2 Maccabees Chapter 10 - መጽሐፈ መቃብያን ካልእ | EOTC Bible

¹እናንተም ነገሥታቱና መኳንንቱ በሰይጣን ጎዳና አትሂዱ። ነገር ግን የፈጠራችሁን፥ እስከ ዛሬም ድረስ የጠበቃችሁን እግዚአብሔርን ፍሩት። ²ሁሉንም በሚገዛ በእግዚአብሔር ሕግና ትእዛዝ ጸንታችሁ ኑሩ። ³የእስራኤል ልጆች የኬጤዎንንና የከናኔዎንን፥ የፌርዜዎንንም ሀገር ይወርሱ ዘንድ ወደ አማሌቅ በመጡ ጊዜ የሴፎር ልጅ ባላቅ፥ ⁴በለዓምን፥ “አንተ የረገምኸው የተረገመ፥ የመረቅኸውም የተመረቀ ነውና ትረግምልኝ ዘንድ ና፤ እኔም የሚያከብርህን ብዙ ወርቅና ብር እሰጥሃለሁ” ብሎታልና። ⁵በለዓምም የጥንቆላውን ዋጋ ተስፋ አድርጎ መጣ፤ የሴፎር ልጅ ባላቅም የእስራኤል ልጆች የሰፈሩበትን ቦታ አሳየው፤ ⁶ሟርቱንም አደረገ፤ መሥዋዕቱንም ሠዋ፤ የሰቡትንም ላሞችንና በጎችን አረደ፤ የእስራኤልንም ልጆች ይረግማቸው ዘንድ ወደደ። ⁷እግዚአብሔር ግን ይረግማቸው ዘንድ አልወደደም፤ ርግማንን ወደ ምርቃት በቃሉ መለሳት እንጂ። ⁸እንዲህም አለ፥ “አንተ እግዚአብሔር የመረጠው ሕዝብ ነህና፥ ከሰማይ የሚመጣ የፍቁር ማደሪያም ነህና የሚመርቁህ የተመረቁ ይሁኑ፤ የሚረግሙህም የተረገሙ ይሁኑ” አለ። ⁹ከዚህም በኋላ በፊቱ በመረቃቸው ጊዜ የሴፎር ልጅ ባላቅ አዘነ፤ ፈጽሞም ተቈጣ፤ ይረግማቸውም ዘንድ አዘዘ። ¹⁰በለዓምም፥ “እግዚአብሔር የመረቀው ወገን ወደዚህ ሀገር መጥትዋልና እግዚአብሔር የመረቃቸውን እኔ አልረግምም” አለው። ¹¹የሴፎር ልጅ ባላቅም በለዓምን አለው፥ “እኔ ትረግምልኝ ዘንድ ወድጄ ነበር፤ አንተ ግን አልረገምኻቸውም፤ በፊቴም ፈጽመህ መረቅኻቸው፤ አንተም ብትረግምልኝና ስጠኝ ብትለኝ እኔ ቤት ሙሉ ወርቅና ብር በሰጠሁህ ነበር፤ አንተ ግን ፈጽመህ መረቅኻቸው፤ ለእኔም በጎ አላደረግህም፤ እኔም ለአንተ በጎ ነገር አላደርግም።” ¹²በለዓምም፥ “እግዚአብሔር በአንደበቴ ያደረገውን ቃል እርሱን እናገራለሁ እንጂ እኔስ የእግዚአብሔርን ቃል ቸል ማለትና መተላለፍ አልችልም። ¹³እኔስ ከነፍሴ ገንዘብን አልወድድም፤ ገንዘብን ብወድ የተመረቀ ወገንን እንዳልረግም እግዚአብሔር ይቈጣኛልና” አለ። ¹⁴እግዚአብሔር አባታቸው ያዕቆብን፥ “የሚመርቁህ የተመረቁ ይሁኑ፤ የሚረግሙህም የተረገሙ ይሁኑ” ብሎታልና፤ ¹⁵የሚመርቅህም ሁሉ የተመረቀ ነው፤ ያለ ፍርድም የሚረግምህ የተረገመ ነው፤ እግዚአብሔር አንተን ይወድህ ዘንድ ጎዳናህንና ሥራህን አከናውን። ¹⁶እግዚአብሔርንም በክፋታቸው እንዳሳዘኑት፥ እርሱም ቸል እንዳላቸው እንደ ቀደሙ ሰዎች አትሁን፤ በጥፋት ውኃም ያጠፋቸው አሉ። ¹⁷በጠላቶቻቸውም እጅ ያጠፋቸው አሉ፤ መከራ ያጸኑባቸው ክፉዎች ጠላቶችን አምጥቶ ነገሥቶቻቸውን ከካህናቶቻቸውና ከነቢያቶቻቸው ጋራ ማረኳቸው። ¹⁸ወደማያውቁት ወደ ባዕድ ሀገርም አደረሷቸው፤ ፈጽመውም ማረኳቸው፤ ገረፉአቸውም፤ ሀገራቸውንም አጠፉ። ¹⁹የቅድስቲቱን ከተማ አጥሯንና ቅጥሯን አፍርሰዋልና ኢየሩሳሌምን እንደ እርሻ አደረጓት። ²⁰ካህናቱም ተማረኩ፤ ሕጉም ፈረሰ፤ አርበኞችም በጦር ወደቁ። ²¹ባልቴቶችም ተማረኩ፤ ለሞቱ ባሎቻቸውም አላለቀሱም፤ ተማርከዋልና ለራሳቸው አለቀሱ፤ ²²ሕፃናትም አለቀሱ፤ ሽማግሎችም አፈሩ፤ የሽማግሌውንና የሽበታሙን ፊት አልራሩም። ²³ለቆንጆዎችና በሕግ ላሉም አልራሩም፤ በአገራቸው ያገኙትንም ሁሉ አጠፉ፤ ቤተ መቅደስን አስቀድሞ ያፈርስ ዘንድ በወደደ ጊዜ እግዚአብሔር ወገኖቹን ተቈጥትዋልና ወደማያውቁት ወደ ባዕድ ሀገር ማርከው ወሰዷቸው። ²⁴ስለዚህም እግዚአብሔር የእስራኤልን ልጆች ቸል ባላቸው ጊዜ እግዚአብሔር ኢየሩሳሌምን እንደ እርሻ እንድትታረስ አደረጋት፤ ሁልጊዜ ፈጣሪያቸውን ያሳዝኑታልና። ²⁵እርሱ ግን በምንም አንድ ጊዜ አላጠፋቸውም፤ ስለ አባቶቻቸው ይራራላቸዋልና የሚራራላቸው ስለ ራሳቸው አይደለም። በእውነት የነገሡ፥ በፈጣሪያቸውም ፊት በቀና ሕግ ጸንተው የኖሩ አባቶቻቸውን አብርሃምንና ይስሐቅን ያዕቆብንም ይወዳቸዋልና ነው እንጂ። ²⁶እርሱም እጥፍ በሆነ ክብር ላይ ሾማቸው፤ በሰማይና በምድር ያለ ሁለት መንግሥትንም አገኙ። ²⁷እንዲሁም በሚያልፍ በዚህ ዓለም የምትኖሩ እናንተ ነገሥታቱና መኳንንቱ በሚገባ ሥራ ጸንተው የኖሩ ከእናንተ አስቀድሞ የነበሩ አባቶቻችሁ መንግሥተ ሰማያትን እንደ ወረሱ፥ ስማቸው ለልጅ ልጅ ያማረ እንደ ሆነ አስቧቸው። ²⁸አንተም መንግሥትህን ያቀናልህ ዘንድ መልካም አኑዋኑዋራቸው እግዚአብሔርን እንዳገለገሉት ከአንተ አስቀድሞ እንደ ነበሩ እንደ ደጋጎች ነገሥታት ስምህን መልካም ያደርግልህ ዘንድ ሥራህን አቅና።

መጽሐፈ መቃብያን ካልእ 10