Enoch Chapter 16 - መጽሐፈ ሄኖክ | EOTC Bible

¹ሄኖክ ከተሰወረ በኋላ በአምስት መቶ ዓመት፥ በሰባተኛውም ወር በዐሥራ አራተኛው ቀን ከሰማያት በላይ ያለች ሰማይ ታላቅ ንውጥውጥታን እንደምትነዋወጥ፥ የልዑልም ሠራዊት እንደሚነዋወጡ በዚያ ምሳሌ አየሁ። ²ብዙ፥ የብዙ ብዙ መላእክትም ታላቅ ሁከትን ታወኩ። ³ያንጊዜም ብሉየ መዋዕልን በጌትነቱ ዙፋን ተቀምጦ አየሁ። ⁴መላእክትና ጻድቃንም በዙሪያው ቆመው አየሁ፤ እኔንም ጽኑ እንቅጥቅጥ ፈጽሞ ያዘኝ። ⁵ፍርሀትም ያዘኝ፥ ወገቤም ጐበጠ፤ ተለያየም፤ ሁለመናዬም እንደ ሰም ቀለጠ፤ በግንባሬም ወደቅሁ። ⁶ቅዱስ ሚካኤልም ከቅዱሳን መላእክት አንዱን ሌላ መልአክ ልኮ አነሣኝ። ⁷ባነሣኝም ጊዜ ነፍሴ ተመለሰች፤ ያን ተአምራትና ያንም ሁከት፥ የሰማይንም መነዋወጥ ከማየት የተነሣ መታገሥን አልቻልሁምና። ⁸ቅዱስ ሚካኤልም እንዲህ አለኝ- “ምን ራእይ ስላየህ እንደዚህ ታወክህ?” ⁹የምሕረቱ ቀንም እስከ ዛሬ አለች፤ መሓሪውም አለ፤ በምድር በሚኖሩ ላይም መዓቱ የራቀ ነው። ¹⁰የመናፍስት ጌታ ለእውነተኛ ፍርዱ ለሚሰግዱ፥ እውነተኛ ፍርዱንም ለሚክዱ፥ ስሙንም በከንቱ ለሚያነሡ ያዘጋጃት፥ የኀይል፥ የመቅሠፍትና የፍርድ ቀን በምትመጣበት ጊዜ፥ ¹¹ያች ቀን ለተመረጡት የቃል ኪዳን፥ ለኃጥኣንም የምርመራ ቀን ሆና ተዘጋጅታለች።” ¹²በዚያችም ቀን ሁለቱ አንበሬዎች ይለያያሉ፤ ሌዋታን የምትባለው አንስታይ አንበሪ ከውኃዎች ምንጮች በላይ በባሕሩ ጥልቅ ትኖር ዘንድ ትለያለች። ¹³የማይታየውን ምድረ በዳ በደረቱ የሚይዝ፥ ስሙ ብሔሞት የሚባለው ተባዕት አንበሪም ይለያል። ¹⁴የቦታውም ስም ጻድቃንና የተመረጡት በሚኖሩበት፥ የመናፍስት ጌታ ለፈጠራቸው ሰዎች መጀመሪያቸው ከሆነው ከአዳም ሰባተኛ የሆነ አያቴ በተወሰደበት በገነት ምሥራቅ ያለ ዴንዳይን ይባላል። ¹⁵እኔም ባንዲት ቀን እንዴት እንደ ተለዩ፥ አንዱ በባሕሩ ጥልቅ፥ አንዱም በምድረ በዳ እንዴት እንደሚኖሩ የእነዚያን አንበሬዎች ኀይላቸውን ይገልጥልኝ ዘንድ ያን ሁለተኛውን መልአክ ጠየቅሁት። ¹⁶እርሱም አለኝ- “አንተ የሰው ልጅ፥ የተሰወረን ነገር በዚህ ልታውቅ ትወዳለህ?” ¹⁷ከእኔ ጋር የሚሄደው፥ የተሰወረውን የፊተኛውንና የኋለኛውን፥ በላይ በሰማይ፥ በምድርም በጥልቁ፥ በሰማይ ዳርቻና በሰማይ መሠረትም፥ በነፋሳትም መዛግብት ያለውን የገለጠልኝ ሁለተኛው መልአክ፥ ¹⁸ነፋሳት እንዴት እንደሚከፈሉና እንደሚመዘኑ፥ ምንጮችና ነፋሳትም በመንፈስ ኀይል እንደሚከፈሉ፥ የጨረቃም የብርሃኑ ኀይል፥ የእውነት ሥራ እንደ መሆኑ፥ የከዋክብትም ክፍሎች በየስማቸው እንደሚከፈሉ ንገረኝ። ¹⁹ክፍሉም ሁሉ ይከፈላል፤ ነጐድጐዶችም በመውደቂያቸው ይሰማሉ፤ ለሚከፈለው ክፍል ሁሉ መጠን አለው። ²⁰መብረቁ ይበራ ዘንድ፥ ሠራዊታቸውም ፈጥነው ይሰሙ ዘንድ ለነጐድጓድ ማረፊያ አለውና በትዕግሥት ለቃሉ ተሰጠው። ²¹ነጐድጓድና መብረቅ አይለያዩም፤ እያንዳንዳቸውም ሁለቱ በነፋስ ይሄዳሉ። ²²መብረቅ ብልጭ ባለ ጊዜ ነጐድጓድ ቃሉን ይሰጣልና አይለያዩም፤ ነፋሱም ወዲያውኑ ያርፋል። ²³በመካከላቸውም እኩል ይከፍላል፤ የሚወጡበት ቅፅበት እንደ አሸዋ ነውና። ²⁴ከእነርሱም እያንዳንዳቸው ወዲያውኑ በልጓም ይገታሉ። ²⁵በነፋስም ኀይል ይመላለሳሉ፤ እንደ ምድር ዳርቻዎች ብዛትም እንዲሁ ይነዳሉ። ²⁶የባሕሩም መንፈስ ²⁷እንዲህም ትነዳለች፤ በምድር ተራሮችም ሁሉ ትበተናለች። ²⁸የውርጩም ነፋስ የእርሱ መልአክ ነው፤ የበረዱም ነፋስ ቸር መልአክ ነው። ²⁹የአመዳዩ ነፋስም ስለ ብርታቱ ቆመ፤ ለብቻውም መልአክ አለው። ³⁰ከእርሱም የሚወጣው እንደ ጢስ ያለ ነው፥ ስሙም ደደክ ይባላል። ³¹የጉም ነፋስም ከእነርሱ ጋር በመዛግብታቸው አይተባበርም፤ ነገር ግን አካሄዱ በጌትነት፥ በብርሃንና በጨለማ፥ በክረምትና በበጋ ነውና ለብቻው መዝገብ አለው። ³²የእርሷም ቦታ ³³ከዝናም መዛግብትም ጋር አንድ ነው፤ መሄጃውም በክረምትና በበጋ ነው። ³⁴ደመናውም ከጉም ደመና ጋር አንድ ነው፤ አንዱ መግቦ ለሌላዉ ይሰጣል። ³⁵የዝናሙ ነፋስ ከመዝገቡ በሚናወጥ ጊዜ መላእክት ይወጣሉ፤ መዝገቡንም ከፍተው ያወጡታል። ³⁶በምድር ሁሉ ላይ ዝናሙ በሚበተን ጊዜ በምድር ላይ ካለው ውኃ ሁሉ ጋር አንድ ይሆናል። ³⁷ዝናሙም በየጊዜው ሁሉ በምድር ላይ ካለው ውኃ ጋራ በሚተባበርበት ጊዜ ውኃዎች በምድር ለሚኖሩ ሰዎች ለጥቅም ናቸው፤ ከሰማይ ከልዑል ዘንድ ለምድር ምግቧ ናቸውና። ስለዚህም ለዝናሙ መጠን አለው፤ መላእክትም ይቀበሉታል። ³⁸እነዚህንም ሁሉ እስከ ጻድቃን ገነት ድረስ አየሁ። ³⁹ከእኔም ጋር የሚኖረው የሰላም መልአክ እንዲህ አለኝ- “እነዚህ ሁለቱ አንበሬዎች በታላቋ የእግዚአብሔር ቀን ⁴⁰የመናፍስት ጌታ መቅሠፍት በእነርሱ ላይ ባረፈች ጊዜ ልጆች ከእናቶቻቸውና ከአባቶቻቸው ጋር ይገደላሉ። ⁴¹የመናፍስት ጌታ መቅሠፍቱም በከንቱ እንዳትመጣ በቸርነቱና በትዕግሥቱ ኋላ በእነርሱ ላይ ፍርድ ትሆናለች።

መጽሐፈ ሄኖክ 16