Enoch Chapter 21 - መጽሐፈ ሄኖክ | EOTC Bible

¹የሰማይ ብርሃናትን መመላለስ የሚናገር መጽሐፍ። ²እየአንዳንዳቸው በየወገናቸው እንደ አሉ፥ እየአንዳንዳቸውም በየሥልጣናቸውና በየዘመናቸው፥ እየአንዳንዳቸውም በየስማቸውና በየመውጫቸው፥ በየወራታቸውም ከእኔ ጋር ያለው መሪያቸው መልአክ ቅዱስ ዑርኤል እንደ አሳየኝ። ³ሰሌዳቸውንም ሁሉ፥ ዓመተ ዓለምን እስከ ዘለዓለም ድረስ፥ እስከ ዘለዓለም የሚኖር ሐዲስ ሥራም እስኪሠራ ድረስ እርሱ እንዳሳየኝ። ⁴የብርሃናት መጀመሪያ ትእዛዝ ይህ ነው። ⁵ፀሐይ ብርሃን ነው፤ መውጫውም በምሥራቅ በኩል በሰማይ መስኮቶች ነው፤ መግቢያውም በምዕራብ በኩል በሰማይ መስኮቶች ነው። ⁶ፀሐይ የሚወጣባቸው ስድስት መስኮቶችን አየሁ፤ ፀሐይ የሚገባባቸውን ስድስት መስኮቶችንም አየሁ። ⁷ጨረቃም በእነዚያ መስኮቶች ይወጣል፤ ይገባልም። ⁸የሰማይ ከዋክብትን የሚመሩም ከሚመሯቸው ጋር፥ ስድስቱ በምሥራቅ፥ ስድስቱም በፀሐይ መግቢያ ናቸው። ⁹ሁሉም እየአንዳንዱ ከሌላው በኋላ የቀና ነው፤ በዚያም መስኮት በቀኙና በግራው ብዙ መስኮቶች አሉ። ¹⁰መጀመሪያ ስሙ ፀሐይ የሚባል ታላቁ ብርሃን ይወጣል፤ ዙሪያውም እንደ ሰማይ ዙሪያ ነው፤ ሁለመናውም የሚያበራና የሚያቃጥል እሳትን የተመላ ነው። ¹¹የሚሄድባቸውንም ሠረገላዎች ነፋስ ይነዳቸዋል። ¹²ፀሐይም ከሰማይ ይጠልቃል፤ ወደ ምሥራቅም ይሄድ ዘንድ ወደ መስዕ ይመለሳል፥ ወደዚያ መስኮት ይገባ ዘንድ ይመራል፤ በሰማይም ሆኖ ያበራል። ¹³እንደዚህ በመጀመሪያው ወር በታላቁ መስኮት ይወጣል፤ ፀሐይ በምሥራቅ ከሚወጣባቸው ከስድስቱ መስኮቶች በአራተኛዪቱ ይወጣል። ¹⁴በመጀመሪያው ወር ፀሐይ ከእርሷ በሚወጣባት በዚያች በአራተኛዪቱ ደጃፍም በዘመናቸው በሚከፈቱበት ጊዜ ከእነርሱ ዋዕይ የሚወጣባቸው ዐሥራ ሁለት ደጃፎች አሉባት። ¹⁵ፀሐይ ከምሥራቅ በወጣ ጊዜ በዚች በአራተኛዪቱ ደጃፍ ሠላሳ ቀን ይወጣል። ¹⁶በሰማይ በአለው መግቢያም በአራተኛዪቱ ደጃፍ አቅንቶ ይወርዳል። ¹⁷በእነዚያም ወራት እስከ ሠላሳ ቀን ድረስ ቀኒቱ ከቀን ትረዝማለች፤ ሌሊቲቱም ከሌሊት ታጥራለች። ¹⁸በዚችም ቀን ቀኒቱ ከሌሊቱ ሁለት እጅ ትረዝማለች። ¹⁹ጠንቅቀውም ቢቈጥሯት ቀኒቱ ዐሥር ክፍል ትሆናለች፤ ሌሊቲቱም ስምንት ክፍል ትሆናለች። ²⁰ፀሐይም ከዚች ከአራተኛዪቱ ደጃፍ ይወጣል፤ በአራተኛዪቱም ደጃፍ ይገባል። ²¹ሠላሳ ቀንም በምሥራቅ ወዳለችው ወደ አምስተኛዪቱ ደጃፍ ይመለሳል፤ ከእርሷም ይወጣል፤ በአምስተኛዪቱም ደጃፍ ይገባል። ²²ያንጊዜም ቀኒቱ ሁለት እጅ ትረዝማለች፤ ቀኒቱም ዐሥራ አንድ ክፍልን ትሆናለች፤ ሌሊቲቱም ታጥራለች፤ ሰባት ክፍልንም ትሆናለች። ²³ፀሐይም ወደ ምሥራቅ ይመለሳል፤ ወደ ስድስተኛዪቱም ደጃፍ ይገባል፤ ስለ እርስዋም ምልክት ²⁴በዚያችም ቀን ቀኒቱ ከሌሊቲቱ ትረዝማለች፤ ቀኒቱም የሌሊቲቱን እጥፍ ትሆናለች፤ ቀኒቱም ዐሥራ ሁለት ክፍልን ትሆናለች። ሌሊቲቱም ታጥራለች፤ ስድስት ክፍልንም ትሆናለች። ²⁵ቀኒቱም ታጥር ዘንድ፥ ሌሊቲቱም ትረዝም ዘንድ ፀሐይ ይነሣል። ²⁶ፀሐይም ወደ ምሥራቅ ይመለሳል፤ ወደ ስድስተኛውም መስኮት ይገባል፤ ከእርስዋም ሠላሳ ቀን ይወጣል፤ ይገባልም። ²⁷ሠላሳውም ቀን ከተፈጸመ በኋላ በጥንቃቄ ቢቈጠር ቀኒቱ አንድ ክፍል ትጐድላለች፤ ቀኒቱም ዐሥራ አንድ ክፍል ትሆናለች፤ ሌሊቲቱም ሰባት ክፍል። ²⁸ፀሐይም ከስድስተኛዪቱ መስኮት ከምዕራብ ወጥቶ ወደ ምሥራቅ ይሄዳል፤ ሠላሳ ቀንም በአምስተኛዪቱ መስኮት ይወጣል፤ ዳግመኛም በምዕራብ በኩል በአለችው በአምስተኛዪቱ መስኮት በምዕራብ ይገባል። ²⁹በዚያችም ቀን ቀኒቱ ሁለት ክፍል ታንሳለች፤ ቀኒቱም ዐሥር ክፍል ትሆናለች፤ ሌሊቲቱም ስምንት ክፍል ትሆናለች። ³⁰ፀሐይም ከዚያች ከአምስተኛዪቱ መስኮት ይወጣል፤ በምዕራብ በኩል በአምስተኛዪቱ መስኮት ይገባል። ³¹ስለ እርስዋ ምልክትም ³²በዚያችም ቀን መዐልቱ ከሌሊቱ ጋር ይስተካከላል፤ የተካከለም ይሆናል፤ ሌሊቲቱም ዘጠኝ ክፍል ትሆናለች። መዐልቱም ዘጠኝ ክፍል ይሆናል። ³³ፀሐይም ከዚያች መስኮት ³⁴በሦስተኛውም መስኮት ሠላሳ ቀን ይወጣል፤ በምዕራብም በሦስተኛዪቱ መስኮት ይገባል። ³⁵በዚችም ቀን ሌሊቲቱ ከሌሊቲቱ እስከ ሠላሳ ቀን ትረዝማለች፤ ቀኒቱም ከቀኒቱ እስከ ሠላሳ ቀን ታጥራለች፥ በጥንቃቄ ቢቈጠርም ሌሊቱ ዐሥር ክፍል ይሆናል፤ ቀኑም ስምንት ክፍል ይሆናል። ³⁶ፀሐይም ከዚያች ከሦስተኛዪቱ መስኮት ወጥቶ በምዕራብ በሦስተኛዪቱ መስኮት ይገባል፥ ወደ ምሥራቅም ይመለሳል። ³⁷ፀሐይም በምሥራቅ በሁለተኛው መስኮት ሠላሳ ቀን ይወጣል። ³⁸እንደዚሁም በምዕራባዊው ሰማይ በሁለተኛው መስኮት ይገባል፤ በዚያችም ቀን ሌሊቲቱ ዐሥራ አንድ ክፍልን ትሆናለች፤ ቀኒቱም ሰባት ክፍልን ትሆናለች። ³⁹ፀሐይም በዚያች ቀን ከዚያች ከሁለተኛዪቱ መስኮት ወጥቶ በምዕራብ በሁለተኛዪቱ መስኮት ይገባል፤ ወደ ምሥራቅም ይመለሳል። ⁴⁰ፀሐይም በምሥራቅ በአንደኛዪቱ መስኮት ስለ ምልክትWa ⁴¹በዚያችም ቀን ሌሊቲቱ ከቀኒቱ ትረዝማለች፤ ሌሊቲቱም የቀኒቱን ዕጥፍ ትሆናለች፤ በጥንቃቄም ቢቈጠር ሌሊቲቱ ዐሥራ ሁለት ክፍል ትሆናለች፤ ቀኒቱም ስድስት ክፍልን ትሆናለች። ⁴²ፀሐይም መስኮቶቹን ጨረሰ፤ ዳግመኛም በእነዚህ መስኮቶቹ ላይ ዙሮ ሠላሳ ቀን በዚያው መስኮት ይገባል፤ በአንጻሩም በምዕራብ ይገባል። ⁴³በዚያችም ቀን ሌሊቲቱ ከርዝመትWa አንድ እጅ ታጥራለች፤ ይኸውም አንድ ክፍል ነው፤ ሌሊቲቱ ዐሥራ አንድ ክፍል ትሆናለች፤ ቀኒቱም ሰባት ክፍል ትሆናለች። ⁴⁴ፀሐይም ተመልሶ በምሥራቅ ወደሚወጣበት ወደ ሁለተኛው መስኮት ይገባል፤ በዚያም መስኮቱ ተመልሶ ሠላሳ ቀን ይወጣል፤ ይገባልም። ⁴⁵በዚያችም ቀን ሌሊቲቱ ከርዝመትWa ታጥራለች፤ ሌሊቲቱ ዐሥር ክፍል ትሆናለች፥ ቀኒቱም ስምንት ክፍል ትሆናለች። ⁴⁶በዚያችም ቀን ፀሐይ ከዚያች ከሁለተኛዪቱ መስኮት ይወጣል፤ በምዕራብም ገብቶ ወደ ምሥራቅ ይመለሳል። ⁴⁷ፀሐይም በሦስተኛዪቱ መስኮት ስለ ምልክትWa ⁴⁸በዚያችም ቀን ሌሊቲቱ ታንሳለች፤ ዘጠኝ ክፍልም ትሆናለች፤ ቀኒቱም ዘጠኝ ክፍል ትሆናለች። ⁴⁹ሌሊቱም ከቀኑ ጋር ይስተካከላል፤ ዓመቱም በጥንቃቄ ቢቈጠር ሦስት መቶ ስድሳ አራት ቀን ይሆናል። ⁵⁰የቀንና የሌሊት ርዝመት፥ የቀንና የሌሊትም ማጠር በፀሐይ መንገድ ይለያል። ⁵¹ስለዚህም መንገዱ ይረዝማል፤ ቀን ከቀን፥ ሌሊትም ከሌሊት ያጥራል። ⁵²የፀሐይ ሥርዐቱ፥ መንገዱም፥ መመላለሻውም ይህ ነው። ⁵³በተመለሰም ጊዜ ስድሳውን ከንትሮስ ሊፈጽም ይመለሳል፤ ተመልሶም ይወጣል፤ ለዘለዓለም የሚኖር ታላቅ ብርሃንም ይህ ነው። ⁵⁴ጌታ እንዳዘዘም በእርሱ አምሳል የሚጠራ፥ ከምሥራቅ የሚወጣ ታላቅ ብርሃን ይህ ነው። ⁵⁵እንደዚህም ይወጣል፤ ይገባልም፤ አይጐድልም፤ አያርፍምም፤ ነገር ግን በመዓልትና በሌሊት በሠረገላ ይሮጣል። ⁵⁶ብርሃኑም ከጨረቃ ይልቅ ሰባት እጅ ያበራል። ⁵⁷የሁለቱም መጠናቸው እኩል ነው።

መጽሐፈ ሄኖክ 21