Enoch Chapter 13 - መጽሐፈ ሄኖክ | EOTC Bible

¹በዚያ ቦታ የማይቈጠር የጽድቅ ምንጭን አየሁ። ²በዙሪያውም ብዙ የጥበብ ምንጮች ይከቡታል። የተጠሙ ሰዎችም ሁሉ ከእርሱ ይጠጣሉ፥ ጥበብንም ይሞላሉ። ³ማደሪያቸውም ከጻድቃን፥ ከተመረጡትና ከቅዱሳን ጋር ነው። ⁴በዚያችም ሰዓት ያ የሰው ልጅ በመናፍስት ጌታ ፊት ተጠራ። ⁵ስሙም ከዕለታት መጀመሪያ የቀደመ ነው። ⁶ፀሐይ፥ ምልክትም ⁷እንዳይወድቁም እርሱን ይመረጐዙ ዘንድ ለጻድቃንና ለቅዱሳን በትር ይሆናል። እርሱም የአሕዛብ ብርሃን ነው፤ በልቡናቸው ላዘኑም እርሱ ተስፋ ይሆናል። ⁸በምድር ላይ የሚኖሩ ሁሉ በፊቱ ወድቀው ይሰግዳሉ፤ ያመሰግኑታል፥ ያከብሩታልም፥ ለመናፍስት ጌታ ስምም ያዘምራሉ። ⁹ስለዚህም አስታራቂ ሆነን፤ ይህም በመናፍስት ጌታ ፊት ከጥንት ጀምሮ እስከ ዘለዓለም ድረስ የተሰወረ ሆነ። ¹⁰እርሱንም የመናፍስት ጌታ ጥበቡ ለጻድቃንና ለተመረጡት ገለጠው። የጻድቃንን ዕድል ፋንታ ጠብቋልና፤ ¹¹ይህን የዐመፅ ዓለም ጠልተው ንቀውታልና፤ ሥራውንና መንገዱንም በመናፍስት ጌታ ስም ጠልተውታልና። ¹²በስሙ ይድናሉና፤ ድኅነታቸውንም ወደደ። ¹³በዚያም ወራት በጭንቀታቸውና በመከራቸው ቀን የምድርን ነገሥታትና ምድርን የያዙ ኀያላን ሰውነታቸውን አላዳኑምና ስለ እጃቸው ሥራ አንገታቸውን የደፉ ሆኑ። ¹⁴በመረጥኋቸውም ሰዎች እጅ ይጥሏቸዋል። ¹⁵ሣር በእሳት እንደሚቃጠል፥ እርሳስም በውኃ ውስጥ እንደሚሰጥም እንዲሁ ከጻድቃን ፊት የተነሣ ይቃጠላሉ፤ ከቅዱሳንም የተነሣ ይሰጥማሉ። ¹⁶ፍለጋቸውም አይገኝም፥ በተጨነቁባትም ቀን በምድር ላይ ፍርሀት ትደረጋለች። ¹⁷በፊቱም ይወድቃሉ፥ አይነሡምም፤ እጁንም ሰጥቶ የሚያነሣቸው የለም፤ የመናፍስት ጌታን፥ መሲሑንም ክደውታልና፥ የመናፍስት ጌታም ስሙ ይመሰገናል። ¹⁸ጥበብ እንደ ውኃ ፈስሶአልና፤ ክብርም በፊቱ ለዘለዓለም አትፈጸምም፤ በጽድቅ ምሥጢር ሁሉ ኀያል ነውና። ¹⁹አስታራቂው በመናፍስት ጌታ ፊት ቁሟልና፥ ዐመፅ እንደ ጥላ ያልፋል፥ መቆምያም ቦታ የለም። ²⁰ጌትነቱ ለዘለዓለም ነው፥ ኀይሉም ለልጅ ልጅ ዘመን ነው። ²¹የጥበብ መንፈስ፥ የማስተዋል መንፈስ፥ የትምህርትና የኀይል መንፈስ፥ በጽድቅ የሞቱትን ሰዎች በእውነት የሚያስነሣቸው መንፈስም በእርሱ ይኖራል። ²²እርሱም የተሰወሩትን ይፈርዳል፥ ከንቱ ነገርንም በፊቱ መናገር የሚችል የለም፤ እርሱ እንደ ወደደ በመናፍስት ጌታ ፊት አስታራቂ ነውና። ²³በእነዚያም ወራቶች ለቅዱሳንና ለተመረጡት መመለስ ትደረግላቸዋለች፤ የዘመን ብርሃንም በእነርሱ ያድራል፥ ፍጹም ክብርም ለቅዱሳን ይመለስላቸዋል። ²⁴በጭንቅ ቀንም ለኃጥአን መከራ ትደልብላቸዋለች፤ ጻድቃንም በመናፍስት ጌታ ስም ድል ይነሣሉ። ²⁵ንስሓ ይገቡ ዘንድ፥ የእጃቸውንም ሥራ ይተዉ ዘንድ ለሌሎች ይገልጣል። ²⁶በመናፍስት ጌታ ፊትም ክብር ይደረግላቸዋል፥ በስሙም ይድናሉ። ²⁷ቸርነቱ ብዙ ነውና፥ በፍርዱና በጌትነቱም ፊት ጻድቅ ነውና የመናፍስት ጌታ ይቅር ይላቸዋል። ²⁸ዐመፅም በፍርዱ ጊዜ አትጸናም፥ ንስሓ የማይገባም በፊቱ ይጠፋል፥ “ከእንግዲህ ወዲያም የመናፍስት ጌታ ይቅር አልላቸውም” አለ። ²⁹በእነዚያም ወራቶች ምድር አደራዋን ትመልሳለች፤ መቃብርም የተቀበለችውን አደራ ትመልሳለች። ³⁰ሞትም የሚከፍለውን ይመልሳል፥ እነርሱም ይድኑ ዘንድ ቀንዋ ቀርባለችና ጻድቃንንና ቅዱሳንን ከእነርሱ ይመርጣል። ³¹አስታራቂውም በእነዚያ ወራቶች በዙፋኑ ይቀመጣል፤ የጥበብንም ምሥጢር ሁሉ ከአንደበቱ ያወጣል፤ የመናፍስት ጌታ ሰጥቶ አክብሮታልና። ³²በእነዚያም ወራቶች ተራሮች እንደ ጊደሮች ይዘፍናሉ፤ ኮረብቶችም ወተት እንደ ጠገቡ ጠቦቶች ይዘላሉ። ³³በእነዚያም ወራቶች አስታራቂው ተነሥትWaልና ሁሉም በሰማይ እንደ መላእክት ይሆናሉ። ፊታቸውም በደስታ ይበራል። ³⁴ምድርም ደስ ይላታል፥ ጻድቃንም በእርሷ ይኖራሉ፥ የተመረጡትም በእርሷ እየተመላለሱ ይኖራሉ።

መጽሐፈ ሄኖክ 13