1 Maccabees Chapter 5 - መጽሐፈ መቃብያን ቀዳማዊ | EOTC Bible

¹ረዓይታዊው ኮራ፤ እግዚአብሔርም፦ በአንዲት የወባ ትንኝ ከእግሩ ጀምሮ እስከ ራሱ ድረስ ሰውነቱ እንዲያብጥ አደረገው፤ በዚያችም ትንሽ የወባ ትንኝ ሞተ። ²ዳግመኛም ከኀይለኝነቱ ብዛት የተነሣ የብረት አልጋ ያሠራው ናምሩድ ኰራ፤ እርሱንም እግዚአብሔር አጠፋው። ³ዳግመኛም ናቡከደነጾር ኰራ፤ “ያለ እኔም ሌላ ንጉሥ የለም፤ በምድርም ላይ ፀሐይን የማወጣ እኔ ነኝ” አለ፤ ከትዕቢቱም ብዛት የተነሣ እንዲህ አለ። ⁴እግዚአብሔር ከሰው ለይቶ ሰባት ዓመት ወደ ምድረ በዳ ሰደደው፤ የፈጠረውም እግዚአብሔር እንደ ሆነ እስኪያውቅ ድረስ ዕድሉን ከምድረ በዳ አራዊትና ከሰማይ ወፎች ጋር አደረገ። ⁵ባወቀውም ጊዜ ዳግመኛ ወደ መንግሥቱ መለሰው፤ በፈጠረው በእግዚአብሔር ላይ ተደፋፍሮ የኰራ፥ መሬትም ያልሆነ ማን ነው? ⁶ሕጉንና ሥርዐቱንስ አፍርሶ መሬት ያልዋጠችው ማን ነው? ⁷“ጺሩጻይዳን አንተም በፈጣሪህ ላይ ትኰራ ዘንድ ትወድዳለህ፤ አንተንም ዳግመኛ ከትዕቢትህ የተነሣ እንደ እነርሱ ያጠፋህ ዘንድ፥ ወደ መቃብርም ያወርድህ ዘንድ አለህ። ⁸ዳግመኛም ጥርስ ማፋጨትና ልቅሶ ወዳለበት የጨለማ ፍጻሜ ወደ ሆነው ወደ ሲኦል፥ ከገቡም በኋላ ለዘለዓለም መውጫ ወደሌለበት ወደ ትልቁና ጥልቁ ጕድጓድ ያወርድህ ዘንድ አለህ። ⁹አንተስ እንደ አንተ እንደ ነበሩና የዚህን ዓለም ኑሮ እንደ ተዉ እንደ ትዕቢተኞች ነገሥታት ነገ የምትሞትና የምትፈርስ ነህ።” ¹⁰እኛስ እንዲህ እንላለን፥ “አንተ ሰው ነህ፤ እግዚአብሔርም አይደለህም፤ እግዚአብሔር ምድርንና ሰማይን የፈጠረ፥ አንተንም የፈጠረ ነውና፤ ¹¹እርሱም ትዕቢተኞችን ያወርዳቸዋል፤ የተዋረዱትንም ያከብራቸዋል፤ እርሱም ለደከሙት ብርታትን ይሰጣቸዋል፤ ለኀያላኑም ድካምን ይሰጣል። ¹²እርሱ ሕያዋንን ይገድላል፤ እርሱም በመቃብር ተቀብረው መሬት የሆኑትን ሙታን ያስነሣቸዋል። ¹³ባሮችንም ከኀጢአት ባርነት ወደ ሕይወት ነጻ ያወጣቸዋል። ¹⁴“ንጉሥ ጺሩጻይዳን ሆይ! ጥቅም በሌላቸው በረከሱ ጣዖቶችህ ለምን ትመካለህ? ¹⁵እግዚአብሔር ግን ሰማያትን ፈጠረ፤ ምድርንም መሠረተ፤ ታላቁንም ባሕር ፈጠረ፤ ፀሐይንና ጨረቃን ፈጠረ፤ ዘመኖችንና ዓመታትን አዘጋጀ። ¹⁶ሰውም ወደ እርሻው ይሰማራል፤ እስኪመሽም ድረስ ሲያርስ ይውላል፤ የሰማይ ከዋክብትም በቃሉ ጸንተው ይኖራሉ። ¹⁷ሁሉንም በየስማቸው ይጠራቸዋል፤ እግዚአብሔርም ሳያውቀው የሚደረግ ነገር የለም። ¹⁸እርሱም ያገለግሉት ዘንድ፥ የከበረ ስሙንም ያመሰግኑ ዘንድ የሰማይ መላእክትን አዘዘ፤ መላእክትም ሕይወትን ወደሚወርሱ ሰዎች ሁሉ ይላካሉ። ¹⁹መልአኩ ሩፋኤል ወደ ጦቢት ተላከ፤ ጦብያንም በራጉኤል ሀገር አዳነው። ²⁰ኤሎፍላውያንንም እንዲያጠፋቸው ያሳውቀው ዘንድ መልአክ ወደ ጌዴዎን ተላከ፤ እስራኤልንም የኤርትራን ባሕር ባሻገራቸው ጊዜ መልአክ ወደ ነቢዩ ሙሴ ተላከ። ²¹እንዲህ ብሏልና፦ እግዚአብሔር ብቻውን መራቸው፥ ከእነርሱም ጋር ሌላ አምላክ አልነበረም። ²²በምድር ላይ ወደአለ አዝመራም አወጣቸው። ²³የሁዳዱንም እህል መገባቸው፤ ፈጽሞ ወዷቸዋልና፥ ከዐለት ማርን መገባቸው። ²⁴“አንተንም በሕዝቡ ላይ አነገሠህ፤ ወገኖቹንም በሚገባ ፈጽመህ ትጠብቅ ዘንድ፥ የፈጠረህ የእግዚአብሔርንም ፈቃዱን ታደርግ ዘንድ በአራቱ መንግሥታት ላይ ሥልጣንን ሰጠህ። ²⁵ከሁሉም ከፍ ከፍ አድርጎ አንግሦሃልና ፈጣሪህ እግዚአብሔርን ትወደው ዘንድ ፈጽሞ አነገሠህ። ²⁶አንተም እንደ ወደደህ፥ በሕዝቡም ሁሉ ላይ እንዳመነህ ፈጣሪህ እግዚአብሔርን ፈጽመህ ትወድደው ዘንድ ይገባሃል፤ አንተም የእግዚአብሔርን ፈቃድ አድርግ፥ በምድር ሁሉ ዘመንህ ይበዛ ዘንድ፥ ከአንተም ጋር ይኖር ዘንድ፥ ²⁷በጠላቶችህም ላይ ይቆምልህ ዘንድ፥ በዙፋንህም ሁሉ ያስቀምጥህ ዘንድ፥ ክንፉንም በራስህ ላይ ይጋርድ ዘንድ። ²⁸ብታውቅስ እግዚአብሔር ሳኦልን የአባቱን አህዮች ሲጠብቅ ከእስራኤል ልጆች መርጦ በወገኖቹ በእስራኤል ላይ እንደ አነገሠው፥ ከነቢዩም ከሳሙኤል ጋር በዙፋን እንደ ተቀመጠ አንተን መረጠህ። ²⁹ከወንድሞቹም ለይቶ ከፍ ያለ ዕድልን ሰጠው፤ እንዲህም አለው፦ ከዛሬ ጀምሮ ወገኖቹን ትጠብቅ ዘንድ እግዚአብሔር በሕዝቡ ላይ አነገሠህ፤ ³⁰ትገድልና ታድን ዘንድም እግዚአብሔር በላያቸው ሾሞሃልና በጎ የሚሠሩትን በበጎ፥ ክፉ የሚሠሩትንም በክፉ ጠብቃቸው። ³¹እየገረፍህና እያዳንህም ቢሆን ፈቃዱን ታደርግ ዘንድ እግዚአብሔር አንተን በሁሉ ላይ ሾሞሃልና በጎ የሚሠሩትን በጎ ክፈላቸው፤ ክፉ የሚሠሩትንም ክፉ ክፈላቸው። ³²አንተ በሰማይ ያለ ሁሉን የሚገዛ የእግዚአብሔር ባሪያ ነህና፥ ባሰብኸው ሁሉ በፊቱ እየተገዛህ፥ በለመንኸውም ሁሉ ፈቃድህን ያደርግልህ ዘንድ አንተም በየጊዜውና በየሰዓቱ የእግዚአብሔርን ፈቃድ አድርግ። ³³“እርሱን የሚገዛው የለም፤ እርሱ ግን ሁሉን ይገዛል። ³⁴እርሱን የሚሾመው የለም፤ እርሱ ግን ሁሉን ይሾማል። ³⁵እርሱን የሚሽረው የለም፥ እርሱ ግን ሁሉን ይሽራል። ³⁶እርሱን የሚነቅፈው የለም፤ እርሱ ግን ሁሉን ይነቅፋል። ³⁷እርሱን የሚያተጋው የለም፤ እርሱ ግን ሁሉን ያተጋል፤ የሰማይና የምድር ሥልጣን የእርሱ ነውና ከእጁ የሚያመልጥ የለም፤ በእርሱ ዘንድ ሁሉ የተገለጠ ነው እንጂ ከዐይኑ የተሰወረ የለም። ³⁸ሁሉንም ያያል፤ እርሱን ግን የሚያየው የለም፤ ወደ እርሱ የሚጸልየውን ጸሎቱን ይሰማዋል፤ ጸሎቱንም ይቀበለዋል፤ ሰውን በአምሳሉና በአርኣያው ፈጥሮታልና። ³⁹ከማይጐድል መዝገቡም ሁሉን ይመግባል። ለዘለዓለም የሚኖር ንጉሥ ነውና።

መጽሐፈ መቃብያን ቀዳማዊ 5