Enoch Chapter 15 - መጽሐፈ ሄኖክ | EOTC Bible

¹ከዚህም በኋላ ብሉየ መዋዕል አዘነ፥ እንዲህም አለ- “በምድር ላይ የሚኖሩትን ሰዎች ሁሉ በከንቱ አጠፋኋቸው፤” ²ከእንግዲህም ወዲያ በምድር ላይ በሚኖሩ ሰዎች ሁሉ እንዲህ እንደማያደርግ በገናና ስሙ ማለ። ³እንዲህም አለ- “በሰማይ ምልክት አደርጋለሁ፥ ይህም በእነርሱና በእኔ መካከል በምድር ላይ የሰማይን ዘመን ያህል እስከ ዘለዓለም መተማመኛ ይሆናል። ⁴ከዚህም በኋላ በመላእክት እጅ አጸናባቸው ዘንድ ብወድ በትእዛዜ ነው። ⁵በችግርና በመከራ ቀን ከዚህ አስቀድሞ መዓቴም፥ መቅሠፍቴም ያድርባቸዋል። ⁶የመናፍስት ጌታ እግዚአብሔርም በምድር የምትኖሩ ኀይለኞች ነገሥታት! እኔ የመረጥሁትን በጌትነቱ ዙፋን በሚቀመጥበት ጊዜ ታዩት ዘንድ አላችሁ አለ። ⁷እርሱም በአዛዝኤልና በማኅበሩ ሁሉ፥ በሠራዊቱም ሁሉ ላይ በመናፍስት ጌታ ስም ይፈርዳል።” ⁸በዚያም የመቅሠፍት መላእክትን ሠራዊት ሲሄዱ አየሁ፤ የብረትና የብርት ወጥመዶችንም ይዘዋል። ⁹ከእኔም ጋር የሚሄደውን የሰላም መልአክ “ወጥመዶችን የያዙ እነዚህ ማንን ሊያሥሩ ይሄዳሉ?” ብዬ ጠየቅሁት። ¹⁰እርሱም እንዲህ አለኝ- “በሸለቆው ጥልቅ ዋሻ ውስጥ ይወድቁ ዘንድ እያንዳንዳቸው ለመረጡአቸውና ለወደዱአቸው ናቸው። ¹¹ያንጊዜም ያ ሸለቆ ከመረጧቸውና ከወደዷቸው የተነሣ ይሞላል። ¹²የሕይወትም ቀናቸው ያልቃል፥ የስሕተታቸውም ቀን ከዛሬ በኋላ አይቈጠርም። ¹³“በእነዚያም ወራቶች አለቆች ተሰብስበው ወደ ጳርቴና ወደ ሜድ ሰዎች ወደ ምሥራቅ ራሳቸውን ይመልሳሉ። ¹⁴ነገሥታቱንም ያነቃንቋቸዋል፥ የሁከት መንፈስም ያድርባቸዋል፥ ከዙፋናቸውም ይገለብጧቸዋል። ¹⁵እንደ አንበሶች ከመደባቸው፥ እንደ ተራቡ ጅቦችም ከመንጋዎቻቸው መካከል ይወጣሉ። ¹⁶“ይዘምታሉ፥ የምርጦቻቸውንም ሀገር ይረግጣሉ፤ የእርሱ ምርጦች ሀገርም በፊታቸው መመላለሻና መገሥገሻ ትሆናለች። ¹⁷የጻድቃኔ ከተማ ግን ለፈረሶቻቸው መሰናክል ትሆናለች። ¹⁸እርስ በርሳቸውም ጦርነትን ያነሣሉ፤ ቀኝ እጃቸውም በእነርሱ ላይ ትጸናለች፥ ሰውም ባልንጀራውን፥ ወንድሙንም አያውቀውም። ¹⁹ልጅም ከሞታቸው የተነሣ ሬሣቸው እስኪቈጠር ድረስ አባቱንና እናቱን አያውቅም። መቅሠፍታቸውም ከንቱ አይሆንም። ²⁰በእነዚያም ወራቶች መቃብር አፏን ትከፍታለች። ²¹በውስጧም ይቀበራሉ፤ ታጠፋቸዋለችም፥ ከተመረጡት ፊት የተነሣም ሲኦል ትውጣቸዋለች።” ²²ከዚህም በኋላ እንዲህ ሆነ፥ ሰዎች ተቀምጠውባቸው ሌሎች ብዙዎች ሠረገላዎችን አየሁ። ²³በነፋሳትም ላይ ሆነው ከምሥራቅና ከምዕራብ እስከ ቀን እኩሌታ ይመጣሉ። ²⁴የሠረገሎቻቸው ድምፅ ቃልም ተሰማ፥ ይህም ሁከት በተደረገ ጊዜ ቅዱሳን በሰማይ ሁነው ዐወቁ። ²⁵የምድር ምሰሶም ከቦታው ተናወጠ። ²⁶ከሰማይ ዳርቻ ጀምሮ እስከ ምድር ዳርቻ ድረስም ባንዲት ቀን ተሰማ። ²⁷ሁሉም ወድቀው ለመናፍስት ጌታ ይሰግዳሉ። ²⁸የሁለተኛውም ምሳሌ መጨረሻ ይህ ነው። ²⁹ስለ ጻድቃንና ስለ ተመረጡት ሦስተኛውን ምሳሌ እናገር ዘንድ ጀመርሁ። ³⁰እናንተ ጻድቃንና የተመረጣችሁ ብፁዓን ናችሁ፤ ዕድላችሁ ክቡር ነውና። ³¹ጻድቃን በፀሐይ ብርሃን፥ የተመረጡትም በዘለዓለማዊ የሕይወት ብርሃን ይሆናሉ። ³²ለሕይወታቸው ዘመንም ፍጻሜ የለውም፥ ለቅዱሳንም የዘመን ቍጥር የላቸውም። ³³ብርሃንንም ይፈልጉታል፥ በመናፍስት ጌታም ዘንድ ጽድቅን ያገኛሉ። ³⁴በመናፍስት ጌታም ዘንድ ለጻድቃን ሰላም ይሆናል። ³⁵ከዚህም በኋላ የሃይማኖት ዕድል ፋንታ የሆነውን የጽድቅ ምሥጢር በሰማይ ይፈልጉ ዘንድ ለጻድቃን ይነገራል። ³⁶እንደ ፀሐይ በምድር ላይ ወጥትWaልና፥ ጨለማም አልፎአልና፤ የማይቈጠር ብርሃንም ይሆናል። ³⁷አስቀድሞ ጨለማ አልፎአልና በዘመን ቍጥር አይገቡም። ³⁸ብርሃንም በመናፍስት ጌታ ፊት ይጸናል፤ የእውነተኛ ፍርድ ብርሃንም በመናፍስት ጌታ ፊት ለዘለዓለም ትጸናለች። ³⁹በእነዚያም ወራቶች ዐይኖቼ የመባርቅትንና የብርሃናትን ምሥጢራት፥ ፍርዳቸውንም አዩ። ⁴⁰የመናፍስት ጌታም እንደ ወደደ ለበረከትና ለመርገም ያበራሉ። ⁴¹በዚያም የነጐድጓድ ምሥጢርን አየሁ፤ በሰማይ ላይም ብልጭ ባለ ጊዜ ቃላቸው ይሰማል። ⁴²የየብሱንም ቦታዎች አሳየኝ። ⁴³የነጐድጓዱም ቃል ለሰላምና ለበረከት ነው፤ ለመርገም ቢሆንም በመናፍስት ጌታ ቃል ነው። ⁴⁴ከዚህም በኋላ የብርሃናትና የመባርቅት ምሥጢሮች ሁሉ ተገለጡልኝ። ⁴⁵ለበረከትና ለጥጋብም ያበራሉ።

መጽሐፈ ሄኖክ 15