1 Maccabees Chapter 7 - መጽሐፈ መቃብያን ቀዳማዊ | EOTC Bible

¹“አንተ ንጉሥም ብትሆን፥ ገዥም ብትሆን አንተ ምንድን ነህ? የፈጠረህ እግዚአብሔር አይደለምን ²ፈቃዱን ታደርግ ዘንድ፥ በትእዛዙም ትሔድ ዘንድ፥ ፍርዱንም ትፈራ ዘንድ ካለመኖር ወደ መኖር አመጣህ፤ አንተ ባሮችህን እንደምትቈጣቸው፥ በላያቸውም እንደ ሠለጠንህ እንደዚሁም ሁሉ አንተንም የሚቈጣህ፥ በላይህም የሠለጠነ አለ። ³አንተ ኀጢአት የሠሩ ሰዎችን ያለ ርኅራኄ እንደምትመታ እንደዚሁም ሁሉ አንተንም የሚመታህ፥ እስከ ዘለዓለም ድረስ መውጫ ወደሌለበት ፍርድም የሚጨምርህ እግዚአብሔር አለ። ⁴ያልተገዛልህን፥ እጅ መንሻም ያላመጣልህን አንተ እንደምትገርፈው አንተ ለእግዚአብሔር ለምን እጅ መንሻ አታገባም? ⁵አንተን ይፈሩህ ዘንድ እንደምትወድ አምላክህን እግዚአብሔርን ለምን አትፈራውም? ሕዝቡንና መንጋውን በእውነት ትጠብቅ ዘንድ የፈጠረህና በፍጥረቱ ሁሉ ላይ ያነገሠህ እርሱ ነውና። ⁶“እግዚአብሔር እንደ ሾመህ በሚገባና በእውነት ፍረድ እንጂ ለታላቅና ለታናሽ ፊት አታድላ፤ ያለ እርሱ ማንን ትፈራለህ? መንገዱንና ትእዛዙን ጠብቅ። ⁷እሳትንና ውኃን አቀረብኩልህ፤ እጅህን ወደ ወደድኸው ጨምር ብሎ ሙሴ የእስራኤልን ልጆች እንዳዘዛቸው ወደ ቀኝም ወደ ግራም ፈቀቅ አትበል። ⁸ቃሉን ትሰማ ዘንድ፥ ትእዛዙንም ታደርግ ዘንድ የምነግርህን ቃሉን ስማ፤ በባሕር ማዶ፥ ወይም በጥልቁ ማዶ፥ ወይም በወንዙ ማዶ ቃሉ አለች፤ አያት ዘንድ፥ ቃሉንም እሰማ ዘንድ፥ የእግዚአብሔርንም ትእዛዙን አደርግ ዘንድ ማን ያመጣልኛል? እንዳትል፥ ⁹ዳግመኛም ሰምቼ አደርጋት ዘንድ ወደ ሰማይ ወጥቶ ያቺን የእግዚአብሔርን ቃል ማን ያወርድልኛል? እንዳትል እነሆ ቃሉ በአፍህ ቅርብ ነው። በእጅህም ውስጥ ነው። ¹⁰መጽሐፉንም ካልሰማኸው አምላክህ እግዚአብሔርን አልሰማኸውም፤ ቃሉንም ካልጠበቅህ እርሱን አልወደድኸውም፤ ትእዛዙንም አላደረግህም። ¹¹አንተም ትእዛዙን ካልወደድህ በእውነትም ትጠብቃቸው ዘንድ ከወገኖችህ ሁሉ ለይቶ ያከበረህንና ያገነነህን ፈቃድ ካላደረግህ ለዘለዓለም ወደ ፍርድ ትገባለህ። ¹²የፈጠረህን የአምላክህን ስም እንድታስብ በሕዝቡ ሁሉ ላይ የበላይና አለቃ አደረገህ። በእውነትና በሚገባም ወገኖቹን ትገዛ ዘንድ ሰጠህ ¹³አንተን ከበደሉህ ሰዎችም የምትቀጣቸው አሉ፤ የእግዚአብሔርን መንገድ እያሰብህ፥ ልቡናህንም እያቀናህና በሚገባ እየፈረድህ የምትምረውም አለ። ¹⁴በፊትህም በተከራከሩ ጊዜ ፊት አይተህ አታድላ፤ ምድር ሁለንተናዋ ያንተ ገንዘብ ናትና ኀጢአተኛውን ሰው ትምረው፥ ንጹሑንም ሰው ትበድለው ዘንድ መማለጃ አትቀበል። ¹⁵“ፈቃዱንም ካደረግህ በምድር ላይ ዕድሜህን ያበዛልሃል፤ ብታሳዝነው ግን ዕድሜህን ያሳንሰዋል። ¹⁶ከሞት እንደምትነሣ፥ በጎም ቢሆን፥ ክፉም ቢሆን በሠራኸው ሥራ ሁሉ በፊቱ ቁመህ እንደምትመረመር አስብ። ¹⁷በጎ ሥራ ብትሠራ በደጋግ ነገሥታት ማደሪያ በብርሃን ቤቶች ትኖራለህ። ክፉ ሥራ ብትሠራ ግን በክፉዎች ነገሥታት ማደሪያ ትኖራለህ። ¹⁸እግዚአብሔር የጌትነትህን ሥልጣን አያፍርም፤ አንተ ግን የመፈራትህን ገናንነት፥ የአርበኞችህንም ሽልማት፥ የተሰቀለ የጦር መሣሪያህንም ባየህ ጊዜ፥ ፈረሶችህንም፥ ከሥልጣንህ በታች ያሉ ጭፍሮችህንም፥ መለከት የሚነፉትንና በፊትህም በበገና የሚጫወቱትን ሰዎች በአየህ ጊዜ፥ ¹⁹አንተ ይኽንን ሁሉ በአየህ ጊዜ ሕሊናህን ከፍ ከፍ ታደርጋለህ፤ አንገትህንም ታደነድናለህ፤ ይኽን ሁሉ ክብር የሰጠህንም አታስበውም፤ ተው ባለህ ጊዜ አንተ የምትተወው አይደለህምን? ²⁰የሾመህን ሹመትም ፈጽመህ ቸል ብለሃልና ክብርህን ለሌላ ይሰጠዋል። ²¹ድንገት ሞት ይመጣብሃልና፥ በትንሣኤም ጊዜ ፍርድ ይደረጋልና፥ የሰውም ሥራ ሁሉ ይመረመራልና በዚያ ይመራመርሃል፤ ይቈጣጠርሃልም፤ ይፈርድብሃልም። ²²የምድርን ነገሥታትም የሚያከብራቸው የለም፤ እርሱ የእውነት ዳኛ ስለሆነ በፍርድ ጊዜ ድሃና ባለጸጋ በአንድነት ይቆማሉና። የምድር መኳንንት የሚመኩበት ዘውዳቸው ይወድቃል። ²³“ፍርድ የተዘጋጀ ነው፤ ነፍስም ትንቀጠቀጣለች፤ መጻሕፍትም ይገለጣሉ፤ የሰዎችም ሥራ ይገለጣል፤ የሚሰወርም የለም። ²⁴ሴት ለመውለድ በደረሰች ጊዜ፥ በሆዷም ያለ ፅንስ ለመወለድ በደረሰ ጊዜ ማኅፀኗን ለመከልከል እንደማትችል ምድር በሙታን ትንሣኤ ጊዜ በርሷ ላይ ያለ አደራዋን ትመልሳለች። ²⁵ወይስ ደመናዎች እግዚአብሔር ወዳዘዛቸው ቦታ ወስደው እንዳያዘንሙ ዝናምን መቋጠር ይችላሉን? እንደዚሁም የእግዚአብሔር ቃል ሁሉን ካለመኖር ወደ መኖር አምጥቶ ፈጥሮታልና፥ ዳግመኛም የእግዚአብሔር ቃል ሁሉን ወደ መቃብር አግብቶታልና የትንሣኤ ጊዜ ከደረሰ በኋላ የሞቱ ሰዎች እንዳይነሡ ማድረግ አይቻልም። ²⁶ዳግመኛም ከእግዚአብሔር አፍ በሚወጣ ቃል ነው እንጂ ሰው የሚድን በእህል ብቻ አይደለም ብሎ ሙሴን እንደ ተናገረ የእግዚአብሔር ቃል ሰውን ሁሉ ከመቃብር ያስነሣዋል። ²⁷እነሆ የሞቱ ሰዎች በእግዚአብሔር ቃል ሕያዋን እንደሚሆኑ ታወቀ። ²⁸ዳግመኛም ስለ ነገሥታትና መኳንንት፥ ፈቃዱንም ስለሚያደርጉ ሰዎች እግዚአብሔር በዳግም ሕግ እንዲህ አለ፦ የሚቈጠሩበት ቀን ደርሷልና በፍርድ ቀን እግራቸው በሚሰናከልበት ጊዜ እበቀላቸዋለሁ። ²⁹“ዳግመኛም የእግዚአብሔርን ፍርድ የማያውቁ ሰዎችን እግዚአብሔር እንዲህ አላቸው፦ እኔ እግዚአብሔር እንደ ሆንሁ ዕወቁ፤ እኔ እገድላለሁ፥ አድናለሁም። ³⁰እቀሥፋለሁ፤ ይቅርም እላለሁ፤ ወደ ሲኦል አወርዳለሁ፤ ዳግመኛም ወደ ሰማይ አወጣለሁ፤ ከእጄም የሚያመልጥ የለም። ³¹ሕጉን ስላልጠበቁ ነገሥታትና መኳንንት እግዚአብሔር እንዲህ አለ፦ ምድራዊ መንግሥት ኀላፊ ነውና፥ ከጧት እስከ ማታም ድረስ ያልፋልና ወደ ዘለዓለማዊው መንግሥቴ ትገቡ ዘንድ ሕጌንና ሥርዐቴን ጠብቁ። ³²የእግዚአብሔር ጥሪው ለክብርም፥ ለአሣርም ነውና ይህን ያዋርዳል፤ ያንም ያከብራል። ³³ፈቃዱን ያላደረገውን ይሽረዋል፤ ፈቃዱን ያደረገውንም ይሾመዋል።

መጽሐፈ መቃብያን ቀዳማዊ 7