Jubilees Chapter 34 - መጽሐፈ ኩፋሌ | EOTC Bible

¹አንተም የእስራኤልን ልጆች በዘመናቸው፥ በየዓመቱ ሁሉ በዓመት አንድ ቀን በጊዜው ፋሲካን ያደርጉ ዘንድ እዘዛቸው። ²የሚወደደው መታሰቢያ ከእግዚአብሔር ፊት ይመጣል። በሁሉ እንደ ታዘዘ በጊዜው በዓልን ባደረጉ ጊዜ በዚያ ዘመን ፈጽሞ ለማጥፋት መቅሠፍት አይመጣባቸውም። ³ከእንግዲህም ወዲህ መበላቱ ከእግዚአብሔር ቤተ መቅደስ ውጭ አይሁን፥ ነገር ግን በእግዚአብሔር ቤተ መቅደስ ትይዩና በእስራኤል ወገኖች ሁሉ ፊት በጊዜው ያድርጉት። የመጣዉ ሰው ሁሉ ከሃያ ዐመት ጀምሮ ከዚያም በላይ ያለ በአምላካችሁ ቤተ መቅደስ በእግዚአብሔር ፊት በዕለቱ ይብላው፥ በእግዚአብሔር ቤተ መቅደስ ይበሉት ዘንድ እንደዚህ ተጽፎአልና፥ ተሠርቶአልምና፤ ⁴የእስራኤል ልጆች ይዘዋት ወደሚኖሩ ወደ ከነዓን ከገቡ በኋላ፥ እግዚአብሔር የሚመሰገንበት ቤተ መቅደስ በኢየሩሳሌም እስኪሠራ ድረስ ሠራዊቶቻቸው ከያዙአቸው ሀገሮች በአንዱ ቦታ በምድር መካከል የእግዚአብሔርን ድንኳን ይተክላሉ። ⁵መጥተውም በእግዚአብሔር ድንኳን መካከል የፋሲካን በዓል የሚያደርጉ ይሁኑ። በዓመት በዓመትም በእግዚአብሔር ፊት ይረዱት። ⁶በወረሱአት ሀገር ላይ በእግዚአብሔር ስም ቤተ መቅደስ በተሠራባት ቀን ወደዚያ ሄደው ፀሐይ ሲገባ ከቀኑ በሦስተኛው ክፍል በማታ ጊዜ የፋሲካውን በግ ይረዱ፤ ደሙን በመሠዊያው ዙሪያ ይርጩት፤ ስቡንም በመሠዊያው ላይ ባለ በእሳቱ ላይ ያኑሩት። ሥጋውንም በእግዚአብሔር ፊት በቤተ መቅደስ ዐደባባይ በእሳት ጠብሰው ይብሉት። ⁷በእግዚአብሔር ድንኳን ነው እንጂ፥ ያም ባይሆን ስሙ በሚጠራበት በቤቱ ፊት ነው እንጂ በከተማቸውና በአውራጃቸው ሁሉ ፋሲካን ማድረግ አይችሉም፤ እግዚአብሔርንም ከመከተል ወጥተው አይሳቱ። ⁸አንተም ሙሴ፥ ዓመቱን በዓመት፥ ቀኑንም በቀን ታደርገው ዘንድ እንደ ታዘዘልህ የፋሲካውን ሥርዐት ይጠብቁ ዘንድ፥ በዐሉን ሊያደርጉ ሰባት ቀን ቂጣ ይበሉ ዘንድ፥ ከግብፅ በወጣችሁ ጊዜ ባሕሩን ተሻግራችሁ ወደ ሱር ምድረ በዳ እስክትደርሱ ድረስ ይህችን በዓል በመቸኮል አድርጋችኋታልና በባሕርም ዳርቻ ላይ ፈጽማችኋታልና መሥዋዕት በሚሠዋባቸው በእነዚህ በሰባቱ ቀኖች በአምላካችሁ መሠዊያ ላይ ዕለት ዕለት ቍርባኑን ወደ እግዚአብሔር ያቀርቡ ዘንድ የእስራኤልን ልጆች እዘዛቸው። ⁹ከዚህም ሥርዐት በኋላ በሱባዔ የሚቈጠረውን ቀን በሲና ምድረ በዳ ነገርሁህ። ይህችውም ምድረ በዳ በሲናና በኤሎም መካከል ያለች ናት። የምድር ሰንበታትንም በደብረ ሲና ነገርሁህ። በዓመቶች ሱባዔ ውስጥ በኢዮቤልዩ የሚቈጠሩ ዓመቶችንም ነገርሁህ። ዓመቱን ግን ወደምትይዙአት ምድር እስክትገቡ ድረስ አልነገርንህም። በእርስዋም ላይ በመኖራቸው ምድር ዕረፍትን ታድርጋለች። የኢዮቤልዩንም ዓመት ያውቃሉ። ¹⁰ስለዚህ ነገር በዓመቶች የሚቈጠረውን ሱባዔ ሠራሁልህ። አዳም ከተፈጠረ ጀምሮ እስከዚህች ቀን ድረስ ያለው ዘመን አርባ ዘጠኝ ኢዮቤልዮታትና አንድ ሱባዔ ከሁለት ዓመት ነው። በምዕራብ በኩል ዮርዳኖስን ተሻግረው ወደ ምድረ ርስት ማዶ እስኪገቡ ድረስ የእግዚአብሔርን ትእዛዝ ለማወቅ ገና አርባ ዘመን ቀርቶአል። እስራኤል ከዝሙት፥ ከበደል፥ ከርኵሰት፥ ከመተዳደፍ፥ ከኀጢአት፥ ከስሕተትም ሁሉ እስኪነጻ ድረስ ብዙ ኢዮቤልዮታት ያልፋሉ። ¹¹በምድርዋም ሁሉ ተዘልሎ ይኖራል፤ ከእንግዲህም ለእርሱ ማንም ባላጋራ አይኖርም። ምንም ክፉ ነገር አይኖርም። ምድርም ከዚያች ቀን ጀምሮ እስከ ዘመኑ ፍጻሜ ድረስ ትነጻለች። ¹²የሰንበታትንም ሥርዐት እነሆ፥ ጻፍሁልህ። የሥርዐቱንም ፍርድ ጻፍሁልህ። በስድስቱም ቀኖች ሥራህን ሥራ። ¹³ሰባተኛዪቱ ቀን ግን አምላካችሁ እግዚአብሔር ከመፍጠር ያረፈባት ቀን ናትና፥ እናንተና ልጆቻችሁ፥ ወንዶች ባሪያዎቻችሁና ሴቶች ባሪያዎቻችሁም፥ ከብቶቻችሁም ሁሉ፥ በአንተ ዘንድ የሚኖር መጻተኛም ቢሆን ሥራውን ሁሉ አትሥሩባት። በዚያችም ቀን ማንኛውንም ሥራ የሚሠራባት ሰው ይሙት። ይህችን ቀን የሚሽራት ሰው ሁሉ፥ ከሚስቱም ጋር የሚገናኝባት ሰው፥ ገሥግሦም ሄዶ ሥራን ይሠራ ዘንድ ነገርን የሚነጋገርባት ሰው ሞትን ይሙት። ¹⁴የሚሸጥባትና የሚለውጥባትም ሰው ሁሉ፥ ውኃንም የሚቀዳ ሰው፥ በስድስተኛዪቱም ቀን ያላዘጋጀ፥ ከድንኳኑ፥ ወይም ከቤቱ ያወጣ ዘንድ የሚሸከመውን ሸክም ሁሉ የሚያነሣ ሰው ይሙት። ¹⁵በስድስተኛው ቀን ያዘጋጃችሁትን በልታችሁና ጠጥታችሁ ለማክበር በዚህች ቀን ከሥራው ሁሉ ዕረፉባት እንጂ፥ በዓል የምታደርጉባትን ቀን የሰጣችሁን አምላካችሁን እግዚአብሔርንም አመስግኑባት እንጂ በሰንበት ቀን ምንም ሥራን አትሥሩ። የተቀደሰች ቀን ናት፤ በዘመናቸው በቀኑ ሁሉ ይህች ቀን ለእስራኤል ሁሉ የተቀደሰች የመንግሥት ቀን ናት። ¹⁶በዚህች የበዓል ቀን በልተውና ጠጥተው ሊጠግቡባት፥ በእግዚአብሔር ፊት በየቀኑና በየሱባዔው ዕጣንን ከማጠን፥ ቍርባንንም ከማቅረብ፥ መሥዋዕትንም ከመሠዋት በቀር ሰው ከሚሠራው ሥራ ሁሉ ሊያርፍባት እግዚአብሔር ለእስራኤል የሰጠው ታላቅ ክብር ናትና አክብሩአት። ¹⁷በአምላካችሁ በእግዚአብሔር ቤተ መቅደስ በሰንበት ቀን ይህ ሥራ ብቻ ይሠራ። የእስራኤልን ልጆች ኀጢአት ያስተሰርዩ ዘንድ፥ በእግዚአብሔር ፊት ተቀባይነት ያለው መባን ለመታሰቢያ ዕለት ዕለት ያቅርቡ። እንደ ታዘዘም ለዘለዓለሙ ዕለት ዕለት ይቀበላቸዋል። ¹⁸ሥራን የሚሠራባት ሰው ሁሉ፥ መንገድንም የሚሄድባት ሰው፥ የሚያርስባትና የሚቈፍርባትም ሰው፥ በቤቱም ቢሆን፥ በሁሉም ቦታ ቢሆን፥ እሳት የሚያነድባት ሰው፥ በእንስሳውም ላይ የሚጭን ሰው፥ በመርከብም በባሕር የሚሄድ ሰው፥ ¹⁹ማናቸውንም መትቶ የሚገድል ሰው ሁሉ፥ እንስሳንና ወፍንም የሚያርድባት ሰው፥ አውሬም ቢሆን ወፍም ቢሆን ዓሣም ቢሆን የሚያጠምድ ሰው፥ የሚጾምባትም ሰው፥ በሰንበት ቀን ጠብ የሚያነሣ፥ ከዚህ ሥርዐትም ወጥቶ ይህን ሁሉ ሥራ በሰንበት ቀን የሚሠራ ሰው ይሙት። ²⁰የበዓሉንና የቀኑን ሥርዐት በየዘመኑ አከፋፈል እጽፍልህ ዘንድ በእጄ በሰጠኝ በሰማይ ጽላት እንደ ተጻፈ፥ ምድር ዕረፍት እንድታደርግ እንደ ታዘዘ፥ የእስራኤል ልጆች በዓልን የሚያደርጉ ይሆኑ ዘንድ ሥራን የሚሠራባት ሰው ሁሉ ይሙት።

መጽሐፈ ኩፋሌ 34