1 Maccabees Chapter 12 - መጽሐፈ መቃብያን ቀዳማዊ | EOTC Bible

¹የኢየሩሳሌም ልጅ! በነቢዩ የተጻፈው ውርደትሽ ይህ ነው፤ የኢየሩሳሌም ልጅ! ሥራሽና በደልሽ እንደ ሰዶምና ገሞራ ሰዎች ሥራና በደል ነውና። ²ውርደትሽም እንደ ገሞራና እንደ ሰዶም ነው፤ የወይናቸው ቦታ በዝሙትና በትዕቢት ተተከለ። ³ከዝሙትና ትዕቢት፥ ከዐመፅና በደል፥ ከቅሚያና ደም ከማፍሰስ፥ የፈጣሪያቸው የእግዚአብሔርንም ስም ከመርሳት በቀር የትሕትናና የምሕረት ዝናም አልዘነመላቸውም። ⁴ከክፉ ሥራቸውና ከጣዖታቸው በቀር ፈጣሪያቸውን እግዚአብሔርንም አላወቁትም፤ በእጃቸውም ሥራ ደስ ይላቸዋል፤ ከከብትና ከወንድ ጋር ይሰስናሉ። ⁵እንዳያዩ ዐይኖቻቸው ታውረዋልና፥ እንዳይሰሙም የእግዚአብሔርን ፈቃዱንና የሚወደውን እንዳያደርጉ ጆሯቸው ደንቁሯልና፥ በሥራቸው እግዚአብሔርን አያውቁትም፤ እነርሱ የሰዶም የወይን ቦታ ናቸው። ወገናቸው የጣፈጠ ፍሬን የማያፈሩ የገሞራ ወይን ሐረግም ናቸው። ⁶ከተተከለበት ቀን ጀምሮ በርግማን ተተክሎአልና፥ አበቃቀሉም በጥፋት ዘመን ሆኗልና ወይናቸውን በጨመቁት ጊዜ የሚገድል መርዝ ይሆናል። ⁷የወይናቸው ተክል የሲዖልን ውኃ ጠጥቶአልና፥ ሐረጋቸውም በሐሩር ነፋስ ጸንቶአልና ሁልጊዜ ለወይናቸው ሐረግ መልካምነት የለውም። ⁸አፍርቶም በተጨመቀ ጊዜ ለመቅሠፍትና ለጥፋት ሆነ፥ የጠጡትንም ሰዎች ልቡናቸውን ያጸናዋል፤ የሚያጸይፉና ከእግዚአብሔር የሚርቁ ያደርጋቸዋል። ⁹በክፉ ሥራውም ይኖራሉና የዲያብሎስ ማደሪያ ያደርጋቸዋል፤ የሰዶም ሐረግም መብላት ትጀምራለች፤ ወደ ተራራዎቹም፥ ወደ ዛፎቹም ትወጣለች። ¹⁰በዙሪያዋ ያሉ የሚያመልኩትን ጣዖቱንም ትጋርደዋለች፤ ክፉና በጎን ለማያውቁ አጋንንትም ሴቶች ልጆችዋንና ወንዶች ልጆችዋን ትሠዋለች። ¹¹ንጹሕ ደምንም ያፈስሳሉ፤ ከሰዶም ወይን ዘለዓለም ፍልቅ አድርገው ለጣዖቱ ያፈስሳሉ። ¹²ኢሎፍላውያን የሚያመልኩትን ዳጎንንም አክብራ ታመልካለች። ¹³ትሠዋላቸው ዘንድ፥ ፈቃዳቸውንም ታደርግ ዘንድ፥ ከሕፃንነቷ ጀምሮ እስከ ወጣትነቷ ድረስ፥ ዳግመኛም እስከ እርጅናዋ ወራትና እስከ ዕለተ ሞቷ ድረስ ሁልጊዜ የሚመግባትና የሚንከባከባት ፈጣሪዋ እግዚአብሔርንም እንዳታውቅ አጋንንት በአስተማሩአት መጠጣቸውና ስንፍናቸው ደስ ይላት ዘንድ ከመንጋዎችዋ የሰቡትን ትሠዋለታለች። ¹⁴ዳግመኛም በትንሣኤ ጊዜ እበቀላታለሁ፤ ወደ ሕጌ አልተመለሰችምና፥ በትእዛዜም ጸንታ አልኖረችምና ጊዜዋ እስከ ዘለዓለም ድረስ ይሆናል። ¹⁵አምላኮችዋ በእውነት ፈጣሪዎች ከሆኑ በቍጣዬ በተቈጣኋት ጊዜ፥ ከእርስዋም ጋር የሚሰስኑ ወዳጆችዋን በአራቅሁ ጊዜ ተነሥተው ወደ ገሃነም ሮጠው ያድኑአት። ¹⁶በቤቴና በንዋየ ቅድሳቴ ላይ ስድብንና ውርደትን እንደ አደረገች ሁሉ በሁሉ ዘንድ ጐስቋላ አደረግኋት። ¹⁷እነሆ ይህች የእግዚአብሔር ወገን ናት፤ የእስራኤል ፈጣሪ የእግዚአብሔር ቤት ናት፤ የልዑልም የስሙ ማደሪያ ናት፤ ከተለዩ የተለየች የገናናው ንጉሥም ከተማ ኢየሩሳሌም ሲሏት በእርሷ የተጠራ ስሜን አሳዘነች። ¹⁸እርሷ ባርያዬ እንደ ሆነች፥ እኔም ጌታዋ እንደ ሆንሁ በእኔ ትመካለች፤ እንደ ወንጀለኛ ትጠቃቀስብኛለች እንጂ ጌታዋ እንደ መሆኔ የምትፈራኝ፥ ፈቃዴንም የምታደርግ አይደለችም። ¹⁹ከእኔ ያርቋት ዘንድ ለማሳት መሰናክል ሆኑባት እንጂ ለማይመግቧትና ለማያሳድጓት፥ ለማያለብሷትም ለሌሎች አማልክት ትገዛለች። ²⁰መሥዋዕት ትሠዋላቸዋለች፤ መሥዋዕታቸውንም ትበላለች፤ የመጠጡንም ቍርባን ታፈስላቸዋለች፤ የመጠጡንም ቍርባን ትጠጣለች፤ ዕጣን ታጥንላቸዋለች፤ የዕጣኑንም መዓዛ ታሸትላቸዋለች፤ ያዝዟታል፤ እርሷም ትታዘዝላቸዋለች። ²¹ዳግመኛም ወንዶች ልጆችዋንና ሴቶች ልጆችዋን ትሠዋላቸዋለች፤ ስለ ፍቅራቸውም ዕልል ትላለችና በእጅዋ ሥራና በከንፈርዋ ንግግር ደስ ይላታል። ²²በፍርድ ቀን ለእርሷ ወዮላት፤ ለምትወዳቸውና ለምታቅፋቸው አማልክቶችዋ ወዮላቸው፤ ከእነርሱ ጋር ትሉ ወዳማያንቀላፋበት፥ እሳቱም ወደማይጠፋበት የታች ታች ወደ ሆነው ሲዖል ትወርዳለች። ²³የፈጠርሁሽን እኔን ትተሽ ሌሎች አማልክትን አምልከሻልና ጐስቋላ የኢየሩሳሌም ልጅ ወዮልሽ። ²⁴እኔም እንደ ሥራሽ ፍዳውን አመጣብሻለሁ፤ አሳዝነሽኛልና፥ ቃሌንም ቸል ብለሽዋልና፥ ሥራሽንም አላሣመርሽምና እንደ ተግዳሮትሽ እበቀልሻለሁ። ²⁵አንቺ ቃሌን አሳዝነሽዋልና ትእዛዜን ትጠብቂ ዘንድ፥ እኔም ከአንቺ ጋራ እኖር ዘንድ፥ ከሚጣሉሽም ሁሉ አድንሽ ዘንድ፥ አንቺም ያዘዝሁሽን ትእዛዜንና ሥርዐቴን ትጠብቂ ዘንድ፥ ከኔ ጋራ በተማማልሽበት ቃል ኪዳኔ አልጸናሽምና እኔ ቸል እልሻለሁ፤ ፈጥኜም አላድንሽም። ²⁶ይህንም ሁሉ አልጠበቅሽም፤ እኔም ቸል አልሁሽ፤ በፍርድ ጊዜም እበቀልሻለሁ፤ እኔ የፈጠርሁሽ አይደለምን? ቃሌንና ትእዛዜንም አልጠበቅሽም፤ የእኔም ወገን ትሆኚ ዘንድ አከበርሁሽ። ²⁷ሰዶምና ገሞራ እንደ ተለዩ አንቺም ከእኔ ተለየሽ። ²⁸እኔ በቍጣዬ አጠፋኋቸው፤ እኔ ካጠፋኋቸው ከሰዶምና ከገሞራ ወገን ነሽና፥ ወደ ጐልማሳ ሚስት በመሔድ፥ ከሴቶች ጋር እንደ መድረስ ከእንስሳና ከወንድ ጋራ ያለ ሕግ በመሰሰን፥ የፈጠርኋቸው እኔን አሳዝነውኛልና፥ በደስታቸው እንዳይኖሩ ስም አጠራራቸውን ከምድር አጠፋሁ። ²⁹ከታናናሾቻቸው ጀምሮ እስከ ታላላቆቻቸው ድረስ በፊታቸው እግዚአብሔርን መፍራት የለም፤ በክፉ ሥራ ሁሉ ይረዱታል እንጂ እርሷን መሥራት ይተዉ ዘንድ አንዱ ሌላውን አይቈጣውም፤ ሥራቸው ክፉ ነውና ዐመፅንና በደልን የጠገቡ ናቸው። ³⁰ክፉ ሥራ ሁሉ ቅሚያና ትዕቢት፥ ስስትም በአሳባቸው የተዘጋጀ ነው። ³¹ስለዚህም እግዚአብሔር ቸል አላቸው፤ ከተሞቻቸውንም ገለበጣቸው፤ እስከ መሠረታቸው ድረስ በእሳት ያቃጠላቸውም አሉ፤ እስከ ዘለዓለም ድረስ ፈጽመው ጠፉ እንጂ ከእነርሱ አንድ ስንኳ አልቀረም። ³²በኀጢአት ታስረዋልና የዘለዓለም ፍርድ እስከሚሰጥባት እስከ ታላቋ የፍርድ ቀን ድረስ ይቈያሉ፤ በክፉ ሥራቸውም አሳዝነውኛልና አልምራቸውም፤ ይቅርም አልላቸውም። ³³እኔም ቸል አልኋቸው፤ እንደዚሁም አንቺ ጐስቋላ የኢየሩሳሌም ልጅ፥ በፍርድ ቀን እንደ እነርሱ ትታሰሪያለሽ፤ ሥራሽ ሁሉ ቅሚያና ኀጢአት፥ ዝሙትና ስስት፥ ሐሰት መናገርም፥ እኔም የማልወደው የስሕተትና የድጥ መንገድ ስለ ሆነ ተቈጥቼ በያዝሁሽ ጊዜ ምክንያት አታገኝምና። ³⁴እኔ ለክብር አድርጌሽ ነበር፤ አንቺ ግን ራስሽን ለውርደት አደረግሽ፤ እኔ ለእኔ ብዬሽ ነበር፤ አንቺ ግን ለሌላ ሆንሽ። ³⁵እኔ ለቅድስና አጭችሽ ነበር፤ አንቺ ግን ለዲያብሎስ ሆንሽ፤ እኔም እንደ ሥራሽ ክፋት እበቀልሻለሁ። ³⁶ቃሌን ሁሉ ስላልሰማሽ፥ በወደድሁሽም ጊዜ ያዘዝሁሽን ትእዛዝ ስላልጠበቅሽ የፈጠርሁሽ እግዚአብሔር እኔ ነኝና ክፉ በቀልን አበዛብሻለሁ፤ እንደ አንቺ ባሉ በኃጥኣንም ሁሉ ላይ እቈጣለሁ፤ እንደ ክፋታቸውም በፍርድ ቀን እከፍላቸዋለሁ። ³⁷ቃሌንም አልጠበቅሽምና፥ ፍርዴንም ቸል ብለሻልና አንቺንም ከእነርሱ ጋር እቀጣሻለሁ። ³⁸በልቡናችሁ እግዚአብሔርን መፍራት የሌላችሁ፥ ሰዶምና ገሞራ፥ ወዮላችሁ። ³⁹በእሳተ ገሃነም ካንቺ ጋራ በአንድነት የሚፈረድባት እኅትሽ የኢየሩሳሌም ልጅ እንደዚሁ ወዮላት! ለዘለዓለሙ መውጫ ወደሌለበት ወደ ተዘጋጀው ወደ ገሃነም በአንድነት ትወርዳላችሁና ያንቺን ሥራ የሠሩ ሁሉ ወዮላቸው። ⁴⁰ቃሌንና ትእዛዜን አልጠበቃችሁምና ቃሌንና ትእዛዜን ያልጠበቃችሁ አንቺና እርሷ በፍርድ ቀን በአንድነት ወደ ሲዖል ትወርዳላችሁ። ⁴¹ቃሌንና ትእዛዜን የጠበቁ ጻድቃን ግን ኃጥኣን ያደለቡትን ይበላሉ፤ ክፉዎች ሰዎች የማረኩትንም ምርኮ እግዚአብሔር እንደ አዘዘ ደጋጎች ይካፈላሉ፤ ጻድቃንና ደጋጎችም ደስ ይላቸዋል። ሐሤትንም ያደርጋሉ። ⁴²በደለኞችና ኃጥኣን ግን ያለቅሳሉ፤ ከትእዛዜ ወጥተው ስለ በደሉት በደላቸው ሁሉ ያዝናሉ። ⁴³ቃሌን የሚጠብቅ፥ በትእዛዜም የሚሔድ በረከቴን የሚያገኝ፥ በእኔ ዘንድም የሚከብር እርሱ ነው። ⁴⁴ቃሌን የሚጠብቅ፥ ትእዛዜንም የሚያደርግ የምድርን በረከት ይበላል፤ ደጋጎችና ቅኖች ነገሥታት ወደሚገቡበትም ገብቶ ይኖራል።

መጽሐፈ መቃብያን ቀዳማዊ 12