1 Maccabees Chapter 8 - መጽሐፈ መቃብያን ቀዳማዊ | EOTC Bible

¹“ስለ ሙታን ትንሣኤም ስማኝ ልንገርህ፤ ዛፎች ይተከላሉ፤ ቅርንጫፎችንም ያወጣሉ፤ ወይንም ሐረግ ያወጣል፤ እግዚአብሔር ፍሬውን ካለመኖር ያመጣዋልና ከእርሱ የወይን ጠጅ ይጥላሉ። ²እስኪ ተመልከት፤ ያች የተከልሃት ዛፍ ታናሽ ነበረች። ዛሬ ግን ጫፎችን፥ ቅጠልንና ፍሬን አውጥታለች። ³እግዚአብሔርም ከሁለት ጡቶች ከውኃና ከመሬት ሥርዋን ያጠጣል። ⁴እንጨቶችዋን ግን ከነፋስና ከፀሐይ ይመግባቸዋል፤ ሥር ለቅጠል ውኃ ታጠጣለች፤ መሬትም ለእንጨቶች ጽናትን ትሰጣለች። ⁵እግዚአብሔር የፈጠረው ነፋስም በመካከላቸው ፍሬን ይሰጣል። የሞቱ ሰዎችም ትንሣኤ እንደዚሁ ነው። ⁶“ነፍስ ከሥጋ በተለየች ጊዜ እየራሱ ሂዷልና ከውኃና ከመሬት፥ ከእሳትና ከነፋስ፥ ከአራቱ ማዕዘናት ነፍሳትን ሰብስብ አለ። ⁷የመሬት ባሕርይ ግን በራስዋ ጸናች፤ ዐመድም ሆነች፤ የውኃ ባሕርይም በራሷ ጸናች፤ ጠልም ሆነች። ⁸የነፋስ ባሕርይም በራስዋ ጸናች፤ ነፋስም ሆነች፤ የእሳት ባሕርይም በራስዋ ጸናች፤ የሚሞቅ እሳትም ሆነች። ⁹እግዚአብሔር የፈጠራት ነፍስ ግን ወደ ፈጣሪዋ እጅ ተመለሰች፤ በወደደም ጊዜ ይመልሳታልና በወደደው ቦታ ያኖራታል። ¹⁰የጻድቃንን ነፍሳት በብርሃን ቤት ያኖራቸዋል፤ የኃጥኣንን ነፍሳት ግን ያወጣቸው ዘንድ እስከ ወደደበት ጊዜ ድረስ በጨለማ ቤት ያኖራቸዋል። ¹¹“ነቢዩ ሕዝቅኤልንም እንዲህ አለው፦ ይሰበሰቡና አንድ አካል ይሆኑ ዘንድ ከአራቱ ማዕዘን ጥራ። ¹²እንዲህም ብሎ ባንድ ቃል በተናገረ ጊዜ ከአራቱ ማዕዘን ተሰበሰቡ። ¹³የውኃ ባሕርይም ጠልን አመጣ፤ ዳግመኛም የእሳት ባሕርይ ሙቀትን አመጣ። ¹⁴የመሬት ባሕርይም ዳግመኛ መሬትን አመጣ፤ የነፋስ ባሕርይም እስትንፋስን አመጣ። ¹⁵እግዚአብሔርም ነፍስን ካኖረበት ከማደሪያዋ አመጣ፤ በአንድ ቃል ተሰበሰቡ፤ ትንሣኤም ሆነ። ¹⁶“ዳግመኛም በአንተ ዘንድ ያለ ምሳሌን አሳይሃለሁ፤ ቀኑ ይመሻል፤ ትተኛለህም፤ ሌሊቱ ይነጋል፤ ከመኝታህም ትነሣለህ፤ አንተ ግን በተኛህ ጊዜ የሞትህ ነህ። ¹⁷በነቃህም ጊዜ የትንሣኤ ምሳሌ ነው፤ ሌሊቱ ግን ሁለንተናው ጨለማ የሆነ የዚህ ዓለም ምሳሌ ነው። ዓለም ሁሉ ይተኛበታል፤ የሌሊት ጨለማ ሸፍኖአቸዋልና። ¹⁸ጨለማ የሚወገድበት፥ በዓለሙም ሁሉ ብርሃን የሚሆንበት፥ ሰውም ተነሥቶ ወደ ሥራው የሚሠማራበት የጧት ብርሃን ግን የሙታን ትንሣኤ ምሳሌ ነው። ¹⁹ይቺ የዓለም መታደስና የሙታን ትንሣኤ እንደዚህ ናት፤ ይህ ዓለም በዚህ ሌሊት አምሳል ኀላፊ ነውና። ²⁰“ዳዊትም ምሳሌውን በፀሐይ አኖረ ብሎ እንደ ተናገረ ፀሐይ በወጣና በአበራ ጊዜ የዚህ ዓለም ምሳሌው ነው። ²¹ዛሬ በዚህ ዓለም እንደሚያበራው ፀሐይ እርሱ እግዚአብሔር በሚመጣ ጊዜ ለሐዲሲቱ ዓለም ያበራላታል፤ እንደ ፀሐይ ያበራል፤ የማይጠልቅ ፀሐይ፥ የማይጠፋም ፋና እኔ ነኝ ብሏልና እርሱ እግዚአብሔር ብርሃንዋ ነው። ²²ዳግመኛም የሞቱትን ሰዎች እንደ ዐይን ጥቅሻ ያስነሣቸዋል፤ ዳግመኛም ከምትዘራው፥ አንተም በሕይወት ከምትኖርበት ከምግብህ አንዲት ምሳሌ አመጣልሃለሁ፤ የስንዴም ቅንጣት ቢሆን፥ የገብስም ቅንጣት ቢሆን፥ የምስርም ቅንጣት ቢሆን በምድር የሚዘራ የሰው ተግባር ሁሉ ካልፈረሰ የሚበቅል የለም። ²³እንደምታየው እንደ ሰው ሥጋ ሁሉ በሚፈርስበት ጊዜ ፍሬው ከገለባው ጋር በመሬት ይበላል። ²⁴ፍሬውም በተበላ ጊዜ የቅንጣት ሰባተኛ እጅ ያህል ሆኖ ይበቅላል፤ እግዚአብሔርም እንደ ወደደ የሕይወት ነፋስን ይሰጣል፤ ሥርም በምድር ውስጥ ትበቅላለች፤ ቅጠልንም በምድር ላይ ታወጣለች። ²⁵እስቲ ተመልከት፤ እርሷ ካልፈረሰች መብቀል አትችልም፤ ከበቀለች በኋላ ግን ብዙ ዝርዝር ታወጣለች። ²⁶ላደገው ለዚያ ለዝርዝሩም ከእግዚአብሔር ፍሬ ይሰጠዋል፤ ፍሬውንም ገለባ ያለብሰዋል። ²⁷የዘራኸው ዘር ቅንጣቱ እንደበዛ መጠን እይ እንጂ ቅጠሉ፥ ብርዑ፥ ገለባውና ምርቁ ግን አይቈጠርልህም። ²⁸“ሰነፍ አትሁን፤ ዘርህንም እንደ በዛ እይ፤ እንደዚሁም ሁሉ የሙታንን ትንሣኤ፥ እንደ ሥራቸውም እንደሚከፈላቸው አስብ። ²⁹ዳግመኛም ዘር ወደ ሌላ ዘር እንደማይለወጥ ስማኝ፤ ልንገርህ፤ ስንዴ ብትዘራ ገብስ ትሰበስባለህን? ከሙን ብትዘራ ተልባ ትሰበስባለህን? ³⁰ከተክልስ ወገን በለስ ብትተክል በውኑ ለውዝ ሆኖ ይበቅልልሃልን? ገውዝስ ብትተክል ወይን ሆኖ ይበቅልልሃልን። ³¹ጣፋጭ ፍሬ ብትተክል የመረረ ሆኖ ይበቅልልሃልን? የመረረውንስ ፍሬ ብትተክል የጣፈጠ ሆኖ ይበቅልልሃልን። ³²እንደዚሁስ ሁሉ ኀጢአተኛ ቢሞት በትንሣኤ ጊዜ ጻድቅ መሆን ይችላልን? ጻድቅስ ቢሞት በትንሣኤ ጊዜ ኃጥእ መሆን ይችላልን? ሁሉም እንደ ሥራው ይከፈለዋል፤ እንደ ሥራው ፍሬ፥ እንደ እጁም ሥራ ይከፈለዋል እንጂ፥ በሌላ ኀጢአት የሚፈረድበት የለም። ³³የሊባኖስ ዛፍ ይተከላል፤ ረጃጅምና ታላላቅ ቅርንጫፎችንም ያወጣል፤ ይደርቅና ይረግፋል እንጂ፥ የአርሞንኤም ጠል ካልዘነመበት ቅጠሉ አይለመልምም። ³⁴ዝግባውም የክረምት ዝናም በእርሱ ካልወረደ ከሥሩ ይነቀላል። ³⁵እንደዚሁም ሁሉ ከእግዚአብሔር የሕይወት ጠል ካልወረደላቸው ሙታን አይነሡም።

መጽሐፈ መቃብያን ቀዳማዊ 8