1 Maccabees Chapter 21 - መጽሐፈ መቃብያን ቀዳማዊ | EOTC Bible

¹ዳዊት በእግዚአብሔር ተአመነ፤ በእርሱም አምኗልና መጠጊያ ሆነው፤ ከንጉሡ ከሳዖልም እጅ አዳነው። ²ልጁ አቤሴሎምም በተነሣበት ጊዜ፥ ኢሎፍላውያንም በተነሡበት ጊዜ፥ አማሌቃውያንና ኤዶማውያን፥ ቀርኒዎናውያንም በተነሡበት ጊዜ በእርሱ አምኗልና፥ ሕጉንም ጠብቋልና ከተቃወሙት ጠላቶቹ ሁሉ እግዚአብሔር ዳዊትን አዳነው። ³ያላመኑበትን ክፉ የሆኑ ነገሥታትን ግን እግዚአብሔር አላዳናቸውም፤ ድል መንሣት ከእግዚአብሔር ነውና በጠላቶቻቸው እጅ ድል ተነሡ እንጂ። ⁴ሕዝቅያስም በእግዚአብሔር አመነ፤ ከትዕቢተኛው ከአሶራዊውም እጅ አዳነው። ⁵ልጁ ምናሴ ግን እምነቱን በእግዚአብሔር አላደረገምና በጠላቱ እጅ ድል ተነሣ፤ ምናሴን ድል የነሡት እነዚያ ጠላቶቹም እንደ እርሱ አልሆኑም፤ መታመኑን በእግዚአብሔር አላደረገምና፥ ፈጽሞ ያከበረውና ያገነነው እግዚአብሔርንም አልፈራውምና አስረው ወደ ሀገራቸው ወሰዱት እንጂ፤ ⁶ዘመኑ ይበዛ ዘንድ፥ ጠላቱንም ይከራከርለት ዘንድ በኋላና በፊትም ኀይልንና ጽንዕን ይሆነው ዘንድ በፈጣሪው በእግዚአብሔር ዘንድ መንገዱን አላሣመረምና ከሰጠው ሀብት ከለከለው። ⁷በብዙ ሠራዊትና በፈረሶች፥ በቀስትና በጋሻም ከመታመን በእግዚአብሔር መታመን ይሻላልና። ⁸በእርሱም የታመነ ሰው በሕይወት ይኖራል፤ ይከብራል፤ ፈጽሞም ከፍ ከፍ ይላል። ⁹እግዚአብሔር ለፊት አያዳላምና በእግዚአብሔር ያላመኑና፥ በገንዘባቸው ብዛት ያመኑ ሰዎች ግን ከሰጣቸው ጸጋና ክብር የወጡ ይሆናሉ። ¹⁰ያመኑበትን ግን ይጠብቃቸዋል፤ ዐላዋቂ የሚሉትን ሰዎች ግን ዐላዋቂዎች ያደርጋቸዋል፤ እግዚአብሔርንም ለመከተል፥ ሕጉንም ለመጠበቅ ልቡናቸውን አላስጨከኑምና በመከራቸው ጊዜና ጠላቶቻቸው በተቃወሙአቸው ጊዜ ፈጥኖ አይረዳቸውም። ¹¹እግዚአብሔርን በመከተል ትእዛዙንና ሕጉን ለመጠበቅ ለጨከነ ግን በመከራው ጊዜ መጠጊያ ይሆነዋል። ¹²ጠላቱን በመግደልና የጠላቱን ከብት በመማረክ፥ የጠላቱን ሀገር ሰውም በመማረክ፥ የዘመናት ዝናምን በማዝነም፥ በቡቃያውም ፍሬ፥ ክምርንም በማግባት፥ በተክሉ ቦታው ፍሬም፥ ¹³በሳተኑና በበልጉም ፍሬ፥ ሣሩንና ልምላሜውን በመስጠት፥ ከእጁ በታች ያሉ ወገኖቹም ደስ ይላቸው ዘንድ የተለያዩ ፍሬዎችን በመስጠት ደስ ያሰኘዋል። ¹⁴የሌላውን ድካም ይበሉ ዘንድ፥ ከጠላታቸውም በዘረፉት ገንዘብ ይጠግቡ ዘንድ፥ እንስሳትን፥ በጎችንና ላሞችንም ይዘርፉ ዘንድ፥ የሌላውንም ማዕድ ይበሉና ይለብሱ ዘንድ፥ የጠላቶቻቸውንም ልጆች ምርኮ ይወስዱ ዘንድ ደስ ያሰኘዋል። ¹⁵እግዚአብሔርም ይህን ሁሉ ለሚወድደው ያደርግለታል፤ የሚጠላውን ግን ለጠላቱ ብዝበዛ ያደርገዋል። ¹⁶እጁንና እግሩን ያስረዋል፤ በጠላቱም እጅ ይጥለዋል፤ ለጠላቶቹም መዘባበቻ ያደርገዋል፤ የእግዚአብሔርንም ሕግ ያፈረሰ፥ ደም አፍሳሽ ሆኗልና በቤቱ ዘር ደስ አያሰኘውም። ¹⁷በፍርድም ጊዜ አይጸናም፤ ለክፉ አድራጊዎችም ክፉን በሚከፍልበት ጊዜ ክፋትን ለሚሠሩ የሥራቸውን ፍሬ ይከፍላቸዋል። ¹⁸በጎ ለሚያደርጉ ግን በጎውን ይከፍላቸውና ሰው በእጁ ይጠብቃቸው ዘንድ ከእግዚአብሔር ታዘዘ። ¹⁹እርሱም ትእዛዙን ይጠብቅ ዘንድ ታዘዘ፤ ፈቃዱንም ያደርግ፥ የፈጠረውንም እግዚአብሔርን ያመሰግን ዘንድ፥ በፍጥረቱ ሁሉ ላይ አገልጋይ ነውና፥ ከሥጋዊ ፍጥረት ሁሉ ከሰው ብቻ በቀር የፈጣሪውን ትእዛዝ የተላለፈ የለም። ²⁰ሁሉም ያውቁታል፤ እግዚአብሔርም በየሥርዐታቸው የሚኖሩትን ሁሉ እንዳዘዛቸው በትእዛዙና በሕጉ ይጠበቃሉ። ²¹ሰው ግን በአራዊትና በእንስሳ፥ በአዕዋፍም፥ በፍጥረቱም ሁሉ በአነገሠው በእግዚአብሔር ላይ ይደፋፈራል። ²²በባሕር ያለውን፥ በየብስ ያለውንም ሁሉ ቢሆን የፈጠረውን ፍጥረት ሁሉ እግዚአብሔር ለአባታችን ለአዳም ሰጠው፤ የወደደውን ያደርግ ዘንድ፥ በምድርም እንደ እህል ይበላቸው ዘንድ፥ ይገዛቸውና ያሠራቸውም ዘንድ፥ አራዊትም ቢሆኑ፥ እንስሳትም ቢሆኑ ለሰው ይታዘዙ ዘንድ እግዚአብሔር ሰጣቸው፤ የነገሡ ሰዎችም ክብርን ለሰጣቸው ለእግዚአብሔር ይታዘዙ ዘንድ፥ ያደሉለትና ይታዘዙለት ዘንድ በፍጥረቱ ሁሉ ላይ ሾማቸው። ²³ከሕጉ ቢወጡ ግን እርሱ ከሰጣቸው ሀብት ይለያቸዋል፤ ሰማይንና ምድርን የሚገዛ ነውና ፈቃዱን ለሚያደርግ ይሰጠዋል። ²⁴የወደደውን ይሾመዋል፤ የወደደውንም ይሽረዋል፤ ይገድላል፤ ያድናልም፤ ይገርፋል፤ ይቅርም ይላል። ²⁵እንደ እርሱ ያለ ሌላ የለም፤ ለፈጠረው ፍጥረት ሁሉ እርሱ ጌታ ነውና የሚነቅፈው የለም፤ በላይ በሰማይ፥ በታችም በምድር ከእርሱ በቀር ሌላ አምላክ የለም። ²⁶ይሾማል፤ ይሽራልም፤ ይገድላል፤ ያድናልም፤ ይገርፋል፤ ይቅር ይላልም፤ ያደኸያል፤ ያበለጽጋልም። ²⁷የሚለምኑትን ልመናቸውን ይቀበላል፤ በንጹሕ ልቡና ፈቃዱን የሚያደርጉትንም እርሱ ጸሎታቸውን ይሰማቸዋል፤ በለመኑትም ሁሉ ፈቃዳቸውን ያደርግላቸዋል። ²⁸ታላቁንና ታናሹንም እንዲታዘዙላቸው ያደርጋል፤ በተራሮችና በኮረብቶች፥ በዋሻዎችና በጫካዎች፥ በምድር ጕድጓድም፥ በባሕርና በየብስም ውስጥ ያለው ሁሉ የእነርሱ ነው። ²⁹የአምላካቸውንም ፈቃድ ለሚያደርጉ፥ ሁሉ የእነርሱ ነው፤ ከበረከቱም አያሳጣቸውም፤ የምስጋናቸውንም ዋጋ ይሰጣቸዋል። ³⁰በሰማይም ለአባቶቻቸው ለአብርሃምና ለይስሐቅ፥ ለያዕቆብም፥ ከሕጉና ከትእዛዙ ላልወጡ ለዳዊትና ለሕዝቅያስ፥ ለሳሙኤልም ያዘጋጀውን ክብር ይሰጣቸዋል፤ ³¹ከጥንት ጀምሮ ላገለገሉት ለአባቶቻቸው ለአብርሃምና ለይስሐቅ ለያዕቆብም የማለላቸውን ርስት ይሰጣቸው ዘንድ፥ በመንግሥቱም ደስ ይላቸው ዘንድ።

መጽሐፈ መቃብያን ቀዳማዊ 21