Enoch Chapter 18 - መጽሐፈ ሄኖክ | EOTC Bible

¹በእነዚያም ወራቶች ኖኅ ምድር እንደ አዘነበለች፥ ጥፋትWaም እንደ ቀረበ አየ። ²ከዚያም እግሩን አንሥቶ እስከ ምድር ዳርቻ ድረስ ሄደ። ³ለአያቱ ለሄኖክም ጮኸ፤ ኖኅም በመረረ ቃል ሦስት ጊዜ “ስማኝ፤ ስማኝ፤ ስማኝ” አለ። ⁴እንዲህም አለው- “በምድር ላይ የሚሠራው ሥራ ምንድን ነው? ንገረኝ! ⁵ምድር ደክማለችና፥ እንዲህ ተነዋውጣለችና፥ ምንአልባት እነሆ፥ እኔ ከእርስዋ ጋር እጠፋ ይሆን?” ⁶በዚያም ጊዜ በምድር ላይ ታላቅ ሁከት ሆነ፤ ከሰማይም ቃል ተሰማ። ⁷በግንባሬ ወደቅሁ፤ አያቴ ሄኖክም ወደ እኔ መጣ፤ በአጠገቤም ቆመ፤ እንዲህም አለኝ- “ወደ እኔ መራራ ጩኸትንና ልቅሶን ለምን ትጮኻለህ? ⁸እርሱም- ጥፋታቸው ይሆን ዘንድ በምድር በሚኖሩ ሰዎች ላይ ከመናፍስት ጌታ ፊት ትእዛዝ ወጣ። ⁹የመላእክትን ምሥጢር ሁሉ፥ የሰይጣናትን ግፍ ሁሉ፥ የተሰወረ ሥራቸውንም ሁሉ፥ ሟርት የሚያሟርቱ ሰዎችን ኀይል ሁሉ፥ የቀለማትንም ኀይል፥ የምድርን ሁሉ ጣዖት የሚሠሩ ሰዎችን ኀይል አሳውቀዋልና። ¹⁰ብር ከመሬት ትቢያ እንዴት ይገኝ ነበር? ቅልቅል ብረትስ በምድር ላይ እንዴት ይገኝ ነበር? ¹¹እነርሱን የሚያስገኛቸው መሬትና በውስጥዋ የሚቆመው መልአክ መጀመሪያ ምንጭ እንደ ሆኑ እርሳስና ቆርቆሮ ከምድር አይገኙም ነበርና፤ ¹²ከዚያም በኋላ አያቴ ሄኖክ በእጁ ይዞ አነሣኝ። ¹³እንዲህም አለኝ- “በምድር ላይ ስላለው ሁከት የመናፍስትን ጌታ ጠይቄዋለሁና ሂድ።” ¹⁴እንዲህም አለኝ- “ስለ በደላቸው ፍርዳቸው ተፈጸመችባቸው፤ ስለ ፈለጓቸውም ወራቶች በፊቴ አይቈጠሩም። ¹⁵ምድርም እንደምትጠፋ፥ በእርሷም የሚኖሩ ሰዎች እንደሚጠፉ ዐወቁ፤ እኒህም የተሰወረውን ለሰዎች አስተምረዋልና፥ እነርሱም የተፈረደባቸው ናቸውና ለዘለዓለም መመለሻ የላቸውም። ¹⁶ነገር ግን አንተ ልጄ! ከዚህ ከተሰወረው ነቀፋ አንተ ንጹሕና ቸር እንደ ሆንህ የመናፍስት ጌታ ዐውቋልና ይህ ለአንተ አይደለም። ¹⁷በቅዱሳን መካከልም ስምህን አጸናው፤ በምድርም ላይ ከሚኖሩት ለይቶ ይጠብቅሃል። ¹⁸ለመንግሥትና ለብዙ ምስጋናም ሊሆን ዘርህን በእውነት አጸናው፤ ከዘርህም የጻድቃንና የቅዱሳን መገኛ ይወለዳል፤ ለዘለዓለሙም ቍጥር የላቸውም።” ¹⁹ከዚህም በኋላ እንዲመጡ በምድር ላይ በሚኖሩ ሰዎች ሁሉ ለፍርድና ለጥፋት ሊሆን ከምድር በታች ያለ የውኃውን ኀይል ሁሉ መጥተው ይከፍቱ ዘንድ የተዘጋጁ የመቅሠፍት መላእክትን አሳየኝ። ²⁰የመናፍስት ጌታም እነዚያ መላእክት በውኃው ኀይል ላይ ተሾመዋልና የወጡትን መላእክት እጃቸውን እንዳያነሡ፥ እንዲጠብቁም አዘዘ። ²¹ከሄኖክም ፊት ወጣሁ። ²²በእነዚያም ወራቶች የእግዚአብሔር ቃል ወደ እኔ መጣ። ²³እንዲህም አለኝ- “ኖኅ! እነሆ፥ ዕድል ፋንታህ ወደ እኔ ደረሰ፤ “ነቀፋ የሌለበት ዕድል የፍቅርና የቅንነት ዕድል ነው።” ²⁴አሁንም መላእክት እንጨቶችን ያዘጋጃሉ፤ እነርሱም ለዚያ መልእክት በወጡ ጊዜ እጄን በላይዋ ጭኜ እጠብቃታለሁ። ²⁵ከእርስዋም ወጥተህ የሕይወት ዘር ትሆናለህ፤ ምድርም ባዶውን እንዳይቀር ለውጡ ይግባ። ²⁶ዘርህንም ለዘለዓለም በፊቴ አጸናዋለሁ፤ ከአንተ ጋራም የሚኖሩ ዘሮችህን በምድር ፊት አበዛቸዋለሁ። ²⁷በመናፍስትም ጌታ ስም በምድር ላይ ይበዛል፤ ይባረካልም። ²⁸ዐመፅን የአሳዩ እነዚያን መላእክትም ²⁹ታላቅ ሁከትና የውኃዎች መታወክ ያለባትንም ያችን ሸለቆ አየኋት። ³⁰ይህ ሁሉ ከተደረገ በኋላ፥ ከዚህ ከእሳቱ ነጠብጣብ የተነሣ ከሚያውካቸውም ሁከት የተነሣ በዚያ ቦታ የድኝ ሽታ ተገኘ፤ ከእነዚያም ውኃዎች ጋር አንድ ሆነ። ³¹ያችም ሰውን የአሳቱ የመላእክት ³²የእሳት ፈሳሾችም በምድር ላይ የሚኖሩትን ያሳትWaቸው መላእክት በሚኰነኑበት ቦታ ወደ ሸለቆዎችዋ ይፈስሳሉ። ³³በእነዚያም ወራት እነዚህ ውኃዎች ለነገሥታቱና ለአዛዦች፥ ለልዑላንና በምድር ለሚኖሩ ሰዎች፥ ለነፍስና ለሥጋ ፈውስ፥ ለመንፈስም ፍርድ ይሆናሉ። ³⁴የመናፍስት ጌታን ክደውታልና በሥጋቸው ይፈረድባቸው ዘንድ ልቡናቸው ዋዛ ነገርን ይመላል። ³⁵የየቀኑን ሁሉ ፍርዳቸውንም ያያሉ፤ በስሙም አያምኑም። ³⁶በመናፍስት ጌታ ፊት ዋዛ ፈዛዛ የሚናገር የለምና፥ ሥጋቸው ብዙ ጊዜ እንደ ተቃጠለ እንደዚሁ በነፍሳቸው ለዘለዓለሙ ለውጥ ይኖርባቸዋል። ³⁷በእነርሱ ላይ ፍርድ ትመጣለችና፥ በሥጋቸውም ዋዛ ነገር ያምናሉና፥ የጌታንም መንፈስ ይክዳሉና። ³⁸በዚያም ወራት እነዚያ ውኃዎች ለውጥ ይኖራቸዋል፤ እነዚያ መላእክት በሚፈረድባቸው ጊዜ በዚያ ወራት የእነዚያ የውኃዎች ምንጮች መቃጠል ይለወጣልና። ³⁹መላእክትም በወጡ ጊዜ የምንጮች ውኃ ተለውጦ ይቀዘቅዛል። ⁴⁰ቅዱስ ሚካኤልንም እንዲህ ብሎ ሲመልስ ሰማሁት- “አለቆች የሚቀጡባት ይህች ፍርድ ለነገሥታትና ምድርን ለሚቈጣጠሩ አዛዦች ምስክር ናት፤ እኒህ የቅጣት ውኃዎች ለአለቆች ሥጋ ፈውስ፥ ለሥጋቸውም ለሞት ናቸውና።” ⁴¹እነዚያ ውኃዎች ተለውጠው ለዘለዓለም የሚነድድ እሳት እንደሚሆኑባቸው አያዩም፤ አያምኑምም። ⁴²ከዚህም በኋላ አያቴ ሄኖክ የተሰጡትን የምሥጢሮችን ሁሉና የምሳሌዎችን ምልክት በመጽሐፍ ሰጠኝ፤ በእኔ ዘንድ ከአለው የመጽሐፍ ቃል ጋርም ጨመራቸው።

መጽሐፈ ሄኖክ 18