2 Maccabees Chapter 11 - መጽሐፈ መቃብያን ካልእ | EOTC Bible

¹የእግዚአብሔርን ሰው ሙሴን አስበው፤ በጸሎቱና በትሕትናው ይህን ያህል ሕዝቡን ሲጠብቅ አልተበሳጨም፥ አላጠፋምም፤ ነገር ግን ላሙትና እግዚአብሔርም በአንድ ጊዜ ያጠፋቸው ዘንድ ለወደደ ለወንድሙና ለእኅቱ በየዋህነቱ በእግዚአብሔር ዘንድ ኀጢአታቸውን እንዲህ ሲል አስተሰረየላቸው፥ “አቤቱ ወገኖችህ በፊትህ በድለዋልና ወገኖችህን ይቅር በል፤ ቸልም አትበል፥ ²በፊትህ በድያለሁና ኀጢአተኛ የምሆን እኔን ባርያህን ይቅር በለኝ፤ አንተ መሓሪ ነህና፥ ይቅር ባይም ነህና ለእነርሱም አስተስርይላቸው።” ³እንደዚህም ሙሴ ለአሙት አስተሰረየላቸው። ⁴ስለዚህም የዋህ ተባለ። ⁵እግዚአብሔርም ከወንድሞቹ ከሌዋውያኑ ልጆች ሁሉ ይልቅ እጅግ ወደደው፤ ካህናቱንም ይሾማቸዋልና በእነርሱ ዘንድ እንደ እግዚአብሔር አስመሰለው። ⁶የተደፋፈሩ የቆሬን ልጆች ግን በምድር በታች አሰጠማቸው፤ በሥጋና በነፍስ ሕያዋን ሳሉ ከከብቶቻቸውና ከድንኳኖቻቸው ጋራ ወደ ሲኦል አወረዳቸው፤ ፈጣሪው እግዚአብሔርን ወድዶታልና ከትእዛዙም አልወጣምና የተናገረው ቃል ሁሉ እንደ እግዚአብሔር ቃል ይደረግለት ነበር። ⁷አንተም እንዲሁ የእግዚአብሔርን ትእዛዝ ባትተላለፍ እግዚአብሔር ፈቃድህን ያደርግልሃል፤ ነገርህንም ይወድልሃል፤ መንግሥትህንም ይጠብቅልሃል። ⁸ከሙሴ ትእዛዝ የወጡ የቆሬና የአሳፍ ልጆችም ለእግዚአብሔር ልቡናችሁን አቅኑ ስላላቸው በእርሱ አንጐራጐሩ። ⁹“እኛስ በምስክሩ ድንኳን የክህነት ሥራ የምንሠራ የሌዊ ልጆች አይደለንምን?” አሉት። ¹⁰ያጥኑም ዘንድ ጥናቸውን ያዙ፤ ሄደውም አጠኑ፤ እግዚአብሔር ግን ጸሎታቸውን አልተቀበለም፤ በጥናቸው እሳትም ተቃጠሉ፤ በእሳት እንደሚቀልጥ ሰምም ቀለጡ፤ ከእነርሱም አንድ ሰው ስንኳ አልቀረም፤ “በሰውነታቸው መቃጠል ጥናቸው ከብሯል” ብሏልና በእግዚአብሔር ትእዛዝ ወደ እግዚአብሔር ማደሪያ ከገቡት ከጥናቸው በቀር ልብሶቻቸውና አጥንቶቻቸው አልቀሩም። ¹¹ስለዚህም እግዚአብሔር ሙሴንና አሮንን እንዲህ አላቸው፥ “ጥናቸውን ወደ ድንኳን ሰብስቡ፤ ከውጭ ጀምሮ እስከ ውስጥ ድረስ ሁሉን ላዘጋጀሁለት ለቤቴ መሣሪያ ይሁን።” ¹²የተቀደሰች የድንኳንዋንም መሣሪያ አዘጋጀ፤ መክደኛውንና ቀለበቱን፥ የኪሩቤልን ሥዕልና ባሕሩን አዘጋጀ። ¹³ሰኑንና መጋረጃውን፥ ስክተቱንና የድንኳኑን ዙሪያ ዕድሞ፥ ጋኖችንና በምስክሩ ድንኳን የሚሠዉበት መሠዊያውን ሠራ። ¹⁴የፈቃዱን መሥዋዕትና የሰላሙን መሥዋዕት፥ የስእለቱንና የኀጢአቱን መሥዋዕት፥ የማታውንና የጧቱንም መሥዋዕት ሠዉ። ¹⁵ሥራ ይሠሩባት ዘንድ በምስክሩ ድንኳን ለሙሴ ያዘዘውን ሁሉ አዘዛቸው። ¹⁶ማርና ወተትን የምታስገኝ፥ ለአብርሃም የማለለትን፥ ያባቶቻቸውን ርስት ይሰጣቸው ዘንድ ተስፋ በሰጣቸው በፈጣሪያቸው በእግዚአብሔር በሕጉ ድንኳን ውስጥ ስሙ በእነርሱ ይመሰገን ዘንድ ለአምላካቸው መገዛትን አላቃለሉም። ¹⁷ለይስሐቅ ማለለት፤ ለያዕቆብም አምልኮቱን አጸናለት። ¹⁸በምስክሩ ድንኳንም ለሙሴና ለአሮን አጸናላቸው፥ ¹⁹በኢየሩሳሌም በድንኳኑና ሰሎሞን በሠራው ቤተ መቅደስ የእግዚአብሔር ማደሪያ፥ የልዑልም የስሙ ማረፊያ፥ የእስራኤልም ቅዱስ ማደሪያ እስኪሆን ድረስ ለሳሙኤልና ለኤልያስ አምልኮቱን አጸናላቸው። ²⁰በየዋህነት ለሚኖሩ ለካህናቱ የሚገለጥባት መለመኛና የኀጢአት ማስተስረያ ናትና። ²¹ፈቃዱንም ለሚያደርጉ ሰዎች ልመናቸውን የሚሰማባት ቦታ ናት። ²²የእስራኤልም ቅዱስ የእግዚአብሔር ሕጉ የሚሠራባት ናትና። ²³ለእስራኤል ቅዱስ ለእግዚአብሔር በጎ መዓዛ ሊሆን መሥዋዕት የሚሠዋባት፥ ዕጣንም የሚታጠንባት ናትና። ²⁴በምስክሩ ድንኳን ውስጥም ይቅር በሚልበት በመክደኛው ላይ ሆኖ ይናገር ነበር፤ ለመረጣቸው ለያዕቆብ ልጆች፥ በእግዚአብሔር በሕጉና በትእዛዙ ጸንተው ለሚኖሩ ለቅዱሳኑም የእግዚአብሔር ብርሃኑ ይገለጥላቸው ነበር። ²⁵የሚገዳደሩ ግን ምድር እንዳሰጠመቻቸው እንደ ቆሬ ልጆች ይሆናሉ፤ እንዲሁም ኃጥኣን እስከ ዘለዓለም ድረስ መውጫ ወደሌላት ወደ ገሃነም እሳት ይገቡ ዘንድ አላቸው።

መጽሐፈ መቃብያን ካልእ 11