Book of Judith Chapter 5 - መጽሐፈ ዮዲት | EOTC Bible

⁵የአሞን ልጆች ሹም አክዮርም እንዲህ አለ፥ “ከእኔ ከባርያህ አንደበት ይህን ነገር ስማ፤ ከእኔ ከባሪያህ አንደበት ሐሰት ነገር አይወጣምና፥ በእነዚህ አንባዎች፥ በአቅራቢያህም ስለሚኖሩ ስለእነዚህ ወገኖች እውነት ነገርን እነግርሃለሁ። ⁶እነዚህ ወገኖች ከከላውዴዎን መጡ። ⁷በከላውዴዎን ሀገር የሚኖሩ የአባቶቻቸውን ጣዖቶች ያመልኩ ዘንድ አልወደዱምና አስቀድመው በመስጴጦምያ ይኖሩ ነበረ። ⁸የወገኖቻቸውንም መንገድ ትተዋልና ላወቁት ከጣዖቶቻቸው ፊት ላወጣቸው ለሰማይ አምላክ ለእግዚአብሔርም ሰግደዋልና ወደ መስጴጦምያ ሸሽተው በዚያ ብዙ ዘመን ኖሩ። ⁹ፈጣሪያቸውም ከተሰደዱበት ሀገር ይወጡና ወደ ከነዓን ይሄዱ ዘንድ አዘዛቸው፤ በዚያም ብዙ ዘመን ኖሩ፤ ብርንና ወርቅን፥ ብዙ ከብቶችንም ፈጽመው አበዙ። ¹⁰ረኃብ በከነዓን ሀገር ሁሉ ጸንትዋልና ወደ ግብፅ ወረዱ፤ በዚያም እየተመገቡ ኖሩ፤ በዚያም በዝተው ሞሉ፤ ለወገኖቻቸውም ቍጥር አልነበራቸውም። ¹¹የግብፅ ንጉሥም በጠላትነት ተነሣባቸው፤ ተተነኰለባቸውም፤ መከራም አጸናባቸው፤ ጡብ በማሠራትም ገዛቸው፤ ባሮችም አደረጋቸው። ¹²ወደ አምላካቸውም ጮኹ፤ እርሱም መድኀኒት በሌለው መቅሠፍት የግብፅ ሀገርን ሁሉ አጠፋ፤ ግብፃውያንም ከፊታቸው አስወጡአቸው። ¹³እግዚአብሔርም በፊታቸው የኤርትራን ባሕር አደረቃት። ¹⁴ወደ ሲና ተራራና ቃዴስ በርኔ ወሰዳቸው፤ በምድረ በዳ የሚኖሩትንም ሁሉ አወጣቸው። ¹⁵በአሞራውያን ሀገርም ኖሩ፤ የሐሴቦንንም ሰዎች ሁሉ በኀይሉ አጠፋ ዮርዳኖስንም ተሻግረው ተራራማውን ሀገር ሁሉ ወረሱ። ¹⁶ከናኔዎንን፥ ፌርዜዎንን፥ ኢያቡሴዎንን፥ ሴኬምን፥ ጌርጌሴዎንንም ሁሉ ከፊታቸው አስወጣቸው፤ በዚያም ብዙ ዘመን ኖሩ። ¹⁷“በፈጣሪያቸውም ፊት ባልበደሉ ጊዜ መልካም ነገር ሁሉ ሆነላቸው፤ በደልን የሚጠላ እግዚአብሔር ከእነርሱ ጋር ነበረና። ¹⁸ያዘዛቸውን ሥርዐት በተዉ ጊዜ ግን ፈጽሞ በብዙ ጦር አጠፋቸው፤ ወደ ባዕድ ሀገርም ተማረኩ፤ የፈጣሪያቸው ማደሪያ ቤተ መቅደስም ፈረሰ፤ ምድረ በዳም ሆነ፤ ከተሞቻቸውንም ጠላቶቻቸው ያዙባቸው። ¹⁹ዛሬ ግን ወደ ፈጣሪያቸው ተመለሱ፤ ከተበተኑበትም ሀገር ከዚያ ተሰበሰቡ፤ ቤተ መቅደስ ባለበት በኢየሩሳሌም ኖሩ፤ ምድረ በዳም ነውና በተራራው ኖሩ። ²⁰አሁንም አቤቱ ጌታዬ እነዚህ ወገኖች በደል እንዳለባቸው፥ ፈጣሪያቸውንም በድለው እንደ ሆነ ይህ መሰናክላቸው ነውና አንድ ጊዜ እናረጋግጥ፤ ከዚያ በኋላ ወጥተን እንዋጋቸዋለን። ²¹በእነዚህ ወገኖች በደል ከሌለባቸው ግን ጌታዬ እለፋቸው፤ እነሆ ጌታቸው ያጸናቸው ይሆናል፤ ወይም አምላካቸው ይቆምላቸው ይሆናል፤ እኛም በሀገሩ ሁሉ ኀፍረት እንሆናለን።” ²²ከዚህ በኋላ አክዮር ይህን ነገር ተናግሮ በጨረሰ ጊዜ በሰፈሩ ዙሪያ የቆሙ ወገኖች ሁሉ አንጐራጐሩ፤ የሆሎፎርኒስ ሹሞች፥ በባሕር ዙሪያና በሞዓብ የሚኖሩ ሰዎችም ሁሉ “አክዮርን እንግደለው” አሉ። ²³“ከጽኑ አርበኛ ጋር ይዋጉ ዘንድ ብርታትና ኀይል የሌላቸውን ወገኖች የእስራኤልን ልጆች የምንፈራቸው አይደለም። ²⁴ስለዚህ ግን ጌታችን ሆሎፎርኒስ ሆይ፥ እንዝመት፤ እነርሱም ለጭፍራዎችህ ሁሉ ምግብ ይሆናሉ” አሉ።

መጽሐፈ ዮዲት 5

ሆሎፎርኒስ በእስራኤል ላይ ለመዝመት የጠራው ስብሰባ

የአክዮር ንግግር