መጽሐፈ አስቴር 1

የመርዶክዮስ ሕልም

¹ታላቁ ንጉሥ አርጤክስስ በነገሠ በሁለተኛው ዓመት በኒሳን መባቻ የኢያዕር የሰሜኢ የቂስ ልጅ ከብንያም የተወለደ አይሁዳዊው መርዶክዮስ ሕልም አየ፤ ²እርሱም በሱሳ ከተማ ይኖር ነበር፤ ታላቅ ሰውም ነበረ፤ በንጉሡ ቤት አደባባይም ያገለግል ነበር። ³እርሱም የባቢሎን ንጉሥ ናቡከደነፆር ከይሁዳው ንጉሥ ከኢኮንያን ጋር ከኢየሩሳሌም ከማረካቸው ምርኮኞች አንዱ ነበረ። ⁴ሕልሙም ይህ ነበረ፦ እነሆ ቃል፥ የምድር መነዋወጥና ሁከት፥ ነጐድጓድም ተሰማ፤ በምድርም ላይ ችኮላ ሆነ። ⁵እነሆም ለጠብ የተዘጋጁ ሁለት ታላላቅ ዘንዶዎች መጡ፤ ቃላቸውም ታላቅ ሆነ። ⁶በቃላቸውም አሕዛብ ሁሉ ጻድቃን ሕዝብን ይዋጉ ዘንድ ለሰልፍ ተዘጋጁ። ⁷እነሆም ጭጋግና ጨለማ፥ ኀዘንና መከራ፥ ጭንቅና ታላቅ ሁከት በምድር ላይ የሚደረግበት ቀን ሆነ፤ ⁸ጻድቃን ሕዝቦች ሁሉ ክፋታቸውን እየፈሩ ታወኩ። ለጥፋትም ተዘጋጁ፤ ⁹ወደ እግዚአብሔርም ጮኹ፤ ከጩኸታቸውም የተነሣ ከትንሽ ምንጭ ብዙ ውኃ እንዳለበት እንደ ትልቅ ወንዝ ሆነ፤ ¹⁰ብርሃንና ፀሐይ ወጣ፤ የተዋረዱም ሰዎች ከፍ ከፍ አሉ፤ የከበሩ ሰዎችንም አጠፉአቸው። ¹¹መርዶክዮስም ይህን ሕልም እግዚአብሔርም ያደርግ ዘንድ የቈረጠውን ነገር አይቶ ነቃ፤ ይህንም ነገር በልቡ ጠበቀ፤ እስከ ሌሊትም ድረስ በሁሉም አቅጣጫ ያስተውለው ዘንድ ወደደ።

መርዶክዮስ የንጉሡን ሕይወት እንደ አዳነ

¹²መርዶክዮስም ሀገሩንና አደባባይዋን ከሚጠብቁ ከንጉሡ ባለሟሎች ከሁለቱ ከታራና ከገበታ ጋር በአደባባይ ይቀመጥ ነበረ። ¹³ያሰቡት ምክራቸውንም ሰማ፤ ንጉሡን አርጤክስስን ይገድሉት ዘንድ ሴራን እንደ አዘጋጁ ዐወቀ፤ ተረዳም፤ ለንጉሡም የእነርሱን ነገር ነገረው። ¹⁴ንጉሡም ሁለቱን ባለሟሎቹን መረመራቸው፤ ኀጢአታቸውንም አምነው በሞት ተቀጡ። ¹⁵ንጉሡም ይህን ነገር በታሪክ ማስታወሻው ጻፈው፤ መርዶክዮስም ይህን ነገር ጻፈው። ¹⁶ንጉሡም መርዶክዮስን በንጉሡ ግቢ ያገለግል ዘንድ አዘዘው፤ ስለዚህም ነገር ድርጎ አወጣለት። ¹⁷የአግ ወገን የሆነ የሐመዳቱ ልጅ ሐማ ግን የከበረ ነበረ፤ በንጉሡም ፊት ይቆም ነበር፤ የንጉሡ ባለሟሎች የሆኑ እነዚያ ሰዎች ስለ ሞቱ በወገኖቹና በመርዶክዮስ ክፉ ነገርን ያደርግ ዘንድ ይፈልግ ነበር።

ንግሥት አስጢን የንጉሡን ትእዛዝ እንደ ተላለፈች

¹⁸በአርጤክስስም ዘመን እንዲህ ሆነ፤ ይህም አርጤክስስ ከሕንድ ጀምሮ እስከ ኢትዮጵያ ድረስ በመቶ ሃያ ሰባት ሀገሮች ነገሠ። ¹⁹በዚያም ዘመን ንጉሥ አርጤክስስ በሱሳ ከተማ በመንግሥቱ ዙፋን ላይ ተቀምጦ ሳለ፥ ²⁰በነገሠ በሦስተኛው ዓመት ለባለሟሎቹና ለአገልጋዮቹ፥ ለቀሩትም ለፋርስና ለሜዶን ታላላቆች ሁሉ፥ ለሠራዊቱም አለቆች ሁሉ ግብዣ አደረገ። ²¹ከዚህም በኋላ የከበረውን የመንግሥቱን ሀብት፥ የታላቁንም የግርማዊነቱን ክብር መቶ ሰማንያ ቀን ያህል አሳያቸው። ²²የሰርጉም ቀኖች በተፈጸሙ ጊዜ ንጉሡ በከተማ ለተገኙት ሕዝብ ሁሉ በንጉሡ ቤት አደባባይ ስድስት ቀን ግብዣ አደረገ። ²³በቤቱም ነጭ፥ አረንጓዴና ሰማያዊ መጋረጃዎች ከጥሩ በፍታና ከሐምራዊ ግምጃ በተሠራ ገመድ በብር ቀለበትና በዕብነ በረድ አዕማድ ላይ ተዘርግተው ነበር፤ አልጋዎቹም ከወርቅና ከብር ተሠርተው በቀይና በነጭ፥ በብጫና በጥቁር ዕብነ በረድ ወለል ላይ ነበሩ። ²⁴የወርቅና የብር ጽዋዎች ነበሩ፤ ዋጋው ሠላሳ ሺህ የሚሆን የከበረ የዕንቍ ጽዋዕም ነበረ። ወይኑም ብዙ ነበር፤ ንጉሡም የሚጠጣው ወይን መዓዛ እጅግ መልካም ነበር። ²⁵በዓሉ ንጉሡ እንደ ፈቀደ ነበረ እንጂ እንደ ቀደመው ወግ አልነበረም። የእርሱንና የሰዎችን ፈቃድ ያደርጉ ዘንድ የቤቱን አዛዦች አዝዞ ነበርና። ²⁶ንግሥቲቱም አስጢን በንጉሡ በአርጤክስስ ቤተ መንግሥት ለሴቶች ግብዣ አደረገች። ²⁷በሰባተኛውም ቀን ንጉሡ አርጤክስስ ደስ ባለው ጊዜ በፊቱ የሚያገለግሉትን ሰባቱን ጃንደረቦች ሐማን፥ ባዛንን፥ ታራን፥ ባራዚንን፥ ዘቶልታን፥ አባታዛን፥ ታራባን ²⁸ንግሥቲቱ አስጢን መልከ መልካም ነበረችና ውበቷ ለአሕዛብ አለቆች እንዲታይ ዘውድ ጭነው ወደ ንጉሡ ፊት ያመጡአትና ያነግሡአት ዘንድ አዘዛቸው። ²⁹ነገር ግን ንግሥቲቱ አስጢን በጃንደረቦች እጅ በላከው በንጉሡ ትእዛዝ ትመጣ ዘንድ እንቢ አለች፤ ንጉሡም አዝኖ እጅግ ተቈጣ። ³⁰እርሱም አስጢን ያለችውን ለወዳጆቹ ነገራቸው፤ እንግዲህ እንደ ሕጉና እንደ ፍርዱም አድርጉ አላቸው፤ ³¹በመንግሥቱም ቀዳሚዎች ሆነው የሚቀመጡ የንጉሡ ባለሟሎች የፋርስና የሜዶን መሳፍንት አርቄስዮስ፥ ሰርስትዮስ፥ ሚሊሲአር ወደ እርሱ መጡ፤ ³²ንጉሡም በጃንደረቦች እጅ ያዘዘውን ስላላደረገች በንግሥቲቱ በአስጢን ላይ ምን እንደሚያደርጉ እንደ ሕጉ ነገሩት። ³³ሜኬዎስም ለንጉሡና ለአለቆቹ እንዲህ አላቸው፥ “ንግሥት አስጢን ንጉሡን ብቻ የበደለች አይደለችም፤ አለቆቹንና የንጉሡን ሹሞች ሁሉ እንጂ።” ³⁴እርሱም ንጉሡን እንቢ እንዳለችው የንግሥቲቱን ቃል ነገራቸው። “ዛሬ ይህች ንጉሡን አርጤክስስን እንሲ ካለችው፦ ³⁵ዛሬም የፋርስና የሜዶን መኳንንት ሚስቶች ንግሥቲቱ ለንጉሡ የመለሰችለትን ሰምተው እነርሱም ደፍረው ባሎቻቸውን ይንቃሉ። ³⁶ንጉሡም ቢፈቅድ ንግሥቲቱ አስጢን ወደ ንጉሡ ወደ አርጤክስስ ፊት ከእንግዲህ ወዲያ እንዳትገባ የንጉሡ ትእዛዝ ከእርሱ ይውጣ፤ እንዳይለወጥም በፋርስና በሜዶን ሕግ ይጻፍ፤ ንጉሡም ንግሥትነቷን ከእርስዋ ለተሻለችው ለሌላዪቱ ሴት ይስጥ። ³⁷ንጉሡም የሠራው ሕግ በመንግሥቱ ሁሉ በሰፊው ይነገር፤ ያንጊዜ ሴቶች ሁሉ ባሎቻቸውን ባለጸጋም ቢሆን ድሃም ቢሆን ያከብራሉ።” ³⁸ይህም ምክር ንጉሡንና አዛውንቶቹን ደስ አሰኛቸው፤ ንጉሡም እንደ ሜኬዎስ ቃል አደረገ። ³⁹ንጉሡም ሚስቶች ባሎቻቸውን ይፈሩአቸው ዘንድ በመንግሥቱ ወደ አሉ ሀገሮች ሁሉ በዚሁ ቃል ላከ።