Enoch Chapter 23 - መጽሐፈ ሄኖክ | EOTC Bible

¹የወሮቹን መንገድ በሚያደርግበት በዚያ ትእዛዝ ሁለተኛ መሄጃውንና ትእዛዙን አየሁለት። ²የሁሉም መሪያቸው የሆነው ቅዱስ መልአክ ዑርኤል ሁሉን አሳየኝ፤ ³እንዳሳየኝም ቦታቸውን ጻፍሁ። ⁴ጸንተው እንደሚኖሩም ወራታቸውን ጻፍሁ፤ የብርሃናቸውንም መልክ ጻፍሁ። ⁵ዐሥራ አምስቱ ቀን እስኪፈጸም ድረስ በአንድ ቀን አንድ ሰባተኛ ክፍለ ብርሃን እየተቀበለ ብርሃኑን ሁሉ በምሥራቅ ፈጽሞ ያገኛል፤ አንድ ሰባተኛ ክፍለ ብርሃንም እየተነሣው ጨለማውን ሁሉ በምዕራብ ፈጽሞ ያገኛል። ⁶በታወቁም ወራቶች መግቢያዎቹን ይለውጣል፤ በታወቁም ወራቶች አንድ አንድ ክፍለ ብርሃን እየተሰጠው መንገዱን ይሄዳል። ⁷ጨረቃም በሕፀፁ በሁለቱ ከፀሐይ ጋር ይገባል፤ በመካከል ባሉ በእነዚያ በሁለቱ መስኮቶች በአራተኛዪቱና በሦስተኛዪቱ መስኮት ሰባት ቀን ይወጣል። ⁸ዳግመኛም ዙሮ ተመልሶ ፀሐይ በሚወጣበት መስኮት ይወጣል፤ በዚያም መስኮት ብርሃኑን ሁሉ ፈጽሞ ያገኛል። ⁹ከፀሐይም ይርቃል፤ ፀሐይ ከእርሷ በሚወጣባት በስድስተኛዪቱም መስኮት ስምንት ቀን ይገባል። ¹⁰ፀሐይም ከአራተኛዪቱ መስኮት በሚወጣ ጊዜ ከአምስተኛዪቱ መስኮት እስኪወጣ ድረስ በአራተኛዪቱ መስኮት ሰባት ቀን ይወጣል። ¹¹ዳግመኛም ተመልሶ በአራተኛዪቱ መስኮት ሰባት ቀን ይወጣል፤ ብርሃኑንም ሁሉ ፈጽሞ ያገኛል። ¹²ይርቃል፥ በመጀመሪያዪቱም መስኮት ስምንት ቀን ይገባል፤ ዳግመኛም ተመልሶ ፀሐይ ከእርሷ በሚወጣባት በአራተኛዪቱ መስኮት ሰባት ቀን ይወጣል። ¹³በየወራታቸው ሥርዐት ፀሐይ እንደሚወጣና እንደሚገባ አኗኗራቸውን እንዲህ አየሁ። ¹⁴በእነዚያም ወራቶች አምስት ዓመት ይጨመራል፤ ለፀሐይም ሠላሳ ቀን ይደርሰዋል። ¹⁵ለአንዱ ዓመትም ቀኖች ሁሉ ይደርሱታል፤ ከእነዚህም ከአምስቱ ዓመታት ተውጣጥተው ቀኖቹ ሦስት መቶ ስሳ አራት ቀን ይሆናሉ። ¹⁶ለፀሐይና ለከዋክብትም ስድስት ቀን ይደርሳቸዋል፤ ከአምስቱ ዓመትም ስድስት ስድስት ቀን ወጥቶ ሠላሳ ቀን ይደርሳቸዋል። ¹⁷ጨረቃም ከፀሐይና ከከዋክብት ሠላሳ ቀን ይጐድላል። ¹⁸ጨረቃም ዓመታትን ጠንቅቆ ያስቈጥራቸዋል። ¹⁹ሁሉም ለዘለዓለም እንደሚኖሩ አንዲት ቀን አያተርፉም፤ አያጐድሉምም። ነገር ግን ሦስት መቶ ስድሳ አራት ቀን እየሆነ በጥንቃቄ በእውነት ዓመቱን ይለውጣሉ። ²⁰የሦስቱ ዓመት ቀን ሺህ ዘጠና ሁለት ነው፤ የስምንቱ ዓመት ቀን ሁለት ሺህ ዘጠኝ መቶ ዐሥራ ሁለት ቀን ይሆን ዘንድ የአምስቱ ዓመት ቀን ሺህ ስምንት መቶ ሃያ ቀን ነው። ²¹ለጨረቃም ለብቻው ይደርሰዋል፤ የሦስቱም ዓመት ቀኑ ሺህ ስድሳ ሁለት ቀን ነው። ²²በስድሳ ሁለቱ ቀን ላይ ወደ ላይ በመውጣቱ ለፀሐይ ቀን ይጨመርለታልና ጨረቃ ለአምስቱ ዓመት አምሳ ቀን ይጐድላል። ²³ለጨረቃ የስምንቱ ዓመት ቀኑ ሁለት ሺህ ስምንት መቶ ሠላሳ ሁለት ቀን ይሆን ዘንድ የአምስቱ ዓመት ቀኑ ሺህ ሰባት መቶ ሰባ ቀን ይሆናል። ²⁴በስምንቱ ዓመት የሚያንሰው ቀኑ ሰማንያ ቀን ነውና ከስምንቱም ዓመት የጐደለባቸው ቀኖች ሰማንያ ቀኖች ናቸው። ²⁵እነርሱ እንደሚኖሩበት፥ ፀሐይም እንደሚኖርበት መጠን ዘመኑ እንዲህ በእውነት ይፈጸማል። ²⁶ከዋክብት ከሚወጡባቸው መስኮቶች ፀሐይ ሠላሳ ቀን ይወጣል፥ ይገባልም።

መጽሐፈ ሄኖክ 23