Enoch Chapter 12 - መጽሐፈ ሄኖክ | EOTC Bible

¹ጥበብ የምታድርበትን ቦታ አላገኘችም፤ ማደሪያዋም በሰማያት አለ። ²ጥበብ በሰው ልጆች ታድር ዘንድ ወጣች፤ ማደሪያንም አላገኘችም፤ ጥበብም ወደ ቦታዋ ተመለሰች፤ በመላእክትም መካከል አደረች። ³ዐመፃ ከመዛግብትWa ወጣች፤ ያልወደደችውን አገኘች፤ ዝናም በምድረ በዳ፥ ጠልም በተጠማች ምድር እንደሚያድር በእነርሱ አደረች። ⁴ሌሎች መብረቆችንና የሰማይ ከዋክብትንም አየሁ። ⁵ሁሉንም በየስማቸው እንደሚጠራቸው፥ እነርሱም እንደሚሰሙት አየሁ። ⁶በብርሃናቸውና በቦታቸው ስፋት ይመዘኑ ዘንድ የጽድቅ ሚዛኖችንም አየሁ። ⁷የፍጥረታቸውንና የመመለሻቸውንም ቀን አየሁ፤ መብረቅ መብረቅን ይወልዳል። አመላለሳቸውም በመልአኮቻቸው ቍጥር ነው፤ ሃይማኖታቸውንም እርስ በርሳቸው ይጠብቃሉ። ⁸ከእኔ ጋራ የሚሄደውንና የተሰወረውን የገለጠልኝን መልአክ ጠየቅሁት። እንዲህም አልሁት- “እነዚያ ምንድን ናቸው?” ⁹እርሱም እንዲህ አለኝ- “የመናፍስት ጌታ የእነርሱን ምሳሌ አሳየህ። እነዚህም በምድር ላይ የሚኖሩ፥ በመናፍስት ጌታም ስም ለዘለዓለሙ የሚያምኑ የጻድቃን ስሞች ናቸው። ¹⁰ስለ መብረቅም ሌሎችን አየሁ፤ ከከዋክብት እንዴት እንደሚጸኑና መብረቅን እንደሚሆኑ አየሁ። ከእነርሱም ጋር ¹¹ይህም ሁለተኛው ምሳሌ የቅዱሳን ማደሪያንና የመናፍስት ጌታን ስም በሚክዱ ላይ ነው። ¹²ወደ ሰማይም አይወጡም፤ ወደ ምድርም አይወርዱም፤ የመናፍስትን ጌታ ስም የሚክዱ፥ ለድካምና ለመከራ ቀንም እንደዚህ የሚጠበቁ የኃጥኣን ዕድል እንዲህ ይሆናል፤ በዚያችም ቀን የተመረጠው በጌትነቱ ዙፋን ይቀመጣል። ¹³ሥራቸውንና ቦታቸውንም ይመርጣል፤ ቍጥርም የላቸውም። ¹⁴እኔ የመረጥሁትን፥ ቅዱስና ክቡር ስሙን የሚማጠኑትንም ¹⁵በዚያችም ቀን እኔ የመረጥሁትን በመካከላቸው አኖረዋለሁ። ¹⁶ሰማይን እለውጣታለሁ፥ ለዘለዓለምም ለበረከትና ለብርሃን አደርጋታለሁ። ምድርንም እለውጣታለሁ፤ ለበረከትም አደርጋታለሁ። ¹⁷የመረጥኋቸውንም በውስጧ አኖራቸዋለሁ። ኀጢአትንና በደልን የሚሠሩ ግን አይረግጧትም፤ እኔ ጻድቃንን አይቻቸዋለሁና፤ ሰላምንም አጥግቤአቸዋለሁና፥ በፊቴም አኖርኋቸው። ¹⁸ከገጸ ምድር አጠፋቸው ዘንድ የኃጥኣን ፍርድ ወደ እኔ ቀረበች። ¹⁹በዚያም ብሉየ መዋዕልነት ያለውን አየሁ፥ ራሱም እንደ ባዘቶ ነጭ ነው። ²⁰መልኩ እንደ ሰው መልክ የሆነ ሌላም ከእርሱ ጋር አለ። ጸጋንም የተመላ ነው፤ ፊቱም ከቅዱሳን መላእክት እንደ አንዱ ነው። ²¹ከእኔ ጋራ የሚሄደውንና የተሰወረውን ሁሉ የገለጠልኝ ከቅዱሳን መላእክት አንዱን ስለዚሁ የሰው ልጅ ጠየቅሁት። ²²እንዲህም አልሁት- “ያ ማን ነው? እርሱስ ከወዴት ይሆን? ከብሉየ መዋዕልስ ጋር ስለምን ይኖራል?” ²³እርሱም መለሰልኝ እንዲህም አለኝ- “ጽድቅ የሆነለት፥ ጽድቅም ከእርሱ ጋር የኖረ የሰው ልጅ ነው። ጌታ እርሱን መርጧልና እርሱ የተሰወሩ መዛግብትን ሁሉ ይከፍታል። ²⁴ዕድሉ በመናፍስት ጌታ ፊት ለዘለዓለም በርትዕ ሁሉን ድል ያደረገ ነው። ²⁵“ይህም ያየኸው የሰው ልጅ ነገሥታቱንና ኀያላኑን ከአልጋዎቻቸው፥ ጽኑዓኑንም ከዙፋኖቻቸው ያስነሣቸዋል። ²⁶የጽኑዓኑንም ልጓሞች ይፈታል፥ የኃጥአንንም ጥርሶች ይሰብራል፤ ከፍ ከፍ አያደርጉትምና፥ አያመሰግኑትምምና፥ መንግሥትም ከየት እንደ ተሰጠቻቸው አያምኑምና ነገሥታትን ከዙፋናቸውና ከመንግሥታቸው ይገለብጣቸዋል። ²⁷የጽኑዓኑንም ፊት ይገለብጣል፤ ኀፍረትንም ይመላባቸዋል፥ ማደርያቸውም ጨለማን ይሆንባቸዋል። ²⁸ትሎችም ምንጣፍ ይሆኗቸዋል፤ የመናፍስትን ጌታ ስም ከፍ ከፍ አያደርጉምና ከመኝታቸው ይነሡ ዘንድ ተስፋ አያደርጉም። ²⁹እነርሱም የሰማይ ከዋክብትን የሚገዙ ሆነዋል፤ እጆቻቸውንም ወደ ልዑል ይዘረጋሉ፥ በምድር ይሄዳሉ፥ በውስጧም ይኖራሉ። ³⁰ዐመፅ ሥራቸውንም ሁሉ ይገልጣሉ፤ ሥራቸውም ሁሉ ዐመፅ ነው፥ ኀይላቸውም በባለጸግነታቸው ላይ ነው። ³¹ሃይማኖታቸውም በእጃቸው ለሠሯቸው ጣዖታት ሆኗል፥ የመናፍስትን ጌታ ስምም ክደዋል። ³²ከእርሱና በመናፍስት ጌታ ስም ከሚያምኑ ምእመናን ማደሪያዎችም ይሰደዳሉ። ³³“በዚያም ወራት የጻድቃን ጸሎት ከምድር ዐረገች፥ የጻድቁም ደም በመናፍስት ጌታ ፊት ተወደደ። ³⁴በእነዚህም ወራቶች በሰማያት የሚኖሩ ቅዱሳን አንድ ይሆናሉ፤ በአንድ ቃልም ይማልዳሉ፥ ይጸልያሉም፥ ያመሰግናሉም። ³⁵ስለ ፈሰሰውም የጻድቃን ደም በመናፍስት ጌታ ስም ያመስግናሉ፥ ይባርካሉም። ³⁶የጻድቃንም ጸሎታቸው ለዘለዓለም ፍርድ ይደረግላቸው ዘንድ፥ መዘግየትም ለዘለዓለም እንዳይሆንባቸው በመናፍስት ጌታ ፊት አትቋረጥም።” ³⁷በእነዚያም ወራቶች ብሉየ መዋዕልን በጌትነቱ ዙፋን ተቀምጦ አየሁት፤ የሕያዋን መጻፎቻቸውም በፊቱ ተገለጡ። ³⁸በሰማያት የሚኖሩ ሠራዊትም ሁሉ በዙሪያው ሆነው በፊቱ ይቆማሉ። ³⁹የቅዱሳን ልብ ደስታን ትሞላለች፤ የጽድቅ ቍጥሯ ሞልትWaልና፥ የጻድቃንም ጸሎት ተሰምትWaልና። ⁴⁰የጻድቁም ደም በመናፍስት ጌት ፊት ተወደደ።

መጽሐፈ ሄኖክ 12