2 Maccabees Chapter 8 - መጽሐፈ መቃብያን ካልእ | EOTC Bible

¹በትዕቢትና በልብ ተንኰል ሄደ። ²በመንግሥቱም ዳንኤል እንዳየው ብረት ፅኑ ተብሏልና በዙሪያው ያሉ የአሕዛብ ሀገሮችን ዞረ። ³በስንፍናና በክፋት ሁሉ፥ በሁከትም ይኖራል። ⁴ቀድሞም የተናገርነውን ይሰብራል፥ ያደቅቃል፤ ይበላልም። ⁵አንገቱን እንደ አደነደነ እንደ አባቱ እንደ ዲያብሎስም መርዝ የሚተፋ ነውና የቀረውን በእግሩ ይረግጣል። ⁶እግዚአብሔርንም ፈጣሪው እንደ ሆነ አያውቀውም፤ ነገር ግን ዘመኔ እንደ ሰማይ ዘመን ሆነ ይላል። ⁷በልቡናውም ፀሐይ ከእርሱ እንደሚወጣ ያስባል። ⁸በኀይልም ይነሣል፤ በዛብሎን ዕጣ ይሰፍራል፤ በመቄዶንያም ሰልፍን ያስነሣል፤ ከሰማርያም ቀለቡን ይቀበላል፤ ከሶርያም እጅ መንሻን ይሰጡታል። ⁹በዘላኖች አውራጃ ይሰፍራል፤ እስከ ሲዶናም ይደርሳል፤ በአካይያም ግብርን ይጥላል፤ እስከ ፈሳሹ ባሕርም ድረስ አንገቱን ከፍ ከፍ ያደርጋል፤ ተመልሶም እስከ ሕንደኬ ባሕር ድረስ መልእክቱን ይልካል። ¹⁰እንዲሁም አንገቱን እስከ ሰማይ ድረስ ከፍ ከፍ ያደርጋል። ¹¹በመታበይና በክፋት ጸንቶ ይኖራል እንጂ ራሱን ማዋረድ የለውም። ¹²መንገዱም ሁሉ ወደ ጨለማና ወደ ድጥ፥ ወደ ወንጀልና ወደ መታበይም፥ ደም ወደ ማፍሰስና ወደ መከራም ነው። ¹³መንገዱ ሁሉ እግዚአብሔር የሚጠላው ነው፤ የቅሚያና የክፋት፥ የኀጢአትም መምህር ሰብላንዮስ እንደ አስተማረው ያደርጋል፤ ድሃአደጉንም ያስጮሃል፤ ለድሃም አይራራም። ¹⁴የአሕዛብንም ነገሥታት በእጁ አግብቶ ገደላቸው። ¹⁵የጠላቶች አለቆችንም ገዛ፤ ብዙ አሕዛብንም ገዛ፤ እንደ ወደደም አስገበራቸው። ¹⁶ምሕረትም አላደረገም፤ ከተርሴስ ባሕር ጀምሮ እስከ ኢያሪኮ ባሕር ድረስ ያልነጠቀው የለም። ¹⁷ለጣዖትም ይሰግድ ነበር፤ ሙቶ ያደረውንና ደሙን፥ አባላ የተመታውንና ለጣዖቶች የተሠዋውን ይበላ ነበር፤ በሥራውም ሁሉ ያለ ፍርድ ፍጹም ቍጣና ክርክር ነበር እንጂ ፍርድ አልነበረውም። ከሥልጣኑ በታች ላሉ አሕዛብም የሚያስደነግጥ ሆኗልና እንደ ወደደ ግብርን ያስገብራቸው ነበር። ¹⁸በፊቱ የወደደውን ሁሉ ያደርጋልና በፊቱ እግዚአብሔርን መፍራት አልነበረውም፤ በፈጣሪው በእግዚአብሔርም ፊት በተንኰል ይኖር ነበር። ¹⁹እንደ ፈጣሪውም አያደርገውም ነበር። እግዚአብሔርም ተቈጥቶ በያዘው ጊዜ በባልንጀራው ላይ ክፉ ነገርን እንደ አደረገ ፍዳውን ይከፍለዋል። ²⁰እግዚአብሔር ከዚህ ዓለም ስም አጠራራቸውን አጠፋ ዘንድ በትእዛዜ የማይኖሩ ትዕቢተኞችን እኔ ተበቅዬ አጠፋቸዋለሁ ብሏልና፥ ከእርሱ አስቀድሞ የነበሩ ኃጥኣንን እንዳጠፋቸው በጊዜው ይበቀለዋል። ²¹ክፉዎችም ክፉ እንደ አደረጉ ፍዳቸውን ይቀበላሉ። ²²በጎ አድራጊዎችን ግን በጎነት ከእግዚአብሔር ዘንድ ትከተላቸዋለች። ²³ኢያሱ አምስቱን የከነዓን ነገሥታትን በአንዲት ቀን በአንዲት ዋሻ እንደ አጠፋቸው፥ ሠራዊቶቻቸውንም ያጠፋቸው ዘንድ በጸሎቱ ፀሐይን በገባዖን እንደ አቆመ፥ የኤዌዎንንና የከናኔዎንን፥ የፌርዜዎንንና የኬጤዎንን፥ የኢያቡሴዎንንም ሠራዊት እስኪያጠፋቸው ድረስ ፀሐይ በሰማይ መካከል ቆሟልና በአንድ ጊዜ ሃያ ሺህ ያህል ሰውም እንደ ገደለ፥ እነርሱንም እንደ ገደላቸው፥ እግር ከአንገትም አድርጎ እንደ አሰራቸው፥ በዋሻም በጦር እንደ ገደላቸው፥ ደንጊያም እንደ ገጠመባቸው፥ ²⁴በክፉ ሥራቸው እግዚአብሔርን የሚያሳዝኑትንም ሰዎች እንደዚህ ያለ መከራ ያገኛቸዋል።

መጽሐፈ መቃብያን ካልእ 8