Enoch Chapter 1 - መጽሐፈ ሄኖክ | EOTC Bible

¹ክፉዎችንና ዝንጉዎችን ለማራቅ፥ በመከራ ቀን ይገኙ ዘንድ ያላቸውን ምርጦችንና ጻድቃንን እንደ ባረከ የሚናገረው የሄኖክ ቃለ በረከት፤ ²ሄኖክም ተናገረ፤ እንዲህም አለ- “ከእግዚአብሔር ዘንድ የሆነ ጻድቅ ሰው ዐይኖቹ ተገልጠው ሳለ- መላእክት ያሳዩኝን በሰማያት ያለ ቅዱስ ራእይ ያይ ነበር። ከእነርሱም ሁሉን ሰማሁ። እኔም የማየውን ዐወቅሁ። ³ለዚህም ትውልድ አይደለም። ነገር ግን ለሚመጣው ለሩቁ ትውልድ ነው። ⁴ስለ ተመረጡት ተናገርሁ። ስለ እነርሱም በምሳሌ እንዲህ አልሁ። ቅዱሱና ገናናው የዓለም ፈጣሪ ከማደሪያው ይወጣል። ⁵ከዚያም በደብረ ሲና ተራራ ላይ ይቆማል፤ በሰፈሩ ይታያል፤ በኀይሉም ጽናት ከሰማይ ይገለጣል፤ ሁሉም ይፈራል፤ መላእክትም ይነዋወጣሉ፤ እስከ ምድር ዳርቻም ድረስ ፍርሀትና ታላቅ እንቅጥቅጥ ይይዛቸዋል። ረጃጅሞች ተራሮች ይደነግጣሉ። ረጃጅም ኮረብታዎችም ዝቅ ይላሉ። ከትኩሳቱም የተነሣ እንደ አደሮ ማር ይቀልጣሉ። ምድርም ትሰጥማለች። በምድርም ላይ ያለ ሁሉ ይጠፋል። ⁶ፍርድ በሁሉም ላይ በጻድቃንም ሁሉ ላይ ይሆናል። ⁷ለጻድቃን ግን ሰላምን ያደርግላቸዋል፤ የተመረጡትንም ይጠብቃቸዋል፤ ለእነርሱም ይቅርታ ይደረግላቸዋል። ⁸ሁሉም የአምላክ ገንዘቦች ይሆናሉ። ይከናወናሉ፤ ይባረካሉ፤ የአምላክም ብርሃን ይበራላቸዋል። ⁹ፍርድን ያደርግላቸው ዘንድ እነሆ፥ ከብዙ ቅዱሳን ጋር ይመጣል፤ ዝንጉዎችንም ያጠፋቸዋል፤ ኃጥኣንና ዝንጉዎች ፈጽመው በእርሱ ላይ ስለ አደረጉት ሁሉ ሥጋዊዉን ሁሉ ይወቅሳል። ¹⁰በሰማይ የሚኖሩ ብርሃናት መንገዳቸውን እንዴት እንደማይለውጡ፥ ሁሉም እንደሚወጣና እንደሚገባ፥ ሁሉም በየዘመኑ እንደ ተሠራ፥ ከሥርዐታቸውም እንደማይተላለፉ በሰማይ ያለውን ሥራ ሁሉ ተረዱ። ¹¹ምድርን እይዋት፥ ከመጀመሪያው ጀምሮ እስከ መጨረሻው ድረስ በእርሷ ላይ ከሚሠራው ሥራ የተነሣ የሚታይ የአምላክ ሥራው ሁሉ እንደማይለወጥ አስተውሉ። ¹²በጋውን፥ ክረምቱንም እዩት፤ ምድር ሁሉ ውኃን እንደ ተመላች፥ ደመናውና ጤዛውም፥ ዝናቡም በእርሷ ላይ እንደሚያርፉባት ተመልከቱ። ¹³ከአረጀው ጀምሮ አዲሱ እስከሚመጣ ድረስ ለሁለትና ለሦስት ዓመት ከሚቈዩትና ከማይረግፉት ከዐሥራ አራት ዛፎች በቀር ዛፎች ሁሉ ደርቀው፥ ቅጠሎቻቸውም ሁሉ ረግፈው እንዴት እንደሚታዩ ተረዱ፤ እዩም። ¹⁴ዳግመኛም ፀሐይ በምድር ላይ አስቀድሞ እንደሚጸና የበጋውን ወራት ተረዱ። ¹⁵እናንተ ግን ስለ ፀሐይ ዋዕይ ጥላና መጠለያ ትፈልጋላችሁ፤ ምድርም ከሐሩሩ ትኩሳት የተነሣ ትቃጠላለች። ¹⁶እናንተ ግን ስለ ዋዕይዋ ምድርንና ድንጋይዋን መርገጥ አትችሉም። ¹⁷ዛፎች በቅጠል ልምላሜ እንዴት እንደሚሸፈኑና እንደሚያፈሩ ተረዱ። ¹⁸ስለ ሁሉም አስተውሉ፤ ለዘለዓለሙ ሕያው ሆኖ የሚኖር እርሱ እነዚህን ሁሉ እንደ ፈጠረላችሁም ዕወቁ። ¹⁹በየዓመቱ የሚሆነው ሥራውም በፊቱ ነው፥ ፍጥረቱም ሁሉ ለእርሱ ይገዛሉ። አይለወጡምም፥ ነገር ግን አምላክ እንደ ሠራው ሁሉ እንዲህ ይደረጋል። ²⁰ባሕሮችና ፈሳሾችም አንድ ሆነው ሥራቸውን እንዴት እንደሚፈጽሙ እዩ። ²¹እናንተ ግን አልታገሣችሁም፤ የጌታንም ትእዛዝ አላደረጋችሁም። ነገር ግን ተላልፋችሁ በረከሰች አፋችሁ በገናናነቱ ላይ ታላላቅና የጸኑ ቃላትን አማችሁት። እናንተ ልበ ድንጋዮች ሰላም አትሆንላችሁም። ²²ስለዚህም እናንተ ዘመናችሁን ትረግማላችሁ፤ የሕይወት ዘመናችሁንም ታጣላችሁ፤ የዘለዓለም መርገምም ይበዛል። ይቅርታም አይሆንላችሁም። ²³በዚያም ወራት በዘለዓለም ርግማን ለጻድቃን ሁሉ ሰላማችሁን ²⁴ለተመረጡ ግን ብርሃን፥ ፍቅር፥ ²⁵እነርሱም ምድርን ይወርሷታል። ለእናንተ ለዝንጉዎች ግን ርግማን ይሆንባችኋል። ²⁶ያንጊዜም ለተመረጡት ሰዎች ጥበብ ይሰጣቸዋል፤ እነርሱም ሁሉ በሕይወት ይኖራሉ፤ በመዘንጋትም ቢሆን ወይም በትዕቢት ዳግመኛ አይበድሉም፤ ነገር ግን ጥበብ ያላቸው ለእርሱ ይገዛሉ። ²⁷ዳግመኛም አይበድሉም፤ በሕይወት ዘመናቸውም ሁሉ አይፈረድባቸውም። የሕይወት ዘመናቸውን ቍጥር ይፈጽማሉ እንጂ በመቅሠፍትና በመዓት አይሞቱም። ²⁸ሕይወታቸውም በሰላም ይበዛል። የደስታቸው ዓመታትም በሐሤትና በዘለዓለም ሰላም፥ በሕይወታቸው ዘመን ሁሉ ይበዛሉ።

መጽሐፈ ሄኖክ 1