3 Book of Ezra Chapter 6 - መጽሐፈ ዕዝራ ሱቱኤል | EOTC Bible

⁶እኔም መለስሁለት እንዲህም አልሁት፥ “በፊትህ ባለሟልነትን ካገኘሁ ይህንም ለባሪያህ ንገረው፤ በሞትን ጊዜ፥ ከእኛ ከእያንዳንዳችንም ነፍሳችን በምትወጣበት ጊዜ ቍርጥ ፍርዱን የሚያደርግበት ጊዜው እስኪደርስ ድረስ ይጠብቁናል? ወይስ ከዛሬ ጀምሮ ይፈረድብናል?” ⁷እርሱም መለሰልኝ እንዲህም አለኝ፥ “ይህንም እነግርሃለሁ፤ አንተ ግን ከከሓድያን ጋር አትጨመርም፤ ከሚፈረድባቸውም ጋር አትቈጠርም። ⁸በልዑል ዘንድ የተዘጋጀ መዝገብ ለአንተ አለህና፥ ነገር ግን እስከ ኋለኛው ቀን ድረስ አልገልጥልህም። ⁹የሞትስ ነገር እንዲህ ነው፤ ከልዑል ዘንድ የትእዛዝ ቃል ከመጣ በኋላ፥ እገሌ ይሙት ባለ ጊዜ ነፍሱ ከሥጋው ትለያለች፤ ዳግመኛም ወደ ሰጣት ትመለሳለች፤ ለልዑል ጌትነትም አስቀድማ ትሰግዳለች። ¹⁰የልዑልን መንገዶች ካልጠበቁ፥ የልዑልን ሕግ ካቃለሉ፥ እርሱንም መፍራትን ካላሰቡ ከከሓድያን ወገን ከሆኑ ግን፥ ¹¹እነዚያ የኃጥኣን ነፍሳት ይዞራሉ እንጂ ወደ ጻድቃን ማደሪያ አይገቡም፤ ከዚህ በኋላ መከራ ይቀበላሉ፤ ይጨነቃሉ፤ ያዝናሉም፤ ሰባቱንም ሥርዐታት ያሳዩአቸዋል። ¹²መጀመሪያዪቱ ሥርዐት ይህች ናት፤ የልዑልን ሕግ ክደዋልና። ¹³ሁለተኛዪቱም ሥርዐት እንዲህ ናት፤ ከእንግዲህ ወዲህ ዳግመኛ በሕይወት ይኖሩ ዘንድ መመለስ አይቻላቸውምና። ¹⁴ሦስተኛዪቱም ሥርዐት እንዲህ ናት፥ በልዑል ሥርዐት ላመኑ የተዘጋጀላቸውን ዋጋ ያያሉና። ¹⁵አራተኛዪቱም ሥርዐት እንዲህ ናት፤ በኋላ ዘመን የሚጠብቃቸውን ፍርድ ያያሉና። ¹⁶አምስተኛዪቱም ሥርዐት እንዲህ ናት፤ መላእክት የጻድቃንን ነፍስ በማደሪያቸው ውስጥ በብዙ ዕረፍት ሲጠብቋቸው ያያሉና። ¹⁷“ስድስተኛዪቱም ሥርዐት እንዲህ ናት፤ ከዛሬ ጀምሮ የሚያገኛቸውን መከራ እያዞሩ ያሳዩአቸዋልና። ¹⁸ከነገርሁህ ሥርዐታት ሁሉ የምትበልጥ ሰባተኛዪቱ ሥርዐት እንዲህ ናት፤ በፊቱ ይፈረድባቸው ዘንድ ያላቸው ዛሬ በሕይወታቸው ሳሉ እርሱን የበደሉ በፊታቸው የልዑልን ጌትነት ባዩ ጊዜ በኀሣር ይቀልጣሉና፥ በኀፍረትም ይጐሳቈላሉና፥ በፍርሀትም ይጠወልጋሉና። ¹⁹“የልዑልን ሕግ የጠበቁ ግን ከመዋቲ ሥጋቸው በሚለዩበት ጊዜ ሥርዐታቸው እንዲህ ናት። ²⁰በኖረበት ዘመን ሁሉ ያስተማራቸው የልዑልን ሕግ ይፈጽሙ ዘንድ መከራቸውን ታግሠው ሁልጊዜ በድካም ለእግዚአብሔር ተገዝተውለታልና። ²¹ስለዚህ ነገራቸው እንዲህ ነው። ²²መጀመሪያ የተቀባያቸውን የእግዚአብሔርን ጌትነት በብዙ ደስታ ያያሉ፤ ወደ ሰባቱም ሥርዐታት ይወስዷቸዋል። ²³መጀመሪያዪቱ ሥርዐት እንዲህ ናት፤ በዛሬው ሕይወታቸው በሞት እንዳያስታቸው በእነርሱ ያለ ክፉ አሳብን ድል ይነሡ ዘንድ በብዙ ድካም ተጋድለዋልና። ²⁴ሁለተኛዪቱም ሥርዐት እንዲህ ናት፤ የኃጥኣንን ነፍሳት በሚዞሩበት ያዩአቸዋልና፤ የሚጠብቃቸውንም ፍርድ ያያሉና። ²⁵ሦስተኛዪቱም ሥርዐት እንዲህ ናት፥ በሕይወት ሳሉ በሃይማኖት የተቀበሉትን ሕጉን እንደ ጠበቁ የፈጠራቸው ምስክር ይሆንላቸዋልና። ²⁶አራተኛዪቱም ሥርዐት እንዲህ ናት፥ መላእክት እየጠበቋቸው ብዙ ደስታ ባለባቸው ማደሪያዎቻቸው ከዛሬ ጀምሮ የሚያርፉትን ዕረፍትና የሚቈያቸውን ክብር ያያሉና። ²⁷አምስተኛዪቱም ሥርዐት እንዲህ ናት፤ ዛሬ ያለውን ሞት እንዴት ድል እንደነሡትና ኋላ ያገኙት ዘንድ ያላቸውን እንደ ወረሱ አይተው ደስ ይላቸዋልና፤ ዳግመኛም ድካምን ከተመላ ከዚህ ከጠባቡ የተነሣ እንደታገሡ፥ ያን ሰፊውን ሕይወት እንደሚያገኙ ያያሉ። ሞት በሌለበትም ለዘለዓለም ደስ ይላቸዋል። ²⁸ስድስተኛዪቱም ሥርዐት እንዲህ ናት፤ ፊታቸው እንደ ፀሐይ እንደሚያበራ፥ ብርሃናቸውም እንደ ከዋክብት እንደሚያንጸባርቅ ያሳዩአቸው ዘንድ አላቸውና፥ ከእንግዲህ ወዲህም አይሞቱምና። ²⁹ከሁሉ የምትበልጥ ሰባተኛዪቱም ሥርዐት እንዲህ ናት፤ በእርሱ ዘንድ ይከብሩና ዋጋ ያገኙ ዘንድ ያላቸው በሕይወት ሳሉ የተገዙለትን ፊቱን ያዩ ዘንድ የሚቸኩሉ ስለ ሆነ ሳያፍሩ በብዙ ደስታ ተማምነው በግልጥ ይመካሉና። ³⁰“ከዛሬ ጀምሮ ያገኙ ዘንድ ያላቸው የጻድቃን ነፍሳት ሥርዐታቸው ይህ ነው፤ ከሓድያንም መከራ ይቀበሉ ዘንድ የነገርሁህ ሥርዐታቸው፥ መንገዳቸውና ፍርዳቸው ይህ ነው።” ³¹እኔም መለስሁለት እንዲህም አልሁት፥ “ከሥጋዋ ከተለየች በኋላ ይህን የነገርኸኝን ታይ ዘንድ ለነፍስ ቀን ይሰጣታልን?” ³²“በእነዚያም በሰባቱ ቀኖች ይህን የነገርሁህን ሥራቸውን ሁሉ ያዩ ዘንድ ለሰባት ቀን ነጻ ናቸው፤ ከዚያም በኋላ ወደ ቦታቸው ይመለሳሉ” አለኝ። ³³እኔም መለስሁለት እንዲህም አልሁት፥ “አቤቱ ጌታዬ፥ በፊትህ ባለሟልነትን ካገኘሁ ይህንም ለባሪያህ ዳግመኛ ንገረው፤ በፍርድ ቀን ጻድቃን በልዑል ዘንድ ለኃጥኣን መለመን ይችላሉን? ³⁴አባቶችም ለልጆቻቸው፥ ልጆችም ለአባቶቻቸው፥ ወንድሞችም ለወንድሞቻቸው፥ ዘመዶችም ለዘመዶቻቸው፥ ወዳጆችም ለወዳጆቻቸው መለመን ይችላሉን?” ³⁵እርሱም መለሰልኝ እንዲህም አለኝ፥ “በፊቴ ባለሟልነትን አግኝተሃልና ይህንም እነግርሃለሁ፦ የፍርድ ቀንስ ለአንድ ጊዜ ናት፤ በሁሉም ትእዛዝ ላይ የእውነት ማኅተምን ያሳያቸዋል። ³⁶ዛሬ አባት ልጁን ስለ እርሱ፥ ልጅም አባቱን፥ ጌታም አገልጋዩን፥ ወዳጅም ወዳጁን ስለ እርሱ ታሞ ይተኛ ዘንድ፥ በልቶና ጠጥቶም ደስ ይለው ዘንድ፥ ይፈወስም ዘንድ እንደማይልከው፥ ³⁷እንደዚሁ አንዱ ለሌላው መለመን ፈጽሞ የሚችል ማንም የለም፤ የራሱንም ሸክም በባልንጀራው ላይ የሚመልስ ማንም የለም። ሁሉም ዋጋውን ያገኛልና፥ ሥራውም የየራሱ ነውና።” ³⁸እኔም መለስሁለት እንዲህም አልሁት፥ “ቀድሞ አብርሃም ስለ ሰዶምና ገሞራ፥ ሙሴም በምድረ በዳ በበደሉ ጊዜ ስለ አባቶቻችን እንደ ለመነ ዛሬ እንዴት አገኘን? ³⁹ኢያሱ በአካን ዘመን ስለ እስራኤል፥ ሳሙኤልም በሳኦል ዘመን፥ ⁴⁰ዳዊትም ስለ ቸነፈር፥ ሰሎሞንም ስለ ቤተ መቅደስ፥ ኤልያስም ስለ ዝናምና ስለ ሙታን ይድኑ ዘንድ፥ ⁴¹ሕዝቅያስም በሰናክሬም ዘመን ለሕዝቡ፥ ብዙ ሰዎችም ስለ ብዙዎች ለመኑ። ⁴²እንግዲህ ዛሬ መዋቲው በሕይወት ሳለ፥ ኀጢአትም በዝታ ሳለች ጻድቃን ስለ ኃጥኣን ከለመኑ ያንጊዜስ እንደዚሁ እንደ ምን አይሆንም?” ⁴³እርሱም መለሰልኝ፤ እንዲህም አለኝ፥ “የዚህ የዛሬው ዓለም ፍጻሜው ገና አልሆነምና፤ የእግዚአብሔርም ክብር በውስጡ ለዘለዓለም ተገልጦ የሚኖር አይደለምና-። ስለዚህም ጽኑዓን ለድኩማን ለመኑ። ⁴⁴የፍርድ ቀንስ የዚህ ዓለም መጨረሻ ናት፤ መዋቲው ያልፍ ዘንድ፥ የማያልፈውም ይተካ ዘንድ፥ ለሚመጣው ዓለም መጀመሪያ ናት። ⁴⁵ከዚህ በኋላ ድካም ይሻራል፤ ጠብም ይጠፋል፤ ጽድቅም ታብባለች፤ ቅንነት ትጸናለች። ⁴⁶ያንጊዜ በፍርድ ድል የተነሣ ሰውን ይቅር ማለት የሚቻለው የለም፤ ድል የነሣውንም መከራ ሊያጸናበት የሚችል የለም።” ⁴⁷እኔም መለስሁለት፤ እንዲህም አልሁት፥ “ቃሌ እንደ ቀደመው ነው፤ አሁንም እንዲህ እላለሁ፦ ምድር አዳምን ባታስገኘው በተሻለ ነበር፤ ከአስገኘችውም እንዳይበድል ባስተማረችው ነበር። ⁴⁸ሁላችን የምንኖረው ሕይወት ምን ይጠቅመናል? በኀዘን እንኖራለንና፤ ከሞትንም በኋላ ዳግመኛ ፍርድ ይቈየናልና። ⁴⁹አዳም ሆይ! ምን አደረግንህ? አንተ ባትበድል ይህች መከራ በእኛ ላይ ባልመጣችብን ነበር። ⁵⁰ተስፋ ያስደረግኸን፥ ሞት የሌለበት የሚመጣው ዓለም ምን ይጠቅመናል? እኛ ግን ሞትን የሚያመጣ ሥራን ሠራን። ⁵¹የነገሩንን በጎውን ተስፋ አልሠራንም፤ እኛ ግን ክፉ ሥራን ሠራን። ዐመፅንም ተከተልን። ⁵²ኀዘንና ደዌ የሌለባቸውን፥ ለእኛ የተዘጋጁትን ቤቶች አልተከተልንም። እኛ ግን ኀጢአትን ሠራን። ⁵³ያጸናቸው ዘንድ መከራ የተቀበሉ ጻድቃን የልዑልን ጌትነት ያዩ ዘንድ አላቸውና፤ እኛ ግን በበደላችን ኖርን። ⁵⁴ፍሬው የማይጠወልግ ገነት ይገለጣልና፥ በውስጡም የሚገኘው ፍሬ ደስታና ሕይወት ነውና። ⁵⁵እኛ ግን አንገባም፤ የማንመሰገንበትን ሥራ እንሠራለንና። ⁵⁶ትዕግሥትን ያጸኗት ፊታቸው ይበራልና፥ የእኛ ፊት ግን ከጨለማ ይልቅ ይጠቍራል። ⁵⁷እነሆ፥ ከሞትን በኋላ በእኛ ላይ ምን እንዳለ ሳናውቅ እንኖራለን።” ⁵⁸መልአኩም መለሰልኝ እንዲህም አለኝ፥ “በዚህ ዓለም ለሚጋደል፥ በምድር ለተወለደ ሰው የታሰበለት ይህ ነው። ⁵⁹ድል ያደረገ እኔ ያልሁትን ያገኛል፤ ድል የተነሣ ግን አንተ ያልኸውን ያገኛል። ⁶⁰ትድኑ ዘንድ ሕይወትን ምረጧት ብሎ ሙሴ ለሕዝቡ የነገራቸው መንገድ ይህች ናት። ነገር ግን እርሱን አልተቀበሉትም፤ ከእርሱም በኋላ ነቢያትን የተናገርኋቸው እኔንም አልተቀበሉም። ⁶¹በሚያምኑ ሰዎች ደስታ እንዳለ በሚጠፉት ሰዎች ኀዘን የለም።” ⁶²እኔም መለስሁለት እንዲህም አልሁት፥ “አቤቱ፥ ምንጊዜም እንደ ኢምንት የሆኑትን ይቅር ባላቸው ጊዜ ልዑል ዛሬ ይቅር ባይ እንዲባል ፈጽሜ አውቃለሁ። ⁶³ይቅር ባይ ነው፤ ወደ ሕጉ የተመለሱትን ይቅር ይላቸዋልና። ⁶⁴ታጋሽም ነው፤ የበደሉትን ሰዎች እንደ ልጆች ይታገሣቸዋልና። ⁶⁵ለጋስም ነው፤ እንደ ሥራቸው እንደሚገባቸው መጠን ለነገርሁህ ሰዎች ይሰጣቸዋልና። ⁶⁶ምሕረቱም የበዛ ነው፤ ላሉት፥ ለሚታዘዙትም፥ ይመሰገኑ ዘንድ ላላቸውም ቸርነቱን ፈጽሞ ያበዛልና። ⁶⁷ቸርነቱን ፈጽሞ ካላበዛ ይህ ዓለም ባልኖረ ነበርና፥ በእርሱም ያሉ ባልኖሩ ነበርና። ⁶⁸ለጋስም ነው፤ ኃጥኣን ከኀጢአታቸው ይመለሱ ዘንድ ከቸርነቱ ካልሰጣቸው ሰው ሁሉ ባልዳነ ነበርና። ⁶⁹ፈራጅም ነው፤ እርሱ የፈጠረውን ፍጥረት ካልጠበቀ የከሓድያን ብዛታቸው ይጠፋልና፤ ከቍጥራቸውም ብዛት አይቀርምና። ያም ባይሆን በጣም ጥቂት ነው።”

መጽሐፈ ዕዝራ ሱቱኤል 6

ለዕዝራ ጥያቄ የተሰጠ መልስ

ከፍርድ በፊት ያለ የሙታን ሁኔታ