያ ይጐድላሉና፥ ወደዚያም ይወርዳሉና ከምዕራብ የሚነፍሰውንም ነፋስ ጐደሎ ብለው ይጠሩታል። ²³ስሙ መስዕ የሚባል አራተኛው ነፋስ ከሦስት ይከፈላል፤ ከእነርሱም አንዱ ለሰው ማደሪያ ነው፤ ሁለተኛውም በውኃ ባሕሮችና በጥልቆች፥ በዛፍና በወንዞችም፥ በጨለማና በጉምም የተሾመ ነው። ሦስተኛውም ክፍል በጽድቅ ገነት የተሾመ ነው። ²⁴በምድር ካሉ ተራሮች ሁሉ የሚረዝሙ ሰባት ረጃጅሞች ተራሮችንም አየሁ። ²⁵ከእነርሱም ውርጭ ይወጣል፤ ቀኑም፥ ዘመኑም፥ ዓመቱም ያልፋል፥ ይሄዳልም። ²⁶ከፈሳሾች ሁሉ የሚበልጡ ሰባት ፈሳሾችን በምድር ላይ አየሁ፤ ከእነርሱም አንዱ ከምዕራብ መጥቶ ሰፊ ወደ ሆነው ውቅያኖስ ውኃውን ያፈስሳል። ²⁷እነዚያም ሁለቱ ከመስዕ እስከ ባሕር ድረስ መጥተው ውኃቸውን ከወደ ምሥራቅ በኤርትራ ባሕር ያፈስሳሉ። ²⁸የቀሩትም አራቱ የእነርሱ ባሕር እስከሚሆነው እስከ ኤርትራ ባሕር ድረስ በመስዕ አጠገብ ይፈስሳሉ። ²⁹ሁለቱ ፈሳሾችም ወደ ታላቁ ባሕር ይጨመራሉ፤ በዚያም ይከማቻሉ። ³⁰በባሕርና በየብስ ሰባት ታላላቅ ደሴቶችን አየሁ፤ ከእነዚያም ሁለቱ በየብስ፥ አምስቱም በታላቁ ባሕር ናቸው።

መጽሐፈ ሄኖክ 25