Enoch Chapter 17 - መጽሐፈ ሄኖክ | EOTC Bible

¹በእነዚያም ወራት ለእነዚያ መላእክት ረጃጅሞች ገመዶች ሲሰጡ አየሁ፤ ²ለእነርሱም ክንፍን ተቀብለው ፈጥነው ወደ መስዕ ሄዱ። ³“እኔም እነዚህን ረጃጅሞች ገመዶችን ይዘው ለምን ሄዱ?” ብዬ መልአኩን ጠየቅሁት። ⁴እርሱም- “ይለኩ ዘንድ ሄዱ” አለኝ። ⁵ከእኔ ጋር የሚኖረውም መልአክ- “እኒህ ለዘለዓለሙ በመናፍስት ጌታ ስም ይጸኑ ዘንድ የጻድቃንን መለኪያና ማሰሪያ ገመድ ያመጣሉ። ⁶የተመረጡት ከተመረጡት ጋር ለመኖር ይጀምራሉ። ⁷እነዚህም መለኪያዎች በሃይማኖት የሚሰጡና የጽድቅ ቃልን የሚያጸኑ ናቸው። ⁸እነዚህም መለኪያዎች በምድረ በዳ የጠፉት፥ በባሕር ዓሣና በአራዊት የተበሉት በአስታራቂው ቀን ተመልሰው ይጸኑ ዘንድ የምድር ጥልቀት ምሥጢርን ሁሉ ይገልጣሉ። ⁹በመናፍስት ጌታ ፊት የሚጠፋ የለምና። መጥፋትም የሚችል የለምና። ¹⁰በሰማይ ያሉና ሠራዊትም ሁሉ ትእዛዝን ተቀበሉ፤ ቃላቸው አንድ ነው፤ ብርሃናቸውም እንደ እሳት አንድ ነው። ¹¹ያንም ቀዳማዊ ቃል ያመሰግኑታል፤ ከፍ ከፍም ያደርጉታል፤ በጥበብም ያከብሩታል። ¹²በነገርና በሕይወት መንፈስ ይራቀቃሉ፤ የመናፍስት ጌታም አስታራቂውን በጌትነቱ ዙፋን አስቀመጠው። ¹³በሰማያት ላይም የቅዱሳንን ሥራ ይመረምራል፤ የሁሉም ሥራቸው በሚዛን ይመዘናል። ¹⁴በመናፍስት ጌታ ስም ቃል የተሰወረች መንገዳቸውንና በልዑል እግዚአብሔር እውነተኛ ፍርድ መንገድ ላይ ያለች ፍለጋቸውን ይመረምር ዘንድ ፊቱን በአቀና ጊዜ፥ ¹⁵ሁሉም በአንድ ቃል ይናገራሉ፤ የመናፍስት ጌታ ስምንም ያመሰግናሉ፤ ያከብራሉም፤ ከፍ ከፍም ያደርጋሉ፤ ይቀድሳሉም። ¹⁶እርሱም የሰማያት ሠራዊትን ሁሉ፥ በልዕልና ያሉ ቅዱሳንንም ሁሉ ይጠራል። ¹⁷የእግዚአብሔር ሠራዊት ኪሩቤልና ሱራፌል፥ አፍኒን፥ የኀይላት መላእክት ሁሉ፥ የአጋእዝት መላእክትም ሁሉ፥ የተመረጠውም፥ ¹⁸በየብስና በደሴት የሚኖረው ሌላው ኀይልም በዚያች ቀን አንድ ቃል ተቀብለው በሃይማኖት መንፈስ፥ በጥበብና በትዕግሥት መንፈስ፥ ¹⁹በምሕረት መንፈስ፥ በፍርድና በሰላም መንፈስ፥ በቸርነት መንፈስ ይባርካሉ፤ ያከብራሉ፤ ያመሰግናሉም፤ ከፍ ከፍም ያደርጋሉ። ²⁰ሁሉም በአንድ ቃል “ቡሩክ ነው፥ የመናፍስት ጌታ ስምም ለዘለዓለም ይክበር ይመስገን” ይላሉ። ²¹የማያንቀላፉ ሁሉ እስከ ዘለዓለም ድረስ በሰማያት ያመስግኑታል። በሰማያት ያሉ ቅዱሳኑ ሁሉ ያመሰግኑታል፤ በሕይወት ገነት የሚኖሩ የተመረጡት ሁሉ ያመሰግኑታል። ²²ቅዱስ ስምህን ማመስገን፥ ማክበር፥ ከፍ ከፍ ማድረግና መቀደስ የምትችል የብርሃን መንፈስ ሁላ ታመሰግነዋለች። ²³ሥጋም ሁሉ- በብዙ ኀይል ስምህን ለዘለዓለም ታከብራለች፤ ታመሰግናለች። የመናፍስት ጌታ ምሕረቱ ብዙ ነውና፤ ከመዓትም የራቀ ነውና። ²⁴ሥራውን ሁሉና ኀይሉን ሁሉ፥ የሥራውንም መጠን በመናፍስት ጌታ ስም ለጻድቃንና ለተመረጡት ገለጠ። ²⁵ጌታም ለነገሥታትና ለአዛዦች፥ ለልዑላንና በምድር ለሚኖሩ እንዲህ አዘዘ። ²⁶“አስታራቂውን ማወቅ ትችሉ እንደ ሆነ ዓይኖቻችሁን ግለጡ፤ ሥልጣናችሁንም አንሡ” አለ። ²⁷የመናፍስት ጌታም በጌትነቱ ዙፋን ተቀመጠ፤ የጽድቅ መንፈስም በእርሱ ተገለጠ። ²⁸የአንደበቱም ነገር ኃጥኣንን ሁሉና ዐመፀኞችን ሁሉ ይገድላል። እነርሱም ከፊቱ ይጠፋሉ። ²⁹በዚያችም ቀን ነገሥታትና አዛዦች ሁሉ፥ ልዑላንና ምድርን የሚገዟት ሁሉ ይቆማሉ። ³⁰በጌትነቱም ዙፋን እንደ ተቀመጠ ያዩታል፤ ያውቁታልም፤ ጽድቅም በፊቱ ይፈረዳል። ³¹በፊቱም የሚነገር ዋዛ ፈዛዛ የለም። ³²በምጥ እንደ ተያዘች፥ ልጅዋም በአፈ ማኅፀኗ በመጣ ጊዜ መውለዱ እንደሚያስጨንቃት፥ ለመውለድም እንደምትጨነቅ ሴት መከራው ይመጣባቸዋል። ³³እኩሌቶቹ እኩሌቶቹን አይተው ይደነግጣሉ፤ አንገታቸውንም ይደፋሉ። ³⁴ያንም የሰው ልጅ በጌትነቱ ዙፋን ተቀምጦ በአዩት ጊዜ መከራው ይይዛቸዋል። ³⁵ነገሥታትና አዛዦች፥ ምድርን የሚገዙአትም ሁሉ የተሰወረውን ሁሉ የሚገዛውን ያከብሩታል፤ ያመሰግኑታል፤ ከፍ ከፍም ያደርጉታል። ³⁶የሰው ልጅ ከጥንት ጀምሮ የተሰወረ ሆኖ ነበርና፥ ልዑልም በሠራዊቱ ፊት ጠበቀው፤ ለተመረጡትም ገለጠው፤ የቅዱሳንና የተመረጡት ማኅበራቸው ይሰፋል። ³⁷በዚያች ቀንም የተመረጡት ሁሉ በፊቱ ይቆማሉ። ³⁸ነገሥታትና አዛዦች፥ ልዑላንና ምድርን የሚገዟትም ሁሉ በፊቱ በግንባራቸው ወድቀው ይሰግዳሉ። ³⁹ያንም የሰው ልጅ ተስፋ ያደርጉታል፤ ይማልዱታልም፤ ከእርሱም ዘንድ ምሕረትን ይለምናሉ። ⁴⁰ከዚያ በኋላም ያ የመናፍስት ጌታ ከፊቱ ፈጥነው ይወጡ ዘንድ ያስቸኵላቸዋል። ⁴¹ፊታቸውም ኀፍረትን ይሞላል፤ ፊታቸውም ጥቍረትን ይጨምራል። ⁴²ልጆቹንና የመረጣቸውን በበደሏቸው ሰዎች ፍዳን ያመጡባቸው ዘንድ የመቅሠፍት መላእክት ይቀበሏቸዋል። ⁴³ለመረጣቸውና ለጻድቃኑም አርአያ ይሆናሉ። ⁴⁴በእነርሱም ደስ ይላቸዋል፤ የመናፍስት ጌታ ቍጣው በእነርሱ ላይ ታርፋለችና፥ የመናፍስት ጌታ ሾተልም ከእነርሱ የተነሣ ትሰክራለችና። ⁴⁵ጻድቃንና የተመረጡትም በዚያች ቀን ይድናሉ። ⁴⁶ከእንግዲህም ወዲህ የኃጥኣንና የዐመፀኞችን ፊት አያዩም፤ የመናፍስት ጌታም በእነርሱ ያድራል። ⁴⁷ከዚያም ከሰው ልጅ ጋር ይኖራሉ፤ ይበላሉ፤ ይጠጣሉም፤ ያርፋሉም፤ ለዘለዓለሙም ይነሣሉ። ⁴⁸ጻድቃንና የተመረጡትም ከምድር ተነሡ፤ አንገታቸውንም መድፋት ተዉ። ⁴⁹የክብር ልብስንም ለበሱ፤ እርሱም በመናፍስት ጌታ ዘንድ የሕይወት ልብስ ይሆናችኋል። ⁵⁰ልብሶቻችሁም አያረጁም፤ ክብራችሁም በመናፍስት ጌታ ፊት አይፈጸምም። ⁵¹በእነዚያም ወራቶች ምድርን የሚገዟት ነገሥታትና አዛዦች ተላልፈው በተሰጡበት ቦታ ጥቂት ዕረፍትን ይሰጧቸው ዘንድ፥ በመናፍስት ጌታ ፊትም ወድቀው ይሰግዱ ዘንድ ለመቅሠፍት ከታዘዙ መላእክት ይለምናሉ። ⁵²ኀጢአታቸውን በፊቱ ያምናሉ ፤ የመናፍስት ጌታንም ያመሰግኑታል፤ ያከብሩታልም። ⁵³እንዲህም ይላሉ- “የመናፍስት ጌታ፥ የነገሥታት ጌታ፥ የአዛዦች ጌታ፥ የባለጸጋውም ጌታ፥ የክብር ጌታ፥ የጥበብም ጌታ እግዚአብሔር፥ ቡሩክ ነህ። የተሰወረም ሁሉ በአንተ ይገለጣል። ⁵⁴ኀይልህም ለልጅ ልጅ ዘመን ነው፤ ጌትነትህም ለዘለዓለም ነው። ⁵⁵ምሥጢርህም ሁሉ ጥልቅ ነው፤ ቍጥርም የለውም። ለቸርነትህም ቍጥር የለውም። ⁵⁶አሁንም የነገሥታቱን ጌታ፥ በነገሥታቱም ሁሉ ላይ የሚነግሥውን እናከብርና እናመሰግን ዘንድ ዐወቅን” አሉ። ⁵⁷እንዲህም አሉ- “እናከብረው፥ ፈጽመንም እናመሰግነው ዘንድ፥ ጌትነቱንም እናምን ዘንድ ዕረፍትን ማን በሰጠን? ⁵⁸አሁንም ጥቂት ዕረፍትን እንመኛለን፤ ነገር ግን አናገኘውም፤ እንከተለዋለን፤ ግን አንይዘውም። ⁵⁹ብርሃን ከእኛ አለፈ። ጨለማም ለዘለዓለሙ መኖሪያችን ነው። በፊቱ አላመንምና፥ የመናፍስት ጌታ ስሙንም አላመሰገንምና። ⁶⁰ጌታንም በሥራው ሁሉ አላመሰገንነውም፤ አለኝታችንም በመንግሥታችንና በጌትነታችን ዙፋን ሥልጣን ላይ ሆነ። ⁶¹በድካማችንና በመከራችን ቀንም አላዳነንም። ⁶²እናምንም ዘንድ ዕረፍትን አናገኝም፤ ጌታችን በሥራው ሁሉ፥ በፍርዱና በቸርነቱም ሁሉ የታመነ ነውና። ⁶³የፍርዱንም ፊት አያገኙም፤ ስለ ሥራችንም ከፊቱ እንሄዳለን፤ ኀጢአታችንም ሁሉ በጽድቅ ተቈጠረ፤” ⁶⁴አሁንም እንዲህ ይሏቸዋል- “ሰውነታችን ከዐመፅ ገንዘብ ትጠግባለች፤ ወደ ሲኦል መከራ ትኩሳት ከመውረድም አታድነንም።” ⁶⁵ከዚህም በኋላ በዚያ በሰው ልጅ ፊት ፊታቸው ጨለማንና ኀፍረትን ይሞላል። ⁶⁶ከፊቱም ተሰድደው ይሄዳሉ፤ በመካከላቸውም በፊቱ ሰይፍ ያድራል። ⁶⁷የመናፍስትም ጌታ እንዲህ አለ- “የአዛዦችና የነገሥታት፥ የልዑላንና ምድርን የሚገዟት ሰዎች ሥርዐታቸው፥ ፍርዳቸውም በመናፍስት ጌታ ፊት ይህ ነው።” ⁶⁸በዚያም ቦታ የተሰወሩ ሌሎች ፊቶችን አየሁ። ⁶⁹የመልአኩንም ቃል እንዲህ ሲል ሰማሁ- “ከሰማይ ወደ ምድር የወረዱ፥ በስውር ያለውንም ለሰው ልጆች የገለጡ፥ ኀጢአትንም ይሠሩ ዘንድ የሰው ልጆችን ያሳትWaቸው መላእክት እኒህ ናቸው።”

መጽሐፈ ሄኖክ 17